الأحد، أكتوبر 05، 2008

عيدنا كلنا


السلام عليكم ورحمة الله وبركاته
عيد سعيد وعمر مديد إن شاء الله تعالى
عارفة إن العيد خلص من يومين ثلاثة
بس انا قصدى على عيدنا كلنا
احنا المصريين
مسلمين ومسيحيين
عيد السادس من اكتوبر

ممكن شباب ما بعد اكتوبر يقولوا
ايه كلام الانشاء ده بس والله ماهو انشاء
حقيقى , إن انا لو نسيت كل حاجة لا انسى فرحتنا بنصر اكتوبر
لما إتذاع فى الراديو الخبر الساعة 2 وعشرة الضهر تقريبآ
الناس بقت ماشية فى الشارع تهنى بعضيها وتسلم على بعضيها

لكن كنا حاطين ايدينا على قلبنا يكون خبر (فشينك)زى اخبار عام 1967
ووصولنا الى حدود تل ابيب المزعوم حقيقى كانت هناك بعض(الهمهمات ) (والشائعات)ان الحرب
حتقوم وفى الغالب يوم 20 اكتوبرلكن الكل لما كان يسمع كده يقولك :يااااااااعم سيبك !!!!
احنا نحارب اسرائيل تانى ؟ازاى؟ وليه؟ وبأيه؟
لكن اهو حصل وربنا اراد لنا النصر سبحانه وتعالى
لاجل ما يفضل الامل فى النصر النهائى إن شاء الله
سنين وسنين فاتت على الحرب دى
لكن هناك اسماء ما تغيب
عن بالى او اسماء تيجى فى بالى
اول ما اقول 6 اكتوبر
البطل :عبد العاطى صائد الدبابات
الشهيد :ابراهيم الرفاعى
قائد المجموعة 39من قوات الصاعقة الشهيرة بأداء العمليات الانتحارية
أذكر عنه هذه القصة الخاصة
وكأنها نبوءة لحياة خاصة قادمة
وهى عن هاتف اتى امه بعد صلاة الفجر
وكانت تعانى فى الآم ماقبل المخاض فغفت قليلا

وإذا هناك من يقول لها :انهضى! انهضى!
لقد رزقك الله بأبراهيم
تنبهت الام لتجد طفلها
قد أتى!!!

(القصة سمعتها عن اخته واخيه
المرحوم الاستاذ سمير الرفاعى
واللذان كانا يعملان مع اختى
فى احدى المصالح الحكومية بالقاهرة)
تحية لابطالنا جميعاً
اللهم صلى على محمد وعلى آل محمد
كما صليت على إبراهيم وآل ابراهيم
وبارك على محمد وآل محمد
كما باركت على ابراهيم وآل ابراهيم
انك حميد مجيد
.
اللهم اعز الاسلام والمسلمين
واهزم الشرك والمشركين
اعداءك واعداء الدين
اللهم امين اللهم امين .......

* *** **** ******* **** *** *
أعرف كتير حيقولوا اللى استفادوا من الحرب دى
والنتايج بتاعتها مش هم اللى حاربوا وتعبوا
اعرف واصدق كلام ممكن يتقال عن الحكاية دى
قاله فيلم( سواق الاتوبيس)..........
لكن ده موضوع يطول الكلام فيه.....

هناك 36 تعليقًا:

عين فى الجنة يقول...

كل عام وانتى طيبة

Unknown يقول...

السلام عليكم ورحمة الله وبركاته
راجى
وكل عام وانت فى
اتم صحة واكمل عافية

غير معرف يقول...

شبعنا كلام عن 6 أكتوبر ده!!زهقنا بقى

هانى زينهم يقول...

