الأحد، أكتوبر 18، 2009

..............أنا اتبعت ياجمـــاعة


انا اتبعت بعتة جامدة اوى اوى
قاعدة يوم السبت اللى فات لا بيا ولا عليا
الاقى الموظف بتاع السويتش
جاى وجايب اشارة ليا!
خير ياعم حسانين
كل خير يادكتورة
دى اشارة لحضرتك عايزينك فى الفرع بكرة
يالهوتىىىىىىىىىىى
الفرع!!!
يبقى تحقيق وشكوى وسين وجيم
ولاصوت يعلو على صوت
المريض
لأن انت السليم وهو
المريض
ولو كان بردون قل ادبه وعمل وسوى ّفيك
لكن فى الاخر يقولولك
انت السليم وهو
المريض
ولازمن ولابدن تستحمله
وتموت انت وتتغاظ انت
وتتحرق أعصابك انت
مش مهم ما هو انت السليم وهو
المريض
وربنا يخلى الجرايد
وابواب الشكاوى فيها
والتليفزيون والقنوات الفضائية
والتوك شو وغيرها وغيرها
اللى بتاخد جانب واحد من اى مشكلة
ولا تعرض للجانب الاخر منها
المهم مضيت بالعلم وقريت
الكلمتين المكتوبين
للحضور باكر بالفرع
لحضور الدورة التدريبية
بالفرع حتى 22اكتوبر
مرتين اسبوعياً
حسبتها قبل ما امضى
(عملت فيها ناصحة المرة دى!)
لقيتها
اربع مرات
قلت
يااااااااااااااااااااااااابت
معلش اربع مرات يفوتوا بالطول ولا بالعرض
اركبى تاكسى وربنا يسهل
مش كل حاجة اقول لأ وكدهـ
المهم ركبت التاكسى تانى يوم ورحت
الاقى الحكاية
بااااااااااااااااااااااااااعتة
كبيرة اوى
ازاى؟؟
المحاضرات فين؟
فى أخر مدينة نصر
انا اروح اخر مدينة نصر ليه؟
ولمدة ستة اشهر!
ومرتين اسبوعياً
بس للأسف كنت مضيت بالموافقة وخلاص
ولمّا سألت أمال ليه
بيقولوا فى الفرع
قالوا:
معلش ياجماعة
أص
أص
أص
أصل
الكابل بتاع الجهاز
ماله ياسيدى؟
باااااااااايظ
(أهـــ ادى اولها!)
ومش حينفع نعمل الفيديو كونفرانس هنا
حنضطر نروح
الفرع بتاع
مدينة نصر
ونررررررررررروح
مدينة نصر
ونكمل المرة الجاية
السلاموا عليكوا
اروح اشوف المحاضرة
واقرأ فيها شوية
اصل عاملين لنا فيها
إستمحان!!
بعد 100سنة خدمة بالحكومة
يودونى
دورررررررررة تدريبية
وكمان
حيمتحنونى
ويالهوتىىىىىىىىىى
يالهوتىىىىىىىىىىىىىى
يالهوتىىىىىىىىىىىىىىىىىىىىىىى
ومحدش يقولى وفيها ايه ؟
العلم نورن!
احسن أتنرفز
وانا مش ناقصة نرفزة
السلام عليكم .

هناك 66 تعليقًا:

أحمـــــــــــــد أبو العلا يقول...

ههههههههههههه

حلوه البعته ديه طبعا
وهتبقى أحلى كل مره وانتي بتدعي عليهم عشان المواصلات

ربنا يهون عليكي

بصي وانتي رايحه وانتي جايه ابقي اسمعي نجوم اف ام الصبح والساعه 6 بيقولوا حالة الشوارع شكلها ايه
ولوكسلتي اطمني التقرير كل يوم هوا هوا
الطرق مقفوله
ههههههه

قال فيديو كونفرنس قال
بلد لتاعة شهادات صحيح

karim يقول...

