الجمعة، أكتوبر 24، 2008

موقف بايييييييييييييييييييييييييخ ......



هو موقف بايخ من زمااااااااااااااان اوى ومع ذلك لا انساه بالرغم من مرور كل السنين دى
حتى انى عندما اُسئل الان عن ابوخ المواقف التى تعرضت لها فى حياتى (وطبعا هى كثيرة)اعد هذا الموقف من احدهم
المهم احكى عنه فقد كنا فى راوند(العملى) بتاع الكارديولوجى=القلب
يُسمعنا نائب القسم حينها (وهو على فكرة الحين طبيب مشهور اوى بيجى كتير فى التليفزيون والاذاعة وربات البيوت وفى المؤتمرات الطبية)يسمعنا المعيد حينها
دقات القلب المريض
من على شريط كاست التقطه هو وسجله وجابه لنا (خلى لى بالك من المجهود الجبار اللى عمله )المهم الراجل شغال واخر مزاج وقول ايه اللى سحبنى من لسانى (وانا كنت وما زلت من اجبن مخلوقات الله إن لم اكن اجبنهن )بس مش عارفة ايه اللى سحبنى من لسانى ساعتها وخلانى اقوله: مش مفروض نسمع الدقات السليمة الاول يادكتور وبعدين نسمع المريضة!!!
بس عندك والله والله والله لو رميت دبوس ابرة ساعتها كنت سمعت صوته
الراجل راح ملفوت لى اوى
وبالضبط زى ما رئيس الملجأ
فى قصة اوليفر تويست
لما طلب منه شويةزيادة
وقال له:
I want some more!!!!!!

وراح نازل بالكبشة فوق راسه من غير كلام
بقيت حاسه إن الكبشة دى نزلت فعلا فوق راسى(اى.. اى... اى )
الراجل(المعيد) ده اتنفض كأن قرصة بعيد عنكم ثعبان وراح جاى لى من اخر القاعة
هو حضرتك كنت فين المرتين اللى فاتوا يادكتورة!!!!!
ياخبر اسوس هو كان فيه مرتين فاتوا!!!(دانا بقول لنفسى)
يا جاااااااااااااااابر هات الفلكة ياجابر زى فى مدرسة المشاغبين
بس الفراش بتاعنا كان اسمه عم دسوقى
طبعا عمنا المعيد نادى بعزم صوته
يادسوقى هات دفتر الغياب !!!
جاب دسوقى دفتر الغياب
وطبعآ بكل (ذوق)سأل
هو انتى اسمك ايه؟؟
الحقيقة انا ماكنتش عايزة اجاوبه ولا ارد عليه وأطنش
لكن اعمل ايه فى شلة الانس اللى معايا ردوا بدالى
اسمهااااااااااا نور يادكتور
كنت عايزة التفت اديهم بالبوكس لكن برضه مسكت اعصابى....مضطرة طبعآ اكذب عليكم
المهم بص طبعآ لقى اسمى مش موجود المرتين الاولانين
سألنى الصراحة برضه وبكل ذوق :انت محضرتيش المرتين اللى فاتوا ليه؟
طبعا برضه رديت مضطرة
ماكنتش اعرف!!!
كنت فاكرة الراوند لسه مابدأوا فيه
وماسألتيش زميلاتك ليه؟
(الراجل مصمم برضه يحرجنى )
ماجتش فرصة اسأل عن الموضوع ده حضرتك عارف احنا يعنى اصل ممكن او يجوز ممكن يعنى
طبعآ بان عليا الكسوف وكان عرقى بقى مرقى واكيد وشى جاب السبعتاشر لون بتوع الطيف كلهم وصعبت على الراجل وقال طيب خلاص(اه والله لوحده كده قال لى خلاص اقعدى )