والله يا دكتور بغض النظر عن مين اللى استفاد ومين اللى ما استفادش وعن جيل اكتوبر والجيل اللى بعده هى تقريبا الحاجة الوحيدة اللى اتعملت لها لازمة فى العصر الحديث . هى وبلن مجدى عبد الغنى فى هولندا طبعا !!
لا بجد هى مبعث فخر لاى مصرى وكل ما تيجى الذكرى دى الواحد يحس اد ايه الناس دى تعبت وسهرت وشالت مسئولية مش اى حد يقدر يشيلها . وطيروا طيارات الواحد بيخاف من منظرها على الارض واحنا اللى لو حد ضرب جنبنا بمبة بنركب الهوا !! ده الفرق بينهم وبينا عشان كدة باتغاظ اوى من اللى بيهاجم ويقلل من قيمتها .
تناول مختلف يا دكتور باهنيكى عليه .

تسنيم محمود حسين يقول...

السلام عليكم

كل عام وانت بخير
فعلا انا بقالى من زمان كل مايجى 6أكتوبر اسمع واقرأنفس الكلام بس فعلا هى دى الوقتى بقت النصر الحقيقى الوحيد فى بلدنا الغاليه

والسلام عليكم

لاجئ الى متى يقول...

كل سنة وحضراتكم طيبين

romansy يقول...

كل عيد نصر وانتى طيبه
ويارب ارحم جميع شهدائنا
اللى ضحوا من اجل الارض دى

kochia يقول...

فعلا هو عيد حقيقي
رغم ان ساعات بنحس بيه اوي وساعات بنحس بيه نصنص

blue-wave يقول...

هوا اكيد نصر
لكن ياترى نصر مين على مين؟
عموما ياريت كنا استفادنا منه بجد
لكن للأسف كالعادة ضيعنا كل اثارة
حتى فرحتنا بيه ضاعت

مش لاقية اسم يقول...

السلام عليكم
جزاك الله كل خير على التعليق عندى
بس اية المعلومات الجامدة دى
ماشية معاك يا سيدى
يارب نبقى فى انتصرات دايما كدة
كل سنة وانتى يالصحة والسلامة
اخت (مش لاقة اسم)

حسن حنفى يقول...

الف مبروووووووك

بس للاسف اضعناه من ايدينا وتحول الحال للنقيض تماما
:(
واصبحنا عبيدا لديهم

الفارس الملثم يقول...

طبعا يا دكتوره حرب اكتوبر مناسبه لازم نحتفل بيها , وهي تعتبر اكبر انتصار عسكري في تاريخ العرب المعاصر , اصل تاريخنا المعاصر بعيد عنك مليان هزائم ونكبات ممممممم, ربما هو انتصار عسكري لم يكتمل للنهاية نتيجة ما تسببته الثغره في خسائر قللت من حجم الانتصار

لكننا لكي ندرك قيمة الانتصار يجب ان نقارن حال مصر والمنطقه والعالم كله قبل حرب اكتوبر وبعده

تحياتي وتقديري

محمد

Mohamed Dawod يقول...

