جهاز الضغط من الاساسيات للكشف على المريض
له معى حكايات وروايات وبسببه اتحولت للشئون القانونية للتحقيق واخدت الجزاء الوحيد
!!!والله فى حياتى الوظيفية :خصم يوم من المرتب ... مظلوم يابيه
المهم انا اسميه المغناطيس واحيانآ برطمان العسل واحيانا ال.... عيب ما اقدرش اكتبها
ليه لانى اتحدى اى مريض لأ مش اى مريض لكن اى انسان عادى يفوت عليه وما يريد يقيس الضغط
تقولش ياخويا احنا كملنا الاوصاف فى كل مجالات حياتنا ومشينا على الصراط المستقيم فى اكلنا وشربنا وعوايدنا الاخرى وبالتالى لازم نقيس ضغطنا كل شوية للاطمئنان عليه.
واحد حيقولى ماتقيسى انت وراكى ايه؟بس شاطرة تقولى بتشتغلى مش عارف كل يوم كام حالة!!!
والله ما مشكلة القياس لكن انا بشر برضة ولما اكون بكشف على العدد ده كل يوم40-60 مش ممكن ال60دول كلهم عندهم ضغط وكلهم لازم يقيسوا الحكاية ساعات بتزيد عن حدها وودانى بتبقى زى النار من السماعة من طول الوقت اللى محطوطة فيها وكمان العيان يقعد يتحايل قيسى لى الضغط والمهم بعد ما يقيس له وتقوله مثلآ140/80
يبص لك كده ويرفع حاجب وينزل التانى ويقولك امال الدكتور فلان قاسه لى وقال 145/85
امتى ياسيدى؟ دلوقتى؟امال ايه اللى جابك تقيسه تانى؟عايز اتأكد!!!فيها حاجة دى!!! تعمل ايه فيه ده........بالضبط كده بس مش ممكن للاسف اصلى بتكسف .وبرضةما يمنع واحد من المرافقين للمريض (قيسلنا بالمرة الهى ماتتحرمى من نضرك ياضكتورة)وواحد يجر التانى وممكن التالت كمان ولو قلت لأ تسمع طبعآ مصمصة الشفايف وتشوف لوية البوز التمام وهو ما فيش حاجة لله ابدآ
واحد حيقول ماتجيبى الجهاز اللى زى الساعة ولو على حسابك لو تعبانة اوى كده من السماعة حاأقول ما هو مضبوط زى الزئبقى ابدآ او يمكن انا اللى موضة قديمة واللى اتعودت عليه هو ده ومش سهل الواحد يغير عوايده .
طبعآ كمان الزميلات الحوامل من ساعة ما يعرفواويمكن من قبل ما يعرفوا بالخبر السعيد
معلش يادكتورة ممكن تقيسيلى الضغط؟ وليه ياستى؟ اصلى دااااااايخة شوية!!!
الجمله دى ممكن تتكرركل يوم لوممكن لحد الست ما (توضّع بالسلامة) وقيس
على كده الزملاء المخطوبين اول الواحد فيهم مايقول تعبان التانى يجيبه جرى
معلش والنبى يادكتورة ممكن تقيسيى له الضغط بيقول تعباااااان!!طيب
ما هو ممكن من العشر سندوتشات فول اللى فطر بيهم مثلا.......!!!
او البادنجان المخلل اللى فتحت نفسها به على الفطار......!!!وطبعآ
الاقارب والزوار بتوع الموظفين الاداريين والجماعة بتوع الحسابات
(والا حيغلطوا فى كشف المرتبات واستنى بقى يادكتورة........
(وخللى بالك من استنى دى) لما يتعمل لك شيك بالمبلغ الناقص
طبعآ فى مواسم الامتحانات بتاعة العيال ونتايج المدارس والشهادات
وخصوصآ الشهادة الماحقة الفتاكة القهارة المسماة الثانوية العامة
القياس فيها بيبقى للركب وكل عيل خايب سقطان تيجى الست الوالدة منهارة
تانى يوم ومعيطة ومبكررة عينها اد كده وقيسى لى الضغط عندى صداع
ماهولازم ياستى يجى لك الصداع بعد العياط ده كله...لأ ابدآ مش معيطه ولا حاجة!!
وحاجات كتير من ده الواحد بيقابلها كل يوم
ولو الواحد قعد يحكى من هنا لبكرة على عجائب البشر ما حيخلص
اما التحقيق الوحيد والجزاءالوحيد فده حكاية تانية احكيها بعدين
علشان ما أطول والناس تزهق مننا والناس مش ناقصة زهقان :الحر والغلاء مكفينهم
.........................................................
