الثلاثاء، مايو 27، 2008

احنا فين بالضبط؟


سمعت انت عن المليون جنيه اللى اتسرقوا من البنك المركزى
انا بكلمك عن مليون ,مليييييييون ,يعنى مليييييييييون جنيه مصرى
ايوه ياأخى مليون جنيه مش محفظة واحد راكب اتوبيس زحمة واتعلقت منه المحفظة
لا دول بقولك مليون جنيه
ومن فين البنك المركزى
وايه فى عزالظهر
اقولك الحكاية من الاول
بقى شركة ياسيدى ....... بتاعته نقل الاموال واللى سياراتها المصفحة)
واخده نص الشارع العام بتاعنا وزحمه الدنيا على الاخر ومعلش ياجماعة اصلها بتنقل الفلوس من فرع البنك اللى امامنا لفروع اخرى ولازم يادوبك الفلوس تخرج من البنك للعربية على طول يادوبك عرض
الرصيف بس والا بعدين حد ابن حرام يخطفها ولا حاجة ولا الفلوس بعدين تاخد زكام مثلا, المهم
الشركة كانت حتنقل يوم2ديسمبر اللى فات مبلغ 130 مليون جنية(بس)فى كام شنطة كده ياسيدى
فى 104شنطة -استلمتها الشركة فعلامن البنك المركزى- الى البنك الاهلى يوم 30 ديسمبر اللى فات داخل الصالة الرئيسية للبنك .المهم الموظفين نقلوا 50 شنطة وال54 الشنطة الباقين سابوها فى المدخل وخلو بالكو من المدخل دى سابوا الشنط اللى فيها ملايين فى المدخل اللى احنا ما نسيب الجرنال القديم على المكتب والا حترجع ماتلاقيه انما دول ناس لارج أوبالاصح الفلوس مش فلوسهم
المهم يا سادة سابوا ال 54 شنطة فى السكة كده وعينوا عليها غفير الدرك المتستنيل على عينه وعنده حول وعمى حيثى ولا بيسمعش كمان سابوا الراجل هو والفلوس فى المدخل بتاع البنك (معلش انا بأعيد وأزيد فى الحتة دى لأنها وزى ما بيقولوا مربط الفرس )ومشيوا
البهوات خلصوا النقلة الاولانيه وجاين ينقلوا الشنط الباقيهاللى هى كام 54 شنطة (اسم الله عليك صاحى وواعى للحكايةويارب تكون كده فى الحاجةالمفيدة)
يعدوها ما يعدوها يلاقوها ناقصة شنطة ازاى؟ فين ؟مين؟وامتى؟ ما يعرفوش الفلوس راحت فين ابدآ لا حس ولا خبر ولا فيه صنف مخلوق يابيه قرب من هنا يابيه وده المستنيل الغفير بيقول.
المهم على طول الفريق البحثى برئاسة اللواء فلان والعميد علان والنقيب ترتان وهات يلله شريط المراقبة بتاع الكاميرات الخفية المسخبية(والبركة فى حلقات كولمبو وسى اس اى اللى علمتهم الحاجات دى)
المهم فى الشريط اللى ما يبقى باين فيه حاجة


شافوا آل ايه واحد سحنتة اجنبى جر كده كلام من غير لزمه مع الغفير ولا العسكرى الغلبان اللى واقف (تشترى كلب؟ )قصدى سأل نصرف الفيزا كارد ازاى طبعآ و بشهامه المصريين اللى بتنقط مع الغريب بس (احنا بنشجع السياحة)لكن معاك انت ياللى من بلدهم بالصر.... ولا بلاش عيب المهم سيدنا الشهم خد السايح من ايده وراح وداه يعرفه ازاى يصرف الفلوس فى الاثناء دى كان 4 من اعوان الحرامى الكبير كانوا لهفوا شنطة وجرى يافكيك على بره البنك ومنها على الشقة الله كانوا مأجرنها مفروشة


اخينا ده كان نصيبه كام من العمليه20 الف دولار .....بس !!!


المهم قعدوا فى الشقة وفرقوا الفلوس بينهم وسافروا على اسبانيا ومنها على بلدهم اللى هى البيرو


لما لقوا العملية سهلة اوى كده ولا السكينة فى الحلاوة السايحة


قالولك الله مانعمل لنا عمليه تانيه وفعلا جابوا بعضهم وجم لقدرهم ......ليه


اصل الباهوات والباكوات بتوعنا لما حللوا وبصوا ونظروا وبحلقوا فى الشرايط بتاعة الكاميرات المستخبيه لقوا 4 نفر وشوشهم عكرة والاجرام مرسوم عليها ولا بتوع العصابات فى افلام عمنا الكبير محمود المليجى,لقوهم متواجدين فى الصالة ساعة السريقة من غير لازمة فقاموا صوروا الصور بتاعتهم وعمموها على ا لمطارات والموانى (ليه ماتعرفش ما عمموش صور ....بقية الحرامين وقتالين القتلى اللى مشيوا من صالة كبار الزوار بالاحضان والتمنيات الطيبة بالنجاح)


