ايه رأيكم نبعد شوية عن مشاكل بلدنا والعالم الثالث واللى عملو واللى سوا وكمان عن اهم حاجة السياسة اللى مرة وصفتها بانها لعبة جيدة الصنع وبسرعة رد على مدون صديق وقال :لأ بل لعبة(....)وبصراحة انا بحترم رأيه ولما عُمنا انور السادات الله يرحمه قالك لا دين فى السياسة ولا سياسة فى الدين تبقى فعلا هى لعبة(كذا وكذا)بالضبط(جايز حد يزعل من الكلام لكن فعلآ صعب تجمع بين الاثنين فى الوقت الراهن)
يلا نروح نتفرج على متحف اوبالصح على صورة مخصوص فى (متحف الفن الحديث) اللى فى الدقى .
لوحة كبيرة جداً مقاسها 3.50م× 198سم للفنان الكبير "محمود سعيد"، واللوحة من أشهر أعماله واسمها "المدينة" وأحياناً بيسموها "بنات بحري"، وهى من أشهر لوحات الفنان السكندري "محمود سعيد" اللي عاش من 1897 إلى عام 1964 وهو من جيل الرواد الأوائل، و كان مستشار محكمة ودرس الفن في مراسم الفنانين الأجانب اللي كانوا موجودين في الوقت ده في إسكندرية لأن ماكانش فيه مدارس لتعليم الرسم في مصر علشان زي ما أنت عارف إن أول مدرسة للفنون الجميلة في مصر كانت سنة 1908...
اللوحة دي اترسمت سنة 1937 وهي مرسومة بخامة الزيت على توال "قماش".. اللوحة دي فيها خدعة كبيرة جداً زي ما أنت شايف الجو كله، تحس إنه في إسكندرية...
أيوه طبعاً... بنات بحري.. والمراكب الشراعية والبحر...
لكن بص يا صديقي في عمق اللوحة...
أيوه دي قلعة قايتباي...
أنا فضلت سنين فاكرة كده... لحد ما أخذت بالي إن دي مش قلعة قايتباي... دي قلعة صلاح الدين في القلعة... لأن قلعة قايتباي مفيهاش جامع....
لكن "محمود سعيد" في اللوحة دي حب يجمع أبطال لوحاته في لوحة واحدة... بنات بحري... بيّاع العرقسوس... راكب الحمار مع ابنه... حاملة الجرة، والمقرئ جنب الجدار، والمراكبية، والملامح المعمارية لبيوت رشيد في الوقت ده، وهو رسم كل الخليط ده فيما يشبه "الكولاج" المحكم، بس هو راعى تكبير الشخوص الأمامية والتصغير التدريجي للعناصر في الخلف علشان يحسِّسنا بالعمق في اللوحة، وكأن كل الناس الموجودين في اللوحة كانوا مع بعض في نفس الوقت وده مش حقيقي...
لكن تجمُّع الشخوص في اللوحة دي بيعبّر بيها عن تجمع مصر الحقيقية متمثلة في ولاد البلد والعامة في الوقت ده... أما بناية وتكوين اللوحة بصريا فدي حاجة عبقرية تانية...
أنا قصدي ازاي أنت بتقدر تشوف لوحة زي دي وعينك بتقدر تتحرك عليها بشكل لا إرادي بالنسبة لك وتستمتع بيها...
ازاي...
فيه نقط في اللوحة بيسموها النقط الذهبية يعني أنسب مكان في اللوحة تقدر تحط فيه شخص وعينك تبقى مستريحة، ودي دايماً بتبقى في مساحة الثلث والثلثين، أو لما يبقى فيه تكوين هرمي مثلث، وده متوفر في اللوحة دي، هتلاقي الثلث على اليمين بيّاع العرقسوس والثلث على الشمال فيه الراجل على الحمار والثلث من فوق فيه بنات بحري والثلاثة عاملين التكوين الهرمي، ورادد على مثلث مقلوب في بنات بحري، أما توزيع الألوان فهسيبه لعينك... وضميرك.
*****&&&&******
منقول
بتصرف
يقول