البوست المرة دى من وحى الحياة اليومية فى العيادة
وكمان من وحى بوست يمكن قديم شويه فى مدونة صديقة
كنت قرأته من مدة لكن لم انساه ابدآ لانه فعلا بيصور
العلاقة بين الطبيب والمريض (وخاصة المريض المصرى )بمنتهى الاتقان
.jpg)
هناك 70 تعليقًا:
بجد بجد
كان الله بعون الدكاترة
Hi! I am happy to repay the visit.
His blog is very good, like to come back here.
I think you just came in my profile, visit my blog.
http://mulherdiferente.blogspot.com/
From the get people to be speaking English or Arabic you prefer? Use the tool Google get translated, is both for me.
Kisses
Stay with Allah
هههههههههههههههههههه
الله عليكى يا نورا
والله انتى صورتى جزء من حرقة الدم بتاعة كل يوم
والكارثه انه ماعدش فيه حد عندة دم
كله بيستظرف على كله
ويلا ماهى تكيه
بجد ربنا يكون فى عوننا ويهدى الناس
اة صحيح
نسيت اقولك ان مقاطع الفيديو اللى انتى حاطاها حاجبه شويه من الكلام
ونسيت اقولك طريقه تخلصى بيهات من وجع القلب بتاه قياس الضغط
بعد ما تلفى الكف افضلى دوسى لحد ماتعدى ال 250 وسيبيه كدا دقيقه:))
هاتلاقيه حرم يقيس الضغط تانى:))
تقبلى تحياتى
لما حد بيعرف ان الواحد مدرس بيساله عن ملزمة وان عرف انه مهندس بيساله عن حل لبيتهم اللى هيقع وان عرف انه دمه خفيف هيساله على نكتة فطبيعى لما يعرف انك دكتورة هيسالك عن ضغطه اهى اى مصلحة والسلام بس عشان حضرتك محترمة وبتتكسفى فبتعملى ده فى دكاترة بيبقوا واخدين كشف اد كدة ومع ذلك الواحد ما يجرؤش يساله هو عيان بايه اصلا من كتر تكشيرته كل المهن متعبة يا دكتورة بس الجزاء عند الله .
اه صحيح ما تعرفيش تقيسى لى الضغط ع النت !!ههههه
كل سنة وانت طيبة
كل سنة وانتِ طيبة والله يكون في عونك يارب وكل الناس تعبانه من بعضها المرضى طول عمرهم بيشتكوا من الدكاترة والدكاترة بيشتكوا من المرضى والطلبة بيشتكوا من المدرس والمدرس بيشتكي من الطلبة المحصلة
مافي حد مرتاح ومالناش غير اننا نصبر ونحتسب
هههههههههههههههههههه
ايه ده دانا كنت جي المدونه مخصوص عشان اقيس الضغط هههههههههه
معلش بقي يا دكتوره انتي شايفه اللي بيحصل حوالينا ده كله ما يجبش الضغط والسكر وحرق الدم
ايه اخبارك يا دكتوره مع الصيام والعزايم وكده مممممممممم بالهنا والشفا طبعا
كل سنه وانتي طيبه يا دكتوره ومن غير لا رفع ضغط ولا حرقة دم العيانين
Hi! True, our world still does not permit this. The world would be much happier if allowed. I am in my linking your blog, pra maintain contact. I love the culture of you! Not yet had the opportunity to meet, but until now I dreamed that i was with my husband. I had a basic course of the belly dancing, I have many songs Arabs, won one of narguile of this anniversary, finally the culture of you is beautiful!
Kisses
طبعا قرأت مآساتك مع قياس الضغط و ان كانت محتملة
لكن لا استطيع ان ابدي اعجابي بفكرة بلو واف السادية
و اعتقد ان اغلب الدكاترة ساديين و لا انتي ايه رأيك ؟
السلام عليكم ورحمة الله البوست جميل جدا جدا جدا وبيمثل مأساتك مع هذا الجهاز المتعب لكن ما باليد حيلة حتى لو كنت بتشتغلى أى حاجة تانية كنت هتلاقى اللى يطلب منك طلب يطلع منه بأى حاجة منك والسلام... لك تحياتى
كل عام وأنت الى الله أقرب
ومنه أخوف
وبه اعرف
والى دار كرامته اسبق
لا تفوتى الواجب الرمضانى
وقفة محاسبة قبل رمضان
بينى وبينك انا مش قوى فى الدكترة بس الكلام ده ميجيش غير من دكتورة
كل سنةوانتى طيبة
السلام عليكم
كل سنة وحضرتك طيبة
اجمل حاجة الواحد يروح للدكتور لما يتعب بس وفي ناس بتطلب كشف الضغط كنوع من انواع العادات لا اكثر
تحياتي لك
هاني
ر