ياستى قضيها اهو بردوا تغيير واكيد هاتستفيدى اشىء اكيد مش من الدورة بس ممكن تتعرفى على حد ينفعك بعد كدة, مفيش شىء يحصل مالوش فايدة صدقينى, تحياتى

فاتيما يقول...

يا حبيبتى ى ى ى ى ى ى
انا اللى غايظنى إن الحاجات دى فى النهاية حبر على ورق
و مجرد حركات عشان يعملوا كشوفات بمكافأت و حوافز و بدلات و انتقالات و الذى منه لموظفى البطالة المقنعة اللى قاعدين عندهم بيشربوا شاى و خلصنا ....
أل يعنى بيشتغلوا
و عاملين اللى عليهم
و بيطوروا فى اداء العاملين
بقتاااااع الدولة ...
بلا وكسة
مفيش أى اعتبارات للعالم
اللى هتحضر الدورة دى طيب
يعنى جايين منين
و لا هّيروحوا امتى
و لا عندهم بيت و عيال مستنياهم
و لا ان الشحططة دى هتقعد شهور و ايام و تبدأ فى فصل
و تخلص فى فصل تانى
و مفيش دم و لا حياة لمن تنادى
و إيه النظام فى اليوم اللى مش فايت دا
تصدقى إنترفزتلك
لأ سيبنى متمسكنيش
و ابعدى انتى يا نورهانتى لتتعورى
عشان هولعلك فيهم

شفـقــة و إحســــان يقول...

معلش يا ست الدكتورة تعالى على نفسك وروحى يمكن تطلعى باى استفادة
كمان مدينة نصر مش بعيدة ولا انتى من اسكندرية ولا كفر الدوار ولا ايه
يا ستى تاكسى يفوت ولا حد يموت
قلبى عندك
شفقة

م/محمود فوزى يقول...

السلام عليكم
ازيك يادكتوره
اولا حمدا لله على سلامتك
التدوينه اللى فاتت قلقتنا عليكي

وبعدين العلم برضه يستحق
عارف انها هاتنرفزك
مش عارف ليه عندي عاده شريره انى انرفز
هههههههههههههههههههه
باهزر

هى بعته تغيظ
يعنى ايه الكبل مقطوع لمده ست شهور قدام
والله اعلم هو اتقطع امتى
اصلا فيه طرق تانيه ممكن تتعمل لحل المشكله
لكن المشكله اصلا ان المواصلات الزحمه ممكن تخلى الناس رايحه وهى مش مركزه

ربنا معاكي
وكمان هاترجعى تذاكرى وتمتحنى
ذاكرى باه كويس
وبلاش شغل البراشيم
هههههههههههههههه

أبو العريف يقول...

ههههههههههههههه

حلوه البعته دي يا داكتوووووووره

تعيشي وتاخدي غيرها

اه

اشمعني الدكاترا اللي قاعدين مريحين في المسشفييات

واحنا متبهدلين في المواقع

( وش شرير )

GiGi world يقول...

ربنا يكرمك يارب

معلش يادكتر
المهم ارفعى راسنا وذاكرى
عايزين عثله من عثله
وهجيبلك مثاثه كمان

عاشقة الأحزان يقول...

ههههههههههههههه


ولا تحطى فى دماغك

تعيشى وتاخدى غيرها

ربنا يوفقك يارب
ههههههههههه
بي بجد كلامك عسل زيك

شوكولاتة يقول...

هوه فيه واحد يمضي على القرف بإيديه يادكتورة دورة تدريبية يعني أي كلام استهبال مالوش أي لازمة وشكلهم هايعلموكم إزاي تدوا حقن وريد
هههههههههههههه

تعيشي وتاخدي غيرها

المعتصم يقول...

