الاثنين، يوليو 13، 2009

......اللى ما معهوش مايلزمهوش !!!+تحديث

تحديث تحديث تحديث
تمنياتى ودعواتى
الى الله عز وجل
بأن يمّن بالفرح والسرور
على كل طلاب
الثانوية العامة
هنا وكل البلاد العربية
والاسلامية
والاجنبية كمان
(بالمرة بقى ! خليك بحبوح :بحبحها ربنا يبحبحها علينا كلنا:)
وينجحهم ويفرحهم وما يخيب تعبهم
ولا يخيب ظن اهلهم
فيهم وفيك
ياكريم
ياحليم
ياغفور يارحيم
يــــــــــــــــــا رب
اميــــن

لحظة ندم ..... لحظة ضعف
هو برنامج اذاعى احرص على سماعه

قبل ان انصرف من العمل وغالبا تكون الظروف مساعدة

على السماع له .يحكى البرنامج عن قصص واقعية وعلى لسان اصحابها

لغلطات ومشاكل اودت بهم الى السجن والعياذ بالله منه لنا ولكم وللناس اجمعين.

حلقات كثيرة سمعتها ولكن لم تعلق بذاكرتى او قل لم تمس قلبى الا حلقتين او ثلاث لا استطيع نسيانهم

اقص الاولى الان والثانية قريبا باذن الله تعالى :

هو موظف 32سنة متزوج وله اسرة وعنده طفل فى الرابعة والنصف لم يرتكب اثماً ولكن جريمته انه كان موظف بالحكومة!كيف هذا ؟؟

شقيق زوجته كان يستعد للزواج ولم يكن يملك المال الكافى

فأشترى بعض الاثاث والاجهزة من احدى المحلات بنظام القسط(عفواً:الله يقطع الاقساط وسيننها بتقطم الوسط !)

المهم كانوا محتاجين لضامن للعريس وبشرط ان يعمل بالحكومة

حتى يجيبوه من تحت الارض إذا اخل الشارى الاول بالعقد وتوقف عن السداد)المهم رضى صاحبنا هذا بالتعهد بالسداد ومضى

فعلا على الشيكات والتى كانت فى جملتها 3500جنية مصرى

فقط لا غير!

(الله يحاسب المفتريين كلهم من يفيضوا بالالماس والهدايا على الغوانى والراقصات وووووو

ومن يقيمون السرادقات للعزاء او حتى فى الافراح للمباهاة وحتى (ولا تغضبوا منى ارجوكم لان هذا رأيى )من يذهبون الى العمرة كل عام مرة ومرتين او من يقيمون موائد الرحمن فى كل عام لا ابرئهم من الذنب فهناك محتاجين اكثر من فته باللحمة او قطعة ذهب)

ولا يلتفتون لامثال هؤلاء الشباب من يريد ان يعف نفسه ويعف فتاة معه ولا يلزمه الا 3500جنية

ليشترى اقل القليل من المطلوب الضرورى لاثاث بيت بسيط ونحن ادرى بالاسعار الان .

المهم مضى صاحبنا على الشيكات وتزوج شقيق زوجته وأقيمت الافراح والليالى الملاح وتم المراد من رب العباد وراحت السكرة وجاءت الفكرة!!!!!

توقف العريس عن السداد ولم يُعلِم زوج اخته والاقساط تعمل فوائد والحسابة بتحسب !

وموظفى البنك( نــــــــــــائمون ) وهم مالهم هو الدين بتاعهم ولا هم اللى حيدفعوه

بالعكس كل ما يناموا اكثر كل ما الفوائد(المصائب)تكتر وبالفعل

صارت

ال3500جنية

عشرة الاف جنية =10000جنية

نقداً وعداً

عندها صحيوا

(ياحلاااااوة يامصيبة وحطت عليك يادى الراجل)

وطالبوا صاحبنا الضامن بالسداد :جرى صاحبناالى اخو زوجته :تعالى اووووام معايا نشوف المصيبة دى !

ولكنه وللاسف لم يقل له شيئاً لانه ببساطة مالاقهوش .....

هرب ...بح.... طفش.... زوغ ....طار !!!

اى من الكلمات استخدمها انت طالما تؤدى الى الغرض وهو بعيد عنكم جميعا

......السجن......
فهو الضامن والبنك مالهوش الا اللى ادامه ومين اللى ادامه المستوظف الغلبان .

حُكم عليه بسبع سنوات سجن مع الشغل والنفاذ قضى منها ثلاثةاعوام ونصف فقط
وخلالهم مات ابوه حزناً عليه وطبعاً رفت من وظيفته .......

ثم كانت الطآمة الكبرى

طلبت زوجته الطلاق

للضرر

(وحُكم لها)

وخلى بالك من كلمة الضرر


لانه (صاحبنا هذا)اكد عليها كثيراً وهو يحكى حكايته وقال اكثر من مرة:

(الضرر:لقد سُجنت ظلماً بدلاً من اخُيكى ثم تتضررين!)

يقول ان طفله الوحيد الان فى رعاية جدته لابيه صباحاً لان

امه موظفة !!ثم يذهب فى المساء اليها (مسكين والله قلبى معاه)

وانتهى المسجون م م ح من حكايته او من قصة سجنه ولكننا

لا يجب ان نسمعها ونمضى بل يجب ان ان نأخذ منها العبرة والعظة

واولها :..........

ولا اقولكم قولوا انتم ...

كل واحد يقول اللى عايزة........

واللى ينصح شبابنا به فى مثل هذا الزمان

لمواجهة الاعلانات من امثال

(أشترى اللى فى نفسك وسدد على راحتك ....)

لأ ياحبيبى !!!!!لأ ياروحى!!!!! لأ ياقلبى!!!!

الاصح يقولوا سدد على قلة راحتك وعلى قلة راحة بالك

لكن لو قالوا كده محدش طبعاً حيشترى او حيقع فى

الشبكة

الخّية

المصيدة

الاقساط والكمبيالات والفوائد الربوية

والعياذ بالله منها


.الخلاصة فى المصاصة


اللى ماعهوش ما يلزمهوش :صح ولا انا غلطانة؟


كلام كتير والله عايزة اقوله لكن كثرته تربكنى


اعظكم ولست بخيركم لانى كتتتتتتتتتتتتتتتتتر


ضمنت اصدقاء لى وهم ايضاً ضمنونى


فى اول حياتنا الوظيفية


وكنا طبعاً

معتمدين على الوظيفة فحتى هذه


صــــــارت الان غير مضمونة!!


الف بعد الشر


مثلا


مرض


حادث


تحويل للتحقيق

عقاب جزافى من


مــدير مفترى


كل هذا قد يفقدك


الحوافز وهى ما نعتمد عليه


فى الاقساط حيث ان المرتب معلوم


ومحسوب مسبقاً كل قرش


(لأ بلاش قرش دى كان زمان وجبر !)