م
ض
ا
ن
ك
ر
ي
م
تحياتى
ودي مش اول مرة ازور مدونتك
اتمنى نبقى اصدقاء
كريم بهي
دكتور..هو فعلا كل حاجة ف الحياة تجيب الضغط ..بس على فكرة الضغط متغير بين لحظة والتانية يعنى انا لما اقيسة وبعديها بشوية اقيسة الاقية اتغير..تفتكرى اية السبب وبعدين مش عارفة انا لية الضغط منخفض عندى غالبا بس ما بياثر عليا فى الحياة اليومية
شفتى انتى هتقرى التعليق وتقولى...كما هنا فى المدونة اسئلة طبية؟؟(:
ماعليكى تلاقيكى انتى الحين رفعو ضغطك..دكتورة..كلة بثوابة بس حاولى استحضرى النية لله عشان تاخدى ثواب فى ميزانك..لان النفس أمارة بالسوء وسبحان الله فى حاجات كثيرة بنعملها لمجرد اننا المفروض نعملها بحكم عملنا ووجودنافى مكان معين فقط لا غير دون استحضار النية..وهذا لن يأخد منا ذرة جهد..تحياتى
السلام عليكمورحمة الله وبركاته
سفروتة
بجد بجد بجد
جبرتى بخاطرى
وخاطر الدكاتيرررر
كلهم.ربنا يجبر بخاطرك
يارب يارب يارب يارب
HI
jhennifer Cavassola
And i am happy u came back.AS i said i hope to begood friends 4 each other.I visted your blod,verynice in fact and inspiring Ihope u find my blog is intersting to.THANKS
السلام عليكم ورحمة الله وبركاته
blue-wave
انا قلت ماحدش حيفهمنى ويحس باللى بقوله اوى الا الدكتور عمرو وفعلآ
اديك قلت اللى عايزة اقوله واكتر
شوية .انا مش اعتراضى على المرضى,دول على عينى وراسى انا اعتراضى على زى ما انت بتقول(كله بيستظرف ....)وللاسف!!
ربنا يكون فى عون الجميع يارب
السلام عليكم ورحمة الله وبركاته
blue -wave
كلاكيت تانى مرة
انا مش فاهمة الصراحة يادكتور ازاى مقاطع الفيديو حاجبه الكلام ,على العموم جارى بحث المشكلة وعمل اللازم لاصلاحها(حلوة الحتة المخاطبية الحكومية دى!!).
صراحة يادكتور ما اقدر اعمل الطريقة دى لاى انسان اولا لانها مؤلمة!! وثانيآ ودى فى بالى على طول ممكن انا او اى حد يهمنى امره أكون مكان المريض فى اى يوم من الايام وبالتالى كله سلف ودين وزى ما بأقول ربك رب قلوب.
شرفتنى ونورتنى بوجودك وبكلامك
وتشكراتى ودعواتى وتحياتى.
السلام عليكم ورحمة الله وبركاته
أ.هانى زينهم
مضبوط كلامك والله يامستر هانى اهى اى مصلحة تتقضى والسلام طالما انها ببلاش!!!
والدكاتير بتوع التكشيرات المهولة دى انا ماليش دعوة بيهم الصراحة انا مبتسمة دايمآ والله :)حتى شوف اهوه:)
وربنا يصبرنا على اكل عيشنا يارب يارب
الحمد لله لسه ما اخترعوا طريقة يقيسوا بيها الضغط عن بعد(اشكرك يارب...:)
ههههههههههه
عندك حق والله .. بيقولوا أسوأ انسان هو العيان...
و واضح إن المقولة دى حقيقية.. بس أنا أحب أضيف لها حاجة : إن أكتر انسان شكاك ف الدنيا هو العيان.. بيشك ف نفسه وف الناس اللى حواليه وف الدكاترة وبيشك حتى ف الدوا نفسه!!!!
فى انتظار قصة الجزاء والخصم
دامت أيامك مبهجة وسعيدة
السلام عليكم ورحمة الله وبركاته
Two in One
كل سنة وانتى بألف خير يارب
ومفيش حد مبسوط من حد انا عارفة حتى انا بسشتكى من نفسى ساعات وبقول الله يكون فى عون الاخرين منى :)
ربنا يصبرنا على احوالنا كلها
وتشكراتى للتواجد اول مرة هنا والتعلق اللطيف كمان
تحياتى ودعواتى
السلام عليكم ورحمة الله وبركاته
محمد الفارس الملثم
كل سنه وانت بالف خير
بقى كده!! يعنى لولا كده ماكنا شوفناك ....ولا عال ياعبد العال!!! بقى دى الصداقة ياصاحبى ما كانش العشم ياصاحبى!! ياصاحب الليل واخره.
مرة تانية كل لحظة وانت بالف خير
يا محمد
ياصاحبى
والله يا دكتور نورا أنا مشكلتى شكل تانى وتالت كمان
الشكل التانى آخر حاجة بفكر فيها صحتى ونادر جدا جدا لما بسأل فى العيادات والمستشفيات
أنا مشترك فى بريما هيلث ونادر لما اكشف وبأستحمل آلام كتير لغاية ما تخف لوحدها.من نوع كاللو دوالى صداع قولون ركبة.