بس اهو حظهم وحش وفعلا


المهم جت الاخباريه ان فيه 4 نفر لهم نفس الملامح بدؤوا فىالظهورفى الشوارع بتاعة نص البلد اللى كلها بنوك


ويوم من ذات الايام اشتبه حضرة البيه المباحث فى اتنين نزولوا من سيارة فى شارع عدلى بجانب بنك القاهرة


قام دخل عليهم جريوا منه بس على مين ده الظبوطه والاجر على الله مسك واحد فيهم وسحبه على القسم


الافندى المسحوب ما بيتكلمش عنجليزى لكن اسبانى ...دى ايه الحوسه دى؟ولا يهمك الاتصالات اشتغلت


استعانوا بوزارة الخارجيه اللى بعتت لهم مترجم ترجم اللى قاله الراجل عن طريقة سرقة المليون جنية وانهم


لقوا الحكايه سهله جم ودبرو لحادث مماثل لكن على مين مش كل مره تبقى العملية فى النملية!!!! ساعات بتبقى فى البوتاجاز!!!!!!!!


وسلملى على التروماى

هناك 14 تعليقًا:

غير معرف يقول...

السلام عليكم

انا اول واحد يعلق خير

يا بخت المليون جنية سافرت على بره

لقيت لها شغلانة بدل ما تتنطط من بنك

لبنك كدة من غير فايدة

وياريت يسرقوا بنى ادمين برضو ما

الناس كلها عاوزة تسافر لبره

المهم

انا فاكر ان الفيلم ده سمعته قبل كدة

هما بيعدوه علشان يقولوا لنا انهم

صاحيين للاموال العامة بتاعت الشعب

اللى مش ممكن تطلع بره مصر

تحياتى

عرفة فاروق السيوطى

غير معرف يقول...

السلام عليكم
طب القطه ذنبها آيه هوإحنا دايما نجي علي الغلبان
إلا قولي لي ياأختي ياحبيبتي هي المليون أبصر آيه دي فيها كام ربع جنيه
يارب مايتسرق لكي شنطه ولابوك علشان إحنا غلابه وطول الشهر من دمنا بنبوك ..هي الكاميرات دى بتصور الحراميه المستوردين بس يارب يخترعوا كاميرات للحراميه المحليييييين ....
وسلام كبير قوى للهليبه
لك تحياتي

Unknown يقول...

السلام عليكم ورحمة الله وبركاته
أ.عرفة فاروق السيوطى(الاديب العاشق)
اهلا بك
متهيأللى صعب انهم يسرقوا ناس لاننا مثبتين هنا (كان الانصح منهم عرفطفشنا ويقعد هو وحبايبه لوحدهم زى ما نفسهم وطبعآ انت عارف مين الانصح منهم هذا!!!؟؟؟
لك تحياتى وسلامى
وتمنياتى بدوام
المرور والمتابعة
وتسلم من الشر
كلللللللللللله

Unknown يقول...

السلام عليكم ورحمة الله وبركاته
أ.وفاء بركات
ذنب القطة انهاالحلقة الاضعف فى سلسلة الجماعة اللى مايغرفوش الرحمة .
وإذا كان عن عدد الاربع جنيهات فى الارنب=المليون اعتقد اددددددددددددددد
كددددددددددددددددددددددددددددددددده
وربنا يستر يااستاذه ما يخترعوا كاميرات تصور الناس اللى بيشربوا شاى ولا بيكلوا فول على الفطار لانهم حيعتبرهم ساعتها مرفهين ولازم يدفعوا ضريبة على الرفاهية اللى عايشين فيها
(انت فاكرة مسرحية وجهة نظر لمحمد صبحى لما قال... ولا اقولك دى حكاية طويلة احكيها لكى بعدين.)
وتقبلى تحياتى
ومليون شكر
للمرور
والتعليق

الفارس الملثم يقول...

هههههههههههه

كله كوم والحراميه اللي رجعوا تاني وتلاقيهم قبل ما يرجعوا سيحوا بره ان مفيش اسهل من تغفيل المصريين

, اصل احنا عندنا فلوس كتير فمش اندق علي كام مليون , ماهي مليارات اتسرسبت من البلد ,مجدش علي الملاليم دي ههههههههه

تحياتي وتقديري
محمد

Unknown يقول...

