المحافظ الهمام انقذ بنت عبد السلام
**********************
آل ايه ياختى
المحافظ كان فى جولة فجائية
وخللى بالك من فجائية
للمستشفى الحكومية
فى محافظته الذكية
لقى وليه قاعدة
تهرول
وتصوت وتولول
يادهوتى يالهوتى
ياخرابى
ياعرابى
ياحوستى
يالوصتى
بسرعة درى وقام وجرى
علشان يشوف الامور
ويرسى على الدور
ايه يافرحانة
مالك زعلانة
ومن الهم كربانة
:قالت
بنتى يابيه قرصها التعبان
اللى كل ليلة يبان
ويعمل عملته
ويكرر فعلته
جبت البت وجيت
اطلب الشفاء
من اهل الطب والدواء
سألت عن الترياق
قالوللى واق واق
انا سهمت ومن الحيرة بلمت
قالولى الترياق غير متوفر
وسابو البت تفرفر
آم المحافظ وقف واتنطر
وبسرعة أمر
روحى على الجامعى
وهناك راح تسمعى
اللى يريحك
و يسرك و يفرحك
لكن البيه ما كان يعرف
ان الترياق شاحح
وفاكر نفسه آ فالح
لكن ولو هاتو وكيل الوزارة
وبالسيارة
يروح يجيب المصل
ويجى قبل العصر
وكان وصار
والمصل اتحط
ومن المخازن فط
طب لما هو موجود
وعلى الرفوف مسنود
وفى المخازن مركود!!
لكن تقول ايه !!
ولا ايه ولا ايه !!
ومين عليه ومين ليه
والبت بقت عال العال
وصحتها فى منتهى الجمال
والحمد والشكر لله
*****************
من وحى حادثة حقيقية
نشرت فى الصحف المصرية