سلام عليكم
الواحد بصراحه كان نفسه يعيش فرحه زى دى فى اى وقت من حياته فرحة الاحساس بأى نصر.
فى رايى ان المظلومين فى الحرب دى هم الجنود والضباط من الرتب الصغيره اللى كانوا فيها. بعد الحرب على طول الدوله كرمت اغلب الجنود اللى شاركوا فى الحرب بأن كان ليهم فرصة التعيين فى اماكن حكوميه مميزه زى شركات البترول او مصانع الحديد والصلب مثلا. وخلاص على كده. الجنود دول بدأوا ينقرضوا والباقى منهم قليل ربنا يديهم الصحه. بيختفوا من حياتنا من غير ما نحس ببطولاتهم وباللى عملوه وباحساسهم العالى اللى ميتنفعش يتوصف فى الوقت ده.
وده اللى يخللى بعض اللى علقوا عندك يقولوا زهقنا من الكلام عن الحرب دى او هى الحرب دى عملت لنا ايه يعنى او مثلا مين يا ترى اللى انتصر فى الحرب. لان مسمعوش ذكريات الحرب من اللى كانوا فى وسطها فعلا.
أبطال عايشين وسطنا مش حاسيين بيهم. شهداء احياء ماشيين جنبنا فى محطات المترو. ناس وصلت لمرحلة ان روحها مش مهمه خالص فى مقابل النصر.
لا انسى متعتى وانا فى مصر فى جلساتى مع الابطال دول بس علشان لاسمع منهم ذكرياتهم. لا انسى محمود السيد وهو بيحكيلى عن لحظة العبور والقائد بتاعهم بيقولوهم عاوز عشره يروحوا يستشهدوا على الضفه التانيه فى اول موجات العبور فيتقدم تلاتين جندى. لا انسى عم شوقى وهو بيحكيلى عن زميله اللى مات فى حضنه وهو صايم. لا انسى الحاج محمود وهو بيتكلم عن دفنه حيا تحت التراب بتأثير القذائف كأنه بيحكى عن نزهه فى القناطر وانا جسدى بيترعش قصاده.
اللى عاوز اقوله فى النهايه ان احنا محتاجين نجمع شهادات و ذكريات الجنود دول فى كتاب او كتب للأجيال الجديده بعيد عن استراتجيات الحرب ونتائجها علشان الناس الجديده تحس بيهم وتحس باليوم ده وميبقاش يوم اجازه فى مصر وخلاص.
اسف انى طولت عليكى بس الموضوع فعلا هزنى وبصراحه بعض التعليقات ضايقتنى.....خالص تحياتى وشكرا

ahmed_k يقول...

كل سنه وكل مصر بخير
ومن نصر إلى نصر بإذن الله
لقد أثبتت تلك الحرب معدن الشعب المصري
الأصيل فلم تسجل لدي أقسام الشرطه
أي حادثة سرقه أو قتل او إعتداء
طوال أيام الحرب
كأن الناس إتلهوا فيما هو هم أكبر
هم الوطن كله
وتناسوا همومهم الشخصيه وخلافاتهم

فتحيه لكل أبطال حرب أكتوبر من قاده وضباط وجنود
ألا بصحيح مين فتحيه دي ؟؟؟؟ ههههه

ودمتي بخير يا دكتوره

Empress appy يقول...

كل سنه وانتى طيبه اولا
روبنا يرحم شهدائنا يا رب

Unknown يقول...

السلام عليكم ورحمة الله وبركاته
انا هو انا
لأ ابدآ ولايمكن نزهق ابدآ
بالعكس عايزين اكتر ونعرف اكتر!!

Unknown يقول...

السلام عليكم ورحمة الله وبركاته
الاستاذ هانى زينهم
ولا يمكن ابدآ حد ينكر شجاعة وكفاح الابطال دول ولا انهم فعلا حضّروا صح واشتغلواصح الصح كمان وتوفيق ربنا سبحانه وتعالى من قبل ومن بعد كان حليف لهم لاجل ما يبقى زاد لنا على التحديات القادمة إن شاء الله.
وتسلم للمرور والتعليق

Unknown يقول...

السلام عليكم ورحمة الله وبركاته
تسنيم حسين
للاسف مجاش المؤلف او الكاتب او المنتج والمخرج اللى يتعانوا مع بعض صح لاجل ما يطلعوا لنا كتاب مثلا او فيلم يبقى فى بنفس المستوى الرائع للاداء
والقتال للجنود دول وبأذن الله لما النصر للاسلام فى النهاية ربنا هو
اللى قال كده مش احنا .
وتسلمى على المرور والتعليق

Unknown يقول...

السلام عليكم ورحمة الله وبركاته
لاجىء الى متى
عائدون إن شاء الله.
وكل لحظة وحضراتكم بخير يافندم .

Unknown يقول...

السلام عليكم ورحمة الله وبركاته
kochia
اكيد هو عيد لنا كلنا
وبأذن اعياد تانية تاليه
سوف تأتى مع تمام النصر والتحرير.
تحياتى للمرور والتعليق.

Unknown يقول...