وجاب الشريط بتاع دقات القلب السليم وعرضه لنا مرة تانية علشان خاطرى!!!!!!
(توك تيك توك تيك توك تووووك تاااااك
لأ يااسيادنا ده مش صوت الشريط
دى دقات قلبى الحين كل ما افتكر الموقف ده
وربنا ما يرميكوا فى ضيقة ولا مواقف مشابهه
فيه ناس حيسألوا وكنتى مابتحضريش ليه او ماحضرتيش ليه صحيح؟
الحقيقة السبب انا كنت عارفة بالميعاد والمكان بتاع الرواند ده بس قبله على طول كان بيقى فيه محاضرات نظرى فى الكلية(وانا اموت فى المحاضرات النظرى )المهم المحاضرة كانت تخلص الساعة عشرة والرواند يبدأ الساعة عشرة (برضة)العيال التانين كانوا ياخوايا تقولش مركبين عجل فى رجليهم تخلص
المحاضرة تتلفت تلاقيهم راحوا المستشفى
طيب ازاى مش عارفة
المهم عقبال ما سيادتى تروح يكون الدكتور دخل وقفل الباب
وانا بقى لو دبحتينى ما ادخل بعد الدكتور ابدآ
عايزاينى اتهزأ!!! لو مش بالكلام يبقى بالنظرات
اصل انا حساااااااااااسة اوى
وعلى رأى الله يرحمهاالست ام كلثوم
اصون كرامتى من قبل (تعليمى) وده
السبب ان المرتين ما حضرتهمش
وبسسسسسسسسسسسسسسسسسسسس
ادينا عايشين وخلصنا واشتغلنا
وهى بقت ذكريات مؤؤؤؤؤلمة
والحمد لله رب العالمين

هناك 29 تعليقًا:

هانى زينهم يقول...

هو فوق انك بتكسفى فمن الواضح انك ما بتنسيش كمان ودى صفة تقصف العمر !!
الانسان من النسيان وخصوصا للمواقف اللى زى دى . تعيشى وتفتكرى يا دكتور ويا رب ما تتزنقى زنقة زى دى تانى .

norahaty يقول...

السلام عليكم ورحمة الله وبركاته
الاستاذ هانى زينهم
عندنا يامرحبا يامرحبا
ماهو اصل فيه حاجات بتفضل
فى ذاكرة الانسان مهما طال العمر او
(اتقصف)بتفضل محفورة فيه وفى الغالب بتكون ذكريات مؤلمة اوى اوى اوى اللى حكيت عنه هنا دلوقتى
لان الالم اكثر وابقى تاثيرا
وادينا عايشين يامستر
والايام بتهون كل الم
متشكريين لحضورك
وتعليقك كمان
يامستر هانى

blue-wave يقول...

هو فعلا موقف محرج جدا
لكن المفروض كنتى تحضرى لأن الكلينيكال اهم من النظرى مليون مرة
بس خلاص انسيه بقى:))

norahaty يقول...

السلام عليكم ورحمة الله وبركاته
blue-wave
ماهو على ايامنا الكلينكال ده كان برضه مشكلةزحمة ودوشة وميت واحد يمكن دايس فوق رجلك علشان يشوف ومفيش فايدة تنفخ وتأفف ولا حد دارى ولا حاسس ,فكتير كنا نشوف الحالات لوحدنا (وطبعآ زى ما انت عارف بالفلوس!)
يلا اهى عدت زى ما غيرها عدى
والحمدلله رب العالمين
متشكريين يادكتور عمرو
للمرور والتعليق كمان.

واحدة مفروسة يقول...

دايما المواقف المحرجة فى حياتنا لاتُنسى
سبحان الله
و بتبقى مواقف بايخة اوي
انا مش بحب حد يحرجني
و الافظع انى بخاف احرج حد
ولوده حصل ياسااااااااتر
بيبقى اصعب من انى اتحرج
سلام

وفاء بركات يقول...

