الجمعة، يونيو 19، 2009

.........امى بتقولك هاتى اللى عليكى!!!!!















من المواقف اللى لاشممكن ابدا
(على رأى عبد الفتاح القصرى)
انساها الموقف ده !!
لما عملت العيادة فتحتها فى الشقة
باعتبار لا انزل ولا اطلع
والشقة كبيرة
وفيه اوده منها على السلم
وخفض للنفقات
وكمان عامل الامان والوقت

وكل المميزات اللى تغريك او تغرى اى انسان
بفتح مكان للشغل مع مكان السكن بالرغم من
متاعب لا حد لها ولا وصف من تحت راس ده :
منها عدم احترام مواعيد العيادة
:
الله ياستى الدكتورة ما انتى قاعدة فى بيتك فيها ايه لما نتاخر !
منها مش لما يجى الاستاذ واعشيه؟
ومنها كنت مستنيه جوزى لما يرجع ويدينى الفلوس
ومنها كنت بسمع المسلسل اصل اخر حلقة !
ومنا الولد نام وصحى عيان اعمل ايه؟

المهم كنت اول ما فتحت
عملت الاجرة او الكشف او زى ما بيقولوا الفيزيتا ب3جنية
يووووه بقى من زمان ما انا قلت قبل كده
ومحدش يسال من زمان اد ايه
احسن ابطحه
هههههه
وفى مرة من ذات المرارير

جت واحدة جارة وبنتها
كشفت علي البنت وخلصت
والست دفعت 5جنية
ادور ياحضرات فى سلقط فى ملقط على 2 جنية
اديهم لها الباقى
ابدا ابدا ابدا

عرضت عليها تاخد الفلوس ولما تيجى الاستشارة تبقى تدفع برضه ابدا
ما احنا جيران وعارفين بعض
برضه ابدا ولازم ادفع محدش ضامن موت من حيا
ده الام اللى بتقول
المهم مالقيتش فايدة
كتبت باقى 2جنية على ظهر الروشتة لما يجوا الاستشارة بعد 4 ايام يبقوا ياخدوها
فات يوم والتانى والتالت
وكنت قاعدة عند اختى فى الدور اللى تحت
وعندها نسايبها
وقاعدين كلنا شاى وجاتوة ولب وسودانى وفيلم فيديو وايه يعنى بقى
وانا بقى الست الدكتورة منورة المجلس بالاستشارات والسؤالات والاجابات (ياسيدى انا :)
الا الجرس رن
فتح ابن اختى الصغير
ابلة الدكتورة هنا
طنط واحدة صغيرة عايزاكى
خليها تتفضل
اهلا ياحبيبتى خير ؟
امى بتقولك هاتى الفلوس اللى عليكى!!
طبعا مش عايزة اقولكم انا بقيت فى نص هدومى
واساسا ما بقيت فاهمة ولا فاكرة الحكاية
لان البنت اللى جت غير البنت العيانة خالص
وانا مخى مش دفتر حافتكر اخوات العيانين كمان!!

فلوس ايه؟؟؟
معرفش امى قالت روحى هات الفلوس اللى على الدكتورة !
احاول افتكر الحكاية ايه
فين وفين المقروضة الصغيرة دى افتكرت تدينى الروشته
اصلها خفت ومش حتيجى الاستشارة
ولما قريتها افتكرت!!
طبعا اديتها وانا بقول ياأرض انشقى وابلعينى
وعنها وحياتكم رفعت الفيزيتا ساعتها ل5جنية
وقلت لنفسى:
اللى معاه يتفضل
اللى معاهوش يتفضل برضه
امتى ؟
لاما يوم الاتنين وده كنت عاملاه مجانا بالكامل
او حتى فى اى يوم ويقولى ممعايش! مافيهاش حاجة

بس فعلا
شغل فى نفس مكان السكن
نعمة ونقمة
جنة ونار
نعيم وجحيم !
*********
احنا حنفتح التعليقات المرة دى
بس بالله عليكم لو اتاخرت فى الرد


ما فيناش من زعل لان الظروف الايام


دى خلطبيطة بيطة بيطيطة بطابيطة!


ايوة صحيح كمان اول تعليق له جايزة


؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟




.


.


.


.


.


.


.











برطمان المخلل المعتبر ده !


ايه رأيكوا زهقنا من الحلو


نجرب الحادق شوية!

هناك 114 تعليقًا:

موناليزا يقول...

:) ماليش فى المخلل على فكرة
غيريه بعصير قصب:)

أفندينا يقول...

بما إن موناليزا تنازلت عن حقها فأنا أطالب ببرطمان المخلل فوراً :)

د. ياسر عمر عبد الفتاح يقول...

طيب إيه المشكلة بقي؟
الناس بتطالب بفلوسها
عاوزين تاخدوا قلوس الناس؟
ادفعوا اللي عليكم بقي
هههههههههههههههههههه

أما موضوع الجيران والعشم ده
فأنا حاسس بيه أوي أوي
لما زمان كنا قاعدين في البلد بتاعتنا
كان الناس بيعتبروا إن أي حد ساكن في البلد دي ,, يبقي قريبنا وليه حق علينا.
فمفيش اي مانع أبداً بعد ما نقفل الصيدلية إن حد يجي يخبط علي الباب علشان نصرفله روشتة الساعة 3 ولا أربعة الفجر.
قام الحاج عمل صيدلية في قلب البيت
حط فيها الأصناف المهمة علشان مش كل شوية ينزل يروح يفتح الصيدلية .
كان فيه حالات طبعاً تستاهل ,, وبتبقي حالات طارئة ,, لكن الباقي كله والأغلبية كانت واحد عاوز سرنجة ولا قرصين أسبرين.
حاجة تغيظ جداااااااااا

Sweet Violet يقول...

اخيراااا فتحتى التعليقات (:

انا الصراحة تخيلت الموقف و فضلت اضحك ((:

على الموقف طبعا مش عليك "ماتفهمنيش صح" ^_^

بخصوص المخلل المفروض انتى فتحتى التعليقات يعنى تعملى حفلة اصلا ايه البخل ده

^_^

MaNoOoSh يقول...

هههههههههههههههههه
3 جنيه
طب قوليلنا على العنوان علشان نجيلك
ههههههههههههه


لا بجد يا قمر ربنا يجزيكي كل خير انك لسه بتقدري ظروف الناس


بس مليش دعوة انا عايزة شوية مخلل انا كمان (بس جزر او خيار)

karim يقول...