كل خمسين جنية فيه رايحة فين


الخلاصة فى المصاصة
اللى ماعهوش ما يلزمهوش :صح ولا انا غلطانة؟

░░░░░░▒▒▒▒▒▓█╠
وكمان الصراحة راحة


انا بسمع البرنامج


على الموبايل طبعاً


مش بالراديو اللى فوق خاااااااالص ده


حاشيله ازاى وامشى!

وكفانا الله وإياكم شر


الغفلة والتغافل

وقديماً قالوا ايضاً

(الدَّيـن :هم بالليل ومذلة بالنهار)


.



.



.



واول تعليق له جائزة !!!!
.......انا جايبة سته اهم
علشان ماحدش يتخانق مع حد
وبالتالى اللى ينول الهنا
بتاع اول تعليق
يبقى بحبوح ويعطى اللى بعده
بلاشـــــــــــــــــــــ
انانية.

هناك 92 تعليقًا:

kochia يقول...

السلام عليكم
ازيك يا قمر
بجد بشكرك جدا علي اهتمامك .. مبسوطة انك متبعاني
ويبدو اني التعليق الاول ..

kochia يقول...

اما بقي الموضوع بتاع الاقساط ده انتشر جدا جدا
وبقي كارثة وانا شخصيا اعرف ناس كتير واقعة في نفس الفخ وللاسف الظروف بتحكم علي الناس لانهم مش معاهم
ومد القسط لتلاث سنوات ثم خمسة ثم سبعة شجع الناس علس الشراء بالقسط
يعني اللي بيستري بالقسط انا بعذره
لكن يسدد
وحرام عليه حد يشيل ذنبه لدرجة الحبس
الامر لله

تحياتي

أحــوال الهـوي يقول...

اخيرا يا دكتور فتحت التعليقات

لا اعرف ماذا اقول غير اللهم ان نعوذ بك من غلبة الدين و قهر الرجال


تحياتي

عاشقة الأحزان يقول...

السلام عليكم


اذيك يادكتوره بجد وحشتنى قوووى

اخبارك ايه اتمنا من الله عز وجل ان يطمنا عليكى وتكونى فى اتم صحه وحال


بالنسبه للبوست بصراحه حضرتك اتكلمتى عنه ومش محتاج تعليق

بس هنقول ايه بس هو ده حال الشعب المصرى اللى ماعهوش ما يلزمهوش

انا عن نفسى اعرف ناسى فى قريتى بجد تم حبسهم بسبب الاقساط والموضيع دى
بجد احنا غلابه ومالناش غير ربنا
احكى على مثل هذا الموضوع
وربنا يوفقك للطريق الصح دمتى بكل خير


انووووووووووووسه

Somaya Kamal El Din يقول...

الله يصبره ويكون فى عونه

وكويس ان عرفت عن موضوع الاقسا
عشان اخلى بالى

مجداوية يقول...

السلام عليكم

فيه حد زقني وأخد التعليق الخامس
:)
لما أخلص أشوفه مين

المهم

الراديو اللي فوق تحفة

فين القصة التانية
القصة بتاعة الشاب سمعتها مليون مرة
فيه جمعية مخصوص لرعاية لمرأة المسجونة وأطفالها بسبب الكمبيالات ’’ عندنا دادة في المدرسة عليها قضية لنفس السبب ,,لكن السبب الرئيسى الفشخرة بيكبلوا نفسهم باللميالات عشان شراء أشياء للرفاهية الدادة دي بتقولي انها جايبة لبتها 80 فوطة و36 ملاية سرير و4 أطقم حلل حاجات تملى عمر أفندي القديم

الضامن بيعمل باللي قاله عليه الدين والأخلاق بأن يكون في عون أخيه لكن أخيه نصاب فالعيب في الناس مش في المبدأ

ومش حينوبني كده ولا حتى بسطة ولا جلاته
:)

قلم رصاص يقول...

السلام عليكم ورحمة الله وبركاته

هنقول ايه بس كلام حضرتك يادكتورة

حقيقي كفيتي ووفيتي والله

واللي معاهوش فعلا ميلزموش

هو ده المفروض

لكن وااااااااااه من قولة لكن دي


لكن الشعب مفيش فيه فايدة على رأي الزعيم الوطني سعد الصغير ،،،، قصدي زغلول
هههههههههههههههه

دمتي في تميز

وخفي شوية على العيانين
انا مش بقرررر .. انا بنؤ بس
ههههههههههههههه

في حفظ الله

norahaty يقول...

Kochia
السلام عليكم ورحمة
الله تعالى وبركاته
وفعلاً انتِ التعليق الاول :)مبروك الايس كريم بس لو سمحتى اعطى من حوالك فالله كريم يحب الكرماء.

norahaty يقول...

Kochia
السلام عليكم ورحمة
الله تعالى وبركاته
مش عايزة اقولك على الامثال العملية اللى بشوفها فى الشغل او فى الجيران عن
المشاكل الكتيرة للقسط وانها والله عاملة زى البير الغويط اللى بياخد معاه ناس كتير مش بيقوا واعيين للى ممكن يحصل لهم
نتيجة عدم السداد.ربنا يرحمنا جميعاً
نورتينا ياكوشيا ومبروك عليك الايس كريم بس زى ما قلت لك (اعزمى )اللى حواليكى واللى بعديكى كمان ياريت:))

norahaty يقول...

احوال الهوى
والهوى احوال
السلام عليكم ورحمة
الله تعالى وبركاته
(ايش لونك ياصيدلى)
يارب تكون فى احسن حال
وامين لكل دعواتك يافندم
نورتنا ونورت بلوجر كلها :)

norahaty يقول...

أنووووووووووووسة
(عـــاشقة الاحزان)
السلام عليكم ورحمة
الله تعالى وبركاته
الاقساط وزى ما بصورها زى دوامة البحر بتجذب الناس فيها وما بيعرفوا للاسف يخرجوا منها شىء بيلضم فى شىءلما
بتبقى مشكلة بعد كده.
ونورتينا ياأنوسة
ويارب دايما منورنا

norahaty يقول...

Somaya Kamal El Din
السلام عليكم ورحمة
الله تعالى وبركاته
خلى بالك كويس بالله عليكى
وما تصدقى كل كلام الدعايات
الفوائد على الدين تحسب من
اول يوم من اخذ الدين وليس
من اول يوم عن التأخر فى السداد
زى ما كل الناس للاسف فاهمين.
نورتينا ياسمية فى
اول زيارة ويارب
دايماً منــــورانا.

norahaty يقول...

