الجمعة، يناير 29، 2010

! بيت الراحة .!!!!

BRB Bathroom Outhouse break Smiley Emoticon Animation Animated gif Pictures, Images and Photos



حاجة مهمة ومحدش يقدر يستغنى عنها
من الامير الى الغفير وكلنا فاكرين حكاية الرهان
اللى قريناها زمــــــان بين ملك والوزير بتاعه وفيها
تحدى الوزير الملك ان مملكته كلها لا تساوى(تواليت )
واحد طبعا الملك هاج وماج ازاى تقول كده؟ دا انا! دا كذا !
المهم الوزير قاله حاثبتلك وفعلا لعبوا مبارة شطرنج هزم
الوزير الملك وكان حكم الوزير ان الملك ما يرحش الحمام!
يالهوىىىىىىىىى الملك عمل فيها راجل ومسك اعصابه
ساعة
أتنين
تلاتة
خمسة
ماقدرش بعدها
وقعد يترجى الوزير


خد كذا طب خذ كدا
والتانى ابدا راسه والف
سيف ما يوافق لحد ما وصل
أنه عرض نص مملكته عليه
ودا ابداً مش موافق ومالاقاش الملك
منها بد عرض مملكته كلها عليه قصاد
يسيبه يرررررررررررررررررررروح
الحمام وفعلا وبعد ما خرج الملك واستررررريح
وحس بالراحة بقى عمال يغنى
زى محــــرم فــــــــؤاد ويقول:
زى ما أكون تعبان وارتحت
دا اللى انا بشعر بيه ياحبيبى
طبعا الحمامات اتطورت
جدا عن زمان وبعد ما كانت
مجرد حفرة فى الارض تردم






أو بردوووووون جردل يقضى الغرض







بقت حاجات ومحتاجات وأماكن
تجنن وتهوس كده يعنى اللى يدخلها
ما بيبقاش عايز يخرج منها بصراحة
زى دا







أو دا مثلاً









أعجب ما اذكره عن الحمامات
لما سافرت لندن وكانت أول مــرة
أعرف ان الأجانب ما بيستــــــعملوا
(بردون الشطاف) يادى النيلة !وكنت
كل مرة ألبى نداء الطبيعة:)أضـطر استحمى
لما أتهريت من الحموم والصابون !بقى كل النظافة دى
فى الشوارع وفى البيوت والورد اللى فى البلكونات والبارفات
وبعد كده مفيش شطااااااااف ياكسوفى ياكسوفى ولندن كانت ارحم
من باريس اللى رحتها بعد كده ليه؟لان الحمام بتاع الاوضة أوالاوض
كلها لها حمام واحد فين ياجماعة !!!!!!!!!فى البسطة اللى بين الدورين
فاهمين قصدى؟أهـ والله وطبعا برضه مافيهوش شطاف! طبعاً يعنى !!!!
ولازم تطلعى تستحمى فى اوضتك !
لما رحت نيويورك كانت ارحم شوية
حمام الاوضة كان فيه بيديه لولولوىى





من ذكريات الحمامات برضه لما كنا
بنروح القرافة(المدافن) وأحنا أطفال
مش عايزة أقولكم الرعب اللى الواحد كان
بيحسه وهو رايح الحمام هناك بالرغم من ان
الحاج والدى الله يرحمه كان موصل النور والمية
للمدفن نفسه لكن الحمام نفسه كان بلددددددددددى






فهمينى !كنت ببقى مرعوبة وحاسه
كأن حاجةأو أيد حتطلع منه وتخطفنى !
المهم ايه اللى فكرنى بالحمامات وكل كل دا
هى فقرة كانت فى إذاعة البى بى سى امبارح
عن مخترع كرسى الحمام الحديث اللى بيفرغ من
المحتويات بتاعته الأوفنسف بضغط الميه (منه فيه)
واللى أنقذ البشرية من (الحمام البلدى)ولو ان بعض
الناس بيقولوا أنه(البلدى يعنى) طبياً اســـلم لكن بصراحة
بيكسراو عايز ركب من حـــــديد:) الحقيقة الفقرة أثـــــارت أهتمــــامى
وذكرياتى وخلتنى ابحث فى جوجل عن مخترع التواليت بشكله الحديث
ولقيت كلام كتير أخترت منه كلام
الاستاذ صلاح منتصر (ومش عارفة
هوالأستاذ منتصر بتاع الاهرام بتاعنا ولامجرد تشابة اسماء)المهم
الاستاذ صلاح أعتبران التواليت الحديث هو الاختراع رقم واحد فى
تاريخ البشرية لان لا أحد يستطيع الأستغناء عنه أو أن يقول أنه
لم يستعمله ولو مرة فى حياته وكمان ريح الناس من حاجااااااااااات
كتيراوىىىىىى انتم عارفينها وأمراض اكثر.أخر حاجة حاقولها
وأمشىىىىى :مرة مريض كان بيشتكى لى من بردون الامساك
وأد ايه معذبه وعمال فيه عمايل صعبة فى نفس الوقت اللى كان
عندى نفس المشكلة :لقيت نفسى لا شعورياً بقوله :
ايوووووووووووووووووووووة عــارفة :)

هناك 114 تعليقًا:

mhmdwahab يقول...

السلام عليكم
ايوة ايوة اة اة
يا سلام الحمامات دى هواءها يرد الروح و بطوس فى القفا لموخذة
ما احلى الرجوع الية
صدق من قال بيت الراحة

أبو العريف يقول...

ههههههههههههههههههههههه

ازيك يا دكتوره

اشي لندن وباريس

والقللي

انا جاي احقد بقي

بيقولك واحد بلدياتنا

بيسألوه عن السيفون بردون

قالهم عباره عن حبل تشده

ويا تلحق تشرب يا ما تلحقش

باردوووووون

Heba Faruq يقول...