الشكل التالت باتكسف آخد وادى مع الدكتور وبأقول يعنى الراجل مش فاضى وهو هايعرف كل حاجة لوحده من غير ما اضيع وقته ارمى الشكوى فى عنوان رئيسى وبعد كدة هو يسأل ما يسألشى براحته بقى.
فى النهاية باخرج من عنده مش مبسوط والعلاج يوم والتانى وابطله.
ممكن بلييز"بى تقيلة" تترجميلى الحالة السكولوجية"بى تقيلة برده" للمرض النفسانى ده وبالمرة تقيسيلى الضغط برشر "بى تقيلة تانى برده".
باى ذا واى"بى خفيفة"
متشكرين للناس اللى ما بينسوش الناس
وعلشان ما كترش
رديت عليكى حتة رد فى مدونتى... عجب
تقبلى أروع تحياتى:
السلام عليكم ورحمة الله.
السلام عليكم ورحمة الله وبركاتهJhennifer Cavassola
yes my blog' friennd
our modern world does't primt
childern 2 live their childhood
it maks us to grow up sooooo rapid
I am very happy that u love arabic songs amd music BUT i want to say a word our arabic culture is
not (belly dancind or narguile
NO my friend a lot of good things
u need to know more
THANKS
السلام عليكم ورحمة الله وبركاته
Jack Sparrow
القصة محتملة وواقعية وشديدة الوجود والتواجد ومستمرة ومتكررةلىّ وللاصدقاء من الاطباء الاخرين وكل فرد بيجى يقيس الضغط بيشوف نفسه واحد ايه يعنى حيزيد عليكى ايه فى الشغل(ده بيقول لنفسه طبعآ)لكن حقيقى هو ليس واحد بل (وحايد كتيررررررررررررررررررر)
يريدون نفس الشء من نفس الشخص!!!
وblue wave ما قصد ما قال حقيقة والا ما وضع علامة الوجه الضاحك بعد كلامه.
(اعتقد ان اغلب الدكاترة ساديين و لا انتي ايه رأيك ؟)انا مش حاجاوب وحاسيبك تظلمنى والاطباء الاخرين لاجل ما ناخد اجر وثواب على الظلم ده!!!
نهارك ابيض وكل يوم وانت طيب:)
السلام عليكم ورحمة الله وبركاته
Lady
مضبوط كلامك
فيه مثل ماعرفش
إن كنتى تعرفيه ولا لأ:
بيقولك (اللى يجى منه احسن منه)
وفعلا لو بتشتغلى اى مهنة سوف تُسألى عن شىء,والله انا مابضايق من المرضى لكن طائفة المنتفعين ببلاش من اى حاجة واى حد دول الى بينرفزونى ويضايقونى.
تحياتى لمرورك وكلامك
السلام عليكم ورحمة الله وبركاته
المحارب المتيم
الاديب العاشق
عرفة الاسيوطى
كل عام وانت بألف خير
وامين يارب العالمين
لكل دعواتك الطيبات
وجعل الله لنا ولكم
وللمسلمين اجمعين حظآ
ونصيبآ منه إن شاء الله
وماهو انا طبيبة ياعرفة
ولا انت كان عندك
شك للحين!!(وجه مستغرب)
كل سنة وانت بألف خير
السلام عليكم ورحمة الله وبركاته
باقى الاصدقاء الاعزاء
استئذن فى الرد بعد العودة
من العمل إن شاء الله لى العودة
وصباااااااااح اااااااااااافل
على اااااااااااااااااااااالكل
ياحرام !!!
السلام عليكم ورحمة الله وبركاته
hany yassin
اجمل حاجة فى الدنيا هى الصحة
فعلا والله الصحة دى نعمة من الله
وصدقنى ياأستاذ هانى ان الثقة فى الله
والايمان بانه ما بيعمل للانسان الا الخير
بيخفف الكثير جدآ من متاعب والالام.
وادعيلى الناس تهدى كده شوية من
برطمان العسل؟؟معلش قصدى جهاز الضغط
تحياتى لمرورك ولتعليقك.
السلام عليكم ورحمة الله وبركاته
كريم بهى
الله اعز و اكرم
طيب فكرنى كده امتى
اول زيارة معلش انا ناسية؟
وعلى العموم يسعدنى تبقى زائر وصديق دائم للمدونة ومرحبآ بك فى كل زيارة وكأنها اول زيارة فأهلا و أهلا وأهلا وأهلا بك دائمآ.