السلام عليكم
أحيانا الواحد بيجيبو لنفسه....
كنت قلتي له هو أسمي مكتوب ، طايييييييييييب
ربنا يكفيكي شر الحرج
تحياتي

mohamed ghalia يقول...

إيه يانور لازم تنسحبى من لسانك ههههههههههه
بس سيبك انتى اكيد زمايلك كان بيبصولك بعد كده على إنك بطلة عشان الدكتور جاب الشريط وسمعكم دقات القلب السليم تانى عشان خاطرك
جميلة قوى مواقف الكلية دى
تقبلى تحياتى
دمتى بود وفى سعادة

rovy يقول...

اد ايه جميله الذكريات حتى لو كانت لمواقف بنعتبرها بايخه لكن مع مرور الوقت ممكن تبقى ذكرى جميله لايام وناس جميله عشناها ..
اطال الله عمرك واكثر من ذكرياتك الجميله اختى الحبيبه ..

تقديرى و تحياتى

TeVa يقول...

هههههههه
صباح الفل
تعيشي وتتحرجي يارب علطول :))

هي أوحش حاجة في الذكرى دي إنك كذبتي عليه مع إن "الصدق ينجي" ,, ولو كنتي حكيتيله القصة اللطيفة دي كان اتحرج هو غصب عن عينه :D

بس ما علينا
هعديها برضو :))

وكل كلية وأنت طيبة :)

حسن حنفى يقول...

ههههههههههههه

كنتي اشتري عجلتين ولا حاجه وروحي بيهم

:d

الحمد لله ان الموقف عدي علي خير وطبعا اصحابك قالوا اسمك علشان خايفين علي مصلحتك وكده

هههههه

تحياتي بوست مميز

norahaty يقول...

السلام عليكم ورحمة الله تعالى وبركاته
واحدة مفروسة
ربنايكفيناويكفيكى شر
الحرج والاحراج والمحُرجين
الاحراج ذكرى (غير سعيدة)
بتفضل فى الذاكرة دايمآ
تحياتى للمرور والتعليق

norahaty يقول...

السلام عليكم ورحمة الله تعالى وبركاته
الأستاذة وفاءبركات
تعملى ايه فى سحبة
اللسان بقى وايه ماقدرش
اقول حد زقنى لألألألأ انا اللى
جبته لنفسى لازم اتكلم واعمل بطلة
واطالب بحقى فى العلم والتعلم
يلا ما علينا على راى واحد
ادينا أتعلمنا وخلصنا
والحمد لله رب العالمين
متشكررررررررررين
ياأستاذةللمرور
والتعليق كمان

norahaty يقول...

السلام عليكم ورحمة الله تعالى وبركاته
Mohamed Ghalia
أه لسانى أتسحب من غصب عنى
وانا ايه ما كنت بنطقش خالص
طول عمرى مسكينة وماشية جنب الحيط
لكن ساعات بقى حبوب الشجاعة بتشتغل
من غير ما أنت تحس وتوقعك فى مطب زى ده!
ذكريات الكلية والدراسة ليس ليها
من اخر ولا نهاية واحنا بقى 6سنين
بسم الله ما شاء الله وكمان سنة
الامتياز وسنة التكليف
وكمان سنين الماجستير
مش حتخلص !!!!!!!
ضاع العمر ياولدى
مذاكررررررررررررة
فكرتنى ليه!!:)
وشكرآ للمرور
والتعليق

norahaty يقول...

السلام عليكم ورحمة الله تعالى وبركاته
rovy
أم ياسمين عندنا
مرحبا مرحبا مرحبا
والله ياروفى (الزمن) كفيل بشفاء كل الجراح!!! قصدى الذكريات زى دى أنا بحكيها دلوقتى واضحك لكن ساعتها مش عايزة اقولك كنت بقول ياأرض انشقى وابلعينى ,لكن الحمد لله كله بيفوت
ومتشكريين اوىىىىىىىىىىى
للمرور الجميل
والتعليق الاجمل

norahaty يقول...