ياااه.. ده الأوربيين دول طلعوا أي كلام صحيح..بس على فكرة انا كنت سمعت قبل كده معلومة بتقول ان الاوربيين لم يكونوا يعرفون الحمامات خالص وانهم عرفوها بس من العرب اللي لهم الفضل في اختراعها..
عموما احنا الموضوع مهم بالنسبة لنا اكتر لانه طبعا شرط من شروط الصلاة

اسعدني كثيرا مرورك لمدونتي ومعلش انا عارفة اني كسولة جدا لكن كتبت تدوينة يا رب تعجبك

مع خالص تحياتي

mhmdwahab يقول...

و لكن تبقى الحمامات البلدى افضل فى الاماكن العامة مثل المساجد والمستشفيات لسهولة نظفتها وعدم لمس جسد الشخص اللى عايز يرتاح لموخذة
تعرفى اصعب حاجة ممكن تقابلنى لو الظروف حبكت فى الراحة خارج البيت لالالالالالالالالالالا ممكن ابدا الا فى حمامات دورات المياة الملحقة بالمساجد لظروف الوضوء

TIMMY !! يقول...

هههههههههه

موضوع فريد من ريحته .. قصدي فريد من نوعه يا دكتورة نور :)

فعلا بيت الراحة ده أصدق اسم أطلقه أحد على الحمام - من وجهة نظري فقط - لأن الواحد بيرتاح جدا بعد ما يطلع منه و بيدعي و يقول كما في الحديث : (( الحمد لله الذي أذهب عني الأذى و عافاني )) ,

أما بالنسبة لأوروبا و الدول المتقدمة , فدول أنجاس ماديا - لعدم وجود شطافات زي ما قلتي :) - و معنويا : نجاسة الكفر ..

karim يقول...

واللة دايما اقول انة اعظم اختراع فى التاريخ و سيظل, انة حقا بيت الراححة, و شفيتم

norahaty يقول...

mhmdwahab
تصدق يااستاذ محمد أصدق
أسم هو :بيت الراحة:)

norahaty يقول...

أبو العريف
الحمد لله أزيك انت
ياباشمهندس كيف حالك؟
القللى!لأ ما رحتش البلد
دى لسه:)وبااااااردون:)

norahaty يقول...

Heba faruq
واللى سمعتيه مضبوط
يااستاذة هبة العرب
والأندلس لها عظيم الفضل
على أوروبا يكفى الروب
والكاب اللى بيلبسه خريج
الكلية أو المدرسة الثانوى
أصلاً متاخد من العباية والعقال
العربى !وسعيدة بوجودك ياهبة.

norahaty يقول...

mhmdwahab
فعلاً افضل فى
الاماكن المزدحمة
بشرط المحافظة على
نظافتها وأعتبار
انها ملكية خاصة
لكل من يستعملها.

norahaty يقول...

TIMMY!!
حمدلله على السلامة
ياباشمهندس كيف حالك.
بس موضوع مهم مضبوط؟:)
كلنا نحتاجه مضبوط؟ :)
وكلامك حكم وصح 100%

norahaty يقول...

karim
عارف ياكريم
أنا كنت دايما
أقول التكيف
صراحة بعد
الموضوع دا
حأغير رأيىّ:)

Tamer Nabil يقول...

لايظل شىء على حالة وكل يوم فى الجديد والاحدث

ونظرة وصناعة كل مجتمع الى الامر تختلف حسب رؤيتها لا لامر

ربنا يوفقك ويكرمك


مع خالص تحياتى

لولا وزهراء يقول...

مسا الفل والورد البلدى والياسمين وكل حاجه حلوه على احلى وارق واغلى دكتوره نورا فى الدنيا كلها

معلش انى جيت متاخره بس شوية ظروف كده
المهم الموضوع بتاعك رغم انه ظاهريا دمه خفيف لكن بجد جد ما يحتويه عمييييييييق جدا جدا جدا

حلوه السفريات والجوله بتاعتك عارفه بقى الوضع فى امريكا وايطاليا مختلف شويه
رغم ان باريس تعتبر من انظف المدن على مستوى العالم لكن شوفتى بقى ايه اللى بيحصل لهم

فى انتظار حاجات منك حلوه يا قمر


زهراء

خواطر شابة يقول...

موضوعك مهم وفعلا نحمد الله على نعمة الاسلام فالابتعاد عن النجاسة والوضوء يجعلنا اكثر التزاما منهم من ناحية الطهارة
هناك مثل فرنسي ان اراد ان يقول لك ان شخص في الحمام يقول لك انه في المكان الذي يذهب اليه الملك وحيدا
تحياتي لك

صيدلانيه طالعه نازله يقول...

طب و الله انتى عسل يا نورا
اصلك فكرتينى بالذل اللى بنتذله اما نخرج و نروح مشوار بعيد و احنا فى القاهره و نحب نروح تواليت و طبعا فى بلدنا ده يعتبر رفاهيه من الرفاهيات انك تلاقى تواليت عمومى و لو لقيتى يبقى اجارك الله قمه القرف
و نضطر ندخل اى كافيه و لو مش فى كافيه قريب يبقى عمر افندى او اى محل قطاع عام

هههههههههههههههههههه

لكن و انا فى اسيوط مهما كان البلد صغيره 10 دقايق بالكتير و ابقى فى البيت

ندخل غرفه الاعترااااااااااف و نطلع مبسوطيييييييين
ههههههههههههههههههههههههههه

أمل حمدي يقول...

ههههههههههههههه

فعلا الحاجة الوحيدة اللي مش رفاهية ابدا

بوست حلو رغم غرابته

تسلمي يا نور

ليس فقيرا من يحب يقول...

هههههههههههههههههههههههه

سلام عليكم الاول

والله صح جدا بيت الراااااااااحه

الواد اخويا فى امريكا لما قاللى ان

الحمامات مش فيها شطافات بصراحه اتصدمت

المعفنين عاملينلى نص البلد طب يرحوا

يتشطروا ويركبوا شطافات الاول هههههههههههههههه

الحمدلله على نعمه الاسلام والعقل

والله يسهلوا يا عم على الفسح دى كلها

تركي الغامدي يقول...

