.......ســــرد واقعى وحى ....(تدوينة قديمة)

يوم شم النسيم الماضى

جلسن اربعتهن على الأريكة امامى
واحترت لهن وبهن
اولهن أو أصغرهن
تلك التى تزوجت منذ ثلاثة أشهر تقريبا
الحبيبة الى قلبى
من اعتبر نفسى أم ثانية لها حقا
وايضا بمجالستها لى اوقاتا كثيرة

اخدت كثيرا من طباعى وصفاتى
الحسنه والسيئة!أعترف فالكمال لله واحده
كانت تجلس وتحكى عن متاعبها الجديدة فى دنيا الزواج
الطبخ والتنضيف والمسح والكنس
(والشربات ياطنط اللى مجنينانى)
فى كل ركن( شراب مرمى)
وكأنهم( باكتريا تتوالد بالانقسام اللا زوجى)
ولكنك تلمح سيمات السعادة فى محياها وفى صوتها
وان حاولت اظهار عكس ذلك
وكيف لا
فستكون اما بعد سبعة اشهر من الان
نعم نعم نعم هى حامل
ثانتيهما

اختها التى تكبرها ب4 سنوات
وبالرغم من ان هناك من طرق بابنا طلبآ ليدها
ولكن لم يقسم الله لها ذلك بعد
أصبحت هذه الايام أسيرة فكرة مجنونة
أن هناك من عمل لها عملا بوقف الزواج
وتريد ان تذهب لمن(يفك)لها هذا العمل
واذا ما حاولت مناقشتها فى ذلك
فإما أنك عدو لها لا تريد سعادتها
وإما انها لا تسمع كلمة واحدة مما تقول انت
ثالثتهُن
زوجة اخيهن الاكبر
والذى سافر للعمل بالخارج
وتركها هى وطفلتيها وجنينآ اذن

الله

ان تولد بعد سفر ابيها
منذ اول لحظه ذهبنا لخطبتها وكأنها منا وعلينا
ياسبحان الله ياسبحان الله ياسبحان الله
متطابقة معنا ومع زوجها فى الطباع
وكأن المثل (فولة واتقسمت نصين)
صحيح مائة بالمائة وانه(المثل) عُمل لهم
كانت تجلس تحايل المحمول
من اجل ان تلتقط الشبكة
نمرة زوجها لتتصل به وتسمع صوته
وتسمعها تقول بصوت خفيض
يارب

الشبكه تلقط

يارب

يارب
هم متزوجون منذ سته اعوام ولكن حبهما ولهفتهما لم تتغير
والذى (الحب)نشأ بعد الزواج

(لم يكن هناك سابق معرفة بينهما ابدآ)
رابعتهم واكبرهن
ابنة خالتهن
الجميلة بشدة وللغاية

(جمالها كان نقمة عليها وليس نعمة لها وساقول كيف)
خريجة المدارس الفرنساوى
والحاصلة على ليسانيس الأداب فى اللغة الفرنسية
والمديرة المهمة أوى فى احدى الشركات الخاصة
متزوجة منذ سبعة اعوام ولها ولد وبنت
تقدم لها كثيرون ممن يطلبون الحلال
ولكن جمالها

وأرتباط امها الشديد بها

وبعض الطلبات المغالى
فيها حال دون ذلك
ثم وفى لحظة مفاجئة
تحدت الجميع واصرت على الزواج ممن تصورت انها

احبته
بقلبها دون الرجوع لعقلها
وها هى ذا تدفع الثمن

لاتفاهم

لا اتفاق

لا وجود لحياةاسرية

بالمعنى المتعارف عليه
وقد حضرت لنا يوم شم النسيم

تريد ان
تتطلق!!!
نعم تريد الطلاق
وفى يوم شم النسيم

تسألها:
طب والعيال؟

وووووووو
لا ترد عليك وتبكى
هذا ما تفعله
البكاء!!
فسبحان الله خالق الاكوان
ومقسم العطايا والحظوظ
من يغير ولا يتغير
بيده ملكوت كل شىء
وهو بكل شىء عليم
-------------
اقول هذا للبنات
اصبرن
أطعن أهلِكُن
اسمعن كلامهم
واستخرن الله
ما استطاعتم الى ذلك سبيلا.
ملحوظة:نجحنا فى الصلح بين الرابعة وزوجها
واعدنها الى بيتها
at 05:39 م Posted by norahaty
Labels: بعض الحكى الواقعى


