الأربعاء، أكتوبر 01، 2008

العيدية واول يوم العيد


.....................
السلام عليكم ورحمة الله وبركاته
عيد سعيد وعمر مديد
وكل سنة والناس جميعآ فى اتم صحة
(وما تسألونيش لا عن الصحةولا وزارة الصحة ولا وزير الصحةهو راخر ربنا يخليكم خلونا نعّيد واحنا مبسوطين وفرحانين ومهيسين) واكمل عافية وراحة بال وهدوء نفس وقلب كمان وكمان يارب
حتسألونى ايه علاقة العيد بمجلة ميكى دى ؟وتقولولى ده عيد الكحك والبسكويت والفطير والذى منه
(ايه الذى منه ده؟؟
البتى فور وحاجة تانية بس نسيت اسمها والله وللاسف الشديد كانت بتتعمل من دقيق الارز مش من دقيق القمح وتبقى صغيرة اوى وزى الكورة وكل اتنين يلزقوا مع بعض بالمربى او العسل وكمان يتحط عليهم الشوكولاته الفرماسيال
كفاية كده حرام عليكى!!!ماعلينا : ايه بقى علاقةالعيد بمجلة ميكى؟
مجلة ميكى بتمثل عندى فرحة وذكرى حلوة من ذكريات العيد السعيد لانى وبصراحة ماكنت اشتريها بأنتظام لانها كانت ب خمسة صاغ وماأدراك ما خمسة صاغ فى ايامنا بقى!!
ايامكوا؟؟اللى هى امتى بقى؟؟
شايفة ناس مطرطقة ودانها اوى للحته دى بس انا ولا كأنى سمعت حاجة ونكمل
من زماااااااااااااان المهم طبعآ اول ما ناخد العيدية كان اول شىء افكر فيه هى مجلة ميكى العدد الجديد مش القديم لانى كتير كنت اشترى الاعداد القديمة ممكن بنص التمن اوحتى بربع التمن وممكن لو البياع عارفنا
ناخد الخمسة اعداد بخمسة صاغ ونقعد نقرا فيهم العيد كله دايمآ كنت بحاول انا واولاد اخواتى (وكانوا هم زى اخواتى الحقيقة لاننا نفس السن تقريبآ)كنا بنحاول نشترى اعداد مختلفة من ميكى وسمير وتان تان ونتبادلهم مع بعض
نيجى لميكى متهيألى مهما قلت او شرحت مش حاقدر اشرح تاثيرها علىّ وسرحانى فى حكاياتها وضحكى على عم بطوط وعمايله وغيظى من اولاد اخيه وعفرتهم ومقالبهم فيه وكمان عم دهب وبخله الشديد وازى كان يحط القرش على القرش ويحوش وازاى صوت الفلوس وهى نازلة الخزنة يطربه ولا اجدع مغنى او
مغنية ومحظوظ اللى الحظ دايمآ معاه وميمى ورقتها وبندق المسكين وتفكيره المحدود
وذكريات كتير كتير سعيدة عن الحكايات بتاعتهم
يمكن اكتر قصة فاكرها لعم بطوط هى لما تمنى انه يقعد فى
جزيرة لوحده من كتر زهقه من الدوشة بتاعة الجيران والاصحاب والقرايب
وكان وصار وركب مركب فى رحلة والمركب اتكسر ورسى هو فى جزيرة لوحده خاااااالص
شويه كده وبعد ما استمتع بالهدوء ابتدى يجوع وعايز ياكل طب ياكل ايه مفيش محلات ولا اكل جاهز ولا حد يحضر له الاكل طبعآ حاول يصطاد سمك: معرفش
حاول يصطاد ارنب : برضه معرفش

رضى بقليله
وقال ياكل خضار
:مالقاش اللى على مزاجه
اصل عم بطوط صاحب مزاج على الاخر
طيب يعمل ايه؟؟ قال ينام وبرضه ده معرفش يعمله
بدأت الضفادع وصراصير الزرع السيفونية الليلية
وكمان حبة خروشات هشهشات للشجر واصوات طيور مبهمة
وزاد وغطى لما سمع صوت اسد قريب منه ...عمنا بطوط اترعب وجرى جرى