السلام عليكم ورحمة الله وبركاته
ازيك يادكتورتنا
فديو كونفرانس!!!!!!!!!!!!!!!!!!!!
الكلمة دى انا لسه سامعها قريب
فين ياواد يامصطفى
اه يوم الخميس اللى فات فى المدرسه لما بعتونى انا التانى
وروحت يادكتورة واجارك الله
حاجه تخنق وتفرس وتطقق ووووووووووو

وكمان فى اخر مدينة نصر
ربنا يعينك
من الجيزة لمدينة نصر مرتين فى الاسبوع لمدة ست شهور
حسبى الله ونعم الوكيل فيهم
ده انا تعبتلك على السيرة
والله حرااااااااام
ربنا يكون فى عونك ويقويكى
بس عشان بعد كده ماتمضيش على حاجه من غير ماتاخدى رأى الزعيم بتاعكم
زعيم اونطه انا ولا ايه ؟؟؟
هههههههههههه
تقبلى مرورى وتحياتى

زهراء يقول...

يا دكتووووووووره العلم نورن هما مش بيقولوا كده برضه
ربنا يقويك واهى دوره تفوت ولا حد يموت ربنا يكرمك وبعدين هو حد يقدرى يبعت فيكى شكوى وانا موجوده برضه انتى ليه شاكه فى قدراتى كمحاميه يعنى مش علشان ليا فى الفن ابقى خلاص بقى نسيت القانون والحاجات اللى قعدت ادرس فيها اربع سنوات بالتمام والكمال
معلش مجرد شؤال صغير خالص مالص هو الكابل اللى اتقطه ده بكام يمكن ابعت لهم واحد هديه او نلم من بعضنا ونجيب واحد
اشد شعرى يا نااااااااااااااااس
ربنا يفوقك

soly88 يقول...

محدش بياكلها بالساهل
يالا فرصه ترجعى لأيام التلمذه

كلمات من نور يقول...

بجد بجد الله يعينك حتاخدي القاهرة بالطول والعرض و على إيه؟؟ بس نقول إيه الحمدلله على كل حال وبالتوفيق يا طبيبة مدوناتنا الحبيبة

قبلاوى يقول...

وفيها ايه ؟

العلم نورن !

ههههه

يا دكتوره المفروض تكونى اتعودتى يعنى

ماحنا على طول بنبعت

فكرة من الزمن ده يقول...

دكتور نور
وعسى ان تكرهو شيئا وهو خير لكم
لكن انا مش هاقول لك وفيها ايه علشان مش تتنرفزي
انا هاقول لك انا مش فاهمة حاجة
فرع ايه وحاجات كده شكلك هتولعي فيا
هدي اعصابك يا جميل
تحياتي

Sweet Violet يقول...

بس على فكرة هى حلوة لو شوفتى منها الجانب الجميل
انه كسر روتين يومى يعنى تغيير
و كمان بيرجعك لأيام المذاكرة
^_^

همس الاحباب يقول...

هههههههههههه
العلم نورن يا دكتورة
وتعيشى وتاخدى غيرها
وبعدين الايام بتجرى
ودورة تفوت ولا حد يموووووت
تحياتى

أبــــو ضـــيــاء يقول...

ههههههههههههههههه
هي دي مصر يا عبله

رابطة هويتي اسلامية يقول...

فى إطار حملة مدونتى عنوانى تستضيف رابطة هويتى إسلامية المدون محمد غالية صاحب مدونة هل تبحث عن السعادة

فى نقاش عام وحوار مفتوح حول موضوع الحملة .

والدعوة مفتوحة للجميع للمشاركة معنا فى النقاش من أجل الإفادة والإستفادة

نتمني منكم مشاركتنا من أجل تدوين أفضل

تحياتنا

أسرة رابطة هويتي إسلامية

نـــــــــــــور يقول...

:))
ياعينى يادكتوره
والله صعبانه عليا زى حالنا بالظبط:)

غير معرف يقول...