10 قول وما تجرحش:
حمامة يقول...
اول رد :)واول زيارة برضه :)

جميلة الحكايات اوى ربنا يكرمهم يارب ويديم عليهم السعادة ويرزقهم بالخير وفعلاً طاعة الاهل واجبه واهم حاجة يكونوا راضيين عن الزواج حتى لما تتجوزى الواحد مش بيعيش لوحدهوزى ما بيقولوا ف المثل اللى ملوش خير ف اهله ملوش خير ف حدربنا يهدي كل البنات ويرزقهم بالازواج الصالحين :)
05 مايو, 2008 08:09 م
norahaty يقول...
السلام عليكم ورحمة الله وبركاته

حمامة**

الله يكرمك ويخليك الزواج ليس زوج وزوجةفقط

بل عائلتين وتاريخين وعوايد وطباع مختلفه

ونجاح الشركة بيعتمد

على قد ايه كل واحد مستعد انه يتنازل

اويتحمل لاجل الاخر.

دومتى بخير وزيارة غير مقطوعةان شاء الله

norahaty
05 مايو, 2008 08:40 م
Hina wi Hinak يقول...
السلام عليكم ورحمة الله تعالى وبركاته

...الزواج،...

الحلم لمن لم ينله

والمشكلة لمن ناله...

الموضوع ده ينكتب فيه موش بس سطور ولا حتى صفحات،

لأ، ده ينكتب فيه مجلدات...

بريد الجمعة طرح الموضوع ده للمناقشة من مدة ليست بالبعيدة، على أمل الوصول لحل يسعد كل القلوب الحزينة...زمان كانوا بيشبهوا الجواز بالبطيخ... فكل طرف ممكن يطلع حلو وممكن يطلع وحش... المشكلة إن البطيخة حلوة أو وحشة، يا إما هتتاكل يا إما هاتترمي... وده مينفعش نطبقه على الجواز، رغم إن أكل البطيخ قد إقترب من رميه...مشكلتنا إن البطيخ كثيرا ما يباع في غير سوقه...

ونادرا ما بيكون المشتري بيفهم في البطيخ!
05 مايو, 2008 10:08 م
الفارس الملثم يقول...
فعلا يا دكتوره الواحد مش ممكن يعرف الخير فين والشر فين ,واحنا لا نملك غير الدعاء لله لارشادنا الي الخير وابعادنا عن ما فيه شقاء لنا ,.بس المهم انهم اتصالحوا في الاخر ورجعوا لبيتهم ..

تحياتي وتقديريمحمد
06 مايو, 2008 04:59 ص
norahaty يقول...
السلام عليكم ورحمة الله وبركاته

hina wi hinak

(مشكلتنا إن البطيخ كثيرا ما يباع في غير سوقه... ونادرا ما بيكون المشتري بيفهم في البطيخ!)

انا ارد بعد الكلام الممتاز اقول ايه؟بس هو فى الاول والاخر قسمة ونصيب ومهما حتعمل من دراسات وابحاث هو برضة بختك يا أبو بخيت!!!!شوفت ازاى؟؟؟

وتقبل تحياتى

norahaty
06 مايو, 2008 06:01 ص
norahaty يقول...
السلام عليكم ورحمة الله وبركاته

محمد**الفارس الملثم

العلم عند الله فى كل شىءبس احنا بنأخذ بالاسباب واقولك الحمد لله انهم اتصلحوا بس والله يامحمد قلبى غير مطمئن بالمرة عليها وعلى حياتهما معآوربنا يستر

وتقبل تحياتىnorahaty

06 مايو, 2008 06:07 ص
Hina wi Hinak يقول...
السلام عليكم ورحمة الله تعالى وبركاته...أنا ممكن أوافقك على إن الجواز قسمة ونصيب، بس بالنسبة لحكاية بختك يا بو بخيت، أنا هختلف معاكي فيها وبشدة...من أول أسباب فشل عدد هائل من زيجات اليومين دول هو إن معظمنا بيؤمن بحكاية بختك يا بو بخيت دي... وللأسف موش هقدر ألوم كل من يؤمن بهذا المنطق لأنهم جميعا ضحايا لحاجات كتير أوي منها العادات والتقاليد، والمجتمع وظروفه الصعبة التي جعلت من الرجل الذي بإستطاعته أن يؤسس بيتا للزوجية، كنزا لا يمكن بل لا يجب لأي أب أن يرفض أن يزوجه بنته بغض النظر عن توافر أي شروط أخرى...هقول إيه ولا إيه... الموضوع ده زي ما سبق وقلت بيحتاج لمجلدات...
06 مايو, 2008 04:11 م
norahaty يقول...
السلام عليكم ورحمة الله وبركاته

Hina wi Hinak.