السلام عليكم ورحمة الله وبركاته
بنت سيناء
بنت الارض الغالية
لأ ياستى مش كل حاجة فى الحياة تجيب الضغط الكركدية الساقع بينزل الضغط ماتخافيش (معلومة طبية مجانآ اهوه )وبعدين لما الضغط يتغير من لحظة للتانية حتعملى ايه؟تمشى بجهاز ضعط معلق فى يدك؟
مش معقول طبعآ!! علشان كده القياس مايبقى متكرر بغير مناسبة :ساعات فرح ساعات حزن ساعات توتر ..طب وبعدين؟ والنية دى بقى بينك وبين ربنا سبحانه وتعالى ربنا يحسن نياتنا جميعآ
حبيبة قلبي وحشتني جدا جدا
علي فكرة حاولت اكلمك كذا مرة علي الماسنجر مش لقيتك اية ياقمر البوست الجميل دا انا اغيب اجي الاقيكي منزلة بوست لذيذ كدا ياصفايح الزبدة السايحة بس والله معاكي حق اي واحد يروح لدكتور عايز يقيش الضغط حتى لو دكتور سنان هههههههههههه يمكن المصريين يحبوا يتبعوا مبدا ابو بلاش كتر منه يعني لما تلاقي في صيدلية مثلا تقولك قياس الضغط مجانا هوبا تلاقي الناس كلها في الصيدلية عايزة تقيس الضغط اصل يادكتور حاسس اني دايخ هههههههههه وربنا يقوييكي ياقمر
ورمضان كريم اوعي تكوني ماخدتيش الفانوس دا انا اخده رهن لحد رمضان بس ههههههههههههه
خالص حبي وتقديري
يوووووووو استني نسيت اقول حاجة انتي عملتي اشراف علي التعليقات ليييييييييية ؟ اوعي يكون حد ضايقك ولا حاجة قوليلي بس عليه انا اشوف شغلي معاه انا معنديش غير نورهاتي واحدة ربنا يخليها ليا يارب
سلاموز
السلام عليكم ورحمة الله وبركاته
مها الغالية
سمعينى ضحكتك كمان وكمان ...اول مرة اسمعا يا مها!!! الحمد لله رب العالمين
انتى حتقوليلى على الشك عارفاه ايوة اللى بيشك ده ......
الجزاء والخصم اه واه احكيلك عليه بعدين إن شاء الله
ويسعد ايامك كلها يارب
يوم لما شفت تعليقك في مدونتي فرحت جدا انك استجبتي لدعوتس أو عجبك شيء في المدونة وفرحت أكتر عشان هأكتسب قارئ جديد ومعلق على كتاباتي بس مش عارف انقطعتي ليه مع اني بأنتظر تعليقاتك باستمرار ممكن أعرف السبب ولو مكانش فيه غير السهو والنسيان يبقى مدونتي مازالت تنتظرك..
كل ودي
أنا مستني قصة الجزا والخصم ....
بنفرح إحنا في الحاجات المصيرية دي .... يوم واحد بحاله ... يا قوة الله
السلام عليكم ورحمة الله وبركاته
مع اصرارى
وعزمى وتصميمى
اولا انت شرفتنا ياأستاذ مصطفى
وثانيآ أنا ما بقول نهمل فى صحتنا او لا نفكر فيها لكن بالعقل كل شىء وخير الامور الوسط
وثالثآ ياريتك كنت من مرضاى ولو أن الواحد برضه بيقابل مرضى كتير امراء زى حضرتك والواحد بيبقى مكسوف من كتر ادبهم لكن من الضرورى تحكى للطبيب كآفة ما تعانى منه لانها بتساعده على تشخيص المرض وكمان تخرج من عنده وانت مبسوط لانك حاسس انك اخدت حقك وشرحت كل شىء.
وتشخيص الحالة :أدب مفرط وأخلاق عالية
وبليز (بى تقيلة) متخلنيش اغير رأيى وتقولى قيسى لى (البلدبريشر بى تقيلة تانى مرة )كده حأرجع فى كلامى !!!!
واول ذاواى(من غير بى خالص)متشكريين لحضرتك جدآ جدآ جدآوبأستأذن احط(رابط)
لألألألألأانا حاحط الكلام كله فى بوست مخصوص
هو الواحد ياخويا كل يوم بيتقال فيه الكلام الحلو ده!!!
مرة اخرى شكرآآآآآآآآآ
وتشكراتى ودعواتى
السلام عليكم ورحمة الله وبركاته
انا هو انا
متشكريين !!!
أهلا! كما الفاي؟
وأنا أعرف هذا لانني قرأت بعض كتب عن ثقافة وكنت اعتقد ان من الحكمة والغنيه جدا. هل تعتقد ان تناضل في سبيل وهذا امر في غاية الاهميه والجميلة في العالم التي لا يزال لدينا اليوم.
- كما
salamu alaykum
Hi! As vai?
I know this because I read some books about the culture of you and I think very wealthy and wise. Do you believe that fighting for and that is very beautiful and important in the world that we still have today.
