السبت، يناير 10، 2009

.....شيشكال!! سمعت عنه قبل كده؟؟؟





خبر صغير فى اخرالصفحة من ورقة جرنال مفروشة على رف الكوبايات


فى النملية جذبت نظرى بالصورة اللى فيها(ودى فايدة الصور )


خلتنى قريت الكلام المكتوب عنها ودى اول مرة الصراحة اعرف عنه
حتى شكيت (وانا اساساً شكاكة بريمو فى كل مايًنشر فى الجرايد)


اقولكم شكيت فى صحة الكلام فقلت


اسأل عمهم وحابس دمهم اى الاستاذ جوجل عنه فلقيت الكلام صح


فقلت يمكن غيرى برضه مايعرفش ولازم يعرف


وبالمرة نتكلم عن الموضوع من صورة اكبر... يمكن !!


يقولك ايه ياسيدى ان فيه ضريح أو مقام اسمه


سيدى شاشكال(سيدهم هم مش سيدنا احنا )قرب مدينة أصفى المغربية


يزوره اعداد كبيرة من الناس كل سنة قبل عيد الاضحى المبارك


ويطوفون حوله سبعة اشواط وهم حافيين ويجروا وينادوا مع بعض


لبيك اللهم لبيك !(استغفرك ربى واتوب اليك)


ثم يصلوا جماعة بعد الانتهاء من الطواف وبعد كده يشربوا من بير قريبة


من الضريح يسمونها بئر زمزم (استغفرك ربى واتوب اليك) وبعد كده


يذبحوا الذبائح كقرابين للضريح مهنيئن بعضهم بعضا بحجهم المبرور


(استغفر الله العظيم)


..المهم طبعا لما سُألوا ليه ده قالولهم اصله ارخص!!واسهل وبكده حيبقى يتقال لنا (ياحاج)


وده لقب له كتير من المزايا والقيمة الاجتماعية( بالافرنجى برستيج وخلاص)
يعنى نفسى اعرف محدش فيهم فكر ان ده كفر وجهل وإفساد للدين !!!!!!
طبعا علماء دين افاضل فى المغرب استنكرو كل ده وتبرئوا منه


لكن ياترى هل وصل صوتهم لممارسى هذا الشرك والعياذ بالله منه ولا صوتهم وصل والناس هم عندهم صمم !!!


ولا اساسا عدم التفكير اسهل بالنسبة لهم.
فى رايى انه بيدخل فى نفس البند بتاع الاحتفال بالموالد والمشايخ بغير ما يرضى الله سبحانه وتعالى
يعنى ما انسى مرة اتجرررررررجرت جررررررررررررررررررر
لحضور الليلة الختامية لمولد السيدة زينب رضى الله عنها
مش حاقولكم على الزحمة والدوشة والهيصة والزيطة


وما سمعت حد قال لا اله الا الله سيدنا محمد رسول الله صلى الله عليه وسلم فى القعدة كلها
المهم اتعزم علينا بالاكل انا فاكرة كانت لحمة عجالى وشوربة ورز ابيض وفول نابت
طبعا الصراحة منظر اللى بيقدم الاكل يغنى عن الاكل نفسه


وانا اساسا ما اكل من عند حد غريب


كمان لفت نظرى


حاجتين ان فيه نساء ورجال بيناموا فى


(الخدمة كما يسمونها) وهى الخيمة بتاعة صاحب الندر!!!


مابفصل بينهم ساتر أو حاجز


وكمان ان واحد من هؤلاء كما قالت لىّ أخته (ماشى فى حب الله)يعنى ايه

ياست ؟ده انا اللى بسأل قالت يعنى بيروح الموالد كلها ويقوم بالخدمة فيها !!!


طيب ومين اللى بشتغل ويأكله هو وزوجته واولاده ؟


مراته اسم الله عليها بميت راجل !!!!!!


لو انت مكانى ترد تقول ايه بذمتك



زى ما قلتم كده


أتكلمت لما قلت يابس لكن كلامى معجبش اللى معايا !!


خدت نفسى وفى اول تاكسى رضى يقف لى(طبعاً )بعد عذاب من الزحمة


حطيت نفسى وجيت .
لا حول ولا قوة الا بالله ؟ايه الخزعبلات دى كلها اللى دخلت ديننا الحنيف
حنلاحق على مين ولا مين بس يارب؟
اللى مش من ديننا ؟
ولا اللى بينسب الى الاسلام والاسلام منه براء بل وفى الواقع بيبقى عدد بالسالب على الاسلام

وخطورة الامر انه حيورث اولاده هذه المعتقدات الباطلة

وبعد ما الطفل وزى رسولنا الكريم صلى الله عليه وسلم قال

(بس للاسف ماأنا اذكر الحديث بالضبط)

ان الطفل بيولد على دين الفطرة لكن والديه يهودانه أو ينصرانه أو ربنا يرحمه ويكونوا مسلمين فيبقى هو كمان مسلم


وربنا يغفر للمؤمنين والمؤمنات
والمسلمين والمسلمات الاحياء منهم والاموات
انه سميع عليم مجيب الدعوات يارب العالمين.!!!