مجداوية
أُخيتى فى الله
السلام عليكم ورحمة
الله تعالى وبركاته
ولا يهمك ياأم بسمة
نبعت نجيب صندوق بحاله :)
وللاسف الشديد والله حاجات مالها
لازمة لكن لازم يعملوها(الله انتى عايزة الناس تأكل وشنا يادكتورة !لو ما جبنا 3دست ملايات و100فوطة وحاجات
والله غريبة يامجداوية لكن تعملى ايه
فى (الامخخ)اللى عايزه كسرها.
وما يهمكيش حنبعت نجيب
جيــــــلاتى تانى :)
نورتينا يامجداوية .

norahaty يقول...

قلم رصاص
السلام عليكم ورحمة
الله تعالى وبركاته
بـــطل نأ انا بقولك اهوه
احسن انأ عليك نأية انت حر بقى:)
وأرفع عليك قضية فى مجلس الامن واستشهد بالجمهور وكلهم اهم شاهديين عليك خلينا نأكل عيش جنبك يامحامى:)
نورتنا يامحامى شهير بأذن الله
وربنا ينجحك فى الامتحانات
كلــــــــــــــــها

karim يقول...

حقيقى يادكتورة دمك خفيف جدااا واللة, على فكرة انا كمان بحب الراديوو جداا وواللة ساعات احسن من الدش و التى فى وبيعرفنى حاجاات كتير مكنتش عارفها ومعلوماات وعظاات كمان, تحياتى

نـــــــــــــور يقول...

ازى حضرتك؟
هى التعليقات مقفوله بقالها فتره ولا بيتهيألى؟؟؟!!!

تعرفى انى اوقات كتير مبقدرش اتابع البرامج دى رغم ايمانى بالعظه اللى فيها بس لانى مش بتعحمل اوقات كتير اللى بيتقدم فيها!!!

على فكره لو انا الكومنت ال16؟؟ ممكن حضرتك تدينى واحده ايس كريم؟؟
عاررفه انه ماينفعش
طيب ممكن حضرتك تديهالى كرم منك؟؟
طيب بلاش
حضرتك ممكن تجيبيلى واحده هديه نجاحى لانك لحد دلوقت مش باركتيلى على تخرجى؟؟؟:(

حمد الله على سلامتك:)

Hesham يقول...

ازيك يانور
اولا طريقة تناولك للموضوع الدرامى جميله جدا ساخره سخريه مره تجعلنا نضحك من الخارج ونبكى من الداخل عموما عن الأسلبو الجميل لن اتحدث كثير ولكن اريد ان اقص عليكى قصه من الزمن الجميل ابان تولى الخليفة عمر بن عبد العزيز إمارة المسلمين ويكمن كثيرون يعلمون هذه القصه حينما فاض بيت مال المسلمين بالاموال فذهب خازن بيت المال - يوسف بن بطرس غالى -أدام الله بقاءة حتى يصلى السعير وقال للخليفه ماذا نفعل بالمال قال له زد الجيش بالسلاح قال فعلت قال سد دين من لم يستطع سداد الدين قال فعلت فقال له زوج من له حاجة فقال فعلت ومازال بيت المال فائض
طبعا الفرق كبييييييييييييييييييير اوى يانور فرق بين مااشرته له فى اول القصه بين من يقيم الأفراح بالملايين او العمرة او موائد الرحمن وبين من يسدد الزكاه فى مصارفها الصحيحه ان اسهبت ياصديقتى فلن تكفينى مدونات الأرض ولكن اعتقد انك فهمت مقصدى
والى لقاء اخر فى القصة الثانيه

norahaty يقول...

Karim
السلام عليكم ورحمة
الله تعالى وبركاته
الاذاعة مدرسة بصحيح
كل ما الواحد يقول راحت
على الراديو خلاص يرجع تانى
يلاقيها فعلا مفيش غنى عنها
بالعكس انا بتعودعليها اكثر :)
نورتنا وشرفتنا ياكريم.

norahaty يقول...

نـــور
السلام عليكم ورحمة
الله تعالى وبركاته
ازيك انتى حبيبتى الحبية ؟
وياخــــــــــــــبر ابيض!
انتى اتخرجتى ياقمر الف مبروك
لأ لكِ حق وكمان لكِ عندى تورتية جيلاتى بحالها ولا تزعل ياجميل .معلش الزيارة
بتاعة بنت اختى شغلتنى اوى عن متابعة
الاخبار السعيدة دى وحالا اخد التورتة
واجى لحد مدونتك وابــــــارك بنفسى
نورتينى يانور وزادتنى نور على نور.

norahaty يقول...

Hesham
السلام عليكم ورحمة
الله تعالى وبركاته
الحمد لله انت ازيك عامل ايه.؟
فكرتنا بايام واوقات جميلة تفتكر
ممكن ترجع فى يوم من الايام تانى؟وايه
الطريقة؟ربنا يهدينا للصواب ولو انى (ومش عايزة ابقى بايخة على المسالكنها الحقيقة)ارى انا حالنا فى تدهور مستمر
ليس على المستوى الحكومى فقط بل حتى
على المستوى الفردى:( الناس شوية شوية حتأكل بعضيها ولاقل الاسباب!
وزى ما قلت لو فتحنا فى الكلام
مش حتكفينا (الف تدوينة تدوينة)
نورتنا وشرفتنا ياأستاذ هشام
ويسترك وييسرك عليك غربتك يارب.

موناليزا يقول...

ماليش دعوة انا عاوزة الايس كريم مش هبقى طماعة هاخد اللى بالفسدق بس:)
===
تعليقى على الموضوع
المفروض اللى كان يضمن العريس اى حد من قرايبه مش من قرايب زوجته ولو ملقاش يبقى جهز براحتك ولما تخلص عرفنا

تسنيم حسين يقول...

السلام عليكم ورحمة الله وبركاته

موضوع الأقساط ده بتحصل من وراه مصايب كتير -وده طبعا للناس اللى معندهاش ضمير ويمكترهم- ربنا يهدينا ويتوب علينا من الأقساط دى...
وبالنسبه للقصه الواحد بقى مش عارف يساعد ولا ما يساعدش لو ساعد ممكن ياخد فوق دماغه ولو ماساعدش الناس حتقول عليه انانى ومابيحبش الا نفسه.. بس من رايى ان احنا لازم نساعد الناس بس الحذر مطلوب.

والسلام عليكم ورحمة الله وبركاته

نـــــــــــــور يقول...

:)

متشكره اوى
حضرتك ذوق اوى ربنا يخليكى يادكتوره يارب وماتغيبيش عننا ابدا
:)

الازهرى يقول...