السلام عليكم ورحمة الله وبركاته
الفارس الملثم
ماهى دى ماتؤاخذنى (البجاحة )بعينها يامحمد!!!
عملوا العمله ومشيوا
ايه اللى رجعهم تانى؟
الا البجاحة والطمع
وتسلم يامحمد من كل شر
وتحياتى وتقديرى
ووووواحتراماتى

بنات صاحبة الجلالة يقول...

هههههههههههههههههههه

بجد بوست حلو اوي اوي هلكت ضحك والله العظيم الصورة كمان بتاعته القطة جميلة خالص صحيح مش كل مرة تسلم الجرة البحر يحب الزيادة جايين ياخدوا فلوس تاني هههههههههههه حاجة ببلاش كدا

البوليس اتطور عندنا بقي بيتفرج علي افلام اكشن كتير واعيين حطوا صورهم في المطارات مصر لسة بخير وفلوس البنك حلال ههههههههههههه مفيش والنبي شنطة كدا فيها بتاع 50جنية الاقيها انا وانتي يادكتورة ونقسمها بالنص هههههههههه

بجد الله ينور موضوع ررروعه تسلم الايادي ياجميل

تحياتي لكي ياماي فريند

بنات صاحبة الجلالة يقول...

نسيت اقول حاجة الضحك نساني احنا في مدونة اجمل دكتورة خلي بالك احسن تتسرق منك اي حاجة اقفلي باب المدونة قبل ماتمشي ههههههههه

تحياتي الغالية لك

غير معرف يقول...

أول مرة أسمع بالحكاية دي، بس برافو لبوليسنا!

Unknown يقول...

السلام عليكم ورحمة الله وبركاته
Hina wi Hinak
الجريمة وتفاصيلها نشرت بجريدة الأهرام
ليوم الاربعاء23/4/2008
وزى ما انت بتقول برافو لبوليسنا
بس عايزه اقولك ان جزء من نجاحه(البوليس )واقع على غباء اللصوص آل راجعين لنفس المكان و بنفس الاسلوب ونفس الافراد ونفس الوجوه!!!!!!
وتسلم للمرور والتعليق
وتقبل تحياتى

Unknown يقول...

السلام عليكم ورحمة الله وبركاته
بنات صاحبة الجلالة
شوفتوا ضحكوا عمل ايه؟خلانى ارد على hina wi hinak قبلكوا...لخبطنى يعنى !!!
المهم my very very dear friends
شوفتى الشطارة بتاعت السى اس اى المحلى بتاعنا كاميرات وافلام وتوزيع صور ولا عمنا الكبير كوجاك(تعرفوه ده؟ ولا انتم اصغر من كده)
بتدعىّ نلاقى شنطة فيها 50جنيه!انت ما سمعتى المثل اللى بيقولك فى جزء منه:وان سرقت اسرق جمل !!فياحبيبتى لما تتمنى خليكى لارج كده ...الملايين ادامك بتترمى فى الشنط البلاستكى وتتساب فى الممرات وانتى تقولى 50جنيه......زعلتنى منك!!!!
وكمان ان انا اقفل المدونة ,ما ينفعش والله اصلنا على النت وده مبتفقل ابدآ
يارب دايمآ مفتوح باللى فيه واللى عليه ومنورينه
سلامى وتحياتى لكم دائمآومتشكرة على دوام المرور والتعليقات اللطيفة.

Unknown يقول...

السلام عليكم ورحمة الله وبركاته
والحمد لله رب العالمين
طبعآ احنا اتسرقنا مرتين فى المواصلات :حتقوللى بس!!!
اصل انا ما ركبت مواصلات كتير فى حياتى
فى المدرسة كان الباص
وفى سنة 3 فى الكلية جبنا العربية
والشغل الان قريب من البيت
مليون حمد وشكر لك يارب
بس الاعجب من كده انا اتسرقت الشنطة منى من العربية وانا فيها والله
بس دى برضه حكاية كبييييرة ابقى اعملها بوستتتتتتتتتتتتتت لحاله.
وتشكرات مراتتتتتتتتتتتتت كتيرة لكم يا
my very dear friends
norahaty

بنات صاحبة الجلالة يقول...

انا بحلم علي ادي شنطة ب50جنية يدوب الملايين دي مش لينا ياقمر هنقسم بالنص هههههههههههههه

نزلي بوست عن سرقة شنطتك انا مستينه هههههههههه

تحياتي الغالية كمان مرة

Unknown يقول...

السلام عليكم ورحمة الله وبركاته
بنات صاحبة الجلالة
خمسين جنيه ايه دى اللى دوشنا بيها ياريمو بس؟يابيبى اسمعى كلامى خليكى لارج
شنطة بمليون لاما بلاش وخلينا فى حالنا!
وان شاء الله ابقى اعمل البوست بعدين.
وتسلملى ياحبيبتى

.