طلع فوق شجرة لاقى بومة فى وشه لزم وبطوط بيتشائم اوى من كده حاول ينزل لاقى الاسد منتظره تحت الشجرة طيب يعمل ايه؟؟
صحى من النوم
ههههههههههه

اشكرك يارب اشكرك يارب
راح تانى جرى جرى جرى على اولاد اخوه

وهاتك ياسلامات واحضان فيهم وهم مش فاهمين ايه السبب فى تغيره ده
وزاد اندهاشم لما عرفوا انه سمح لهم يجيبوا اصحابهم والجيران ويعملوا حفلة فى جنينة البيت
وسمح لهم بأستعمال مكبرات الصوت فى الحفلة !!!وهو اللى بيضايق من صوت العصفورة لو طولت شوية
حتسألونى اشمعنى الحكاية دى اللى لسه فاكراها ؟لانى برضة ساعات كتير بتمنى اكون فى مكان لوحدى من غير اى حد الا ربنا سبحانه وتعالى لكن ارجع افتكر عم بطوط وحكايه وافتكر الوحدة عملت فيه ايه

وقالوا فى الامثال:
جنة من غير ناس ماتنداس
مثل صحيح واصح منه مفيش!!

وكل سنة وانتم واحنا وهم وهن طيبون وطيبات
..............

هناك 38 تعليقًا:

بنات صاحبة الجلالة يقول...

كل سنة وانتي طيبة ياروح قلبي عيد سعيد عليكي ياقطتي الجميلة وربنا يجعل ايامك هنا وسعادة وكحك وبيتوفر والحاجات الحلوة كلها


خالص تحياتي وتقديري وقبلاتي

سفروتة يقول...

كل سنة وحضرتك طيبة يا دكتورة
وعيد سعيد عليكي يارب
ذكرياتك جميلة قوي
انا كمان بحب ميكي اوي اوي
ولسة لحد دلوقتي بجيب مجلة العربي الصغير
معرفش ايه الطفولة المتأخرة دي
ههههههههههههههههههههههههههههههههههههههههه
عموما كل سنة وحضرتك بألف خير وصحة وسعادة
ومتسألينيش عن الصحة:))))))

تحياتي

هانى زينهم يقول...

انا اعترض بشدة.. بندق ما كانش تفكيره محدود هو كان طيب ومسلم دماغه لميكى على طول !!
ونادر قوى لما تلاقى حد طيب كدة دلوقتى .. اييييييييييييه !! قلبتى علينا المواجع وفكرتينا بايام حلوة ميكى وسمير وكابتن ماجد واجرى بسرعة يا واد يا حسين شوفلنا ريرى بيتباع فين ؟؟
كل سنة وانت طيبة يا دكتور .

حسن حنفى يقول...

كل سنه وانتي طيبه يارب

بجد استايل المدونه هايل

والمدونه جميله دايما انا هشرفها طبعا

:d

هههههههههه

تحياتي

romansy يقول...

كل سنه وانتى طيبه
عيد سعيد عليكى وعلى المسلمين جميعا
باليمن والخير والبركات
امال فين الكحك

مصطفى محمود يقول...

وزير الصحة !! ,, ميكي ,, بطوط !!

مين دول

ايه علاقة دا بالعيد بس دلوقت !!

تصوري النهاردة الصبح بعد صلاة العيد كده
قعدت ولقيت أكل !!
ومسكت العيش في ايدي وكلت
اه وربنا كلت
بقيت بغمس من الطبق دا ومن الطبق دا ,,
طبعا مش هقول الاطباق فيها ايه :P

الحاجة الوحيدة اللي ليها علاقة بالعيد في كلامك هي الكحك والذي منه
نيههااههاااااااي

كل سنة وأنت طيبة يا دكتورة
وبطلي شغل الاطفال دا :))

ولو إن الخمسة صاغ مش نافعين عشان نعرف السر :))
بس ما علينا بكرة يكبروا ويبقو ربع مخروح ونعرف برضو :))

عيدك سعيد وفطرك مبارك إن شاء الله,,

سلام

Mohamed Dawod يقول...