بادكتور وانتى اية اللى يكسفبك دة شىء عادى اكيد الناس فى الاول هاتفهم غلط بس بتعدى, وفى الاخر جت مصلحة انك خليتها ب 5 جنية وربنا يبارك ليكى فى اليوم المجانى, متتاخريش فى الرد علينا علشان نطمن عليكى يمكن فى باقى على روشتة تانية ولا حاجة مش فاكراها والموضوع مش ناقص هههههههههههههه, تحياتى

Lyssandra يقول...

هههههههههه
أبلة الدكتورة ؟؟
وهاتي الفلوس اللي عليكي ؟؟

هههههههههههه

هو بصراحة موقف لطيف أوي
أكيد لما بتفتكريه بتضحكي

-----

جزاكي الله خير

وسعيدة اني لحقت مكان قبل ما تقفلي التعليقات تاني

دمتِ بخير
:)

Lyssa

أحمـــــــــــــد أبو العلا يقول...

هههههههههههههههههه

لا لا لا ده مطب صناعي مفيش بعد كده
ههههههههه

يعني دكتوره وبرستيج وفي الآخر اتنين جنيه
الديانه بتطالبك باتنين جنيه

الله يكرمك يافندم في أي وقت يحصل حاجه زي كده علة طول طلعي كاميرا الموبيل وصوره كده واعملي البوم
أكيد ألبوم صور الاحراج ده هيكسب جوايز كتيره


بوست عثل

راسبوتين يقول...

أنا لو منك كنت كشفت على الأم بالباقى وكنت حرد عليها بنفس الكلام
" ماحدش ضامن الموت من الحيا "
شكرا ...أرجو قبول مرورى

كيــــــــــــارا يقول...

ماتدفعوا اللي عليكو بئه للناس

ايه البشر اللي بتاكل حق الناس دي :)

كنتي قافله الكومنت ليه ؟

salma mohamed يقول...

اخييييييييييرا
فينك يا قمر وحشتينا,

انا بجد اتكسفتلك سلف (:
ده شكله كان زماااان اويييي (:
عرفينا رفعتي الكشف لحد كام دلوقتي,
علشان نجيبلك زباين ده العيادات الشعبية والخيريه عندنا مش بتكشف بضعف كده.

ياسر سليم يقول...

ده بقاله اد ايه الكلام ده ؟

ولسه لحد دلوقتى ب 5 جنية

ولا في افترا اكتر من كده ؟

GiGi worled يقول...

ياخبر
ايه المواقف المحرجه دى
اتصرفى بقه وفعلا حاولى الفيزيتا تبقى فلوس مجمده
وربنا يكرمك يارب
طبعا خساره مالحقتش الطرشى انا بحبه قوى
اذا تكرمت موناليزا تجيبهولى بما انها مش عايزاه
تحياتى ياقمر

norahaty يقول...

السلام عليكم ورحمة
الله تعالى وبركاته
موناليزا
معنديش عصير جصب
اجيبلك شــــــــاى:)
نورتينـــــــــــــــى

norahaty يقول...

السلام عليكم ورحمة
الله تعالى وبركاته
أفندينا
حلال عليك يافندم!
اتفضل بالهنا والشفا:)

norahaty يقول...

السلام عليكم ورحمة
الله تعالى وبركاته
د.ياسر عمر عبد الفتاح
انت معايا ولا معاهم ياصيدلى؟
البت كسفتنى وانا قاعدة عاملة
فيها باشمهندسة اد الدنيا :يرضيك؟
نورتينى وسلامنا للوالد الكريم
وقوله ربنا يخليك للغلابة يارب.

norahaty يقول...

اللام عليكم ورحمة
الله تعالى وبركاته
Sweet Violt
ياأهلا وسهلا
ياميت مرحبا:)
حاضر المرة الجاية
نعمل مخلل بارتى وكل
واحد يجيب معاه برطمان :
لا لو سمحتى ماتفهمنيش غلط
يدينا مش ياخد مننا :)
نورتينى.

norahaty يقول...

السلام عليكم ورحمة
الله تعالى وبركاته
MaNoOoSh
روحى انتى هناك
وخليكى عندك بس
وان حاجى اخدك:)
وعونيا نجيب الخيار
والجزر هو احنا نقدر
على الهجوممممممممممم:)

norahaty يقول...

السلام عليكم ورحمة
الله تعالى وبركاته
Karim
كويس كده؟ متأخرتش فى الرد :صح؟
بس الحمد لله اطمن خالص بطلنا البواقى
على ظهور الروشتات خـــــــــــالص
بعد العملة اللى ما يعلم بيها الا ربنا سبحانه وتعالى دى:(
نورتنا.

norahaty يقول...

السلام عليكم ورحمة
الله تعالى وبركاته
Lyssandra
شفتى منتهى الاحترام:
ابلة الدكتورة:هاتى الفلوس
اللى عليكى (كان فاضل تقول
يــــاست انتى)صح هو انا بضحك
دلوقتى لكن زمان ما تتصوريش
كان مزعلنى اد ايه؟
نورتينى

norahaty يقول...

السلام عليكم ورحمة
الله تعالى وبركاته
أ.احمد ابو العلا
شفت الفضيحة دى كلها على ايه؟
اتنين جنية واللى ما يشترى يتفرج
شرفتنا ونورتنا .

norahaty يقول...

السلام عليكم ورحمة
الله تعالى وبركاته
راسبوتين
وكنت حاطولها فين دى ساعتها
بس عارف كان مفروض اكشف على
البنت اللى جت تاخد الباقى
واقولها:روحى قولى لماما عليكم جنيه فرق!

norahaty يقول...

السلام عليكم ورحمة
الله تعالى وبركاته
كيــــــــــارا
دليل الحيارى
وصل ياناس ياعسل :)
كنت مزوغة شوية
وماتقوليش لحد:)

د/عرفه يقول...

كويس انك رجعتى التعليقات تانى


بس والله
موت من الضحك


انا عمرى ما افكر افتح العيادة فى نفسة الشقة

بس ممكن جدا فى نفس البيت عندنا

الله المستعان


بس اظن الفيزيتا حاليا بقت بخمسين
مش
خمسة
هههههههههههههههه
انا مش بأر
ههههههههههههههه

norahaty يقول...

