حادثة حدثت

**طالعتنا جريدة الاهرام


** فى يوم 6 -6 -2008


**بأن قوات المباحث والامن العام تكثف جهودها لكشف غموض جريمة تعرض لها العاملون بشركة


الاسماعيلية للدواجن حيث فوجئوا بمجموعة من الرجال,اكثر من 40 باب..............



**باب؟



**قصدى ضلفة ........

**ضلفة؟

**قصدى راجل عريض المنكعين اشلولخ.....

**مالهم ال40 اشلولخ ده؟

**كانوالابسين.......

ياسلام بقى هم كانوا لابسين؟

وبعدين!! خلينا نحكى ولا بلاش؟

لأ احكى ,ها وبعدين؟

زى ما قلت لك كانوا لابسين كأنهم البدو وملثمين ومتسلحين كمان بالشوم والعصى والبنادق الالية وكانوا

راكبين7عربيات اشى جيب واشى نص نقل وراحوا جايين على المقر الرئيسى للشركة بالاسماعيلية (مش

فى حتة مقطوعة ولا الصحرا ولا حاجة ,لأ الاسماعيلية العمرانة المأهولة بالسكان وهاتك ياضرب فى

مخاليق الله وابعد ياجدع انت هو من هنا واللى حيقرب حأطخه رصاصة فى المليان

المهم ياحبة قلبى العمال لا ليهم فى الطور ولا الطحين وما نابهم الا التعاوير والاصابات والتكاسير لعظامهم

(12 عامل اصيبوا باصابات مختلفة بين طلقات ناريه وجروح قطعية )

**والا نفد خد لكش على الماشى

**لكش؟

**لكش هذا يعنى خبطه اوالاصدق بس انا مكسوفة اقول كف ينزل على اللى يطوله من التانى وشه قفاه اى حته والسلام.

**وبعدين حصل ايه؟


**بس ومن ضمن البجاحة كمان كانوا جابين معاهم لوادر سحبوا العربيات بتاعة الشركة والاتوبيسات


وخدوها معاهم وهم ماشين وايه سابوها فى الصحرا(ناس مؤذية لا خدوها!!! ولا سابوها لاصحابها)

**وبعدين ؟

**طبعآ بسرعة قوات الامن وصلت للمكان


**بعد اللى ضرب ما ضرب واللى انضرب انضرب ايه الفايدة, والحرامية اكيد هربوا


***هششششششش انت عايزه تودينا فى داهية


**هاه وبعدين؟

طبعآ المصابين نقلوهم لمستشف فايد العام والمستشفى الجامعى بتاعة جامعة قناة السويس( للى عايز

يزورهم ياعنى)


احنا فى ايه ولا ايه؟حصل ايه ؟عرفوا حاجة عن اللى عمل العملة السوده دى؟ ولا لسه؟

المباحث بتجرى تحرياتها والنيابة بتعمل تحقيقاتها.

واللى ظهر لحد دلوقتى بيقولك ايه؟

**ان مفروض فيه مستثمر جديد وخللى بالك من كلمة مستثمر دى


**ماله المستثمر ياستى؟


**ده ياسيدتى دفع 426مليون جنيه للشركة وكمان تعهد بدفع حبة فكة كده اد 85مليون جنيه ضرايب


**ليه ياستى؟



**للحصول على كامل ارض الشركة

**اللى هى اد ايه؟

**امسكى اعصابك كويس=3800فدان

**وبعدين ؟

**والعاملين فى الشركة دى حوالى 1587عامل وموظف حيطلعوا معاش مبكر طبعآ!!!المستثمرهو اللى



برضه حيدفع لهم اظن!!

**وحصل ايه بعد كده ؟

طبعآ عمك المستثمر زعلان وغضبان وحلف براس جده الكبير صلطح فلطح باشا انهم ما كانوش (مين

هم...لو حدق تفهم انت!!!! )انهم لو ما كنوش يشوفوا صرفة فى الاجرام ده حيفسخ العقد والبيعة تقف

والمستخبى يبان ساعتها والعمولات والهديا تنكشف

**ياخبر !!

طبعآ رأس المال جبان وماتسألينيش يعنى ايه انا سمعتها كده.

احكى وبعدين؟

مصدر فى الشركه (شرولوك هولمز ياعنى)قالك ان الشركةمن سنة 1981 عمر ما حاجة زى دى حصلت

لها.اشمعنى بقىلما المستثمر جه؟ افهم انت بقى؟

المهم للحين ما ظهر اى حاجه توضح او تبين ولو علامة عن الجانى او الجناة

ومازال البحث مستمرآ عن الجناة

وشكلها حيلبسها كتكوت ابن ام فرخة


وبكرة افكركم وتقولولى.

**************************************************************
انا جبت التاريخ بتاع الجرنال لاجل ما يجى (صديق ) ويسأل

امتى اتنشر الكلام ده ؟ انا بقرأ الجرنال كويس مافى حاجة من دى!!!

اهوه التاريخ بتاع الجرنال مكتوب اهوه واللى عايز يتأكد يروح يتفضل

يشوف الجرنااااااااااااااااااااااااااااااااااااااااااااااااااااااااااااااااااااااااااال ويدور