السلام عليكم ورحمة الله وبركاته
romansy
وكل لحظة وانت بألف خير
واللهم ارحمنا جميعآ
احياءآ وامواتآ
ويقدر لنا الخير حيث كان
تشكراتى للمرور والتعليق.

Unknown يقول...

السلام عليكم ورحمة الله وبركاته
blue-wave
نصر الجنود المصريين كلهم على
حكمدرات الجيش الاسرائيلى
نصر الانسان المصرى وتصميمه على الدبابة والطيارة اخر طراز
وفرحتنا به او اى فرح وكذلك اى حزن انت عارف الزمن والنسيان وتأثيرهما عليهم أن لم يكن هناك جديد .

Unknown يقول...

السلام عليكم ورحمة الله وبركاته
مش لاقية اسم
وجزاكى الله كل الخير
للمرور والتعليق يافندم
وامين لكل دعواتك
وجعل الله لكى نصيب منها

Unknown يقول...

السلام عليكم ورحمة الله وبركاته
حسن حنفى
ده غلطنا احنا ومن اتى بعد اكتوبر!!!
وليس ذنب او غلطة من حارب وتعب فيه.

Unknown يقول...

السلام عليكم ورحمة الله وبركاته
محمد الفارس الملثم
عارف يامحمد ما يعرف فرحة النصر دى الا ما عاشها والحمد لله عرفتها
ويهدينا ربنا الى مافيه الخير دائما
ودعواتى وتشكراتى
للمرور والتعليق
يامحمد
ياصاحبى.

Unknown يقول...

السلام عليكم ورحمة الله وبركاته
Mohamed Dawod
زى ما بتقول حضرتك ماجاش اللى يسجل لنا بطولات الناس او الابطال الحقيقين للحرب دى .عارف استاذ محمد ابن خالتى كان من طاقم افراد الصاعقة اللى عبروا فى الدفعات الاولى للعبور وفاكرة نفس الكلمة الل قرأتها بعد كده فى مذكرات جنود اخريين (الالتحام المباشر فى الخنادق )كان له اكبر الاثر فى نفوس الجنود :المصريين شافوا انهم مش اقل من الاسرائيلين فى الشجاعة والقوة
ويابختك ياعم بالقعدات الحلوة دى
وتسلم للمرور والتعليق

Unknown يقول...

السلام عليكم ورحمة الله وبركاته
ahmed_k
اللهم امين يارب العالمين
لكل دعواتك الطيبات
وينصر الاسلام والمسلمين
ويهزم الشرك والمشركين
(اعتقد انها بنت عبالعال!!)
وتسلم للمرور يافندم والتعليق

Unknown يقول...

السلام عليكم ورحمة الله وبركاته
Appyplant
وكل لحظة وانتى بألف خير
وزى ما بقول يرحمنا جميعآ
احياءآ وامواتآ.
تحياتى للمرور
والتعليق.

Unknown يقول...

السلام عليكم

ازيييييييييييييك

اخبارك ايه يارب تكوني كويسة وبخير

كل سنة وانتي طيبة بمناسبة عيد اكتوبر

عايز اقولك علي حاجه

في حد مشهور جدا برضه اسمه الشهيد ابراهيم الرفاعي وهو من القرية اللي منها والدتي وتربطنا بعائلاتهم معرفة قديمة

ونفتخر انه من عندنا

مش عارف بقي هو نفس الشخص ولا لا



وبعدين انتي فين من زمان


سجلي زعلي

يلا سلاموز

بنات صاحبة الجلالة يقول...

حبتتي الغالية وحشتني خالص ياقمر والله معنديش نت ومقيضها سيبر هههههههه كل سنة وانتي طيبة ياقمر وبعدين انا اسمي مش موجود لية انا كنت فدائية ايام الحرب دي هههههههههههه كنت بحارب معاهم ياريت الشباب يكون عندهم نفس حماس ابطال حرب اكتوبر تفتكري لو حصلت حرب دلوقتي هتكون هي دي روح الجنود مفتكرش وربنا يسترها يارب

وحشتني جدا والله وادعيلي بقا

سلاموز ياجمل نورهاتي

Unknown يقول...