السلام عليكم ورحمة
الله تعالى وبركاته
Salma Mohamed
وانتِ اكتر يعلم ربى
(ده شكله كان
زماااان اويييي (:
الله انتى حتزعلينى منك ولا ايه؟
دا انا بحبك!ايه زماااااااان
اوى دى ؟من (..)سنه بس!!!
نورتينى ياسلمى .

norahaty يقول...

السلام عليكم ورحمة
الله تعالى وبركاته
ياسر سليم
اممممممممم
ما قلنا بلاش نسال
السؤال ده: حتنرفز:)
وان كان على الافترا ففيه
كتيييييييييييير ماتخافش
نورتنا أ.ياسر .

norahaty يقول...

السلام عليكم ورحمة
الله تعالى وبركاته
GiGi world
معلش ياجيجى
خده افندينا
ملحوقة المرة
الجاية اتشطرى
وتعالى بدرى شوية:)
نورتينى جيجى.

norahaty يقول...

السلام عليكم ورحمة
الله تعالى وبركاته
د/عرفه
عارف انا بحكى واضحك دلوقتى
لكن ساعتها ولحد وقت قريب
كان الموضوع مزعلنى اوى اوى
ربنا يسهل وتفتح المستشفى
الخاص مش العيادة بس
جنب البيت يارب:)
نورتنى يادكتور.

بلاش فضايح يقول...

هههههههههههههههههههههههههه
ههههههههههههههههههههههههههه
هههههههههههههههههههههههههه
هههههههههههههههههههههههههه

حكاية حلوة بجد ومحرجة جدا ههههههههههههههههههههههههههههههههه

انا اتحكالى بردو حاجة زى كدة بس العكس
الدكتورة قابلت واحدة جارها فى الشارع وكانت بنت جارتها عيانة فأشارت عليها بدوا وشخصت حالتها وهى واقفة

وبعدين لما اتفرقوا الدكتورة بعتت بنتها لجارتها تقولها ماما بتقولك هاتى فلوس الكشف
ههههههههههههههههههههههههههه

عاشقة الأحزان يقول...

السلام عليكم

هههههههههه

حبيبتى الغاليه
نورتينى باول زياره
وان شاء الله يدوم التواصل بيننا

طبعآ

الموقف ده عمره ما هيتنسى مهما حصل

ههههههههههه

تحياتى ليكى

ايناس

عمرو يقول...

يا جماعه أدفعوا اللى عليكم بقى غلبتوا الناس معاكم :)))))))
أنا لو منك بصراحه كنت خدت البت المقروضه دى رهينه مش عارف لأيه بالظبط بس رهينه و خلاص :)))))))

عمرو يقول...

طيب كنتى خليتى برطمان المخلل ده لرمضان كان بنفع برضو

سفروتة يقول...

هههههههههههههههههههههههههههههههههههههههههههههههههههههههههههه
امي بتقولك هاتي الفلوس اللي عليكي
يالهووووووووووووووووووي
لا بجد ليكي حق يا دكتور تقولي للارض انشقي وابلعيني
بجد موقف شنيع
مع ان نيتك كانت خير ومكنتيش عايزة تاخدي منها الفلوس في ساعتها
يا سبحان الله

معلش يا دوك اهه موقف تضحكي لما تفتكريه
اصل الواحد اليومين دول بيتحايل ع الضحكة عشان تيجي

وحشتيني اوووووووووووووووووووووووووي يا دكتور
امووووووووووووووووووووووواة

ثلام يا ثكر
:)

norahaty يقول...

السلام عليكم ورحمة
الله تعالى وبركاته
بلاش فضايح
بجد؟والله برافو عليها
دكتورة شاطرة بتعرف
تاخد حقها وحقنا معاها:)
عارفة انا على كده لى عند
كل سكان الشارع فلوس اد كده
يلا زكا على صحة وعين عافية الانسان

norahaty يقول...

السلام عليكم ورحمة
الله تعالى وبركاته
عـاشقة الاحزان:ايناس
انا اللى حصللى السرور
بالزيارة.ربنا دايما
منورانا ومنورة مدونتك

norahaty يقول...

السلام عليكم ورحمة
الله تعالى وبركاته
أستاذ عمرو
البت ما كانت باينة
من الارض وعليها صوت
ياأستاذنا يخرم طبلة
ودن الفيل :)لو صرخت
بس حتجيب مديرية الامن
كلها تقولى اخدها رهينة!

norahaty يقول...

السلام عليكم رحمة
الله تعالى وبركاته
أستاذ عمرو
ماتخافش :)
عندنا غيره
كتـــــــير:)

norahaty يقول...

السلام عليكم ورحمة
الله تعالى وبركاته
سفــــــــــروته
حمدلله على السلامة
ياجميل ويارب تكونى
وفقتى فى الامتحانات
ونقولك مبروك على النجاح
قريباً باذن الله تعالى.هو حاليا
انا بضحك لما افتكره لكن زمان مش عايزة اقولك كنت متغاظة اد ايه :)

بنوته يقول...

السلام عليكم
هههههههههههه
بجد حضرتك عثثثثثثثثل اوي
انا متخيله الموقف هههههههههههه
بجد اتشرفت اوي بزيارة مدونة حضرتك
في رعاية الله
السلام عليكم

z!zOoOo يقول...

السلام عليكم

ازيك يا دكتوره يارب تكوني بخير

مبروك علي فتح اتعليقات

انا مش عايز برطمان المخلل انا عايز بجنيه مخلل ينفع :)

يارب دايما بخير

تحياتي

شمس النهار يقول...

برطمان المخلل شكله جميل
بس انا مش باكل الزيتون الاخضر المخلل


الموقف طبعا مضحك وانت واضح انك انسانه عطوفه ربنا يكرمك

mohamed ghalia يقول...

يعنى المرة الى فاتت مدبلر والمرة دى حوادق
ليه كده بس يادكتور هههههههههههههه
ليهم حق كده يقولوا هاتى الفلوس الى عليكى هههههههههههههههه
بالتوفيق دايما

well يقول...

3 جنيه و5 جنيه
الارقام دى ازهلتنى...ياريت لو تكتبيلى عنوان العيادة ..الشعب كله هيكشف
ويوم الاتنين مجانا ..ربنا يباركلك
الشعب كله هيكشف يوم الاتنين
امممممممم..فى اى تانى ...ايوة المخلل ..
هو بس محتاج شوية ملح ..بس تسلم ايدك
تحياتى

المعتصم يقول...