وبعدين بقى ؟ هو يوم ما تسمحى بالتعليقات يكون الموضوع كده
طيب انا اساسا من الناس بتوع التقسيط دول
مش كمشترى ولكن كبائع
وياما عملت قضايا لناس
ومنهم صدر ضدهم اكام كمان
ظروفكم ايه بقى ؟


صدقينى انا اكتر انسان بينتقد التقسيط ولا اذكر اننى جأت اليه فى يوم من الايام ولو فكرت فسيكون ذلك لضرورة قصوى وليس لمجرد كماليات شكلية لا نفع منها كما ارى من خلال عملى واسراف اعتمادا على التأجيل بدون وود اصول لديه تساعده على السداد
ومنها على سبيل المثال مشهد يتكرر كثيرا اخرها منذ عشرة ايام تقريبا
احد المعارف جاء يريد تليفزيونا واصر على ان يكون 21 بوصة توشيبا الجديد
وعندما بدانا الاتفاق على المقدم وجدت ان ما معه لا يكفى كما انه يريد تخفيض الاقساط فاقترحت عليه ان يشترى تليفزيون ابيض واسود 14 بوصة بما معه وبذلك لن يحتاج الى الديون بل وسيتبقى له مبلغ من المال
ولكنه رفض لان السيدة حرمه مصرة على مطلب 21 بوصة
ولا حول ولا قوة الا بالله

romansy يقول...

يا اهلا يا اهلا
ايه يا عم الامثال الجامده الخلاصه فى المصاصه
انتى جبتى من النهايه فيه مشاكل كتير قدامنا الاقساط واللى جاى على قد الرايح وبعدين كل حاجه بقت ماشيه بالضالين
ربنا معانا بقى
وحمد الله على سلامتك وكويس انك فتحتى التعليقات يا دوك

حتى تشرق الشمس يقول...

السلام عليكم ورحمة الله وبركاتة
كيف حالك حبيبتى؟
يا رب تكونى فى اتم صحة
جميل اوى اليوست
وخاصة الخلاصة فى المصاصة
هههههههههه
ربنا يكرمك ويبعد عنا الاقساط والحاجات الغريبة دى
دمت بالف خير

لاسع افندى يقول...

القروض هى الحل الوحيد اللى قدام الموظف الغلبان



تحياتى

السامر يقول...

قصة محزنة تنم عن واقع يعج بغبرة الظلم .. تدوينة رائعة .. السامر

MaNoOoSh يقول...

انا فعلا طول عمرى اكرة التقسيط والجمعيات

لانهم زي السلف بالظبط مبيجوش الا بالخسارة
لكن الحقيقة فى ناس كتير مبتعرفش تمشي حياتها غير بالشكل ده
المهم انهم يبقى عارفين حدود استهلاكهم ايه وميبالغوش فى الحاجات الى بيجيبوها

حاسوباتيه يقول...

بجد فعلا قصه صعبه قوي ربنا يعينه يارب وبجد مراته دي غايظاني قوي الي غايظني اكتر انه اهو شاب وماشي صح وكويس يدخل السجن لمجرد 10000 وفي ناس تانيه بتدفعهم في ثواني زي ماقولتي حسبي الله ونعم الوكيل وربنا يخليله بنته ويفك كربه

norahaty يقول...

موناليزا
السلام عليكم ورحمة
الله تعالى وبركاته
فاتتك الفرصة يامونى خلاص:)
خيرها فى غيرها المرة الجاية حأجيب
عربية لورى بحالها ولا تزعلى نفسك:)
وبالنسبة للتدوينة اقولك اهو ده اللى حصل وفعلا ماكان فيه موظف الا
هو تنطبق عليه الشروط وأخو مراته
يعنى مش غريب عنه لكن المقدر والمكتوب
بقى مسكين لاجل ما حياته تضيع كده:(
نورتينا وشرفتينا يامونى

norahaty يقول...

تسنيم حسين
السلام عليكم ورحمة
الله تعالى وبركاته
حمدلله على السلامة ياتسنيم :فينك من زمان وحشانى جداً.ولكِحق تحتارى أهو ده اخو زوجته يعنى مش غريب عنه ومع ذلك عمل كده فيه!سبحان الله وعلى رأيك الواحد برضه يساعد بس باحتراس
وربك هو اللى بيستر ويحاسب.
نورتينا وشرفتينا ياتسنيم .

norahaty يقول...

نــــور
السلام عليكم ورحمة
الله تعالى وبركاته
العفو ياباشمهندسة
هو احنا فى دا اليوم
لما بيبا الحبيبة بقت
باشمهندسة اد الدنيا

norahaty يقول...

الازهرى
السلام عليكم ورحمة
الله تعالى وبركاته
ربنا يرحمنا جميعا ياأزهرى
انا ما انكرش انى تعاملت مع الاقساط كتير زمان فى اول حياتى وكده لكن بصراحة الحين ولما بحسب الفوائد
وفرق الفلوس بفضل كتير ادفع
فورى طالما فى إمكانى لو مش
حاقدر يبقى الحاجة تتأجل
افضل الف مرة من الكمبيالات
والديون .
وبعدين هو فيه حد بيشترى تلفزيون ابيض واسود الحين ياراجل ياطيب...:)

norahaty يقول...

romansy
السلام عليكم ورحمة
الله تعالى وبركاته
ايه رأيك.بنعرف نفنن:)ولا لأ:)
بس مش حيجى زى ولا حتى من كلامك
الحلو يارومنس ابداً.
ومتشكرة لكلامك وسلامك
يارومنسى الرومنسية
كلهــــا نورتنـــا

norahaty يقول...

حتى تشرق الشمس
السلام عليكم ورحمة
الله تعالى وبركاته
فى خير حال والحمد لله :كيفك انتِ؟
ايووووة الخلاصة فى المصاصة الزُبد
يعنى بمعنى اخر :)اللى ماعهوش
ما يلزمهوش يستلف او يعمل
حاجات ممكن تضره بعد كده:صح؟
نورتينا وشرفتينا ياأم سلمى

norahaty يقول...

لاسع افندى
السلام عليكم ورحمة
الله تعالى وبركاته
القروض = قيود
هذا رأيىّ والموظف
الغلبان مش ناقص
قيود وانت عارفـ
نورتنا وشرفتنا

norahaty يقول...

السامر
اللام عليكم ورحمة
الله تعالى وبركاته
هى حكاية واقعية
حصلت لانسان ولناس
اخريين من لحم ودم وزى
ما قلت تنم عن واقع ظالم:(
شكــــــراًلكلماتك الطيبة
ونورتنا وشرفتنا ياأفندم

mohamed ghalia يقول...

أحيانا بنتعامل بحس نية أوى لكن مش بنفكر فى العواقب
بجد القصة كلها مأسى يمكن كل سطر بيحتوى على مأسأة
متفق معاكى تمام انى عمر التدين مكان بإنك تحج وتعمل عمرة كل سنة لإنى فى ناس محتاجة الفلوس دى بجد
ربنا يكرمك
دمتِ فى سعادة

عمادخلاف يقول...