وينصر الحق ويخسف الباطل بقدرته وبعظمته
:::::::::::::::
ومش حأتكلم عن ابو حصيرة دا موضوع كبير ما اعرف الا بعضه
لكن إن شاء الله نعمل عنه تدوينة بأذن الله تعالى

هناك 44 تعليقًا:

أحــوال الهـوي يقول...

يا بنيتي

انت سمعت عن الموالد في مصر

فيها افظع مما ذكرت

الجهل و اختلاط الثقافات الوثنيه ادت الي كل هذا لدرجة تأليه صاحب المقام

تحياتي

romansy يقول...

دا بقى شئ عادى
والحكومه بتشجعه
علشان تلهى الناس فيه

عمرو يقول...

أيوه موضوع شيشكال ده أنا أعرفه من زمان و طبعا شىء مقزز و مزعج للغايه
عاوز أقول لك يا دكتوره أن المغرب بالذات مليئه بكم هائل من المعتقدات و الخزعبلات التى تتعارض تماما مع ديننا الحنيف
زى مقامات الأولياء و بيسموهم المباركين و السحره اللى فاتحين دكاكين فى الأحياء القديمه و الزبون و لا الزبونه من دول تدخل الدكان فتلاقى الساحر قاعد و لابس لبس الشغل و مستنى فتقوله : يا سيدى رانى نبغاو نديرو شويه أسحار للاله باش تراضى علينا
يعنى عاوزه تعمل سحر لحماتها علشان تحبها :))
مثلا يعنى
فيروح الساحر يبتدى شغله الممزوج بكفر بين و العياذ بالله
طنجه و يهودها و أمازيغها صدروا للمغرب ما لا يقبله الدين أبدا

GiGi world يقول...

للاسف هى دى حياتنا وهو ده بقى مخنا
وعايزين ننتصر لسه مش ده وقته بس للاسف مش احنا اللى بنموت لكن اطفال ابرئياء هى اللى بتموت

dodda يقول...

والله ده كله بيحصل عشان المسلمين مالهم قائد

ولو فى بينا قائد زى سيدنا ابوبكر او سيدنا عمركات اياد الناس دى اباده لان دى حتى مش بدعه
ده كفر كفر كفر

والله اللى ميعرفش يعنى ايه اسلام ومش بيدور على دينه مالوش لزمه
دول اسوأ من الرده

Ola يقول...

لأ بقى!! مستحيل الجهل و الغباء و التخلف ده!! الناس دي أصلا الكلام معاها مضيعة للوقت، بجد حاجة تقرف

غير معرف يقول...

انا اول مره اسمع عن عم شيشكال ده , لا برده الموالد بتاعتنا رحمه .. دول اخترعوا دين لوحدهم , ولو مكنش ده كفر يبقي الكفر يبقي ايه

بالنسبه لحكاية الموالد بتاعتنا , دي مشكله بعض العقول اللي في بقايا من وثنية الاجداد جواهم , هما مش متقبلين فكرة انهم يدعوا ربنا من غير وسيط فاخترعوا حكاية الاوليا دي

ربنا يهديهم

موناليزا يقول...

اللهم لاتؤاخذنا بما فعل السفهاء منا

Unknown يقول...

الجهل
اختلاط المفاهيم التضليل الدينى اشياء اثرت على الكثير من معتقدات الناس
ربنا يبارك فيك ويحفظ علينا عقولنا واسلامنا

مذكرات مشاغب يقول...