ازيك يادكتورة
اخيرا فتحتى التعليقات
حمدالله على السلامه
............
بس بجد الموقف يهلك من الضحك
عارفه انا لو منك كنت شخطت فى البنت وقلتلها هو انتوا بتدفعوا فلوس اصلا
انتوا بتكشفو ببلاش
روحى قولى لامك هاتى انتى الفلوس اللى عليكى
وكنتى قلبتى الترابيزة
ههههههههههههههههههههههههههه
بس على كده ادتيها الاتنين جنيه من معاكى ولا استلفتيهم من اختك ؟؟؟؟؟؟
ههههههههههههههههههه

Hesham يقول...

دكتورة
اولا صباح الخير ثانيا مدونتك رائعة وجميله واسلوبك الادبى فى القصص بيشبهنى بكاتبنا الكبير أحمد رجب وطبيبة علاقتها بالأدب تشبهنى ايضا بالشاعر الجميل دكتور ابراهيم ناجى شاعر الرومانسية الاول ومؤلف قصيدة الأطلال للعظيمة ام كلثوم دمتى للحياة الادبية العربية لمزيدا من إثراءها بكتاباتك وللمجتمع المصرى من خلال المشاكرة فى المنظومة الطبية المصرية التى ارجو ان تنصلح

beautiful mind يقول...

بصراحه موقف محرج جدا ودا بيحصل لينا كلنا

ويمكن اكتر من كدا كمان
المهم بس اننا مناخدش حد بذنب حد
مهو الناس نعذورة بردو ياست الدكتوره
الجنيه بيفرق بردو اليومين دول

بس احسن حاجه انك خليتي الفيزيتا رقم صحيح

يلا بقي تقبلي تحياتي ومروري

أم أحمد المصرية يقول...

اخيرافتحت التعليقات
انا قربت اقول انك مش عايزة تسمعي صوتنا :))))))))
و بالمناسبةدي قي ابدأ تعليقي بكلمة
تووووووووووووووووووت
و بعدين يا ستي اشكرك علي سؤالك عني كنت بصيف مع العيلة الكريمة عقبال عندك و ما ادراك ما التصييف مع العيلة فطار ل 14 فرد علي ما يخلص تحضري الغدا ل 14 فرد و في النصف تتسلي بحموم الاطفال و ملابسهم
الحمد لله عدت بالسلامة
عقبالك انت و الزيارةالقادمة من فرنسا :))
و في الختام هاتي الفلوس اللي عليكي
و احمدي ربنا انك في منزلك :)))
انا بفكر اسيب المدرسة و اشتغل دروس خصوصية في منزلي فقط
ايه رايك :)

romansy يقول...

ماشى يا دوك
انتى افتريتى
ترفعى الكشف 5 جنيه
طب ندعى بايه دلوقتى

romansy يقول...

كويس انى مش اول تعليق
علشان البرطمان فيه ليمون وانا بحب الزيتون

المره اللى جايه عاوزين ندوق

romansy يقول...

هاتوا الفلوس اللى عليكوا
هاتوا الفلوس اللى عليكوا
هاتوا الفلوس اللى عليكوا
هاتوا الفلوس اللى عليكوا
هاتوا الفلوس اللى عليكوا
هاتوا الفلوس اللى عليكوا
هاتوا الفلوس اللى عليكوا
هاتوا الفلوس اللى عليكوا
هاتوا الفلوس اللى عليكوا
هاتوا الفلوس اللى عليكوا
هاتوا الفلوس اللى عليكوا
هاتوا الفلوس اللى عليكوا

أ / أحمد عبد المنعم يقول...

بسم الله الرحمن الرحيم
الأخت الفاضلة :
كم ذا بمصر من المضحكات ولكنه ضحك ....

اسمعى حكايات أخى الطبيب " وهو يعشق الفكاهة بطبعه مع جديته المتناهية فى العلم والطب "

يقول أخى :
زارنى مريض فى العيادة يشكو من ألم فى صدره فكشفت عليه ومنحته الوصفة وحددت له موعد الاستشارة فإذا به يأتى يوم الاستشارة مصاحبا لزوحته يقول : الحمد لله ذهب عنى المرض لكن أريد بالاستشارة أن تكشف على زوجتى !!!!

وجاءه آخر فى الاستشارة ذات مرة يحكى له صعوبة بلع آخر حبة فى الدواء مع غرابة شكلها فقد كانت مكعبا صغيرا !!!!!!

لكل مهنة حكاياتها الطريفة والغريبة نشكرك على قصتك الطريفة لكن ما رأيك لو دونت بلغة عربية سهلة لا تكلف فيها بدلا من العامية .

ابو صهيب ( الجمعاوي الاصيل)سابقاً يقول...

عيادة ودكتورة وممرضة وادوات وعلاج

والكشف بـــــ3 جنيه بس

ربنايجعله في ميزان حسناتكم

وهاتوا بقى الفلوس اللي عليكوا

كفاية كده





















حلو المخلل ده

ahmed_k يقول...

هههههههههههههه
هاتوا الفلوس اللي عليكوااااا
موقف محرج جدا
أنا لو مكانك وناس عارفيني من الأول
مخليلهمش حاجه ولو أضطريت أنزل افك من أي محل
لأن صعوبة الموقف في إحراجاته خصوصا أمام الضيوف زي ما حصل معايا
عموما تعيشي وتاخدي غيرها يا فندم ههه
وهو لسه يوم الإتنين مجانا
دليني على عيادتك لو سمحتي حبعتلك زباين بالطابور فقط يوم الإتنين هههه

دمتي بكل خير

عدنان أحمد يقول...

السلام عليكم

ازيك يا دكتورة اخبارك ايه
يارب تكوني بخير ان شاء الله

هو لسه في حاجه في البلد دي ب 3 جنيه يا دكتوره ؟
و بالذات اسعار الكشف في العيادات بقت بتخلي المريض يعيا اكتر

ماشاء الله عليكي و الله
ربنا يتقبل منك و يجازيكي خير

أبو العريف يقول...

ايه دا بقي يا دكتوره

انت هتأخري في الفلوس اللي عليكي
وهتأخري في الرد عالتعليقات كمان

ايه الناس المماطله دي

عموما انا جاي اقول ان دي اول زياره

ومش الاخيره لان مدونتك جميله
ودمك عسل

ربنا يوفقك

قلتيلي انت بتكشفي ببلاش امتي
اصل فيه شله اطفال اعرفهم
احتمال يعيو الفتره الجايه
وهو نطلع باي مصلحه من التعليق ده


تحياتي

أبو العريف يقول...