من يتأمل التوجيه الديني عند قضاء الحاجة يدرك إلى أي مدى أهمية الاعتناء بالجسد وكيف يتحول شعور أحدنا بعد ذلك إلى الراحة والاستعداد لرحلة أخرى مع الأكل جميع ذلك يحدث والاستعاذة من الشيطان الرجيم تحفظ الإنسان حتى حال قضاء حاجته بالتنزه من القذارة ومواصلة الطهارة .
شدني الموضوع دكتورتنا الموقرة بل أتت النهاية لتؤكد أن الطبيب يتفاعل مع مريضة متى وفق إلى تلك الرسالة السامية أو هذا ماحدث لك .
دمت في صحة وسرور .

romansy يقول...

ههههههههههه
ايه يا دكتوره الكلام الجامد دا
وبعدين بقى الصراحه الصور تحفه وبعدين ادينا عرفنا معلومات بقى عن لندن وباريس ونيويوك
يا بختك يا عم لفيت

Romancia يقول...

البوست بتاعك جميل
واول مرة اعرف موضوع ان مفيش بره شطاف دة
طيب سورى هما كلهم بيستحمو كدة بعد مبيلبو نداء الطبيعه ولا بيعملو ايه بجد حاجة مش عاديه خالص ....

نـــــــــــــور يقول...

ياخراشى
هو اللى لونه بمبى ده كمان اللى فى الصوره التانيه حمام؟ عادى كده؟ يعنى الناس بتدخله يعملوا ببى زيينا كده
والله افتكرته فيلا والمصحف هههههههههههههههه

بس حلوه اوى حكايه ايـــــــــوه عارفه دى
فضيحه
الراجل اخد باله طيب ولا فهم انها من خلال خبرتك كدكتوره؟

اما عن حكايه الملك فقالها هارون الرشيد فى اختبار عمله لاحد اولاده ان الملك اللى مايساويش شويه ميه مالوش لزوم
ده فيما معناه يعنى اصل ده مش ممكن يبقى كلام هارون الرشيد يعنى
والا يبقى هارون من بولاق :))

محمد الجرايحى يقول...

بصراحة اندهشت من العنوان
وصارت دهشتى اكبر عند مطالعة التدوينة
فكرة غريبة وجريئة وطريفة

كلمات من نور يقول...

أكبر ازمة في حياتي الموضوع داه وخاصة لو طلعت بره بيتي وحمامي وطقوسي باتعذب علشان مش باعرف ادخل الحمام في أي مكان ....وبابقى نفسي في طيارة توديني البيت شوويتين بس وارجع ......هههههههههه موضوع مهم وسبحان الله فعلا النظافة من الإيمان

د/عرفه يقول...

السلام عليكم

دايما كنت بعتقد ليس اى تجديد بيكون افضل من سابقه
وليس اى تطور بيكون افضل من الماضى

علشان كده لما الشقيرى جاب حمامات اليابان
وقعد حلقتين يمدح فيهم
وبابا قالى ان الحمامات دى من غير شطاف

قولت طيب والهيلمان ده كله ملهوش لازمة من غير مية



و ما يحسش ببيت الراحة بمفهومه الكامل إلا مريض الامساك
ربنا يكون فى عونه
ههههههههههه

mhmdwahab يقول...

طيب بردون بدل ما تستحمى كل مرة تدخلى الحمام و انتى فى لندن و باريس كنتى ممكن تستخدمى الكوز اة و كل واحد مسافر ياخذ الكوز معاة فى الشنطة بس الخوف هناك يعتقدوا انها بومبة وتبقى اخرتها جواتينامو وهل تعرفى ان فى اقسام البوليس يستخدمون الجردل فى اماكن الحجز ايوة حجز المتهمين على ذمة قضية حكى لى سائق الشركة لما كان عامل حادثة و تم حبسة 3 ايام فى حجز القسم فبل العرضى على النيابة

لولا وزهراء يقول...

السلام عليكم ورحمة الله وبركاته ازي حضرتك يا لادكتورا نورا
يارب تكوني بخير وسعادة يارب(:
ايه الموضوع الهايل ده هو مش متوقع ..بس جميل جدا المناقشة الراقية فيه وتوضيح حقائق مكنتش اعرفها عن الانجليز والفرنسيين في تعاملاتهم اليومية مع التواليت معقووووووووووووووووولة دي !!!!
الحمد لله رب العالمين الاسلام دين النظافة والطهارة
لـــولا

الشاعر الفنان أحمد فتحى فؤاد يقول...

ربنا يعزك
و يحميكى و يحمينا
واستر يا رب

Dr-Ibrahim يقول...

لا الحمام البلدى عندى اريح وأنضف وأحسن كتير مليون مرة
على فكرة الامساك ممكن يكون من ان محتويات الجهاز الهضمى مبتنزلش كلها عشان العضلات مستريحة انما الانسان لما بيعد على البلدى عضلاته بتنقبض فيبقى هناك قوة دافعة
والصراحة المفروض يبقى فى كل بيت حمامين واحد بلدى واحد افرنجى للى صحته تعبانة ..واحنا عاملين كده
وبره كما ذكرتى مفيش مياه
هتلاقى أى زجاجة بارفان
مكتوب عليها
l'eau de toilette
يعنى مياه الخاصة بالحمام

حاجة قرف
مفيش أحسن من الإسلام فى النظافة

أحكيلك حكاية
كان واحد قريبنا ايام زمان ساكن فى سكن جمب الجامعة وكان معاهم واحد صعيدى
وجه واحد صعيدى يزور قريبه الصعيدى دافدخل الحمام وشوية وقريبى بيقول سمعت صوت طرقعة جامدة
فطلع يشوف
لقى الأخ طالع من الحمام
فبيقوله خير فيه ايه يا حاج
قاله
"مالها القاعدة عالية كده جيت اقعد مستحملتنيش وقعت بيا"
طبعا هو حسبها بلدى وطلع عليها برجله من فوق:)ونزلت بيه:)

well يقول...

