بداية التعارف

والله دى اول مره اكتب حاجه زى كده.
بس بقى اهى طلعت فى دماغى ونفذتها.
قصدى على حكايه المدونه دى.طيب يعنى ايه لزماتها؟اهو بقى طقت فى دماغى والسلام.
احكى من الاول:اناجديده فى عالم النت وحتى الكومبيوتر اصلا ما كنت اعرف عنه حاجه لحد السنه اللى فاتت فى ديسمبر 2006,يومها سهرت ليله راس السنه مع بنت اختى وكانت فاتحه برنامج google earthوعينكم ما تشوف الا النور وقعت فى حب الانترنت والحمد لله كنت لسه قابضه الجمعيه اللى كنت عاملاها فى الشغل ويلا نزلت جبت الكومبيوتر على طول واشتركت فى النت على طول.
ومن ساعتها ما بعملش غير الاكل والشرب و مرواح الشغل(علشان اجيب فلوس والا حاصرف على الكومبوتر اللى كل شويه يبوظ منين؟)برضه للحق انا بصلى الحمد لله الفرض بفرضه حاضر والحمد لله.
اقول كفايه كده النهارده احسن الساعه بقت عشره ونص مساء والواحد لازم يقوم ينام احسن.