ايه دابقي
لامؤاخذه يا دكتوره
دانا زبون قديم هنا ومش اول زياره
بص اصلي دخلت من مدونه تانيه

فما خدتش بالي من الشارع
تهت في العنوان

تحياتي واعتذاري

كلمات من نور يقول...

هههههههههههههه بجد حاجه تكسف

طيب أقولك بقى عهلى حاجه تكسف أكتر؟؟

من فترة كده وبما إني مريضة عمود فقري بعد الشر عنك ..العمود كان مسمع في المنطقة الصدرية ناحية القلب وزوجي العزيز مريض بالوسواس و إني حيجيلي القلب زي أمي المهم لقيت البا بيخبط ومين داخل؟ دكتور الباطني بتاعنا....خير يا دكتور؟ جوزك كلمني قالي ان عندك ذبحة و أجيب جهاز رسم القلب و آجي ...قلتله واو خلاص طالما هو قال ذبحه خلينا نشوف...طبعا عمل رسم القلب والحمدلله وطلع حلو وكويس الا من شيء بسيط يعتبر عصبيه مش اكتر وخلص الكشف وجيت احاسبه لقيت البيت مافيش فيه الا يمكن 30 جنيه

وداه بقى فيزيتا ورسم قلب يعني حاجة بتاعة تلاتين تلاف جنيه

بصيت له بمنتهى الاحراج بالرغم من انه طبيب للعائلة وقلتله معلش يادكتور ممكن ابعت لحضرتك المبلغ مع احمد ابني علشان ماسيش لوس؟؟؟؟(مافيش فلوس بس الخجل يا دكتورة ) بصلي الراجل وقالي مش عيب تقولي كده؟

على مهلك

وعنها يختي الكلام داه بقاله يمكن شهر كل الصبيان ما ييجوا نازلين احلفهم ياخدوا الفلوس يودوها
مرة ينسوا ومرة امتحانات ومرة مش فاضيين ومرة يصرفوا جزء منها علشان راحوا الكافيه يذاكروا

زمان الراجل بيقول عني إيه؟
ههههههههههههههههههه

jonoon 3aqel يقول...

ههههههههه
يا دكتورة جيبي الفلوس اللي عليكي..

ياااه الله يعينك..
دي حكاية تتناقلها الأجيال..

الله يكتب لك الاجر و ييسر امرك و يكتب على يدك الشفاء يارب..

دمتي بخير..
انا كأني شفت ف البرطمان تبع المخلل
لوز...مش عارف بتسموه ايه ف مصر..
لكن هو كأنه لوز (مش لوز مكسرات..لا حاجه تانيه) تكون حمرا او صفرا...هي دي و لا بيتهيأ لي؟؟

تحياتي

MǿиY El-Shreef يقول...

اخييييييييييييرا اتفحت التعليقات

ع فكره اوحش حاجه تحطي مكان شغلك ف بيتك

عشان هيتحول من مكان راحتك لأسوأ مكان ع وجه الارض :D

المهم ياست الضاكتورة الست دي المفروض كنتي عملتي فيها موقف ولا حاجه عشان غاظتني اوي بصراحه ياااه :D

بس ع فكره الفيزيتا قليله 5 جنيه بس

طيييييبه وبنت حلال هههههههه

وحشاني

راجى يقول...

بقى لى اسبوع عندى برد معكننى وده سبب تأخرى فى التعليق ، ممكن برطمان المخلل؟

akeed يقول...

البرطمان شكله مغرى لا كن الاملاح و بعد كده نكشف عندك ونقول هاتى الفوس اللى عليكى

هو فعلا موقف محرج

شاعر سبيل يقول...

هو احنا كده يا مصريين
ساعة ما ييجي الناس تطالب بحقها نزعل
على فكرة
من أجمل وألطف التدوينات اللي قرأتها
أحييكي بشدة

norahaty يقول...

السلام عليكم ورحمة
الله تعالى وبركاته
بنوتة
احنا اللى نورنا
بتشريفك ومرورك اللطيف
يابنوتة ويارب دايما منورانا

norahaty يقول...

لسلام عليكم ورحمة
الله تعالى وبركاته
Z!zOoOo
وعليكم السلام يازيزو
لأ ماعلش احنا ما بنيع قطاعى:)
لاما بالبرطمان لأما يفتح الله :)
نورتنا يازيزو بالحضور.

norahaty يقول...

السلام عليكم ورحمة
الله تعالى وبركاته
البرنسيسة شموسة
ولا يهمك يافندم
خليه على جنب:)
كتيررررر عايزينه:)
ومن بعض ما عندكم :)
نورتينا بالمرور والتعليق.

norahaty يقول...

السلام عليكم ورحمة
الله تعالى وبركاته
mohamed ghalia
بعد الشر عليك ياخويا
وعلى (المدونين كلهم )من
الدبلرة والكلام بتاع الجماعة
الفشلة دول :)مالنا دعوة بيهم
نورتنا يامحمد ويارب تنجح انت وكل
الطلبـــــــــــــــــــــــــــة

norahaty يقول...

السلام عليكم ورحمة
الله تعالى وبركاته
Well
دا كان زمان!وما تسألنيش
من امتى احسن اكرهـــــك:)
نورتنا ياويل بالتعليق.

norahaty يقول...

السلام عليكم ورحمة
الله تعالى وبركاته
أ.المعتصم المنتصر
الله يسلمك يافندم
والله يافندم لو تدورعلى الحقيقة
تلاقيهم كانوا بيكشفوا ببلاش يعنى
لازم نقيس ضغط ام البت المقروضة دى
وما يمنعش بالمرة (اختها الصغيرة)فوق البيعة وساعات كانت بيبقى فيه
استشارة واتنين كمان:(:(
وال2جنية استلفتهم
من اختى طبعاً
ساعتها :):)
نورتنا :)

norahaty يقول...

السلام عليكم ورحمة
الله تعالى وبركاته
Hesham
مساء النور يافندم
(أحمد رجب وابراهيم ناجى )
كتيررررر علىّ يااستاذ هشام
وايش اكون انا بينهم :لاشىء
على رأى مدون صديق:هوا:)
والمنظومة الطبية تنصلح !
قول يارب يارب يارب
نورتنا يافندم.

norahaty يقول...