سلام عليكم وكل سنه وانتى طيبه
يااااه والله انتى مسكتى الحاجات الحلوه اللى وحشانى وقعدتى تدوسى عليها....الحاجه اللى انتى مش فاكره اسمها كان اسمها "لانكشير" وكانت طالعه موضه شوية ايام وكانت والدتى هريانه بيها ومش عارف ليه بطلت دلوقتى تعملها.
الظاهر ان ايامنا واحده مع ان العدد اللى انتى حاطاه من ميكى من سنة 1962 بس انا حعتبر دى غلطه. لا تقريبا نفس اللى كان بيحصل عندك كان بيحصل عندى. حتى لما كبرنا شويه بقينا نجيب رجل المستحيل وملف المستقبل ونبدلهم. انا فاكر اول عيديه وعيتها ذاكرتى وكانت ربع جنيه من عمو محمد الله يرحمه احد اقربائى......كل سنه وانتى طيبه....رجعتينا لايام حلوه اطفال الزمن ده غلبانين مش عارفين يتمتعوا بأيام زيها....ربنا يعود عليكى الايام بخير انتى واسرتك وكل من هو عزيز وغالى عليكم

بنت سيناء.. يقول...

كل سنة وانتى طيبة وفعلا ميكى ليها تأثير بحكاياتها ورسومها المميزة انا لى قريب كان مدمن نقل صور وتقليد منها..

هاتى بئة العيدية(:

Ola يقول...

كل سنة و انت طيبة يا دكتوره,
تقصدي "اللانكشير"؟ ماما كانت بتعمله زمان قبل ماتبطل عمايل الكحك كلها من حوالي 12 سنة!! و لما بنسألها ليه تقول علشان مش لاقية حد يساعدني!! تفتكري قصدها إيه؟ هه؟؟

Dr Ahmed Said@Black Armor يقول...

والله عندك حق جنةمن غير ناس ماتنداس
حسيت بالقصة قوى ...لما ييجى عليك العيد فى الغربة وماتلاقيش حد تزوروا ويزورك لازم تحس بقمة الوحدة
كل سنة وانتى طيبة

Unknown يقول...

السلام عليكم ورحمة الله وبركاته
ملكات وبنات صاحبةالجلالة
كل سنةوانتن فى اكمل صحة واتم عافية
ويتم عليكن ربى ربى نعمه ظاهرة وباطنة ويسعد ايامك يارب ياريمو ويتم ربى ما بالك وبالك على خير أن شاء الله
مرة تانينة كل لحظة وانتن بالف خير يابنات يارب .

Unknown يقول...

السلام عليكم ورحمة الله وبركاته
سفروتة الامورة
الف اهلا بيكى انت يادكتورة
وهو برضه متهيأللى محدش بيكره
ميكى كلمة فى سرك ساعات اشتريها لاولاد اخواتى بس الحقيقة انا شاريها لنفسى مش لهم (طفوله متاخرررررررررررررررة اوى الصراحة انا باعترف لكن مالهاش علاج او وجدودها مش ماثر على الانسان ليه نحرم نفسنا منها؟؟؟؟ .
تمنياتى ليكةى يادكتورة مذاكرتكم صعبة لما قريت فى مدونتك افتكرت ايام الشقا والضنا ....يلا ماعلينا يعديها ربنا على خير
كل سنة وانتى بالف خير ياأمورة
وماتحرميناش الزيارة والتعليقات الجميله دى .شرفتى.

Unknown يقول...

السلام عليكم ورحمة الله وبركاته
الاستاذ هانى زينهم
هههههههههههههههههه
حضرتك لسه فاكر الاعلان بتاع
ريرى ده!! ماتتصور كان بيعجبنى ازاى
ايام جميلة والله يامستر هانى الواحد كان مفيش فى راسه حاجةالا اللعب وحتى لوكان بيزعلى لاى سبب كان سهل اوى ينسى
Those were the the days my friend!!
نهارك سعيد يامستر وكل سنهوانت بالف خير

Unknown يقول...