هههههه
ناس كتير اوى اتصدمت من الموضوع ده لما راحت اوربا وسمعت من ناس كتير وقريت لمدونين مهاجرين كتير مواقف زى دى
وبصراحة كنت بضحك
عاوز اقول على حاجة هتتفقى معايا فيها او لأ
هو نعمة بجد ومحدش يعرف قمته الا لما ....
تحياتى

راجى يقول...

دمك شربات يا دكتورة
موضوع ظريف جدا

حاول تفتكرنى يقول...

اعشق أدب الرحلات ، واحتفظ بكل الكتب التي تناولت كل جديد عنا ، بالشرح والتحليل والوصف

تمتعنا بالجديد
وسعدنا بالتنقل بين بلدان العالم ، ولو أني لم أتخيل يوما أن يكون مضمون الموضوع يتناول وصف عملية نتجنب الكلام فيها أو القراءة عنها

تحياتي

د. ياسر عمر عبد الفتاح يقول...

أنا بعد ما قرأت البوست ده حسيت إني عاوز أروح في حتة كده .. لا مش مهم

حضرتك عاملة إيه؟
من زمان أوي معدتش من هنا
ولا عديت من أي حتة أصلاً
اصلي بمارس هوايتي المعتادة في الغطسان

د/ أحمد لاشين يقول...

الحمامات اللي حضرتك حطتيها دي
فعلا تخلي اسمه بيت راحة
حتي لو الواحد مش محتاجه يعني يدخل يتفرج علي المنظر بس :):):):)

Tarkieb يقول...

هههههه والله موضوع فعلا مهم ومحتاج حد لف وشاف الدنيا ووهب حياته للاخراج ولا يوسف شاهين....ضحكتيني والله بس انت عارفة احسن اختراع شفته كان فى مطار كوالا لامبور حيث انهم دافنين التواليت الافرنجي تحت ويستخدم كانه تواليت بلدي واكيد بصه له من ناحية شرعية....بس الرجال ربنا بجد بيحبهم حيث انهم يجيدو التصويب واقفين ...عشان كدة تلاقي الكباري في مصر بنكهة النشادر,,..بس اجدع بقى حكاية بجد حصلت لي هي لما كنت في محطة القطر في جزيرة المانية اسمها سولت Sylt وكان سعر دخول الحمام يورو بينما في جميع المانيا نص يورو بس وطبعا في ناس تقول معقول يورو بس بعد ما اي راجل يخش بيطلع اكنه موسيقار كبير ولا المايسترو جادليو لان التواليت عبارة عن جدار نازل عليه المية من فوق على طول وبالضوء والوان مختلفة وحاجة بجد تشرح القلب كانه عرض ضوئي مائي وعندما يقوم المتبول بتوجيه البول للجدار تتغير الالوان والموسيقى وطبعا كان في ناس داخلة عشان تعذف الحان مائية عذبة....بس ياستي ....

م/محمود فوزى يقول...

ازيك يادكتوره
جزاكم الله خيرا على الموضوع الهام والمريح طبعا
ده بيت الراحه

واللى فعلا يغيظ انهم بره فعلا ميعرفوش النظافه فى الحمام
حتى ولو كان نظيف ظاهريا
بس ازاى يعنى من غير شطاف
انا اول ماعرفت ده من فتره اتغاظت جدا
ولكنى تعودت على التناقض عندهم
فهم برضه بيوجعوا دماغنا بحقوق الانسان وحقوق الحيوان
في حين انهم بيحتلوا بلاد ويعذبوهم ويقتلوهم ويحاصروهم
ونلقى ان اغلب الى واقعين تحت ظلمهم هم المسلمين
حسبنا الله ونعم الوكيل

فيه بس موقف افتراضى افتكرته من نكته سمعتها من الدكتور وجدي غنيم
مره واحد عنده اسهال راح الحمام لقى واحد عنده امساك جوه
فاللى بره بيخبط على الباب بعنف
اللى جوه بيقول بهدوووووووووء : فيه ايه
اللى بره: عندي اسهال
اللى جوه: يابختك
هههههههههههههههههههههه
ربنا يكرمك ويسعدك

جايدا العزيزي يقول...

هههههههههه


موضوع مهم فعلا


هو فيه اهم من بيت الراحه


فكرة جديدة سرد متقن


احيكى على جرائتك


تحياتى

أم .. بوبه يقول...

إيه الريحة دى

أقصد إيه البوست الجميل ده

بجد عرفت معلومات حلوة اوى وجديدة لانج بالنسبالى واهمها موضوع الشطاف فى لندن ده إيه القرف ده بجد مفاجاة بالنسبالى

أم .. بوبه يقول...

http://awraktanbod.blogspot.com/

mhmdwahab يقول...

شوفى بقى يا نور البوست الجاى عن الزهور و الورود لازم تغيرى الاحساس الغريب بتاع الكبنيهات دة اوعى اوعى تعملى بوست عن المراحيض العامة

salma mohamed يقول...

ازيك يا نور؟
معلش على الغيبة الطويله,وشكرا على سؤالك,
فعلا الواحد بيستشعر قد ايه معنى الدعاءالمورود في الحديث (الحمد لله الذي أذهب عني الأذى و عافاني),
بنعايب على ان لندن ما عندهومش شطاف بس,احنا بقى دورات المياة في معظم الاماكن غير صالحة للاستخدام الادمي ده ان وجدت اصلا ):
بس بجد لما شوفت حلقة خواطر من اليابان بتاعة الحمام اتحسرت على اللي بلدنا فيه.

أحمد شريف يقول...

السلام عليكم
بمناسبة الموضوع أردت أن أذكر بدعاء الدخول والخروج من الحمام ( الخلاء )
عند الدخول : " اللهُمَ إِنيّ أعُوذُ بِكَ مِنَ الخُبْثِ وَ الخبائثِ "
وعن الخروج : " غُفْرانَكَ " أو " الحمد لله الذي أذهب عني الأذى وعافني "

==== بمناسبة موضوعك أردت أن أستثمره في شيء آخر .. هل تعرفي أن مصر من أهم دول العالم في صناعة الأدوات الصحية على مختلف أشكالهاوتجهيزاتها وكذلك السيراميك والرخام ؟
منتجاتها تكسو أفخم منشآت العالم في كل الدول بلا استثناء
هذا فضل من الله

حصان المرجيحة يقول...