السلام عليكم ورحمة
الله تعالى وبركاته
Beautiful mind
الله لو تدور على الحقيقة
هم اخد باكتر من الاتنين جنية
دول ايشى قياس ضغط للام مثلا
او اسئلة كتير لاخوات المريضة
وغيره كتير بس الواحد بينسى
ما علينا كله بيفوت
الحمد لله رب العالمين
نورتنا .

norahaty يقول...

السلام عليكم ورحمة
الله تعالى وبركاته
حبيبتى ام احمد
أى أى أى :)
كده برضه تاخدينى على غفلة
بحبـــــــك برررررررررررررضة
ايه رأيك بقى؟ولما انتى كان معاك بسم
الله ما شاء الله العدد ده كنتى (عزمتينا بالمرة :)مافيهاش حاجة هم 2نفر بس
اللى حيزيد عليكى طلباتهم واحنا حنساعدك برضه يعنى حنعمل الشاى:)

norahaty يقول...

السلام عليكم ورحمة
الله تعالى وبركاته
romansy
ال5جنيه دى كانت
زماااااااااااان
وبطلناها من زمان :)

norahaty يقول...

السلام عليكم ورحمة
الله تعالى وبركاته
كويس يارومنسى
شموسةالبرنسيسة مابتحبش
الزيتون ممكن تشتركوا
فى البرطمان وتقسموه
على بعض بس من غير
خنــــــــــــــاق:)

norahaty يقول...

السلام عليكم ورحمة
الله تعالى وبركاته
romansy
مالكش حاجة عندنا
هات الاثباتات
معاك ايصالات
فين شهودك
مالكش حاجة قلتلك
وبعدين بقى
اجيب البوليس!
بينا وبينك المحكمة P
فكرنى كده امتى؟
حد بينادى:)
طب معلش عايزين نقفل P
حين ميسرة
خليك كريم يارومنسى!

norahaty يقول...

السلام عليكم ورحمة
الله تعالى وبركاته
أ/احمد عبد المنعم
عارف ياأستاذ احمد
انا كان عندى توائم فى العيادة
كانوا كل مرة التوأم التانى هو
اللى يجوا به الاستشارة وكنت ببقى عارفة وفاهمة وهم برضوا عارفين انى
عارفة لكن حتعمل ايه فى نصاحتنا
وفهلوتنا نحن المصريين!
وحاضر نصيحة مقبولة
نحاول ان نعمل بها.
ونورتنا .

norahaty يقول...

السلام عليكم ورحمة
الله تعالى وبركاته
أبو صهيب
الجمعاوى الاصيل سابقاً
شفت التواضع!وياريت عاجبين :(
وبالهنا والشفا يافندم والفلوس
حضرتك حق المخلل ولا هو بلاش يعنى !
نورتنا وشرفتنا

norahaty يقول...

السلام عليكم ورحمة
الله تعالى وبركاته
ahmed-K
حتى انت يااستاذ احمد!
والله واخدين بال 2جنية
دول قياس ضغط لما وجعوا
ودانى .العيادة الف من يدلك
عليها اسال انت بس فى ميدان
الجيــــــــــــزة وتعالى :)

norahaty يقول...

السلام عليكم ورحمة
الله تعالى وبركاته
عدنان احمد
الف حمدلله على السلامة
ازيك عامل ايه؟يارب
تكون موفق فى دراستك
اما ال3جنية فهذا ماضى
راح لحاله احنا دلوقتى بقينا
اعلى شوية لكن برضه متهوديين
كتير عن غيرنا.طمنا عليك دايماً

norahaty يقول...

السلام عليكم ورحمة
الله تعالى وبركاته
أبو العريف
ماهو المتأخر متأخر على
كل حاجة بقى :بواقى فلوس
او الرد على التعليقات:)

norahaty يقول...

السلام عليكم ورحمة
الله تعالى وبركاته
ماهوانا برضه
استغربت وقلت
لنفسى يمكن انا اللى
بيتهيأللى :)لكن طلعت
ما بيهيأليش ولا حاجة:)
على العموم انت تنورنا
انت وشلة الاطفال يوم الاتنين
فين؟امممممممم هنــــــــــــاك:)

norahaty يقول...

السلام عليكم ورحمة
الله تعالى وبركاته
كلمات من نور
معلش ماهو جّل من
لا ينسى سبحانه وتعالى
ومعلش بلاش حجج بقى:)
اديكى افتكرتى ابعتيهم
الحين على طول:):):)
نورتينى والف لاباس عنك
شفاكِ الله وعفاكِ من كل سوء

norahaty يقول...

السلام عليكم ورحمة
الله تعالى وبركاته
jonon 3aqel
شفت ياراشد؟ الغلب
اللى الاطباء فيه؟مش كنت
عايز تبقى طبيب :اهى دى عينة:)
اعتقد انك تقصد (العصفر!)نوع من انواع البهارات اوالاضافات نضعها
على المخلل لاكسابة طعم ونكهة مميزة

norahaty يقول...

السلام عليكم ورحمة
الله تعالى وبركاته
Mony El-Shreef
ايووووة فتحناها بناء
على طلب الجماهير :):)
شفتى؟ضاكتورة وطيبة اوى
والله لو تعرفى قلبى وطيبته!
المهم انت تذاكرى بس وتخلصى
وتنجحى باذن الله بمجموع كبيييير
ونشوفك ضضضضضضضضضضكتوررررررة
يـــــــــــــــــــــــارب

norahaty يقول...

السلام عليكم ورحمة
الله تعالى وبركاته
أستاذ راجى
الف لاباس عنك يافندم
عارف عليك بالراحة التامة
فى الفراش وحاجات دافية كتير
صدقنى افيد الف مرة من مليون دوا :)
ومعلش برطمان المخلل اخده افندينا
لما موناليزا تنازلت عنه
حأكتب اسمك فى المطالبين
به المرة الجاية
نورتنا .

norahaty يقول...

السلام عليكم ورحمة
الله تعالى وبركاته
akeed
سلامتك من الاملاح
على العموم الاعتدال
فى الاكل من الحوادق مع
شرب ماء كتيييييييييير
بيخفف كتير من اثارها :)
طب معاكم ايصال بالمبلغ؟

norahaty يقول...

السلام عليكم ورحمة
الله تعالى وبركاته
شاعر سبيل
هو انا قلت حأكلهم عليهم!
ماهو اللى ما جوش الاشتسارة
والبنت خفت والحمد لله ياباىىىى
علينا يامصريين :)
نورتنا بالتعليق اللطيف.