مين اللي بعتك بس
وبعدين اخر مدينة نصر فين
الفرع بتاعكوا دا فين
واسمه ايه
وبعدين لها امتحان
بسيطة اوي تمتحني وتنجحي ومش تحضري


تامر

mohamed ghalia يقول...

هههههههههههههههه
دى حتة باعته
يلا يلا العلم نو (وش بيطلع لسانه)

Dr Ibrahim يقول...

كل بعتة وانتى طيبة:)

نهــــــــــار يقول...

السلام عليكم...
ههههه
اهي دورة تفوت ..
وإعتبريها سياحه في مدينة نصر ...
عدي على جنينه مول عاااااااادي...
...
كان اله في عونك يارب ...
وسهل أمورك..

قلم رصاص يقول...

هههههههههههههه

عادي جدا بتحصل في مصر

هههههههههههههه

ربنا يوفقك يارب ويعينك علي المشوار ده

دمتي في حفظ الله

Che يقول...

قلبى معاكى ... بس معلش ... كلنا بنتبعت ... الا هى مدينه نصر بعيده ولا اخر مدينه نصر هو اللى بعيد ؟ .. ههههههه

norahaty يقول...

م/أحمد ابو العلا
مبسوط وفرحان فيا
مــــــــــــــــاشى:(
واسمع ال أف أم وحالة المرور
واسمع ليه ما أنا بشوف حالة
المرور كل يوم بعيد عنك:
مقفولة مقفولة ياولدى:(

norahaty يقول...

Karim
أنا عارفة !
انت بتصبرنى انا عارفة
تجديد معلومات ماشى لكن
ليه الشحططة فى المواصلات :(

norahaty يقول...

فاطيما
شفتى البعتة
اللى اتبعتتها أختك:(
لولا الكسوف كانو ودونا
حلايب وشلاتين لأجل المناظر
و(الهمبكة)وأحنا اللى
نشحطط فى المواصلات والتكسيات
أقولك حسبى الله ونعم الوكيل
ما تنرفزيش نفسك طمطم
انا فوضت الامر لله
يورينى يوووووووم
فيهم كلهـــــــم

norahaty يقول...

شفقــــة هانم
وأحـــسان بك
حمدلله على السلامة
ماهو مش مرة وتعدى
دول ستة اشهر مع النفاذ
بعيد عنكم وما ادراكم
تاكسى من أخر مدينة
نصر للجيزة أنا
قربت اقدم
على قرض
للمواصلات بس:(

norahaty يقول...

م/محمود فوزى
وعليكم السلام ورحمة
الله تعالى وبركاته
الله يسلمك يارب
من كل شر وأذى
أنا انك طيب مش
شرير بس أهووووة بقى
عادة ومش قادر تبطلها
نرفززززززة الناس :)
ربنا معانا جميعا
على زحمة المرور
وكمان الحرررر

norahaty يقول...

أبو العريف
فرحان فيا
وانا اللى بقول
عليك طيب وبدعى لك
ترجع من الغربة بالسلامة ....
ولووووو حأدعى لك وادعى لكل
متغرب يعود سالم غانم لبلده
ولأهله ولوطنه ولناسه
وأخد الاجر والثواب
من الله وحدهـ
(وش مطلع لسانه)

norahaty يقول...

GiGi world
عشرة ايه بس ياجيجى
طب اياك ما أجبش
ملحق والعيال
تفرح فيا
ربنا
يسترررررررر:)

norahaty يقول...

عاشقة الاحزان
ما هو انا مش حاطة
فى دماغى أنا رجليا
اللى تعبانى وفلوسى
كمـــان الصراحة
التاكسيات قربت
تفلسنى خلاص:(

norahaty يقول...

شوكولاتة
خدعونى ياحبيبتى
كتبوا شهر واتاريها
ستة اشهررررررررررررر
منهم لله وربنا يرحمنا .

norahaty يقول...