انا عندي استعداد اتجوز في شقة عبارة عن تلت حمامات و صالة بس الحمامات تكون زي الصورة
هههههههههههههههه

ذو الوجه المبتسم يقول...

السلام عليكم

جاي اسال عن اختى

اللى مطنشانا بقالها فترة طويلة

كل سنة وانتى طيبة

MaNoOoSh يقول...

أيوووووووووووووة عارفة

بس ايه حكاية من غير شطاف دي
لالالالالا كله الا كده
دة عذاب وكل شوية حموم حموم
دة الواحد يبوش


صحيح والله الواحد بيستغرب مع كل النظافة اللى في شوارعهم ليهم عادات عجيبة

شهد الكلمات يقول...

مرة مريض كان بيشتكى لى من بردون الامساك
وأد ايه معذبه وعمال فيه عمايل صعبة فى نفس الوقت اللى كان
عندى نفس المشكلة :لقيت نفسى لا شعورياً بقوله :
ايوووووووووووووووووووووة عــارفة :)


ضحكتني اوي الحتة دي

اسلوبك ممتع جدا

تحياتي

mhmdwahab يقول...

اغلقتى التعليق
حتى تقومى بالرد هنا
المهم كنت جالس امام الكمبيوتر وبعدين فجاءة اية دة اة اة ياة دة وبعدين فية اية مش وقتة خالص المياة مقطوعة طيب اعمل اية بس تاهت و لقيتها ادخل حمامات بوست نور احم احم لموخذة اصلى اصلى مزنزق معلهش

norahaty يقول...

Tamer Nabil
ايوة الصناعة بتجدد
لكن الأساسيات بتاعة
الانسان هى هى من ساعة
بداية خلقه..........صح؟

norahaty يقول...

لولا وزهراء
شوفتى بقى يازهرة
ياما فيه حاجات
مستخبية لما تعيشى
فى البلاد دى حتلاقيها
وتعرفيها:مش عسل كلها:(
منورانى دايما يازهــــــراء

norahaty يقول...

خواطر شابة
حلوة حيث يكون
وحيداً دى وعن نفسى
بقول أنا رايحة المقر
الرئيسى:):)

norahaty يقول...

صيدلانيه طالعه نازله
دا من ذوقك يادكتورة
والله حتى فى القاهرة يعنى
المشكلةمحلية إقليميـــــة
مستوطنة :)بعيد عنك :)

norahaty يقول...

أمل حمدي
اساسية يافندم
من الوزير للغفير:)

norahaty يقول...

ليس فقيرا من يحب
وعليكم السلام ورحمة
الله تعالى وبركاتــه
صدقيه ياحبيبتى صدقيه
وأيه بقى متفنين فى ورق
التواليت ونقوشاته
والوانه وريحته:)

norahaty يقول...

تركي الغامدي
ديننا مفيش أحسن
منه فى توجيهاته
للدنيا وللدين
لو بس نلتزم
بتعليماته
كلهـــــــا

norahaty يقول...

romansy
من بـــعض ما
عندكم يارومنسى
وعقبالك يارومنسى

norahaty يقول...

Romancia
أنا عملت كده
علشان الطهور
والصلاة لكن هم
بقى معندهوش دى:(

norahaty يقول...

نـــــور
طب دا أنا جبت
أقل واحد مبعوت
لى صورهم على الميل
صديق عزيز بعتهم عن
برج دبى :شفتى بيغظنى أزاى:)

norahaty يقول...

محمد الجرايحى
ماهـــو لازم
كده:التنوع:)

norahaty يقول...

كلمــات من نور
وهو دا نفس مشكلتى
لما بروح اى مكان تانى
وأطووووووووول فيه:(

norahaty يقول...

د/عرفه
وعليكم السلام ورحمة
الله تعالى وبركاته
شفت بقى يادكتور
كل السيراميك والقيشانى
والمرايات وأبصر أيه
ومدرك ايه وبعدين
مفيش بردون شطاف:(

norahaty يقول...

mhmdwahab
الشر بره وبعيد
بلاش سيرة الأقسـام
والبوليس دى:بقشعر
منها الله يخليك:):):)
ربنا ما يرمى حـد
فى ضيقة يــــارب

norahaty يقول...

لولا وزهراء
وعليكم السلام ورحمة
الله تعالى وبركــاته
الف حمد وشكر لله أن
جعلنا من أتباع هذا
الدين العظيم بس لو
كمان نعمل بكل ماجاء
فيه حنبقى أحس ناس .
منورانى يالولا وربنا يصلح
حالك وحالى وحالنا جميعاً.

norahaty يقول...

الشاعر الفنان
أحمد فتحى فؤاد
اللهم آمين
يارب العالمين .

norahaty يقول...

Dr-Ibrahim
مش هو أسمه بيت
الراحة:فكل واحد
براحته بقى:):):)
منورنـــا يادكتور.

norahaty يقول...

well
حتفق طبعاً:)
هى فيها شك دى:)
مهمة جداً جداً جداً

norahaty يقول...

راجـــى
من بعض ماعندكم
ياباشمهندس.

norahaty يقول...

حــاول تفتكرنى
ولكنها مهمــة
جداً صح ولا غلط؟
وحمدلله على السلامة:)

norahaty يقول...

د. ياسر عمر عبد الفتاح
الايحاء فى الحاجات دى
مهم جداً جداُ
وحمــدلله على
السلامة
ياصيــــدلى
نورتنا بعد غياب.

norahaty يقول...

د/ أحمد لاشين
ايوة ما هو من
مهمتها :الاسترخاء
زى ما أكون تعبان
وأرتحت:):):)

norahaty يقول...