السلام عليكم ورحمة الله تعالى وبركاته
TeVa
صباح النور ياهندز
(تعيشي وتتحرجي يارب علطول :))
ياساتر ليه كده بس !!!علطول!!
ده انت يظهر باين عليك شرير
ومخبى,وبعدين احكى له ايه؟
هو انت فاكر المعيد كان
حيستنانى لما احكى له
حاجة؟ما تبصش للايام
دى!!على ايامنا
المعيد والمدرس
ومن شابههم
كانواااا
كال...
ولا بلاش!
يلا اهى ايام وعدت الحمد لله
وكل جامعة وحضرتك بالف خير يافندم

norahaty يقول...

السلام عليكم ورحمة الله تعالى وبركاته
حسن حنفى
انت بتقول فيها ياحسن
كان نفسى اتعلم البتيناج ده
ياسيدى اللى بيقولوا عليه لكن
الشوارع ما ساعدتنى صعبة!!
واصحابى =شلة الانس كانوا
بيحبونى!!كان باين
عليهم اوى!! صح!
ومرسى لمرورك
وتعليقك
الحسن
ياحسن

مها يقول...

ههههههههههههههههه
موقف محرج جداً فعلاً..
أنا برضه حصل لى موقف مشابه وعملت فيها أم العريف وقعدت أفتى بثقة جبارة.. وف الآخر طلع شكلى باااااايخ لما اكتشفت إنى آخر من يعلم!!!

بس حاجة غريبة إنه رغم إن المعيد ده طلع ذوق معاكى يومها إلا إنك معتبرة الموقف ده ذكرى مؤلمة!!! أمال لو كان طلع قليل الذوق بقا كنتى عملتى ايه؟؟

هههههههههههههه

norahaty يقول...

السلام عليكم ورحمة الله تعالى وبركاته
الغالية مها
وكم من مواقف محرجة مرت على الانسان فعلا بعضها الواحد ما بينساها ابدآ
مهما مرت السنين زى موقفك انتى او موقفنى انا وبالرغم من المعيد طلع (ذوق)بس ده خلانى طبعآ احضر كل الروندات بعد كده ومابقيتش اعرف ولا حتى افكر انى(ازوغ او افوت )راوند او اتنين !!!بس أهى ايام مرت بحلوها ومرها
وتحياتى لمرورك ولتعليقك
اللطيف ياصديقتى.

M.K يقول...

السلام عليكم دكتوره نور...
على فكره حتى لوكانت المواقف محرجه
بس بما إنها من أيام الدراسه بيبقى لها طعم تاني,,,
عن مواقف الحياه ...
.........
والحمدلله عرفتي دقات القلب السليمه والمريضه...
بدرس مخصوص ليكي...
........
دمتي بخير

norahaty يقول...

السلام عليكم ورحمة الله تعالى وبركاته
M.K
فعلا ذكريات الدراسة او حتى اى موقف بعد ما بيعدى بيبقى له طعم اخر مادام قد مر على خير
والحمد لله عرفت
دقات القلب
السليمة
والمريضة
كمان
فى راوند
واحد كمان!!
تحياتى لكى.

ahmed_k يقول...

طيب حضرتي المره دي إزاي
يا دكتوره ؟؟؟؟ هههههههه
فعلا المواقف المحرجه اللي ممكن يتعرضلها
الطالب كثيره
بس بتعدي سلامات
وكويس موقفك طلع بفايده
وسمعتي الصوت اللي فاتك ,يعني جات بمصلحه
ولي سؤال لو سمحتيلي
بقرألك سعات بوستات بحس إنك مش مصريه
رغم مصرية كل حواراتك وقصصك زي تكرار كلمة الحين كتير .....