As-Salamu Alaykum
لديك ام) MSN)؟
You have IM (MSN)?
خلى بالك اوعى يجيلك ظغط
وهو الشعب المصري كدا
والدكاترة المصريين كدا بردوا
محدش عاجبه حاله
بس الجزا دا ظلم
بس ايد هو الوحيد
انا بطمن بس مش اكثر
تحياتى
ليه؟
عزيزتي
متهيالي في عملك تمريض بيساعدك مهمته يشوف العلامات الحيوية كلها وانتي تقومي بباقي شغلك
مش كده ولا ايه
السلام عليكم ورحمة الله وبركاته
بنات وملكات صاحبة الجلالة
ياصباح الانوار والفل عليكن كلكن
واديكى انتى بتقولى اهوه .والله ياروبى فيه ايام ماببقى عارفه فيه ايه؟ او حصل ايه؟ من كتر الناس اللى عايزة تقيس الضغط من غير المرضى المهم (لماّاسأل واتقصى)يتضح ان كان فيه برنامج عن قياس الضغط مثلا فى الاذاعة او تمثلية والبطل حصل له (حاجة وحشة)علشان ضغطه كان عالى ومكانش يعرف.
ويارب ربنا يقوينا كلنا على اكل عيشنا .الفانوس اخدته وتشكراتى عليه
وربنا يخليكوا لىّ يابنات يااااااااارب
السلام عليكم ورحمة الله وبركاته
بنات وملكات صاحبة الجلالة
(كلاكيت تانى مرة)
ياستى عملت الاشراف على التعليقات
علشان(.........................
..............................
..............................)
عرفتى بقى الحكاية من طقطق للسلام عليكم
شوية كدة وكل شىء يرجع للسابق إن شاء الله تعالى وربنا يهدى الجميع يارب
السلام عليكم ورحمة الله وبركاته
كاتب مصرى
فعلا الزمن والانشغال وزحمة الحياة اخذتنى بعيدآ عن (كأننى اتكلم)فترة طويلة .اعدك بالقراءة والمتابعة والر بعد العودة من العمل إنشاء الله
تقبل اعتذاراى عن سهوى ونسيانى
ولك تحياتى وسلاماتى ودعواتى
السلام عليكم
jhennifer cavassola
I am happy that u love and know that arabic culutreis very rich and (not only belly dancer as some forigher film maker always say in their films.
HOPE you enjoy readind my blog and others
AND AL SALAM ALIKOM
السلام عليكم ورحمة الله
JHENNIFER CAVASSOLA
AS SOON AS I HAVE IT ,I WILL SEND IT TO YOU.
MY BEST WISHES
السلام عليكم ورحمة الله وبركاته
كريم بهى
ربنا يبعد عنا جميعآ الضغط والمرض وكمان يشفى كل مريض يارب
طيب حاقولك ايه بدال احنا وهما ودولاهم ودوكهم وناس منعرفهاش كده!!
الرضا بالحال من اصعب الاشياء والاكانت كل كل كل كل الناس بقت مبسوطة
وشكرآ لطمئنك !!!!!!!!!!!!!!
السلام عليكم ورحمة الله وبركاته
انت من كنت محتاجآ
واغناك الله من فضله
خليك مستنى عندك لو سمحت
وانا حاجى احكى لك كل شىء
بتفرح !! شكلك زعلان انه يوم واحد!!
ياقوة الله على بنى البشر !!!!! امال عايزة مؤبد!! على العموم هانت كلها حبة صغريين وحتشتغل وتعرف ساعتها !!
واحنا كمان إن شاء الله حنعرف !! ايوة اصل مفيش حاجة بتستخبى فى المدونات!!
السلام عليكم ورحمة الله وبركاته
انا هو انا
علشان
(......)
بس كده!!
سلام عليكم
تصدقى الابتسامه ماسبتش وشى طول ما انا بقرا البوست ده. لانى فهمت دلوقتى ليه الدكتور أحمد صاحبى بينفخ كل ما يلاقينى داخل عنده الصيدليه. اصل انا من الناس اللى غاويه تطمن على الضغط كل شويه. والله مش بمزاجى انما لان الضغط عمل حركه مش ولا بد مره فيا ومن ساعتها وانا عينيا عليه. وكل ما اروح ازور احمد فى الصيدليه اقيس الضغط او بعمل العكس مش عارف.