Tarkieb
كوالامبور:)
ممكن فعلاً وممكن من
ناحية صحية كمان
لمنع نقل العدوى
انت عارف المطار
بتاعهم زززززحمة:)
نورتنا ياتركيب.

norahaty يقول...

م/محمود فوزى
الحمد لله يافندم
أزيك أنت عامل ايه؟
المشكلة او السؤال ليه
ما بيغيروا من الحكاية دى
(عدم وجود الميه)مش شايفين
انها مهمة؟ولو كان كده ليه
بقى مستحضرات التنظيف والصابون
أشكال وألوان؟!ومتشكرين للضحكاية :)

norahaty يقول...

جايدا العزيزي
مهم جداً جداً: فيها
شك دى؟:)ونورتينا
فى اول زيـارة :)

norahaty يقول...

أم .. بوبه
لأ الريحة راحت
خلاص رشينا معطر:)
نورتنى أم بوبه.

norahaty يقول...

أم .. بوبه
عجبــتنى جداً

norahaty يقول...

mhmdwahab
كان بودى يافندم
ومع ذلك عملنا عن
غسيل المخ الإعلامى
لشعبنا العزيز:(

norahaty يقول...

salma mohamed
ماتعتذريش عن شىء
ياسلمى أنا أدرى
بالحال ربنا يصلح
شأنك وشأننا يارب.

norahaty يقول...

أحمد شريف
وعليكم السلام
وشكراً للتذكرة
وعفانا وشفانا
الله جميعاً يارب.
وبمناسبة الأضافة ارد
ولا تزعل:؟ارد صناعة
السيراميك والقــيشانى
والأسمنت من أكبر الملوثات
للبيئة يااستاذ أحمد وعلشان
كده أوروبا استغنت عن المصانع
دى وعملت الأستثمار دا فى(افريقيا )
الغلبانة لاجل ما تستورد على الجاهز:(

norahaty يقول...

حصان المرجيحة
لك حق فعلاً...
حاجة تشرح :)

norahaty يقول...

ذو الوجه المبتسم
وعليكم السلام ورحمة
الله تعالى وبركـاته
حمدلله على السلامة
ياأستاذ ناجى
وبعدين هو
أنا أقدر
اطنش؟
ازاى طيب؟:)

norahaty يقول...

MaNoOoSh
حمدلله على السلامة
يامخنووووووووووقة
فينك من زمااااااان
وعندك حق :ناس غريبة:(

norahaty يقول...

شهد الكلمات
والله ياشهد أنا
أصلى ساعتها انفعلت مع
المريض و(حسيت بألامه:):)

norahaty يقول...

mhmdwahab
منورنا أستاذ محمد
وبما أن الفجر قرب
فأقدر أقـــــولك
نهارك ابيض بأذن الله.

تركي الغامدي يقول...

المكرمة د نور ... قطعاً أوافقك الرأي في أن لا تختصر الوطنية في الفوز بمباراة أو بطولة أو في أي أمر لايسمن ولايغني من جوع إلا في حالات .... !
وإن كنت من جانب آخر أحب أن ألفت نظرك إلى بُعد آخر للوطنية عندما تختصر في غير الوطن تكون الطامة أكبر !
تحياتي وتقديري .

أحمد شريف يقول...

السلام عليكم
مش زعلان من ردك بالطبع
لكن من قال لك أن أوروبا استغنت ؟ .. أصححلك المعلومة بعد إذنك
أوروبا أساساً لا تملك المواد الخام والصناعة مكلفة جداً عندها وبالفعل عندها مصانع في أسبانيا وانجلترا والمانيا في مصانع .. معرفش باقي الدول الأوروبية فيها ولا لأ ، وعند أمريكا مصانع
وفعلاً هي صناعة ملوثة لكن مش كلها ومش كل خطوط الإنتاج ملوثة

أحمد شريف يقول...

الأمر الآخر .. أنا أرى أن السلوكيات التي نراها عقب الفوز في المباريات .. لا ضرر ولا ضرار منها

لا نرفضها لكن نقومها لتشمل إنجازات أخرى نحشد ونذكي الناس لها

المظهر جزء من المضمون يا دكتور ، والتعبير عن الفرحة والانتماء بهذه الوسائل هو أحد جوانب المظهر

فقط نقول وننبه بألا يصل لدرجة التعصب وألا يطغى على استحقاقات أخرى
عفواً إن كنت وضعت الرد هنا بس نسيت نفسي

Abo 3li يقول...

ههههههههههههههههههههههههههه
فعلا الاجانب مش نضاف اوي في الحاجات دي
ال مناديل ال.... بردون يعني

norahaty يقول...

تركى الغامدى
كلامك مضبـوط
ياأستاذ تركى
اللى زعلنى إزاى
الأعلام أفلح فى وضع
الفكرة دى فى دمـاغ
أطفال!طيب ليه ما بيضعش
أفكار أخرى أكثر إيجــابية
وأفيد وأنفع واجدى للوطـن

norahaty يقول...

أحمد شــــريف
أوروبا لا تملك المواد
الخام لأشياء كثيرة ومع
هذا تقيم صناعتها عندها
وبنفس الوقت صارت تعمل
فروع لمصانع للسيارات
مثلاًفى ماليزيا والصين وغيرها
لرخص الأيدى العاملة بها.
لكن مصانع السيراميك
بالذات اوروبا بتتخلص
منها تدريجياً لأنهم محددين
عام(لا ادرى كام بالضبط)
للتخلص منها نهائياً فى اوروبا
لثبوت الأثار المدمرة للبيئة لهذه
الصناعة.

norahaty يقول...

أحمـد شريف
وجه أعتراضى على
الإعلام زى ما قلت
فى كونه أفلح فى الوصول
لعقل الطفل فى جزئية زى
دى :الله طب ما بيوصلش ليه
فى أشياء افيد؟!ليه يتجند
الاعلام كله من أجل مباراة
لكرة القدم وكأنها غزو الفضاء!

norahaty يقول...