السلام عليكم ورحمة الله وبركاته
ارجو االتواصل لدى مدونتين واحدة للقصة القصيرة والتانية للمقالات بحلم ببكرة
ارجو التواصل
وشكرا

ahmed_k يقول...

يا خساره ملحقتش لا أول ولا حتى سادس تعليق معلش تتعوض في بوست تاني
أنا من رأيي أن الموظف غلطان من الأساس
لأنه لم يختار الزوجه من البيت الصالح من البدايه وطبعا كان يعلم أخلاقياتهم بحكم العشره فكيف يضمن واحد منهم ولم يتابع سداده للدين الذي مضى هو عليه ضامن
وفعلا من يصنع المعروف في غير أهله يجد مالا يسره من النكران والجحود
وكيف حكم القاضي لزوجته بالطلاق للضرر
وسبب سجنه أخوها الذي ضمنه بسبب هذا النسب المهبب
ربنا يعوضه خير جزاء طيبة قلبه وسلامة نيته

راسبوتين يقول...

السلام عليكم
طبعا عندك حق اللى معهوش ما يلزموش
وحكاية الضامن ده خطيرة جدا
ومهما كانت النية خير بس الواحد ما يضمنش الظروف
عندك حق والله

واحد من العمال يقول...

السلام عليكم
فعلاً اللى معهوش ميلزموش
ولو نرضى فى البدايه بالقليل والمتاح مكنش أخو زوجته احتاج ضامن ولا هو ضمنه ورجله جت فى الخيه وتحطمت حياته
تتصورى يادكتوره أخى تزوج بأوربيه
قال لى أشترينا لزوم الطعام طبقين وملعقتين وكوبين ومجين كله أتنين أتنين
والأنتريه كرسيين شايفه البدايه وبعد كده جابوا كل مايحتاجه البيت فعلاً ولا ديون ولا شيكات ولا ضامن ولا مضمون
المشكله عندنا أن الكل عايز يبدأ كبير
ويبص لفلان وفلانه وكله أو معظمه ملوش لازمه كله لزوم الفشخره الكدابه وخلاص
البساطه ومايلزم فقط وزى ماقلتى اللى معهوش ميلزموش
وربنا يكفينا شر الديون ولا يجعلنا ضامن ولا مضمون
وربنا يرزقنا القناعه

ودمتِ فى أمان الله

MaNoO يقول...

اولا ازيك يادكتورة ويارب تكونى بخير
الموضوع لمسنى بجد لانى تخيلت انى ممكن اقع فى حاجة زى دى فى يوم من الايام بعدين دا اخو مراته يعنى اكيد مأمن ليه بس الموضوع ليه علاقة بحاجات كتير اوى الجواز ومصاريفه واللى الناس بتطلبه الاموال بتاع الاغنياء اللى المفروض يوظفوها صح فى مساعدة الناس بتوع القسط الله يلعنهم اللى بيضيعوا الناس معاهم ويحربوا بيوتهم برده مهما كن الدنيا مفيش فيها امان ولا حتى لاى حد
ولا مراته اللى اتضررت والكارثة اصلا بسبب اخوها
عجبى ؟؟؟؟؟؟؟؟؟؟؟؟؟؟؟

مانووووووووو

Dr.A.S. black armor يقول...

لا حول ولا قوة الا بالله
مش عارف ازاى ممكن توصل بينا الحال لكدة مع ان الملايين مكدسة فى البنوك
ليه ما يتعملش صندوق من مصارف الزكاة للغارمين
والا يعنى الناس بتدفع الضرايب علشان خايفة من السجن
مع ان الزكاة خير فى الدنيا والاخرة
والله صندوق زى ده يطلع كتير من السجون
دمتى بخير

مصعب صلاح يقول...

السلام عليكم

انا هاقسط وسيبك من الكاش

لأني مصري أصيل

جنّي يقول...

السلام عليكم

انت صح طبعا .. وبعدين ياريت الجايزة تبقى للتعليق رقم 47 ..

وندالة الزوجة من ندالة اخوها ..

مرة ذهبت لشراء سلعة معينة كاش فرفض البائع وقالي خلي فلوسك في جيبك وادفع مبلغ بسيط وادفع اللي تقدر عليه كل شهر .. لان القسط ربحه احيانا يتعدى 50 % ..

ولا تقسيط بعد اليوم ..

هانى زينهم يقول...

همسة عتاااااااب ........
بما ان حضرتك بتحبى برامج الراديو زيى بالظبط . ليه حضرتك كنتى قافلة التعليقات الفترة اللى فاتت ؟ افرضى الواحد كان عاجبه موضوع وعايز يقول رأى يعمل ايه طيب ؟
اما بالنسبة للبوست فده اخرة الجدعنة فى زمن اغبر بعيد عنك !!

norahaty يقول...

MaNoOoSh
السلام عليكم ورحمة
الله تعالى وبركاته
يمكن اختلف معاكى فى حتة الجمعيات
لانها لو مع ناس ثقة وكويسين بتقدر الناس على شراء مستلزمات ضرورية
وكمان مافيهاش ارباح او فوائد
ودا عيب التقسيط (التضاعف)
للربح الرهيب!!!
ونورتينا وشرفتينا ياقمراية

norahaty يقول...

حاسوباتية
السلام عليكم ورحمة
الله تعالى وبركاته
ماتتصورى وهو بيحكى الحكاية
بصوته أد ايه كان متأثر وصعب
عليا جدا وهو بيحكى عن ابنه
اللى مقضى طفولته من غير ابوه
وحتى امه بعيده عنه طول النهار
ربنا يرحمنا ويرحمه
ونورتينا وشرفتينا ياحاسوباتية

معتز شاهين - باحث تربوي يقول...

خير تعمل شر تلقى

والله مشكلة

ربنا يصبره

وأشكر لك النقل والإفادة

ويبقى التواصل

norahaty يقول...

mohamed ghalia
السلام عليكم ورحمة
الله تعالى وبركاته
ماهو ما ضمنش حد غريب يامحمد
دا اخو زوجته!!!ويمكن لو ماكان
رضى كانت برضه زوجته غضبت وزعلت !!
يعنى الزعل مقدور فى جميع الاحوال :(
ونورتنا وشرفتنا يامحمد

norahaty يقول...

عماد خلاف
وعليكم السلام ورحمة
الله تعالى وبركاته
وبأذن الله ازورك
فى مدونتيك .حاضر:)

norahaty يقول...

ahmed_K
السلام عليكم ورحمة
الله تعالى وبركاته
ياأستاذ احمد دا معاشرهم اكتر من خمس سنين ومتجوز بنتهم وله ولد منها يعنى
فاضل ايه تانى؟بعيد عنك يكفيك ويبعد عنك وعن الناس كلها شر الخيانة!!التفسير الوحيد للى عملته فيه
دا رايى .وعيونى:)المرة الجاية
حأجيب عربية ايس كريم
بحالــــــــــــها :)

norahaty يقول...