السلام عليكم ورحمة الله وبركاته شرفتنا زيارتك الاولى لينا ياحسن ومتشكرين اعجابك لمدونتا المتواضعة(انا بخبى اهوه)
ومنتظرين زياراتك المتكررة
زى ما وعدت ووعد الحر
دين عليه.كل سنه
وانت طيب

Unknown يقول...

السلام عليكم ورحمة الله وبركاته
romancy
وكل يوم ولحظة وانت فى اتم صحة واكمل عافية ويارب دايما فى احسن حال
اما سؤال عن الكحك
وما ادراك ما الكحك
امممممممممممممممممممممم
فهو موجود ....فى المحلات ...ههه
واللى عايز يروح يشترى ويجيب لنا معاه
هدية اد عشرين اربعين كيلو هدية مشكل !!
ها استنى ؟؟
نهارك ابيض
وكل عيد وانت سعيد

Unknown يقول...

السلام عليكم ورحمة الله وبركاته
تيفا هنا
الهندزة هنا
يامرحبا يامرحبا
نورتنا وازى مش شايف الروابط
بين ميكى والعيدوالكحك ما كلهاروابط!
المهم انت كلت وشربت على صباحة ربنا الحمد لله بالهنا والشفا (أكلت ايه؟؟)
كل سنه وانت بخير والاسرة كمان يارب
نورتنا وخلينا نشوفك دايما

Unknown يقول...

السلام عليكم ورحمة الله وبركاته
Mohamed Dawod
كل سنة وحضرتك بالف خير وربنا يقصر
ايام الغربة وترجع تانى لبلدك مصر ولبور فؤاد كمان تنورها وتستمع بالعيد وبالاعياد فيها بأذن الله
قولتلى لانكشير ....شفت ازاى؟؟
ياسبحان الله والله يااستاذ محمد بقى
الاسم على طرف لسانى ومش فاكراة فعلا كان جميل اوى وبعدين كمان مميز فى طعمه
علشان دقيق الارز.اما ان عدد ميكى فده بس علشان الصورة لكن اعتقد انا
(.......)سنآ منك ومش حاقول برضة علشان المطرطقين ودانهم فوقك دول ههههه
الايام والذكريات الحلوة مؤنة لينا على الايام والغربة كام مش كده !!
كل سنه وانت واسرتك فى خير حال وزى ما قلتلك يرجع ربك ورب الناس جميعآ بالف سلامة.ما تحرمنا تكرار الزيارةوالنعليق

Unknown يقول...

السلام عليكم ورحمة الله وبركاته
بنت سيناء
يالف اهلاوسهلا
ميكى كانت جميلة
ومازالت للان الحقيقة
لما اصدف والاقيها ..أيام!!
اما العيدية.....حاضر اول ماروح البنك ...امتى؟؟؟بعدين لما افضى حاضررر
نهارك ابيض وعيد سعيد لكى ولكل من عندك.سلاماتى ودعواتى

Unknown يقول...

السلام عليكم ورحمة الله وبركاته
Frustrated
كل سنه وانتى بالف خير
اة الحمد لله عرفت اسمه بس فاضل اكله
كان فعلا زى ماقلت قبل كده مميز فى الطعم بس قوليلى هى ماما بطلت تعمله ليه؟؟قولى لها لو تحتاج مساعدة المدونين موجوديين واى خدمة........هههههه
نهارك ابيض وعيد سعيد وعمر مديد ان شاء الله تعالى.

Unknown يقول...

السلام عليكم ورحمة الله وبركاته
Dr.A.S.black armor
كل سنه وانت طيب وترجع بلدك بالسلامةإن شاء الله .جربت الغربة انا سنتين (عارفة انها مدة قصيرة)بس ليّ فيها ذكريااااااااااااااااااااااااااااات
كتير اوى ما انساها ابدآ ولا احنا كمان يامصريين فينا حب بلدنا زايد شويه كمان الايام دى ولصعوبة العيشه والظروف الاقتصادية مابيبانش الحب ده لكن اسال اى مصرى فى صميم قلبه نفسه فى ايه؟حيقولك ارجع بلدى بس الظروف
اقولك كل سنه وانت بالف خير وربنا يرجعك بالف سلامة انت ومن مثلك.