Abo 3li
شفت أزاى!
ووبردونك معاك:)

غير معرف يقول...

السلام عليكم
أ/ أحمد الشريف
- اذا أرادت دولة النهوض لابد من تحديد أولويات و أهداف قومية، و التخطيط لتنفيذها، أما أن نوجه أولويات الناس نحو مباريات كرة القدم فأعتقد أن هذا لا يجوز. خصوصا في بلد مثل مصر يعاني من مشكلات خطيرة و يحتاج من أبنائه ما هو أكثر من الهتاف مرة بالسب للاعب ضيع فرصة هدف أثناء المباراة، و مرة بالدعاء طوال المباراة (ان ربنا يستر و نكسب)، و المرة الأخيرة بالرقص و الزمر، في حلة الفوز، و الحزن و الاكتئاب عند الخسارة.
- ماليزيا: نسبة من كانوا تحت خط الفقر في نهاية السبعينات حوالي 40%،عام 2000 أصبحت 5%، عام 2005 أصبحت النسبة 3 (ثلاثة)%.
- مصر نسبة من كانو تحت خط الفقر في 2000 كانت 16%، عام 2005 أصبحت 19%، عام 2009 أصبحت بين (21 و 25)%.
- لو أضفنا اليها نسبة 40% ممن هم حول خط الفقر (الذين يعيشون بالكاد) وهي في ازدياد أيضايصبح أكثر من ثلثي الشعب يعاني من الفقر.
- جميل ان المنتخب يفوز ببطولة، و لكن الغير جميل هو استغلال ذلك في تلميع بعض الأشخاص، و في تشويه العلاقة مع شعب عربي، و أخيرا في الهاء بسطاء الناس عن الانتباه الي الانحدار الذي يحدث علي كل المستويات.
- ملحوظة: (في ماليزيا لا يعرفون كرة القدم، و لكنهم اعتقدوا - و قد يكونوا مخطئين - أن الأولوية هي الحفاظ علي كرامة الانسان من الشحاذة و التسول و تعاطي الرشوة...الخ، و غيرها من المشكلات الناتجة عن افقار الناس و تغييبهم).
مش عارف ي دكترة اذا كنتي ها تنزلي الكلام ده و لا لأ.
تحياتي.

mhmdwahab يقول...

السلام عليكم
اعذرنى يا استاذ احمد
لكنى اتفق مع الدكتورة نور تماما فى هذا النقاش

غير معرف يقول...

توضيح
ليس اسمي أحمد الشريف و لكن كنت أخاطب الأستاذ الذي كتب يرحب بما حدث قبل و أثناء و بعد البطولة و يدعو لاستغلال وطنية الرقص و التطبيل كبداية لتحقيق (انجازات) أخري، و هو كلام يتكرر من عشرات السنين بعد كل حدث رياضي..و كأن مصر لسة مكتشفينها سنة 2010 . ما يحدث كل مرة هو ايهام الناس بانتصار في معركة مصطنعة، و بداية لتحقيق (اخفاقات) جديدة في جميع مجالات الحياة تنعكس في النهاية بشكل سلبي علي حالة بسطاء الناس لصالح حفنة معينة من البشر.
- بالمناسبة أنا |أتفق مع كل حرف قلتيه يا ست الدكتورة، و حاسس بنفس الخنقة اللي انتي حاسه بيها.
- في الختام أقول: " يعتبر ثرثرة كل حوار مع شخص لم يعرف الألم" (اميل سيوران _ أديب فرنسي)
تحياتي
حازم

أحمد شريف يقول...

السلام عليكم .. دكتور نور على فكرة حتى الآن لا يوجد أي إتفاق على تفريغ أوروبا أو أمريكا أو أي منطقة من المصانع الملوثة بل يجري تحديث خطوط الإنتاج لخطوط أقل تلويث وهذا يحدث في مصر .... على فكرة الملوث بشدة في مصر مصانع الأسمنت وحتى مصانع الأسمنت اختلف وضعها الآن عن سبع سنوات ماضية وبإمكانك سؤال أهل حلوان أنفسهم لكن تبقى ملوثة ويتم الآن من خلال خطة بدأت بالفعل نقل كل مصانع الأسمنت من حلوان وما حلوها لخارج التجمعات السكنية في منطقة واحدة وهذه الخطة مستمرة لسبعة أعوام إن شاء الله

أعود لنقطة أخرى وهي أن دول أوروبا والعالم بأجمع ما زالوا لم يتفقوا حول استحقاقاتهم نحو البيئة .. ألم تتابعي قمة المناخ الأخيرة في الدانمارك منذ شهر .. هناك خلافات كبيرة جداً يا دكتور وكل طرف يريد تحميل الآخر المسؤولية ولم يصل العالم لأي شيء في هذا الموضوع

=============

بالنسبة لأستاذ محمد عبد الوهاب .. لا أعلم لماذ تسوق مثل تلك الألافظ " الرقص ومش عارف إيه "
يا أستاذ محمد حاول تنتقي ألفاظك في حوارك معي وحاول تكون هاديء ومتزن في كلامك لأني كلما حاولت أن أجد مساحة حوار معك تنفرني منك من جديد
أنا لا قلت رقص ولا مسخرة ولا حاجة

لا حول ولا قوة إلا بالله
على كل حال أعتذر عن هذه المداخلة يا دكتور نور وانتهى حديثي هنا في هذا الموضوع ولن أطرق بابه أو باب ما طرح به يا أستاذ محمد من جديد

mhmdwahab يقول...

السلام عليكم
رقص اية يا ابوة حميد انا لا جبت سيرة رقص ولا اى حاجة انت جبت الكلام دة منين سلامة نظرك يا صحبى

غير معرف يقول...

السلام عليكم:
- (السلوكيات التي نراها عقب الفوز في المباريات)
- أنا ما شفتش غير ناس مشغلين DJ شوية أغاني وطنية من الجديدة و بعد كدة أغاني هابطة من نوعية (شربت سيجارة بني)و قاعدين يرقصو و يطبلوا و يزمروا طول الليل. نفس اللي حصل بعد ماتش الجزاير.. الفرق ان بعد ماتش الجزاير انهم كانوا عمالين يشتموا الاخوة الجزائريين.
حازم

غير معرف يقول...