وفاء بركات يقول...

السلام عليكم يادكتوره
الحمد الله لقيتي المفتاح إعملي نسخه ثانيه .
مش الأيام دى كان كيلو اللحمه بجنيه
يعني مبلغ يعمل أكله.ههههههههههههه
مش قصدى اللي في بالك ولا أقولك أه قصدى وهلبس خوزه
برطمان مخلل يجنن فيش مانع تقدميه مع الجاتوه.
حمدالله علي سلامتك والرد براحتك ياجميل

المعتصم يقول...

السلام عليكم ورحمة الله وبركاته
وزيرتنا الكبيرة
تحياتى
ياافندم التعليقات على القصه القديمه اتنشرت وتم الرد ياافندم
ونأسف على التاخير
معلش العتب على النظر
وحكم السن بقى
هههههههههههههههه
تحياتى

dr aly khamis يقول...

السلام عليكم و رحمة الله و بركاته
انا الصراحة من ساعة ما جيت مدونة حضرتك مش لاقى تعليقات بس انا متابع موضوعات حضرتك الحلوة من أول نشيد ( هزتنى ) اللى عايز اشكرك عليه اوى لأنى بحبه جدا و عاجبنى أوى لكن كان فيه كلمات مش فاهمها
و مرورا بالبيض بالبسطرمة اللى جوعتينى بها
لحد المخلل

انا المفروض بعد كده ادخل تلات مرات بعد الأكل

بارك الله فيك
تقبلى تحياتى

همسه يقول...

روعه
انتى روعه
اسلوبك فى السرد يجنن
الموقف نفسه يضحك
جل من لا يسهو يا قمره
وبخصوص المخلل
روعه بموت فى المخلل
اشكرك جدا على البوسيت اللطيف ده
وتحياتى ليكى

norahaty يقول...

السلام عليكم ورحمة
الله تعالى وبركاته
حبيبتى الاستاذة
وفاء بركات
صباح الفل يافندم
نهارنا ابيض إن شاء الله
حتى انتى؟دا انا بحبك واعزك ليه بس!
على العموم المخلل واللحمة اللى الكيلو بجنية تحت امرك كمان :)
نورتينا ياأستاذة وربنا يسهل
والمفتــــاح ما يضعش تانى

norahaty يقول...

السلام عليكم ورحمة
الله تعالى وبركاته
أستاذ معتصم المنتصر
ايه ده؟ليه هو انت أكبر
ولا (....)اكبر ما هو زى
البمب وبيعمل مؤتمرات ورحلات
100فل واربعتاشر اهوه :)
وحالا نروح نشوف الرد ولو انى
الحقيقة واخده على خاطرى من نفسى
لانى اعتقدت انى تدخلت فى جزئية ليست لىّ!

norahaty يقول...

السلام عليكم ورحمة
الله تعالى وبركاته
dr aly khamis
ياألف اهلا وسهلا يافندم
دا المدونة هى اللى نورت
لما شرفتنا بالمرور والتعليق.
فعلا النشيد جميل ومن ساعة ما سمعته
وانا اردده بينى وبين نفسى لحلاوة الكلمات والاداء والصوت كمان
واتفضل فى اى وقت تجد ما يسرك
ومرة تانية نورتنا يافندم.

norahaty يقول...

السلام عليكم ورحمة
الله تعالى وبركاته
الرقيقة همسة
اللى هى نسمة
فى حقيقة الامر
دى رقتك وجمالك
انتى اللى مخليكى
حاسة بالجمال ده
اما عن الفلوس الباقية
فانا كنت حاديهلهم لما يجوا
الاستشارةهم اللى استعجلوا
وخفوااعملهم ايه انا بقى؟
نورتينى ياهمسة
وسؤال على جنب كده؟!
انت (مخبية)مدونتك فين؟

المعتصم يقول...

الحقيقة واخده على خاطرى من نفسى
لانى اعتقدت انى تدخلت فى جزئية ليست لىّ!

لو كان هيزعلنى ان حد يتكلم معايا فى الموضوع ده مكنتش اشرت له من قريب او من بعيد
بالعكس يادكتورة انا اسعدنى تعليقك جدا
بس هى الظروف وقلبة المخ هى اللى خلتنى مااشوفش التعليقات غير متأخر
.......
وبعدين انا اكبر من (....)
لييييييييييييييه
لان انا فى نافوخى مليون حاجه ومليون مشكله ولازم احلها
انما هو ياعينى عليه(صعبان عليا)مافيش فى نافوخه حاجه خالص ولا بيبكى على مصلحة حد
ولاااااااااا ايه
طبعا انتِ عارفه وانا عارف اننا بنتكلم على الواد حباطه ابن مرعى بتاع الكلمه (ماتودوناش فى داهيه)
هههههههههههههههههههه
ســـــــــــــلام

على عبدالله يقول...

السلام عليكم

واكلينها والعة
:)

هو برنامج يوم الاثنين دا لسة مستمر ؟

طاب ممكن العنوان ؟

Dr Ibrahim يقول...

إيه الخفة دى

بتفتحى عيادة حتى من غير تحضير دبلومة

هبلغ عنك:):)

انا قلت أسلم بدل محدش معبر

بس هو زمان دا من إمتى:)

م/محمود فوزى يقول...

السلام عليكم

كويس انك عامله يوم مجانى وكمان لو حد معاهوش مفيش مشكله
الكلام ده نادر اليومين دول

بس موقف صعب قوي حكايه الاتنين جنيه

بس كويس انها مجتش قدام العيانين وقالت كده
مش كل الناس هاتفهم الموقف

فكرنى بدكتور اعرفه برضه لو حد ممعهوش مفيش مشكله وبالذات لو كان من المعارف او الجيران
المهم جاله واحد وبعد ماكشف عليه وكتب له على الدوا
العيان مش عاجبه الكشف فقال للدكتور هو يعنى عشان ببلاش
الدكتور انا عارف انه بيكشف على قد ما ربنا بيقدره ولا يبخل بحاجه
بيقولى بصراحه دمه اتحرق
وقاله انا باكشف كده بفلوس ولا من غير فلوس

فى الاخر مش عارف البرطمان خلص ولا لسه
ياسلام على شويه منه مع السمك ولا مع الفول فى السحور
جوعونا باه

ربنا يكرمك ويوفقك

شباك موارب يقول...