عاوز اقولك حاجتين يا دكتوره. اولا طبعا واكيد انتى عارفه ان فى جهاز ديجيتال جديد نزل واستخدمته وبيتلبس على دراع المريض وهو يقيس لوحده ويطلع النتيجه والحقيقه انا جربته ونتيجته كانت كويسه ودقيقه مينفعش تستخدميه؟ الحاجه التانيه عاوز ابقى مطيباتى واقول صبرك على الناس وحطى شوية صبر على صبرك وهدوئك الواضحين. والله الناس غلبانه واهى حاجه تطمنهم على نفسهم فى وسط القلق اللى عايشين فيه. انا عارف ان من غير وصيه منى بتعملى كده بس زوديها شويه....خالص تحياتى يا دكتوره وشكرا
ههههههههههههه
ههههههههههه
بوست بجد زى العسل , زى جهاز الضغط يعنى
ومعلش طولى بالك على الناس شوية يا بروف , او هاتى جهاز ديجيتال هايريح دماغك , او علقى يافطة مكتوب عليها " الضغط ممنوع , منعا للاحراج " D:
متحرميناش من بوستاتك الرائعة دى
c ya
السلام عليكم ورحمة الله وبركاته
mohamad dawod
عرفت بقى صحبك بينفخ كل ما يشوفك!!
طيب الحمد لله .عارف والله ياأستاذ محمد لا ادعى انى اعلم الغيب لكن الحين اصبجت اعرف اللى داخل عندى عايز ايه؟ ممكن ان الناس بترددوا على كتير وبقيت عارفة معظمهم وايه رغبة كل حد فيهم ومن ناحية التانية ممكن بيبقى باين فى عيونهم عايزين ايه.
الجهاز الديجتال الصراحة ما انا واثقة فيه جربته كذا مرة وما عاجبنى !!
ولما هو سهل ومضبوط كده ليه انت ما استعملته و(ريحت صحبك دكتور احمد من النفخ!!!!!!!!!!!!!!!!!!!!)
متشكرين للمرور والتعليق كمان
وللتوصية كمان(الدين النصيحة)
Hi!
Shukran
I am happy!
I will wait!
SALAM ALIKOM
السلام عليكم ورحمة الله وبركاته
كلام حسام
كلام جميل
بس زى ما انت بتقول :بيتهأللى !!واخدلى بالك بيتهيألى !!علشان انت عارف (((المساعدة )))من التمريض دى ما بنشوفها الا فى الافلام بس !!صدقنى
وكمان رسميآ وطبيآ وقانونيآ قياس الضغط من عمل الطبيب ودى يمكن من الحاجات اللى مايعرفهاش كتير من الناس
*قياس درجة الحرارة مسئولية التمريض
قياش ضغط الدم :مسئولية الطبيب
علمونا كده زمان .
وتحياتى لك ولكلامك اللى بنتشرف بوجوده وووجودك كمان فى المدونة النهاردة لاول مرة ...شرفتنا
السلام عليكم ورحمة الله وبركاته
Wael
يادى المساء الجميل
ايه يابروفسييراللى بيضحكك اوى كده!!
هانت وبكرة تخلص وتتخرج وتشتغل وتفتكر كلامى وتقول اه قالتلى كده وقلتلها طولى بالك :والله مطولاه على الاخر بس زى ما قلتلك طائفة( اللى يجى منه احسن منه)دول هم اللى بينرفزونا
وسبق وقلت انا موضة قديمة ما بقتنع الابالجهاز الزئبقى (الديجتال مش مضبوط صدقنى ممكن لحالة او اتنين لكن مش يستحمل الكم الرهيب من البشر اللى عندى
((اعلق يافطة)!!!!!!!!!!!!!!!!!!!!!
انت ناوى على تحويلى للنيابة الادارية
على مايظهر (حاقولهم ساعتها انت اللى قلتلى شوف حيحصل ايه!!!)
وشكرى انا اكبر يابروف لتواجدك معنا
وامتاعنا بتعليقك اللطيف.
Jhennifer Cavassola
Hi
welcome
i am happy to
so soon i will
have it
my best
regardes
العزيزة نورا
بعد السلام عليكم
لا يوجد ما يمنع ابدا من مساعدة التمريض ورسميا وفعليا من اولي مهام التمريض قياس العلامات الحيوية
لنفترض مستشفي ما وقسم ما به بعض الحالات ومنها حالة اكتشف التمريض انها حالة غير مستقرة
الخطوات الواجب اتباعها عالميا وليس محليا قياس العلامات الحيوية للمريض من قبل التمريض وتجهيزها لحين وصول الطبيب المعالج
الطبيب من المفروض ان يعيد قياس الضغط للتاكد فالكل منهم مسئوليته
والمفروض في التريتمنت شيت خانات للعلامات الحيوية كل 6 ساعات او 8 ساعات علي حساب حالة المريض
السلام عليكم
ازيك يا نجمه
اكيد انا حاسس بكل اللي بتقوليه لان ده واقع ملموس ادامي يوميا
لكن الشعب المصري زي مانتي عارفه الوسواس عالي شوية
لكن هنعمل ايه ده نصيب كل من هو عضو في medical care team
وربنا يوفقك يا ملاك الرحمة
ملحوظه رفيعه : الفيديوهات اللي حطاها ممكن تصغري حجمها بحيث ميجيش علي الكلام لان في حجات في البوست مش باينة
لما الحجم يصغر هي هتروح في الجنب ولو في اي استفسار هستناكي
دمتي بخير اختي
برقش
السلام عليكم
كل عام وأنت بخير
علاقة المريض بالدكتور فعلا لازم ضغطها يتظبط شويه...