السلام عليكم
- كل كلامك عن نقل (الصناعات القذرة) خارج حدود الدول المتقدمة الي الدول النامية صح يا دكترة.
- للناس اللي مهتمين و يحبو يعرفو تفاصيل أكتر عن الموضوع ده يقرو المقال علي الرابط التالي و هو مكتوب بطريقة علمية موثقة لدكتور مصري (خبير دراسات بيئية):
http://www.feedo.net/environment/pollution/EnvironmentalSocialResponsibilty.htm
- أخيرا أقول:
"The less you know, the more you think you know, because you don't know you don't know."
(Stevens Ray)
حازم

أحمد شريف يقول...

السلام عليكم .. أعتذر جداً للأستاذ محمد عبد الوهاب ظننت أنه من وضع التعليق الذي وضعه الأستاذ حازم
عفواً أعتذر جداً وأتمنى مسامحتي

نهــــــــــار يقول...

السلام عليكم....
هههه
فكرتيني بأيام ...
بهولندا إشترينا مياه معدنيه عشان الحمام...
وفي أمريكا كمان كانت حكايه ...
......
في أمان الله

صدفة جميلة يقول...

السلام عليكم
ههههههههههههه
طبعا مش بضحك على كلامك بس بضحك على الحمامات ال من غير شطافات ههههههه
بصى ياستى اول ما اشتغلت فى شركة بترول اشتغلت تبع شركة دينماركيه على احدى البراريم بتاعتها الموجوده بالبحر الابيض مش هاقولك ال اكموديشن بتاعها عامل ازاى ونظام المعيشه
فول بورد فيها كل شيىء ولا ينقصها شيىء وكانك فى الجنه بحر ودلافين وحاجات كتير جميله
بس كان ينقصها شيىء واحد الشطافه
طبعا انقلبت الجنه الى نار وضاعت اللذه بالحياه فى هذا المكان الراقى
بس هاعمل ايه دا كده كارثه بس الحمد لله الجيش قالك اتصرف وكنت بعرف اتصرف ونستخدم كوبايه ونرجع باه للزمن القديم لحد منزلت اجازه واشتريت شطافه ومسكت روجر وهو انجليزى الميكانيكى لحد لما عرفنا نركبها وهو يقولى نو ايهاب هواى لحد مخت منه العده وزبط الدنيا بس باه فيه مشكله تانيه وكانت اكبر وهى ان حمامى اصبح الحمام العمومى للاخوه اصحابى هههههههههههههه
بس بينى وبينك انا بحب الحمام التانى صحى اكتر فى ظل الامراض الحديثه
يعنى مهما نزلت فى فنادق بكون حريص جدا من الحمامات
ورجعت تانى لما اشتغلت تبع براريم بريه فى الصحراء الغربيه بتاعتنا وطبعا سعات ولا اقولك كفايه انا حاسس ان الريحه هنا خلاص
سلام ويارب تكونى بخير بعيد عن الامساك

mostafa rayan يقول...

عزيزتى هذ هو التناقض الغربي
ليت من يتبعون الغرب بشكل اعمى يفكرون قبل ان يفعلو
لك لك التحيه يا دكتورة

norahaty يقول...

استاذ حازم
اتفق معاك يافندم
فى ضرورة تحديد الاولويات
وهل كاس العالم لكرة القدم
اهم من بناء طريق لقرية نائية
مثلاً كان كل الملايين اللى اتصرفت على
المنتخب كانت أتصرفت عليه(بناء الطريق)!

norahaty يقول...

mhmdwahab
وعليكم السلام
وشكراً للمداخلة:)

norahaty يقول...

استاذ حازم
شكراً للتوضيح
وشكراً للتعقيب.

norahaty يقول...

أحمد الشريف
تابعت يافندم
ولم يستقروا على
شىء أعلم لكن بالعقل
ليه بيستغنوا عن هذه
الصناعات بالذات ؟
الضرر مؤكد منها !

norahaty يقول...

mhmdwahab
حصل خير أستاذ محمد
خطأ غير مقصود نبهتنا
اليه فشكراً لك.

norahaty يقول...

استاذ حازم
مرة تانــية
شكراً للتعليق

norahaty يقول...

استاذ حازم
شكراً لتعضديك
الموضوع بالمحاضرة
المشار اليها .

norahaty يقول...

أستاذ أحمد الشريف.
حصل خير يافندم

norahaty يقول...

نهــــار
وعليكم السلام ورحمة
الله تعالى وبركــاته
يعنى جربتى اللى أنا
بحكيه فعلاً مشكلة بصحيح؟

norahaty يقول...

صـــدفة جميلة
وعليكم السلام ورحمة
الله تعالى وبركاته
بالضبط فول بورد
بس من غير شطاف):
جعل حمـــــامك
واحة للتعبانين:)

norahaty يقول...

mostafa rayan
حاولت أجد لها
تفسير الحكاية
دى ملقتش
ابداً!
نورتناأستاذ مصطفى

TIMMY !! يقول...

معلش حبيت أعلق على الموضوع ده تاني ,
لأن الظروف جمعتني أنا و الحمام اليومين دول كتير ,

بعد ما اتنقلت للإدارة و أنا مش بلاقي مهرب من الشغل الخنيق غير في الحمام , حتى لو مالوش ضرورة , لكن الواحد بيحاول يقعد فيه أطول وقت ممكن , لحد ما يوم العمل الخنيق ده يخلص ,
فعلا هو بيت الراحة :)

norahaty يقول...

TIMMY !!
ايه ياتيمى
حتخلينى اغير فكرتى
عنك:بتاع شغل وحريت
زى ما بيقولوا مذاكرة :(
بس أكيد الW C عندك بيساعد
على(الهروب من الجو الخنيق للعمل)