انا هحكي موقف شخصي شوفته بعيني
في اول مره ادخل فيها مسجد السيد البدوي في طنطا
فشفت واحده ماسكه حتة قماشه وبتمسح بيها الضريح اللي هناك
وبتدور على اي منطقه فيها اي تراب عشان تمسحها بالقماشه
فتخيلت انها بتنضفه يعني
لكن فوجئت انها بتمسح وشها وجسمها بالقماشه دي
ومش بس كده وحطتها كمان في ازازه عشان تخدها معاها
انا بصراحه شفت المنظر ده وزهلت
مصدقتش نفسي
يا ترى فيه حد معندوش عقل للدرجه دي
فيه لسه ناس بتفكر كده
طيب ليه احنا مستغربين انا احنا متاخرين كتير عن غيرنا
ماهو السبب واضح خالص اهه


ملحوظه صغيره:بسبب قلة فهم مني فمقدرتش افهم تعليق حضرتك عندي في مدونتي اذا كان فيه اختلاف مع وجهة نظري فاحاول اقتنع بيه او اناقش حضرتك فيها واشكر حضرتك عليه
او يحمل اتفاق معي فبرده اشكر حضرتك عليه

تحياتي

Asmaa Fathi يقول...

ماشى فى حب الله


ههههههههههههههههههههههههههههههه

دى اغرب مقوله ممكن الواحد يسمعها


يا سبحان الله


شر البلية ما يضحك


ولا اللى بيسترخصو الحج دول كمان


احنا محتاجين إعادة تأهيل

وتحديث لطريقة تفكيرنا


اعتقد ان معظم من يفعلون ذلك

هم اميون سواء بامور دينهم او القرأئه والكتابة

يحتاجون البذل المزيد من الجهد من قبل


العلماء والمشايخ

واعتقد ان تلك القضيه اهم بكتيييييير


من اللى عمالين يقولو ويزيدو فيه كلهم


لان ده بيتعلق بخروج بعض الناس (بجهلهم)

من الدين


تقبلى تحياتى

مصطفى محمود يقول...

مش هقول أكتر من ربنا يهدي

مفيش حاجة تتقال أكتر من كده بجد.

ربنا يهديهم ويهدينا

SemSem يقول...

الواحد مينفعش يقول غير
انا لله وانا اليه راجعون
اللهم اجرنا فى مصيبتنا واخلفنا خيرا منها

الواحد ميقدش يقول حاجه تانى غير كده

تحياتى

Unknown يقول...

لا واللة
يبقوا حجوا
ياسلام
احنا برضو عندنا سيدهم ميدين
وسيدهم سحلول
حسبنا اللة ونعم الوكيل
جهل وخرافة فى امة العلم
...
تحياتى

TIMMY !! يقول...

الحمدلله الذي عافانا !!!

فكرتيني بأول سنة لما رحت الكلية ,
دخلت السيد البدوي من باب الفضول علشان أتفرج مش أكتر حتى ما صليتش لأني عارف إ، الصلاة في المساجد اللي فيها قبور حرام ,

لقيتهم بيطوفوا حوالين ضريحه !!

و اللي بيتمسحوا في الحديد !!

إييييييييييييييه يا بشر !! فين عقولكم !!

و اللي شدني أكثر بعض الناس اللي باين - من لبسهم بس - إنهم محترمين و متعلمين و بيعملوا زيهم !!

و ما حدش يقول لي كانوا رايحين يتفرجوا زيي :)

ربنا يهدينا و يهدي الجميع ,,,

msafa يقول...

فى عندنا جهل مش ظاهر بس ادخلى الصوره هناك فى جنوب بعيد وادخلى فى قلوب ناس لا تعرف القراءة والكتابه سوف تجدى الخراب المختبىء اكثر من الخراب فى الصوره على رف النمليه

وفاء بركات يقول...

السلام عليكم ورحمة
الله وبركاته
كنت لسه بقول في نفسي طب لو عرفت موضوع أبو حصيره حتقول ايه لقيت حضرتك
بتنوهي بأنك ستكتبين عنه... إحنا عندنا مولد السيده حوريه وهي من آل البيت رضوان الله عليهم بتلاقي خيم في الشوارع وحلقات ذكر لدرجة كنت مره معديه أنا وبنت من بناتي قالت ماما الحقي خيمة ديسكو شدتها وأسرعت الخطي ..ناس من كل أنحاء المحروسه والسرقه بتزيد وخطف الإطفال ... هو إحنا جينا ورا من شويه الناس بتطلع القمر وإحنا ياريت زى محنا لأإحنا بنتخلف ولغينا عقولنا وبنستورد الكبريت من بكستان البلد النايمه اللي بتصنع القنبله النوويه ولاالفانوس من بلد المليار نسمه الصين
ده إن ربنا لو مرحمناش ياولينا

حسن حنفى يقول...

حسبي الله ونعم الوكيل

الجهل يعمل اكتر من كده

الحج فرض للقادرين لو اللي بيروحوا هناك مش قادرين يبقي مش فرض عليهم ولاعلشان ياخدوا لقب الحاج يعصوا ربنا ويتلاعبوا بالدين
؟؟!!