الواحد من دول فاكر إنه طالما قاعد أمام دكتور يبقى هو لازم يكون مريض ... وإن الدكتور معاه العصا السحريه ...ضربه كده يعرف عنده إيه ..وضربه كده يعالجه...وهو معندوش حاجه أصلا ....
يللا الله المستعان ..
تحياتي
سلام
السلام عليكم ورحمة الله وبركاته
كلام حسام
كلام جميل
والله أنا لاامانع من المساعدة والمعاونة إذا توافرت وبالشكل اللائق ولكنى لا ادرى هل تعاملت مع (فتوات تمريضنا البواسل)ام انك تتكلم عن( تمريض المستشفيات الاستثمارية ومستشفيات الافلام والاحلام)
كما وان المريض لا يثق الا بك انت فماذا تفعل ؟إن كان قد قاسه عند زميل لك قبلك ولكنه لم يأخذ بقراءة واحدة فهل سيقتنع بأن تقوم الحكيمة او الممرضة بقياس الضغط له؟
السلام عليكم ورحمة الله وبركاته
bar2ash
اللى اسمها نجمة ترد بسرعة على برقاش العزيز لو سمحت!!!!!!!! .
لايوجد نجمة هنا يا زميل medical care teamفنحن كلنا اخوان واصحاب واصدقاء
ربنا يوفقنا كلنا يارب لحسن العمل بما يرضيه تعالى .ومتشكرين لملاحظاتك وعرضك للمساعدة وجارى اصلاحها
وتحياتى وسلاماتى ودعواتى وتشكراتى.
السلام عليكم ورحمة الله وبركاته
dr.m.
وكل عام وانت بألف خير إن شاء الله
دا انت باين عليك شايل كتير فى نفسك من موضوع (علاقة المريض بالدكتور)!!
هى صراحة علاقة (مخصوصة اوى ))بمعنى هات لى اى نوع اخر من العلاقات يأتى فيها الشخص بأبنه اللى هو اغلى عليه من نفسه لانسان اخر ليقول له تصرف كيف تشاء لكن المهم ان يشفى !!!!
لما تفكر فيها تلاقيها علاقةمبنيةاساسآ على الثقة العمياء فى شخصك الكريم !!!!
ربنا يجعلنا اهلآلهذه الثقة
وتشكراتى لك ياطبيب.
السلام عليكم
ههههههههههههههههه
معلش ربنا يقدرك يارب ويجعله في ميزان حسناتك يارب
احنا هنا في مصر ضربنا الحقيقة الرقم القياسي في الاستغلال والاستقطاع
ربنا يطول بالك ويؤجرك خير
رمضان كريم
السلام عليكم ورحمة الله وبركاته
نونو العزيزة
ام يوسف
اللهم امين لك
دعواتك الطيبة
ويرزقنا وينعم
علينا بنعمة الصبر
على كل شىء
وتشكراتىلحضورك
وتعليقاتك.
كنت معجبه شويه ..
وكنت بدأت احبك ..
بس خلااااااص بماانك دكتوره "انسى"
هههههههه
تدوينه ظريفه , وتخيلتها من خلال كلامك
بس على فكره انا فعلا اخاف منكم
واخاف من الابر , ومن جهاز الضغط اصلا
ومستحيل افكر اعمله "اللهم احفظنا"
الله يعينك
وكل عام وانتي بخير
عندك كل الحق في كلامك
والتفاصيل دي بتتكرر بأشكال مختلفة في مهن مختلفة لدرجة مستفزة وفي بعض الأحيان بتكون الردود عليها تحتاج لقدر من السخافة وزي ما قولتي نتيجتها الطبيعية لوية البوز ويقولوا طالع فيها على ايه وشايف نفسه وما إلى ذلك من مواصفات الغرور
المهم مطلوش عليكي احسن خلاص الضغط عِلي عندي
إلا صحيح بالمناسبة
مش ممكن تقيسي لي الضغط :)
وليد
السلام عليكم ورحمة الله وبركاته
عارفة..... مش عارفة ليه!!!
كلامك مضبوط وزى ما قال المثل (ايه احلى من العسل ؟
الخل لو كان ببلاش!!
حتى انت يابروتس ؟؟
قصدى حتى انت ياوليد؟؟؟
اوكى مفيش مانع
تعالى يوم ايه شهر كام الساعة كذا
وانا ابقى اقيس لك الضغط باذن الله
تحياتى وتشكراتى
إرسال تعليق