السلام عليكم ورحمة الله وبركاته
bar2ash
الحمد لله كويسة
وانت كيف حالك ياصيدلى المنصورة
عساك بألف خير وصحة وعافيه ودايمآ كده
فعلا احتمال كبير ممكن هو البطل ابراهيم الرفاعى اللى قصدنا عليه احنا الاتنين حتى ابنه عامل له جروب بأسمه على الفيس بوك .واحد زى ده لازم اللى يعرفه او ينتسب اليه لابد له من الفخر .انا هنا اهوه بس انت عارف المده اللى فاتت عيد وكحك وبسكويت بقى تلاقى الواحد كسل لكن حنتنشط اهوه وسماااااااااااااااح المره دى ماشى؟؟؟؟
وتسلم للمرور والتعليق

Unknown يقول...

السلام عليكم ورحمة الله وبركاته
ملكات وبنات صاحبة الجلالة
ريمو الغاليه
انتى اللى فينك ؟؟
شوقتنا وقلتى اخبار حلوة؟؟
منتظرين اخبارك الحلوة اللى احلى من الكحك السادة ايوة احبه اكتر من كل الانواع بش بشرط يكون معمول كويس مش اى كلام .المهم متهيأللى ساعة الازمات بتنان(الشهامة والاحساس بالمسئولية)على حقيقتها ماتخافيش على مصر ابدآآ
ودعائى للناس كلهم والله بالخير
ومتشوقناش اكتر من كده هه؟؟؟
الف سلام وتحية لكى ولجوجو ولسمسم.

محمد خالد يقول...

سلامو عليكم د نورا

احلي مساء الخير لحضرتك ومعاه كوباية شاي معتبرة

حضرتك بتتكلمي عن اكتوبر الجميلة ... دايما لما حد من اصحابي يقول مفيش فايدة اقولهم اكتوبر يا كلاب ... حرب اكتوبر وكمان عيد ميلادي الشهر ده هههههه

حبيت اخبط التحية المدوية دي في السريع كده ولو ان حضرتك اتاخرتي كده اربع ايام اهو علي ماللموضوع الجديد ييجي ,,, مش كده والا ايه ؟ ههههههه

rovy يقول...

كل سنه وانى و كل مصر بخير يااارب

اللهم انصر الاسلام و المسلمين واعز الاسلام والمسلمين

و يارب نحس اد ايه فيه ناس ضحوا علشان احنا نعيش ..
تحيه لكل الابطال اللى ضحوا بارواحهم من اجلنا و يا رب اروقنا الشهاده فى سبيلك وسبيل الحق ..

دمتى بالف خير

تحياتى

Unknown يقول...

السلام عليكم ورحمةالله وبركاته
دكتور محمد
شمندينا الكبير
هنا يامرحبا يامرحبا
بقى عيد ميلادك الشهر ده ؟؟ياسيدى كل لحظة وانت بألف خير يارب والسنة الجايه تكون احسن واحسن(وكمان تكون قربت سنه من التخرج والشغل باللى بحق وحقيق )واه بالله عليك يامحمد اعمل لنا رجة كده فى المدونة المدارس فتحت والكليات كمان والحاااااااااااال نام اوى اوى ,وبطلنا عذرك ادى الموضوع الجديد نزل ياسيدى لما نشوف تعليقك !!!
تسلم ياشمندى للمرور والتعليق كمان.

Unknown يقول...

السلام عليكم ورحمة الله وبركاته روفى الجميلة
ام ياسمين
كل لحظة واحنا كلنا بخير
إن شاء الله تعالى وامين لكل دعواتك الطيبات ويجعلك نصيب منها بأذن الله
وانا معك تحية لهم على مابذلوه لخدمة وطنهم ومجتمعهم(إن الله لا يضيع اجر من احسن عملا)
وتسلمى للمرور والتعليق
متعك الله بالصحة والعافية
واقر عينيك ببناتك الحلوات.