راسبوتين
السلام عليكم ورحمة
الله تعالى وبركاته
مسئولية الضامن كبيرة
ما عرفتها والله الا على كبر
والحمد لله قدر ولطف فيما مضى
لايعلم الغيب الا الله صح؟ يبقى مين ضامن بقى انه اللى انت ضمنته دا ينفذ المطلوب منه
نورتنا وشرفتنا ياراسبوتين.

norahaty يقول...

واحد من العمال
السلام عليكم ورحمة
الله تعالى وبركاته
عارف وزى ما بتقول
انت انا اشتغلت فى
السعودية سنتين ما اشتريت
الا اقل القليل من الاثاث
اللازم للحياة :هل اتعطلت
حياتى لعدم وجود انتريةمثلا ؟
او اوضة سفرة ؟اطلاقاً بس أهى
سيرة ومنهاج فرعونى متحجر:)
وماشين عليه حتى الشباب بقوا كده!!
ونورتنا وشرفتنا ياواحد من العمال

assafo anaroze يقول...

نورا
يسعد مساك
انا مش حقول غير بيت من الشعر بيقول :
ان انت اكرمت الكريم ملكته///
و ان انت اكرمت اللئيم تمردا
مودتي

norahaty يقول...

MaNoO
السلام عليكم ورحمة
الله تعالى وبركاته
كلامك مضبوط يامانوو وماتتصور
والراجل بيحكى بصوته الحكاية
اد ايه زعلان(وله حق طبعاً) هى
خيانة فى الاول وفى الاخر :من اخو
زوجته ومن زوجته نفسها والضحية
هو وابنه:( ربنا يرحمنا بجد .
نورتنا وشرفتنا يامانووو

norahaty يقول...

Dr.A.S.black armor
السلام عليكم ورحمة
الله تعالى وبركاته
هم مش قالوا (أن الله ليدع بالسلطان ما لا يذع بالقرآن)اهم دول يدفعوا الضرايب طول ما فيه مطالب بها لكن الزكاة شرع الله يسوفوا فيها على قدر الامكان.نورتنا وشرفتنا يادكتور.

norahaty يقول...

مصعب صلاح
السلام عليكم ورحمة
الله تعالى وبركاته
على العموم انا نصحتك
وانت حر اعمل اللى يريحك:)
ونورتنا يامصعب وربنا ينجحك
يــــــــــــــــــــــارب

norahaty يقول...

جنّى(استاذ سعيد)
السلام عليكم ورحمة
الله تعالى وبركاته
شفت التحايل بتاع البائع:(
لا حول ولا قوة الا بالله أهم
بيعملوا كده ويضحكوا على
عقول شبابنا بمواضيع
الفيزا كارد وخلافه!
والمرة الجاية حنجيب
عربية لورى)حاضر
من عينيا الاتنين:)

norahaty يقول...

هانى زينهم
السلام عليكم ورحمة
الله تعالى وبركاته
والله يامستر اصل الواجب
بقى عليا كتير(فيه ردود
وتعليقات على تدوينات
سابقة لم ارد عليها
ومكسوفة من اصحابها
مووووت:(ويامستر التدوينة
اللى تحب تعلق عليها اكتب عنها
فى اللى قبلها او بعدها ولا يهمــــك
عارف المثل الساير بين الشباب الحين ولهم حق(عيش بردون يعنى ندل! تموت مستور)
يبقى لهم حق ولا لأ؟
نورتنى يامستر هانى
وما تحرمش من
زيارتك
يارب

norahaty يقول...

معتز شاهين -باحث تربوى
السلام عليكم ورحمة
الله تعالى وبركاته
على رأيك ادى
اخرة الشهامة
بعيد عنك السجن!
نورتنا وشرفتنا يافندم

norahaty يقول...

assafo anaroze
السلام عليكم ورحمة
الله تعالى وبركاته
صبحّك الله بكل خير
صح كلامك ياأسافو
وما أقدر ازود كلمة:)
نورتنا وشرفتنا ياأسافو.

سما أحمد يقول...

القصة مؤلمة جداااااا
وعلى فكرة بتناقش اكتر من قضية وكلها للاسف بتحصل للكثيرين
فعلا العنوان ممكن يكون صح لكن اوقات الانسان بيحتاج يتصرف باي طريقة حتى يحصل على القليل القليل مما يريد وعندما يجد نفسه محاط بالاحباط من كل صوب يحتار ويتخبط ويقبل باي شيء ممكن الحصول عليه دون تفكير
هذا الرجل ضحية وامثاله كثر
وللاسف موقف الاسرة منه كان سلبي ايضاً
كان الله في عونه
طرح رائع يناقش قضية كبيرة وخطيرة تهم الجميع
اتمنى نتعلم منها درس
يبارك بعمرك ويسلم قلبك

أحــوال الهـوي يقول...

و الله يا دكتور اضافتك في ميعادها
انا مستني نتيجة ابني

يارب يكرمة هو اللي زيه
و يكرمك بدعائك واحساسك بالاخرين
و الا عندك ثانويه ايضا

بكرة لما هاعرف النتيجه ان اراد الرحمن هازورك و ابشرك و ان لم احضر معروفه

تحياتي

عاشقة الأحزان يقول...

السلام عليكم


جميل منك التذكره لطلاب الثانويه العامه

ربنا معاهم وان شاء الله ربنا مش هيخسر ليهم تعب

تحياتى ليكى دكتوره

ايناس

م/محمود فوزى يقول...

السلام عليكم
الاخت الكريمه
جزاكم الله خيرا على الموضوع الهام

هناك نقاط كثيره فى الموضوع

منها الضمير
من اقترض عليه حساب قدرته على سداد الدين قبل اقتراضه
بالاضافه الى ان هناك من ضمنه فيجب شكر هذا الضامن الذى كان سببا فى انقاذه بدلا من تركه يتلقى العقوبه

هناك موقف الزوجه الذى لا ادري ان كانت تؤيد موقف اخيها أم لا
ربما كان صعب عليها الاستمرار وزوجها فى السجن
ولكنها تعلم انه مظلوم والسبب اخيها
كان الافضل لها ان تصبر
وخاصه ان زوجها مظلوم وهناك ابن بينهما

الفوائد الربويه المركبه المعقده كارثه كبيره على الكثير
انا اعرف اناس دخلوا هذه الدوامه واصبحوا يقترضوا من بنك لسداد ديون بنك اخر

اما بالنسبه للثانويه العامه فكان الله فى عونهم
اشكرك مره اخرى على الموضوع الهام

ملحوظه بسيطه
الراديون الروعه اللى فى الصوره ماله يعنى
مش عاجبك ولا ايه
هو صحيح كبير شويتين
وبكل بساطه تبقي تشيليه ومعاه بطاريه عربيه
شفتى البساطه
هههههههههههههههههههه

اوراق قديمة يقول...