Unknown يقول...

اللقاء يوم الجمعه 16/1
عدد الجرحى فى الاسماعيلية 19 حالة
بعد ان توفيت شابه هذا الصباح
منهم سيدة تبلغ من العمر 58 عام
وشابة فى العناية المركزة عندها 17 سنة
والباقى رجال من سن 17 عام الى الاربيعنيات
ومازالت المستشفى تستقبل المزيد
محتاجين تبرعات مالية
وبعض الملابس
رقم تلفونى هو 0188047779

Unknown يقول...

السلام عليكم ورحمة
الله تعالى وبركاته
أحوال الهوى
والهوى أحوال
وللاسف الشديد اختلاط
غريب بمعتقدات وثنية
قديمة ومهما حاول تفهم
اللى ادامك مفيش فايدة!

Unknown يقول...

السلام عليكم ورحمة
الله تعالى وبركاته
Romansy
طب واحنا دورنا فين؟
مفروض نقول ونعيد ونزيد
يمكن ولو واحد بس يبطل تيجى
الفايدة بعد كده شوية شوية

Unknown يقول...

السلام عليكم ورحمة
الله تعالى وبركاته
أستاذ/عمرو
فعلا المغرب وتكويناته المختلطة من بربر وعرب وافرنج كتير اثروا على الممارسات الاسلامية الصحيحة هناك.
ربنا يكون فى عون علماؤهم على
المجهود اللى لازم يقوموا به
ويهديهم ويهدينا يارب.

Unknown يقول...

السلام عليكم ورحمة
الله تعالى وبركاته
GiGi
ربنا يرحمنا ويرحمهم
ويسامحهم ويسامحنا
ويهديهم الى سواء
السبيل.

Unknown يقول...

السلام عليكم ورحمة
الله تعالى وبركاته
dodda
فعلا كفر وشرك بالله
والعياذ بالله من الشرك
الاكبر او الاصغر ربنا يرحمنا
واجبنا نبين لهم اللى ميعرفوش دول
ده من واجباتنا العارف يقول للجاهل .
نورتينى يادودا بعد غياب واحتجاب !!

Unknown يقول...

السلام عليكم ورحمة
الله تعالى وبركاته
Frustrated
معلش!واجب علينا نعرفهم مرة واتنين وتلاتة يمكن ربنا سبحانه وتعالى يهديهم

Unknown يقول...

السلام عليكم ورحمة
الله تعالى وبركاته
محمدالفارس الملثم
ماهو انا برضة استغربت زيك كده وما كنتش مصدقه لحد لما لقيت الموضوع فى جوجل قلت لأ بقى الكلام صحيح!
ربنا يرحمنا والله
يامحمد
ياصاحبى

Unknown يقول...

السلام عليكم ورحمة
الله تعالى وبركاته
موناليزا
امين يارب
ومعاكى بدعى
واقول :اللهم اهدى
قومى فأنهم لا يعلمون.يارب.

Unknown يقول...

السلام عليكم ورحمة
الله تعالى وبركاته
نهر الحب
الجهل :أًسّ البلاء كله!!
ربنا يرحمنا برحمته الواسعة
وامين لكل دعواتك الطيبة وجعل
الله لكِ نصيبا وافرا فيها .

Unknown يقول...

السلام عليكم ورحمة
الله تعالى وبركاته
مذكرات مشاغب
عارف لوكان السيد البدوى نفسه عايش كان تبرأ من فعل هذه السيدة وامثالها !
ربنا يرحمنا ويرحمها
والرد على الملحوظة
تم يافندم والحمد لله.

Unknown يقول...

السلام عليكم ورحمة
الله تعالى وبركاته
gana magde
سوء نيتهم وشيطانهم سول وسوغ لهم هذا وللاسف وزى ما قلتى الامية والجهل سبب البلاء كله.ربنا يهدينا ويهديهم للحق.

Unknown يقول...

السلام عليكم ورحمة
الله تعالى وبركاته
TeVa
اللهم امين
يارب العالمين
يهديهم ويهدينا
ويهدى الناس جميعا

Unknown يقول...

السلام عليكم ورحمة
الله تعالى وبركاته
SemSem
اللهم امين .لكن هذا لا
يعفينا من بذل ما نستطيع
من جهد ليفهم هؤلاء أن هذا
شرك بالله والعياذ بالله منه

Unknown يقول...

السلام عليكم ورحمة
الله تعالى وبركاته
احمد بدر الدين
انا فاكرة مرة شيخنا الشعراوى رحمة الله عليه قال أن اول حاجةكان بيعملها مدعين النبوة والعياذ بالله منهم انهم
يضعوا التكاليف عن الاتباع مثل مسليمةالكذاب ما ابطل الزكاة
مثلا او قلل من ركعات الصلاة.
ربنا يهديهم ويردهم الى الحق.