غير معرف يقول...

كل سنه وانتي طيبة
رجعتني للزمن الجميل ..المجلات دى كان ليها الفضل في تثقفينا وتوسيع مدركنا .للأسف الولاد دلوقت مبيهتموش بالفرأه قد إهتماهم بالجيمز وخلافه.
الأهم من ده ان المجلات كانت بتقدم المعلومه التربويه والدينيه بطريقه بسيطه ومحببه ونمي فينا أشياءمازالت بداخلنا مثل حب الخير للأخر التمسك بالقيم والمبادئ البنائه محاربة الشر المتمثل في عصابة دنجل ...حب العلم والبحث عبقرينو
لكن دلوقت سايبين ولادنا للنت وبلاويه دون رقيب وألعاب عنيفه بأصوات صاخبه
عاوزه اقولك انتي جميله قوى وقبل كده قلت لكي اللي زيك عنده ناس بيحبوه عمره م يكون وحيد ..وربنا ميكتبها عليكي ابدا
تحيااااااااااتي

الفارس الملثم يقول...

تعرفي اني برده كنت بحب اعداد ميكي دي , هي الميزانيه مكنتش بتسمح اني اشتريها فكنت باستلفها , مش مهم جديد ولا قديم المهم مكنش قرتها قبل كده وكنت بحب اتفرج علي الكارتون بتاعهم اوي

انا يمكن كنت بشتري اعداد مجلة علاء الدين في بداية ظهورها كل اسبوع

انا عموما كنت بحب القرايه اوي واي حاجه ممكن تتقري كنت بقراها ولو غلب غلبي اقري اخبار الحوادث هههههههه
شفتي الطفوله البريئه بقي ...

كل سنه وانتي طيبه يا دكتوره بس اعزمينا علي البدفور بقي ممممممم

تحياتي وتقديري

محمد خالد يقول...

ايه الارتباط الفكري ده ؟؟
لسه قاعد من يومين غرقان في طفولة وعايش في طفولة

اااااااااااه من قلبي بقولها

الموضوع جميل اوي

ولسه الحمد لله بجيب كل بطوط كرتون عندي ومحتفظ بيه اول باول

ربنا يديم السعادة والبسمة علي وجه حضرتك يا دوكتورتي العزيزة

لاجئ الى متى يقول...

كل عام وانتم جميعا بخير في مصر
وفي جميع الأقطار العربية والاسلامية

عيد بدون غم بينفع ؟؟ ههههه
لهيك بدي أسأل سؤال ..

سامحيني على الغم قبل ما أسأل

.
.
.

.. في أفريقيا
صحيح انه معمر القذافي
لقبه صار .. ملك ملوك أفريقيا ؟؟

نيالكو ... تتهنو
ما شاء الله
حسبي الله

الى لقاء

Mkjwe يقول...

كل سنة وانتي طيبة
انا مش عارف لية الكلام في مدونتك بيكون ملون بيزغللي عنيا اوي
تقبلي تحياتي

mostafa rayan يقول...

كل سنةوانتي طيبة ويارب عيد سعيد عليكي
بخصوص البوست بقي
فانا طبعا كنت بقرأ ميكي ( دفعة مابعد الشلن انا )
لكن ماكنتش منجذب له بالشكل دة كنت بحب فلاش وماجد اكتر
بخصوص موضوع الجنة من غير ناس ماتنداس فانا مش موافق معاك في الحوار دة لوانا لوحدي في الجنة عادي هتمتع بكل اللي فيها الحور بقي والأنهار والثمار وكل الحاجات الرائعة دي مش هيفرق معايا الناس
اه طبعا الناس مهمين جدا في حياتنا لأنهم اهلنا واصحابنا وجيرانا واللي بنشتري ونبيع لهم
لكن احيان كتير الواحد بيحب ينفرد بذاته والناس مش بتقدر دةوبيكون وجودهم مصدر ازعاج جامد ليه
لكن طبعا في الدنيا ماحدش يقدر يستغنى عن الناس لأنهم هما الحياة
كل سنة وانتي طيبة مرة تانية

Unknown يقول...