استاذ المعتصم المنتصر
هنا يامرحبا يازعيم
وياريته تم الا الميك
عندنا بايظ يعنى نسمع
وما نتكلمش والنهاردة
كانوا عايزين يخدونا
غياب لاننا ماردناش
عليهم شفت الهنا:)
وبعدين يازعيم انا
عملت ناصحة المرة
وقرأت مش ما قرأتش
لكن خدعونى برضة
انا وكل اللى معايا
تصدق!كلهم جايين على اساس
شهر لا أكثر ولا أقل :(:0

norahaty يقول...

زهـــــراء
صح نوررررررن
نورررررن اوى
ومزغلل عيونى:)
لأ ياستى احنا معترفين
بالمواهب والقدرات
بس عاملين نفسنا
مش واخدين بالنا
ويارب اشوفك
منورة كده
فى الدستورية العليا
(مش أسمها كده برضة)

norahaty يقول...

soly88
خالص خالص
ياسولى وصعبة
التلمذة على كبر
دى:(

norahaty يقول...

كلمات من نور
ربنا يقوينا جميعاً
وعارفة ميعاد الانصراف
كام:الرابعة والنصف عصراً:(
ربنا يرررررررررررررررحمنا

norahaty يقول...

قبلاوى
معلش بس بعتة
عن بعتة بتفرق
بقولك بعدى الشارع
الاقى الشغل أو البيت
يقوموا يحدفونى الحدفة دى:(

اللؤلؤة يقول...

السلام عليكم
بعتة جميلة جداً
وأسعد الله أوقاتك
خالص تقديرى

norahaty يقول...

فكرة من الزمن دهـ
لأ انا مش حتنرفز
ولا ازعل ولا أتوتر
خالـــــــــص
خالــــــــــــص
انا هادية اهوه كويس كدهـ:)

norahaty يقول...

Sweet Violt
ايووووووووة
بس الجنب المتعب
بتاعها كبير شوية
مغطى تماما على الجنب
الحلووووووووووووووووو.

norahaty يقول...

همس الأحباب
ايوة نورررن
منوررررر جداً
يااستاذ خالد بس
اصلها مش ايــــام
دى ستة اشهر مع النفاذ:)

norahaty يقول...

أبو ضيــاء
ايوة هى دى
مصر بلدنا مهما
عملت فينا حتفضل
بلدنا وحنحبها برضه.

norahaty يقول...

رابطة هويتى أسلامية
جارى المتابعة
ووفقكم الله.

norahaty يقول...

نـــور
هــــو انتِ
أتبعتى برضه؟
ربنا يقويكى حبيبتى
كلنا لهــــــــــــا

norahaty يقول...

غــير معرف
مين بعتنى :لا ادرى
ولا احد يدرى وكل ما
تسأل المديرين مين اللى
كتب الاسماء أو على أى اساس
محدش يجاوبك خاااااااااااااالص.
الفرع بتاعنا فى الهرم وأخر مدينة نصر
الحى الالف على ما اعتقد:)
هل لديك اسئلة أخرى؟

norahaty يقول...

mohamed ghalia
بتغظنى يامحمد
وانا اللى بقول
عليك امير الأمراء
ماااااااااااااااشى
ولو حأصبررررررررر.

norahaty يقول...

Dr.Ibrahim
وأنت طيب يافندم
كلها سنتين وتشوف
البعت على أصوله:)

norahaty يقول...

نهــــــار
وعليكم السلام
عارفة فكرت أخد
شقة قانون جديد هناك
من طول وصعوبة المشوار
بس المشكلة انها مرتين
بس فى الاسبوع وباقى
الايام هنا:مشكلة.

norahaty يقول...

قلم رصـاص
كتر الف خيرك
للدعوة الحلوة
عى وجعل الله لك
مثلها وأحسن .

norahaty يقول...