صدقنى ما ممكن تعرف انسان الا لما تعاشره يوم واثنين وشهر ويمكن بعد كده يظهر لك طباع وسمات مجهولة فيه ما ممكن تصدق انها له.زى ما قلت النتيجة بتعتمد على هل ما هو مجهول لك اليوم وسيظهر غدآ :هل تستطيع العيش به ومعه ام لا.how much this unknown things are compatible with life.
06 مايو, 2008 05:08 م
Hina wi Hinak يقول...
السلام عليكم ورحمة الله تعالى وبركاته...كلامك صحيح، وأنا معاكي فيه...، بس أرجع وأقول إن العيب فينا إحنا... بنوجد المشكلة علشان نعاني منها بعد كده...إسمحي لي أن أوضح...مسألة تعرف فلان؟ أيوه... عاشرته؟ لأ... تبقى ما تعرفوش... دي بترجع لأسباب إحنا اللي عملناها... أوضح أكتر...أي إتنين بيتعارفوا وبعدين بيتجوزوا... إما بيكونوا بيحبوا بعض وعاشوا قصة حب... وإما بيكون جوازهم ده لحل عقدة إن العمر جرى ولازم نلحق أو نركب القطر...في الحالة الأولى، غالبا وأكرر، غالبا، ما ينطبق عليهما ما ذكرتي سيادتك عن مسألة العشرة وإكتشاف كل الجوانب السيئة التي كانت غير واضحة أو مخفية قبل الزواج... وده بيرجع للمثل اللي بيقول "مراية الحب عامية"... أما الحالة الثانية، فطبعا جواز لمجرد الجواز أو للهرب من نظرة متخلفة من مجتمع ينظر لمن قارب على أو تخطى الثلاثين دون زواج على أنه وباءا أو عارا، طبعا ده غالبا ما سيكون مصيره الفشل...ديننا قد أعطانا أجمل وأثمن نصيحة عند الزواج، فهناك حديثا للرسول الكريم صلوات الله عليه وسلامه، ينصحنا فيه بإختيار شريك أو شريكة الحياة بناءا على الدين، إذ أن ما عدا الدين، هو زائل... لكن وللأسف الشديد إحنا بعدنا أوي أوي
06 مايو, 2008 08:03 م
norahaty يقول...
السلام عليكم ورحمة الله وبركاته

Hina wi Hinak

طيب انا ارد اقول ايه بعد الكلام الممتاز ده؟؟زى ما قلت قبل كده المسأله بتعتمد على المحصلة : ممكن العيش بها ام لا؟ومش حكايه مراية الحب عمياء ولا لابسه نضارة لأ!!!العشرة اولا واخيرآتظهر ما يخفيه الانسان تحت طبقات من التكلف والتظاهروكلام الرسول عليه افضل الصلاة والسلام صحيح مائة بالمائةولكن تطبيقنا له هو الخطأمجرد ان (الواحد او الواحدة )ارتدت منهن خمارآ او اسدلآ وكذلك الفتى اطلق لحيته او ارتدى جلبابآ..يبقى خلاص كفايه عليه كده وهو ده المؤمن الصح.

وتشكرات افندم على خروجكم من الصمت الرهيب والذى لذت به منذ ما يقرب من الشهر اعتقد؟؟

وتحياتى.
06 مايو, 2008 09:50 م

******

**********

************

*********

*******

تدوينة قديمة إعيد نشرها اليوم

وفيها اقول ان

بنت أختى الاولى

انجبت بنت:ملك

والثانية

لم ينعم عليها بعد بالزواج

والثالثة هى تلك التى سافر زوجها للعمل بالسعودية

والرابعة مازالت فى شد وجذب مع زوجها وحياتها

ربنا يهدينا ويهديهم جميعاً