الا صحيح هو الكشف بقى بكام دلوقتي؟؟؟
حرام عليكي مش كفايه
عيانين وغلبانين
وتاخدي فلوسهم كمان
هي العياده تخصص ايه بالظبط؟؟
جايز اجي اكشف عندك بس ساعتها هابقى
اجيب فلوس فكه معايا كتير
عشان ماتاخدوش مننا مجمد بقى
ولا احنا زمايل اكيد انا هاكشف فري
ولا انا هاكشف ليه اصلا
انا مش تعبانه
ولا حتى لو تعبانه لازم اكشف يعني؟؟
مش تعبانه
تعبانه
مش تعبانه
تعبانه

حد عارف انا تعبانه ولا مش تعبانه

رغي كتير وزهق
استحملي بقى

د/منار فايد

لاسع افندى يقول...

طيب لما انتى عندك مخلل كنتى اديها بالباقى مخلل بدل الفضايح ههههههه


تحياتى

محمد عتلم يقول...

انا جيت ازورك لقيت صورة الورده عندك . والجميل منك انك لما لقيتيها مربعه والتوقيع طار من على اليمين عملتى منه نسخه وحطيتيه على الشمال
كان نفسى فى المخلل ده بس للاسف البلوجاتيه نسفوه .. دول كلو البرطمان نفسه يا أمى
تحياتى ليكى يا دكتوره

norahaty يقول...

السلام عليكم ورحمة
الله تعالى وبركاته
استاذ المعتصم المنتصر
اصلى انا ذوووق ومؤدبة
عرفت السبب ايه؟هههههه
على العموم ادعولك ربى
بالخير فى كل خطوات حياتك
وأن يرضيك بما قسمه لك
الرضا نعمة عظيمة
يااستاذ منتصرررر:P
وبلاش نتكلم عن مرعى بتاع الكلمة
مش قده ولا اد (عنتر عبد الجبار)مساعده
نورتنا وشرفتنا ياأستاذ مصطفى.

norahaty يقول...

السلام عليكم ورحمة
الله تعالى وبركاته
أستاذ على عبد الله
مظلــــــوم يابيه
دا احنا اغلب من الغلب
لو تعرف حقيقة الامر بس هى
المظاهر الخداعّة:)واتفضل حضرتك
هناااااااااك وانت حتلاقى العيادة
نورتنا يااستاذ على.

norahaty يقول...

السلام عليكم ورحمة
الله تعالى وبركاته
Dr Ibrahim
ايووووووووة
ماهى نفس الخفة
اللى خلتنا نقولك
دكتوررررررر ابراهيم
وانت لسه فى الكلية !وخلينى ساكتة احسن انا اللى حأبلغ حأبلغ عليكم!
نورتنا يافندم بالمرور والتعليق

norahaty يقول...

السلام عليكم ورحمة
الله تعالى وبركاته
م/محمود فوزى
ماهو ده تناقض الناس مع نفسها
ما بيقتنعوش بالمجانى ولما يدفعوا
دم قلبهم فى الشىء يقولولك مفيش
حاجة ببلاش ابداً:ارضاء الناس شىء مستحيل!وحنكتب اسمك فى دفعة (المخلل القادمة) ولا يهمك:)
نورتنا ياباشمهندس.

norahaty يقول...

السلام عليكم ورحمة
الله تعالى وبركاته
شباك موارب
اهلا اهلا بالزميلة عما قريب
ولا يهمك تعالى انتى واحنا نعملك
ديس كونت :نص الكشف بحاله مجاناً!
لو حيبفى لكى باقى حأديهولك
فى التو واللحظة انا عارفة
الاطباء ناس مضبوطين فى
الحساب.نورتينا دكتورة

norahaty يقول...

السلام عليكم ورحمة
الله تعالى وبركاته
لاسع افندى
مكناش لسه طلعنا
فى كار المخلل ده !
لقينا الطب ما
بيأكلش عيش:(
نورتنا يافندم

norahaty يقول...

السلام عليكم ورحمة
الله تعالى وبركاته
الفنان محمد عتلم
ليه هو انا عايزة احط
صورة وردة وخلاص!تؤ تؤ تؤ
انا عايزة أحط حاجة ذات قيمة
وسيما وبالتالى توقيع الفنان عليها
يزيدها جمال وجمال .نورتنا

ذو الوجه المبتسم يقول...

السلام عليكم
ممكن اضحك بجد
هههههههههههههههههههه
هههههههههههههههههههه
طول ما انا باقرأ البوست باضحك وكانى شايف الموقف بتاع البنت وهى جاية تكلمك

بس قولى لى
هو انتى الكشف بتاعك بكام بجد
يمكن اتزنق واجى اكشف عندك
طالما الفزيتا بتعتك كويسة كده
طبعا الكشف مش عليا على المدام
ههههههههههههههههه

تحياتى اختى الدكتورة

م/محمود فوزى يقول...

كويس انك طمنتيني على المخلل
بس المهم يكون قبل رمضان وكل سنه وانتى طيبه
خلاص رجب بدا النهارده
ربنا يعيشنا لرمضان ويجعلنا من عتقاء الشهر الكريم

حاول تفتكرنى يقول...

فعلا
العمل فى مكان السكن له إيجابيات وسلبيات

أجمل ما فى الموضوع ( انها خفت ومش هتيجي الاستشارة )

زادك الله عــّزة

norahaty يقول...

السلام عليكم ورحمة
الله تعالى وبركاته
ذو الوجه المبتسم
اضحك الله سنك يااستاذ ناجى يارب
ال3جنية دول كانوازمان دلوقتى بقوا
....ولا بلاش علشان الضرايب وقنا الله
واياك شرها .وماتحملش هم اتفضل انت والمدام فى اى وقت مجــــــــــــانا
اصدقاء المدونات لهم خصم خاص:)

norahaty يقول...

السلام عليكم ورحمة
الله تعالى وبركاته
م/محمود فوزى
ماتحملش هم يافندم
كاتبين اسمك فى الطلبية
الجاية إن شاء الله .وووو
كل سنة وانت بالف خير
وامين لكل دعواتك الطيبة.

norahaty يقول...

السلام عليكم ورحمة
الله تعالى وبركاته
حاول تفتكرنى
باين عليك حضرتك مجرب!
فعلا والله نعمة ونقمة فى
ساعة واحدة.وشكرا لدعوتك
وربنا يعز وينصر الاسلام والمسلمين
ونورتنا وشرفتنا .