اختى الدكتورة نورا
قصة جميلة ومؤثرة جدا
وياما فى السجن مظاليم
وده جزاء اللى يعمل خير فى الزمان ده ويضمن حد
وما عدش حد مضمون الايام دى
مدونتك بها صور راااائعه
انا باستمتع جدا بدخولها
وعجبتنى جدا صورة الام اللى بتحمل طفلها وكانها بتفرجه على الدنيا
ياريت تحكى لنا القصة التانية
وياما الحياه مليانه قصص
ام محمد

قلم رصاص يقول...

يااااااااااارب نجح كل اللي في الثانوية العامة واعطي كل ذي حق حقه ووفق الجميع الى ماتحبه وترضاه

التحديث جه في وقته

وان شاء الله في ميزان حسناتك يادكتورة

بس عاوز الفت نظرك الى اني رغم كوني خريج كلية العظماء(الحقوق) والحمدلله رب العالمين وفخور بهذا جدا ، الا اني مش ناوي اشتغل بمهنة المحاماة العظيمة رغم رونقها ودرها الجوهري في مجتمع

وده لسبب ان اتجاهات اخرى ، وهي التخصص في الاقتصاد في مرحلة الماجستير ، الدبلوم القادم السنة الجايه ان شاء الله

وعلى فكرة نتيجة الدبلوم العام بتاعتي ظهرت ونجحت الحمدلله ، بس مضطر انتظر امتحانات الشفوي في أكتوبر

دعواتكم بقى بالتوفيق حتى النهاية

وبلاش أررررررر
ههههههههههههههههههه

دمتم في حفظ الله

وطيبتم وطاب سعيكم وممشاكم

تسنيم حسين يقول...

السلام عليكم

ازيك يادكتوره وانتى كمتن وحشتينى بس بقى الإمتحانات والمذاكره ووجع القلب ده هو اللى شغلنى ..
وألف مبروك لطلاب الثانويه العامه والأزهريه ويارب يخشوا الكليات اللى يتمنوها...

والسلام عليكم

أبو العريف يقول...

انا فاكر اني جيت علقت هنا واكلت ايس كريم كمان
هي النت اللي بيستهبل ولا الجهاز
ولا الزهايمر ولا مين بالظبط

عموما
اللي ماعهوش ما يلزموش
بس الراجل ده اساسا مكنش معاه ومكنش لازمه اصلا
بس اقول ايه بقي
ضمن حاجه هو نفسه ما يضمنش نفسه فيها

تحياتي

حارة سد يقول...

أجد أن تلك الامور ما هي الا نتاج ارهاصات انفصام في الشخصية يعاني منها مجتمعنا..فلو دقنا على تلك التناقضات لن تستمرا لحياة

نظام الاقساط او ضيق المعيشة كلها عوامل تنذر بأننا ما زلنا في عنق الزجاجة ..معلقين بين الخروج او الاندماج

دمتي بخير

الحارة سد

norahaty يقول...

سما أحمد
السلام عليكم ورحمة
الله تعالى وبركاته
للاسف ساعات الاضرار يبدفع
الانسان لحاجات كتير خطيرة يمكن
لو فكر فيها مرتين مش حيعملها
ابداً لكن تعملى ايه فى الغفلة
ساعتها بتبقى معميانا عن رؤية
الاخطار.شرفتينا ونورتينا ياسما
(اسمـــك جميـــــــــــــــــل)

norahaty يقول...

احوال الهوى
والهوى احوال
السلام عليكم ورحمة
الله تعالى وبركاته
ربنا يطمنا ياصيدلى
ونحن فى الانتظار ومعاك
بقلوبنا وبدعواتنا بالنجاح
يــــــــــــــــــــــارب

norahaty يقول...

انوووووووسة
عاشقة الاحزان
السلام عليكم ورحمة
الله تعالى وبركاته
يارب يكون فى عونهم
وشكراًلمرورك ودعواتك
نورتينا ياأنوووووسة

norahaty يقول...

م/محمود فوزى
السلام عليكم ورحمة
الله تعالى وبركاته
الضمير!!متهيأللى بقى عملة نادرة فى زماننا هذا .يرحمنا ربنا برحمته .
عارف اول كلمة قالتها واحة زميلتى لما حكيت لها القصة (هم كانوا عاملين عليه مؤامرة؟)وكأنهم كانوا مبيتين النية لكل هذا !!!اما الراديوووون
فصعب شوية اشيلة زى ما انت شايف اما لو كان عاجبك ..اتفضل خده ما يغلا عليك ياباشمهندس وابقى هاتله انت بطارية السيارة زى ما بتقول:)
نورتنا وشرفتنا ياباشمهندس.

norahaty يقول...

اوراق قديمة
أم محمد
السلام عليكم ورحمة
الله تعالى وبركاته
وياالف أهلا وسهلا
صح ياما فى الحبس مظاليم
وياما فى مجرمين مستحقين للحبس
بس للاسف بيعرفوا يطلعوا زى
الشعرة من العجين ويسيبوا غيرهم يدفع الثمن.اما الصورة فهى الصورة الرمزية لمدونة صديقة(روح قلب ماما )لو دوستى بالمؤشر على الصورة حيوديكى لمدونة من احلى المدونات اللى بتابعها.نورتينا وشرفتينا ياأم محمد

norahaty يقول...

قلم رصاص
السلام عليكم ورحمة
الله تعالى وبركاته
يارب يارب يارب
اسمع منه يارب
وربنا يوفقك لما تنوى
القيام به طالما انه فيما
يرضى الله وينفع الناس.
ومبروووووووك النجاح ولو
ان ما ينفعش كده لازمن ولابدن
تجيب لنا حاجة حلوة حتى ولو نص كيلو عنب!لاجل ما نكمل دعا عليك لألألأ قصدى لك:):):)نورتنا ياقلم يارصاص وشرفتنا.

norahaty يقول...

تسنيم حسين
السلام عليكم ورحمة
الله تعالى وبركاته
ربنا يكون فى عون كل
الطلبة وما يخيب تعبهم
ابداً يارب .
نورتينى وشرفتينى تسنيم :)

norahaty يقول...

ابو العريف
السلام عليكم ورحمة
الله تعالى وبركاته
لأ يافندم احنا مافيش حاجة
بتضيع فى المدونة بتاعتنا خالص
انت بس ناسى او الجهاز بيهذر معك:)
وللاسف الضحية بتاعتنا ده على قولك ضمن شىء غير مضمون بما فيها نفسه وروحه لكن تعمل ايه فى الغفلة بقى!
نورتنا وشرفتنا ياأبو العريف.

norahaty يقول...