وأجمل مرحله في حياتنا هي مرحلة الدراسه الجامعيه ذات الكثير من المواقف سواء المحرجه أو الممتعه
وتعيشي وتفتكري يا دوك
تقبلي خالص تحياتي

norahaty يقول...

السلام عليكم ورحمة الله تعالى وبركاته
ahmed-k
انت معايا ولا معاه ياأستاذ أحمد؟
عارف اضطريت يومها اقعد فى اخر
المدرج بتاع النظرى علشان امشى قبل المحاضرةماتخلص من الباب الخلفى للمدرج
واروح للراوند فى المستشفى وفضلت اعمل كده كل مرة لان حضرته خد باله منى واستحلف لى لو كنت غبت تانى كانت حتبقى مشكلة ربنا ستر الحمد لله
وكلمة الحين (بردون) ياأحمد لزقت فى لسانى من ساعة ما اشتغلت بالسعودية ما عارفة اتخلص منها لكن ادينى بحاول !!!
تحياتى لمرورك وتعليقك اللطيف.

عاشــــــ النقاب ـقــــة"نونو" يقول...

هههههههههههههههههههههههههه
طب اسالي الاول
تيجي تصيده يصيدك
معلش

بنات صاحبة الجلالة يقول...

حبيتي الغالية وحشتني مووووت
تعالي هنا اية اللي خلاكي متحضريش ههههههههههه وبعدين عادي انا ياما كنت بدخل المحاضرة متاخرة لما الدكتور كان بيتكلم كنت بقوله لسة جي من السفر حتي شوف تذكرة الاتوبيس هههههههههههههه ربنا ميجبلك احراج ابدا ويوفقك يارب دايما

خالص تحياتي وتقديري

Frustrated يقول...

يا بنتي راوند الكارديولوجي ده كان أسوء حاجة الواحد ممكن يحضرها!! كنت بحس اننا بنشتغل نفسنا! بري سيستوليك مرمر....صح؟ أيوه با دكتور.....سامعنها متأكدين؟ شوووووور
يلا، ليت الشباب يعود يوما

norahaty يقول...

السلام عليكم
ورحمة الله تعالى وبركاته
Frustrated
فكرتنى باللذى مضى
برى دايستولك
ميد سيستولك
ابصر ايه؟ ومدرك ايه؟
وتلاقى اللى معاك بيتكلموا بكل
ثقة وتمكن ولا كأنهم سامعين حليم فى الاذاعة ...امال انا مش سامعة ليه؟
غاظونى كتير الله يسامحهم بقى عقدونى فى عيشتى !!!
الحمد لله وبعد العمر ده لقيت حد زيىّ
ماكانش سامع حااااااااااااااااجة
تحياتى لحضورك وكمان تعليقك اللى فكرنى بذكريات (سعيدة مباركة)اوى :)

من غير عنـــوان يقول...

نور

أنا شايف إنها تجربة.. ماتتنسيش .. آه ... عشان تحكيها وتعلميها لغيرك..
غن الحضور نصف النجاح في أي حاجة... حتى في الجواز؟؟؟
أقصد ان الزوج اللي بيروح في ميعاده ومش بينسى .. ماحدش بيمسك عليه حاجة..
القصد... طريقتك في السرد حلوة ولذيذه وممتعه

أمنياتي

norahaty يقول...

السلام عليكم
ورحمة الله تعالى وبركاته
من غير عنوان
كان دايمآعميد الكلية بتاعتنا الله يرحمه الدكتور /زغلول مهران يقولك اقعد فى المحاضرة وما تكتبش ولا تسجل لكن انتبه لكل كلمة تقال وأنت كطالب ستستفيد كان مبدأى والله يابشمهندس
لكن هو المشكلة توزع المحاضرات والعملى والمعامل على اماكن متفرقة وأنا لو دبحتنى ما أدخل بعد المدرس ابدآآآآآآ
تحياتى واحتراماتى لك يابشمهندس.

غير معرف يقول...

~.....................................................