Che
الله يخليك
هم الاتنين بعاد
بالنسبة لواحدة
بتعدى الشارع تلاقى
الشغل أو الــبيت :(

norahaty يقول...

اللؤلؤة
وعليكم السلام يافندم
وجـــــــزاك الله خيراً.

osama44 اسامه 44 يقول...

الله جامده اوى البعته دى
تعيشى وتاخدى غيرى
ربنا يوفقك فى الدوره

norahaty يقول...

Osama44
فرحان فـــيا
ولا زعلان عليا:)
ربنا يوفقنا جميعاً
لما يشاء ويـــــرضى

jonoon 3aqel يقول...

أبتسمي فأنتي..................................................................................دكتورة :)
====

شدي حيلك يا "طالبة العلم"...معليش..أصل الجري ورا أكل العيش بيتعب شويه...

و ان شاء الله يصلحوا الكابل و ترجعوا الفرع...>>>>>>> هي جات ع الفيديو كونفرس يعني!!!!!


يا الله...احتسبي الاجر عند الله

تحياتي

jonoon 3aqel يقول...

انا كنت كاتب..

ابتسمي فأنتي................................................................................. دكتورة :)

بس مش عارف اختفت دكتورة ليه؟!

norahaty يقول...

jonoon 3aqel
انــــا مبتسمة
اهو ياراشد :)
شايف الأبتسامة
اد ايه؟:):):)
اقولك ايه الحمد لله
على كل شىء:قضاء اخف من
قضاء كان ممكن يكون الدورة
فى محافظة تانية أو فى المريخ مثلاً:)
ماأحنا موظفين حكومة ولازمن ولابدن نسمع الكلام.

norahaty يقول...

jonoon 3aqel
ولا يهمك ياراشد
اكيد بلوجر بيهزر
معك ومعانا شوية:)

واحد من العمال يقول...

دوره تدريبيه وزعلانه !!
ده عندنا فى kz
إداره إسمها إداره التدريب
وبقالى عشرين سنه فى الشركه وعمرهم مبعتونى دوره تدريبيه
يمكن مش محتاج تدريب !!
أحمدى ربنا يادكتوره
ودوره تدريبيه تفوت ولا حد يموت

ودمتِ بخير حال

norahaty يقول...

واحد من العمال
ما أحنا برضة
عندنا إدارة
التدريب دى
وعمرهم ما
سألوا
فينا
لكن أعتراضى
على بعد المسافة وكمان
طول المدة :مش دا اللى مضيت عليه!

Angel يقول...


نوره ..

مسائك أو صباحك ورد

والله صعبتي عليا
بس معلش بقى احنا عارفين انك شاطرة وقدها

وربنا يعينك ويوفقك

(:

Angel love

norahaty يقول...

Angle
مساء النور
والورد والفل لكى
انا شاطرة!كاااااان
زماااااااااااااااان:(
وربنا يكون بعوننا فى الصعب كله.

Hina wi Hinak يقول...

LOL
حلوة أوي الكام يالهوتي دول :-)
أهم حاجة إن المشاور والتاكسي والوقت والجهد، يكون فيه "بدلات" تعوضك ولو عن بعضهم... (موش برضه إسمها بدلات؟!
اللي لفت إنتباهي خارج الموضوع ده، هو كلمة "إتبعت"، وكمان زيها كلمة "بعتة" ... الكلام ده ماكانش على أيامي!
شكلها كده إني ممكن أوي أحتاج لمترجم كمان كام سنة!

norahaty يقول...

Hina wi Hinak
أومآل انا بقول
يالهوتى ليه؟
علشان لا فيه
بدلات ولا
عمولات
ولا حاجة خالص:(
وكله بندفعه أحنا من
جيبنا:عرفت بقى يالهوتىىىى؟
وبعدين أنبعت دى كلمة عربية
فصحى:اتبعت بعتة فهو مبعوووت
عربى ولا مش عربى؟عربى طبعاً:):)