حارة سد
السلام عليكم ورحمة
الله تعالى وبركاته
ولحد امتى بس حنفضل فى عنق
الزجاجة دى ؟مش مكتوب لنا نخرج منها؟الناس بتحاول تتحايل على ظروفها بالاقساط دى لكن اهى نتيجة من النتايج بعيد عنك:السجن !
حاجة لو اى حد فكر فيها يترعب
وما يفكر فى القسط ابداً
ونورتنا وشرفتنا يافندم.

أحــوال الهـوي يقول...

مبروك يا دكتور

باسم الحمد لله جاب 97.50%

شكرا لدعواتك حبيت تكوني اول من يعرف

تحياتي

norahaty يقول...

أحوال الهوى
والهوى احوال
السلام عليكم ورحمة
الله تعالى وبركاته
الف مليون مبروك ياصيدلى
وعقبال ما نبارك له ولحضرتك
على دخول الكلية التى يريدها
والنجاح بتفوق فيها بأذن الله
فرحت له ولك جداً جداًوربنا ما
بيضيع مجهود وتعب حد ابداًابداً
ولولولوىىىىىىىىىلولولوىىىىىىى
لوىىىىىىىىلوىىىىىىىىلوىىىىىىىى.

م/محمود فوزى يقول...

السلام عليكم
انا لا اريد ان اصدق انها كانت مؤامره عليه
لانه اذا كانت بالفعل مؤامره عليه يكون الامر بشعا جدا

ولكن الرقم صغير فهذا ربما يقلل من احتمال ان تكون مؤامره ضده

الراديوووووووون
متشكر جدا على العرض ده
انا معنديش عربيه اشتري كمان بطاريه عربيه
ربنا يسهل لو جبت عربيه والبطاريه قدمت وقربت تبوظ ابقى ممكن افكر اخده
ياريت متنسيش تلفيه بعيد عن التراب والغبار عشان ميبوظش
الافضل حطيه فى التلاجه

الازهرى يقول...

الف ليون مبروك لكل المجتهدين فى الثانوية وكمان الجامعات

وعقبال الغلابة امثالنا

اما بقى موضوع التليفزيون فتعرفى على الرغم من اننا مركز توزيع معتمد فعندنا فى البيت تليفزيون 14 بوصة وبيجيب بالكتير 6 قنوات مضبوطين والباقى نص نص
ونفسى اقللهم علشان بصراحة وقف مصالح

كلمات من نور يقول...

داه كده مش حاطول ولا حتى لحسة من الآيس كريم


سامحيني لتأخري في قراءة الموضوع بس الاكسبلورر عندي كان بيعمل قفله

ادخل أي مدونة حتى مدونتي يقوم قاطع والصفحه تروح ويقولي خطأ والصفحه وووو


المهم تحايلت عالاكسبلورر وحرقت دمه بالموتزيلا علشان أقدر أعيش في مدوناتكم

موضوعك يوجع القلب يا نوراهاتي العزيزة بس لله الأمر من قبل ومن بعد

احنا شعب طيب وغلبان ومحتاج يفوق

يارب نفيق ونتغير قبل ما ربنا يستبدلنا يارب آمين آمين آمين


أما بالنسبة للثانوية العامة ( الأجنبيه يلااا) على رأيك فشكرا لدعواتك ابني الجهبذ(نمرة 2) نجح في الثنوية الأمريكان وداه كان لازم أمريكان علشان الرماية اشترته مننا ومافيش وقت للثانوية العامية والمذاكرة ..أقصد الدروس الخصوصية

جزاك الله خيرا

norahaty يقول...

م/محمود فوزى
السلام عليكم ورحمة
الله تعالى وبركاته
هو رد من صديقتى كما قلت لك من المحتمل ان يكون صحيحا او غير صحيح!
اما ان الرقم صغير ؟!!من الممكن بالنسبة لاخريين هو مبلغ كبييير!!
ويافندم هو احنا حنستنى لمّّّّــــــا
تجيب العربية اشترى البطارية للراديون والعربية تيجى
بعديـــن :):)
متهيأللى اسهل
وحاضر حأغلفه بالبلاستك
زى البطاقات بتاعة زمان:)

norahaty يقول...

الازهرى
السلام عليكم ورحمة
الله تعالى وبركاته
يعنى باب النجار مخلع:)
افادك الله ياأزهرى :)
على العموم انا اساسا
مسحت بأستيكة حاجة اسمها
تليفزيون من حياتى:)يعنى
يعنى لا 5ولا 6قنوات :الحمد لله
والف مبروك للناجحين فى كل السنين
وبدعيلك ياأزهرى انت والللى زيك
كمان ربنا يوفق الجميع يارب :)

norahaty يقول...

كلمات من نور
السلام عليكم ورحمة
الله تعالى وبركاته
حمدلله على سلامتك وسلامة
الاكسبلورر كمان انا ما
عرفتش او بالاصح ما حبيت
الموزيللا دا علشان كده
الاكسبلور شايف دلاله
عليا على الاخر لما يعّند
يالله السلامة!!بيوقف الحال:)
المهم ان الولد نجح الف مبروك
ثانوية عربى أو امريكانى أو
انجولىّ حتى:) المهم انه نجح وعدىّ
وعقبال الاخريين كمان يارب وووو
لولولوىىىىىىىلولولوىىىىىىىى
لولولولوىىىىىىىىىىىىىىىىىى

عمرو يقول...

مع شديد الأسف و الخجل نص المصريين ماضيين على شيكات على بياض و كمبيالات واٍيصالات أمانه ..
و أحقر محل فى أى منطقه شعبيه يمكن لصاحبه اللى بيتعامل بالربا أن يسجن العشرات من السكان لحيازته مستندات توديهم فى داهيه بسبب الشراء بالتقسيط و دى ظاهره مرعبه و خطيره ..
الحلول كتير و أهمها أن تتغير نظرة المجتمع لما يجب أن يكون عليه جهاز العروسه اللى غالبا بيكون السبب فى كل هذه المشاكل ..
يا عالم ده حتى الأكل بيتباع بالتقسيط !!!

norahaty يقول...

استاذ عمرو بدر
السلام عليكم ورحمة
الله تعالى وبركاته
كلامك مضبوط والله ياأستاذ عمرو
وكمان النهاردة بس قرأت فتوى
بصحة او بجواز انفاق مال الزكاة
للمساعدة فى زواج غير القادريين .
بس لو الناس تقتنع بالكلام ده
وتعمل به زى ما بيقتنوا بكلام الاعلانات الفارغة والتافهة
حالنا حيتغير تماماً.
ومنورنا استاذنا