السلام عليكم ورحمة الله وبركاته
الاستاذة وفاء بركات
كل سنة وحضرتك بالف خير يافندم
ويديم عليكى ربى رضاءه إن شاء الله
فاكرة عصابة القناع الاسود والزعيم دنجل وطبعآ عبقرينو المفكر بتاعه (زيزو) حاجات جميلة اوى وذكريات اجمل والله وماتفكرنيش بالخبط والرزع بتاع (سبيس تون)واللى عاملاه فينا لما الصغيرين بيجوا وماتسمعى الا طاخ! طيخ! طوخ ! والسفينة تحترق !!احذر الاشعاع !!!لما جابوا للواحد الرعشه!!نهارك ابيض ويجعلك من كل دعاويك الحلوة دى نصيب يارب ويكتب لكى فى كل خطوة سلامة .شرفتينا بالحضور والله ياأستاذة والتعليق الجميل ده

Unknown يقول...

السلام عليكم ورحمة الله وبركاته محمدالفارس الملثم
صباح الخيرات إن شاء الله.
فعلا العيال المثقفين الاصحاب بينفعوا فى الاوقات دى واهو سلف ودين ومردود لك بعد كده .مجلة علاء الدين الحقيقة ماحبتهاش مش عارفة ليه ممكن علشان مش عيالى اوى!!!!!!!هههههههههههه.
عارف يامحمد كان لى زميلة لازم كل اسبوع تشترى اخبار الحوادث فى نفس الوقت اللى كانت الدادة عندنا لازم تشوف برنامج اسمه اعتقد(من وراء القضبان .....مش متأكدة اوى)المهم الاتنين بعد كده لازم يحكولى اللى قرأوه او شافوه!! ياستى انتى وهى فى عرض النبى مش عايزة اعرف !!!!مفيش فايدة ولازم يكملوا
كل سنة وانت بالف خير ولما تبقى انت تعزمنا على (العثمانلية)نبقى احنا نعزمك على البيتفور!واحدة بواحدة!

Unknown يقول...

السلام عليكم ورحمة الله وبركاته
محمد هنا
شمندينا هنا
مرحبا مرحبا
طيب بقى فرجت لما نحب نستلفهم منك ابقى ابعتهم لنا على اللنك بتاع المدونةانت عارفة مش كده؟؟ههههههه
نهارك ابيض ويجعل ايامك كلها سعادة
فى حب الله وحب الرسول عليه افضل الصلاة والسلام.
متعك الله بالصحة والعافية واتم عليك نعمه ظاهرة وباطنة.

Unknown يقول...

السلام عليكم ورحمة الله وبركاته
لاجىء الى متى
عائدون إن شاء الله
كل عام وانتم صامدون
صابرون منتصرون منصورون
إن شاء الله (إن جندنا هم الغالبون )
وربك مابيقول حاجة غلط ابدآ...اصبر وما صبرك الا بالله.
انت قرأت الخبر انت كمان؟؟
والله استغربت واستعجبت لما قلت يابس
ولولا انه مكتوب بالاهرام والكاتب صحفى معروف كنت قلت انه نكتةاو شىء كده....اقولك حسبنا الله ونعم الوكيل
تسلموا على الزيارة والمرور والتعليق

Unknown يقول...

السلام عليكم ورحمة الله وبركاته
IOvelyghOst
اولا اهلا اهلا اهلا وحمدلله على السلامة
وكل سنه وانت بأتم صحة واكمل عافية
اسفيييييين للزغلله يافندم ومعلش وبصراحة اصلى احب الورد والالوان والزهور تلاقينى كاتبه كل حبة سطور بلون مختلف .... (مش كلاسك زى ناس ابيض واسود بس)
نورتنا لمرورك والتعليق

Unknown يقول...