Unknown يقول...

السلام عليكم ورحمة
الله تعالى وبركاته
TiMmY
الحمد الله الذى عفانا من هذا الشرك والعياذ بالله .وعلى قولك ياتيمى ربنا يحفظنا ويهديهم ويرسل لهم من يردهم للحق.اللهم امين يارب العالمين.

Unknown يقول...

السلام عليكم ورحمة
الله تعالى وبركاته
الأستاذة /وفاء بركات
أبو حصيرة ده موضوع كبير اوى داخل فيه السياسة على الاقتصاد على كله الاهالى السنة دى ماكانوش عايزين اليهود يدخلوا البلد وكانت مشكلة وبيقولولك انهم بيسببوا مشاكل كتير وحوادث كمان.
وندعى ونقول يارب ارحمنا يارب

Unknown يقول...

السلام عليكم ورحمة
الله تعالى وبركاته
msafa
الجهل الجهل ثم الجهل
مصدر كل البلاءات
يرحمنا اللى خلقنا.

Unknown يقول...

السلام عليكم ورحمة
الله تعالى وبركاته
حسن حنفى
ايوة ياحسن الجهل
يعمل اكثر من كده!
وتستغرب ليه ياحسن ؟
زى اللى بيسرق غطاء البلاعة
لاجل مايبيعه!مايفكرش انه ممكن يقتل
انسان بسبب الكام (ملطوش )اللى حيبع به الغطا وانه مابقى حرامى بس لأ بقى قاتل كمان!!!

Unknown يقول...

السلام عليكم ورحمة
الله تعالى وبركاته
نهر الحب
جزاكى الله كل الخير
على ماتبذلين من مجهود
ووفقك الى ما يحب ويرضى.

مها يقول...

الناس فيما يعشقون... مجاذيب!!
هذا آخر الزمان يا سيدتي فلا تندهشي!
كل علامات الساعة بادية كشمس أغسطس..
وما من متعظ.. ولا من يعظ..!!


تحياتي ومحبتي

Unknown يقول...

السلام عليكم ورحمة
الله تعالى وبركاته
مها الغالية
خزعبلات وأساطير
وتخاريف دخلت على ديننا
الحنيف شوهت كثير من مماراساته
لكن الاسلام باق إن شاء الله
وسيزول عنه هذه البلايا
بعملنا وجهدنا نحن
المتعلمين ما
استطعنا
الى ذلك
سبيل.

الفقيرة إلى الله أم البنات يقول...

طيب بالله عليك ناس زى دول وناس زى اللى هناك وناس زى بتوع المولد
تفتكرى دول هيرجعوا القدس
إنا لله وإنا إليه راجعون
الحل ان علماء الدين يسيبوا الفضائيات
لن اللى بيفح الفضائيات اللى عاوز يتعلم
اما اللى مش على باله..هناو
هناك وفى كل حته
يارب الناس تفهم ان البشر العاديه هى المحتاجين يتعلموا دينهم

Unknown يقول...

السلام عليكم ورحمة
الله تعالى وبركاته
الفقيرة الى الله أم البنات
شرفينتا ونورتينا فى اول زيارة
سأدعوأناوادعى انتى ايضاان يهديهم
الله تعالى الى جادة الحق والدين
وأن تعود امتنا الاسلامية
الى سابق مجدها وعزتها
اللهم امين اللهم
اميييييييين

رحيق يقول...

السلام عليكم

يبدو ان هدف البوست هو التوعية من الخرافات

لكنه بدون وعى منك اشتركتى فى احداها لقد كتبتى فى ملف التعرف ان علامتك التنجيمية هى السرطان وهذا احدى هذه الخرافات

جزاك الله خيرا

تحياتى

Unknown يقول...

السلام عليكم ورحمة
الله تعالى وبركاته
رحيقــــــــــــ
اولا اسفة لتأخير الرد
لانى لم ألحظه الا الان فأرجو
المعذرة.أما عن اشتراكى نشر
الترويج الخزعبلات دى فأرجو مرة
تانية المسامحة لانى وقت ما عملت البروفيل كنت أظن ان كل شىءاجبارى
الرد عليه.والله لو اعرف بيتشال ازاى اشيله لكن للاسف مش عارفة .حسأل
اهل الخبرة واشيله بأذن الله تعالى
ومرة تانية شكرا للتنبية
والتعليق والمرور .