انا عندى زكااااااااااان

ايوة عندى زكاااااان وبرد ورشح

وسخونية ومفشفشنى على الاخر
قافل مناخيرى ومخلينى بتكلم واتنفس من بقى
ومخلى كلامى نصه طاير
معلش
وسامعاك ياللى بتقول
انفلونزا الفراخ والقطط والحاجات التانية
لا ياسيدى اللى عندى

انفلونزا العيانين
يوم الاربع والخميس اللى فاتوا كل اللى
شفتهم كان عندهم رشح
وكل واحد يشرح ويتكلم عن اللى بيشتكى منه
واخر واحد ربنا يسهله بقى
كح الكحة المعتبره فى وشى
حتقولولى ما لبستى الماسك ليه؟
حأقولكم
بكرهه
كرهـ العمى كده
جربت فعلاً ما قدرتش
خنق روحى والدنيا مش ناقصة خنقة
انا بعمل بالنصيحة اللى بقولها للعيانين
(الراحة والسوائل الدافية )
وبس
يعنى لا مضادات حيوية ولا غيره
طالما انه رشح وزكام وكان الله بالسر عليم
خدت اجازة

(اعتيادى واخدين بالكم مش مرضى)

امبارح والنهاردة
يمكن كمان اللى مزود التعب انى صايمة الستة البيض
يعنى مفيش سوائل ولا ليمونادة(بكرهها عمى هى كمان)
لكن هانت النهاردة السادس والاخير بأذن الله
وربنا يتقبل منا جميعا

اشوفكم على خير

وياريت اللى يجيب هدايا

يسيبها على الباب علشان مش حاقدر افتح

الله !

مش بقول تعبانة وملازمة الفراش !

متعكم الله بالصحة والعافية