السلام عليكم ورحمة الله وبركاته
mostafa rayan
كل سنة وحضرتك بالف خير وعيد سعيد وعمر مديد يارب فى طاعة الله وحب رسوله
انت كام دفعة كده بعدين:) والناس مزاجات بمعنى مايعجبك قد لا يعجب غيرك
والعكس صحيح ايضآ ونفس الكلام ينطبق على المثل انا شايفاه صح لانى اعتقد انه بيتكلم كمثل عن جنه الدنيا وليست الاخرة .ياترى شاهدت فيلم (Cast off لتوم هانكس لما السفينة غرقت واضطر هو يعيش فى الجزيرة لوحه اخترع له (خيال مآته)ليحاكيه ويكلمه
الوحدة المطلقة صعبة جدآآآآآآآآآآآ
وقاك الله شرها يارب
مرة تانية شكرآ للتعليق
وكل سنة وانت بألف خير.

ahmed_k يقول...

ياااااه ميكي وسمير
أنا لي معاهم زكريات وزكريات
فعلا زي ما بقول دايما كانت أيام جميله
وبسيطه في كل شيئ حتى التليفزيون كان قناتان فقط وكان لهما متعه لا تقارن لما ياجي بابا ماجد ولا ماما نجوى مره كل إسبوع كنا بنستناهم وظابطين الساعه على ميعادهم ويادي الغم لما تعدي عربيه في الشارع وتشوشر على الإرسال ههههههههه
وقصة عم دهب دي أنا فاكرها أو بالأصح فكرتيني بيها وتخيلت الرسومات بتاعتها
ولو دورت في الأشياء القديمه بالتأكيد حلاقي مجلات ميكي وسمير لكن تانتان مجبتهاش إلا متأخر لأنها مكانتش بتوصل الغردقه
المهم رجعتيلي زكريات جميله

وكل سنه وإنتي طيبه يا دكتوره
وبعوده عليكي الأيام بكل خير

Hossam يقول...

عيد سعيد صديقتى
اتمنى انك تكونى قضبت عيد سعيد ويا رب كل الذكريات القديمة خصوصا مع الاخوات تجدد تانى وعلى طول
سلام

Unknown يقول...

السلام عليكم ورحمة الله وبركاته
ahmed_k
كل سنه وانت بالف خير وصحة وعافية
على كده حضرتك من الغردقة اساسآ
؟يعنى مش رحتها فقط للعمل ؟
برضة الحقيقة انا فاكرة لما عملوا القناة التالته دى وكانت بتفتح لمدة ساعتين بس .المهم كان فيه كارتون كنت لازم اتفرج عليه(وانا كبيرة برضة بس مش حاقول كام.......ههههههههه)مكنتش لا ابدأ مذاكرة او اى حاجة الا لما اشوف
(لولو الصغيرة)كان اسم الكارتون, فاتت الايام واعادوه مرة تانيه ومش حاقولك على حجم الذكريات اللى رجعها لى .....ايام جميلة اوى مش ممكن تتنسى
ومرة تانية كل سنة وانت بالف خير.

Ahmed Kamal يقول...

كل سنة و انتي طيبة ، رجعتيني لورا قد ... كام سنة ؟ ما علينا ، زمان قوي ، و برضه لسه حافظ حكايات من أيام زمان ، و كمان محتفظ بمجلات من أيامها . تحبي تبدلي مجلات ؟ :))

Unknown يقول...

السلام عليكم ورحمة الله وبركاته
أ.احمد كمال
وكل لحظة وانت بالف خير
وخلى عدد السنين فى سرك
شايف الودان مطرطقة ازاى ..هههه
اما مبادلة المجلات ...ياريت.. ياريت ياريت ينفع !!!! ربنا يخللى الاجيال اللى بعد منى قضوا على الاخضر واليابس
قصدى اولاد اخواتى يعنى دمروا كل شىء
ولم يبقى الا الذكريات (الحمد لله معرفوش
يدمروها دى كمان):)
نورتنا ياأستاذ احمد
بالمرور والتعليق

Unknown يقول...

السلام عليكم ورحمة الله وبركاته
Hossam
كل لحظة وانت بألف خير
ياحسام خلاص الدراسة
بدأت شيد حيلك فى المذاكرة
لكن ماتنسيناش برضة احنا
اصحابك فى المدونات
تمنياتى بالنجاح
إن شاء الله.