الاثنين، أبريل 28، 2008

حادثة القطار


هى حادثة مثل غيرها كثير مما نقراه فى الصحف كل يوم ونمضى باعيننا عليه ثم نمضى لحال سبيلنا ,


ولكننها استوقفتنى والحت على ايامآ حتى اعيد كتابتها ثانية .

.
اقول نشر بجريدة الاهرام بتاريخ الخميس 17ابريل ما يلى :


العناية الالهية تنقذ خط حديد سكة الصعيد من كارثة


انفصال 19عربة من قطار البضائع وسيرها 6كيلومترات



عن تفاصيل الحادث نقول وفيه ابضآ من تخيلاتى للحادث وتصوراتى... فاعذرونى



ان القطار كان يتكون من الجرار (القاطرة )و29عربةوعربة السبنسه

**(كانت هناك مسرحية لسعد

الدين وهبه بهذا الاسم وبطولة ...

احنا فى ايه ولا ايه خلينا فى الحادثة !!!!!

المهم القطر كان ماشى فى حال سبيله


عادى وغلبان وسامع الكلام بتاع الاسطى السواق بتاعه

لكن العربيات اللى مش ولابد وكمان ملوزقة فيه بزبدة

**زبدة !!ازاى ؟؟

امال نفسر بايه ان 19 عربية انفصلوا عن القطر ومشيوا لحال سبيلهم

مسافة 6 كيلومترات اول القطر ما مشى والدنيا كانت مولعه من الحر .؟؟


**؟؟صحيح هم فكوا من الربطة اللى ربطاهم بالقطر ازاى


قلتلك الزبدة ياحبيبتى اللى كانت ربطاهم

**المهم وبعدين؟

فضلت ال19 عربية والسبنسة ماشين بس ببطء شوية

لانهم ماشين بالسرعة الذاتيه اللى كانوا مكتسيبنها من الجرار زى ما عمنا الكبير نيوتن ما قال


لنا زمان :ان الجسم الساكن او المتحرك يظل على حالته من السكون او الحركة مالم يطرأ عليه


قوة خارجيه تغير هذه الحالة .المهم الجرار والعشر عربيات فضلوا ماشيييين وواخدين فى وشهم ولا سائلين فى 19

عربية والسبنسه اللى زعلوا منهم وسبوهم لكن العشرة ما تهونش الا على ابن الحرام فضلت ال

19 عربية والسبنسه ماشين على راحتهم بس علشان متغاظين من عملة الجرار اللى ما صدق وخلع وقال


يافكيك !!! المهم ال19 عربيه طلعوا غيظهم فى مين؟؟الناس الغلابه اللى لا لها فى الطور ولا الطحين

**ايه اللى حصل!!!؟؟؟


سيارة نقل كانت معديه المزلقان (وطبعآلا فيه صفارة ولا اشارة ولا دياولو وانت عارف مشكلة


المزلقانات فى بلدنا)



المهم خبطت العربية النقل واصابت السائق(30سنه ومقيم فى سوهاج) وكمان التباع بتاعه(26سنه


ومقيم فى اخميم)


** وبعدين؟


فضلت ماشيه وخبطت عيل عنده 10 سنوات (مقيم فى طهطا)

بلد رفاعة بيه الطهطاوى

**احنا فى ايه لا ايه؟

معلش اسفه

!! الولد كان راجع من المدرسةمع ابوه فالعربيات لما خبطته عملت له بتر فى الساقين

***ياخبر مش فايت وبعدين ؟

نقلوا الطفل لمستشفى سوهاج التعليمى .....

وانتو عارفين بقى زحمة الطريق والاشارات والمواكب الرسمية وكل ده طبعآ عقبال الولد ياحبيب

امه ما وصل المستشفى كان توفى الى رحمة الله سبحانه وتعالى

**انا لله وانا ايه راجعون .دنيا زايلة والمتغطى بيها عريان (بردون )


**وايه كمان؟؟


الاتنيين نفر بتوع النقل الحمد لله لحقوهم ونقلوهم لمستشفى طهطا المركزى

واصابتهم الحمد لله عبارة عن جروح متفرقه بالجسم وكدمات وسجاحات

***هو ايه الفرق بين الكدمات والسجاحات؟؟

هو ده وقته !!كمان انا نسيت الحقيقة !!

***؟طب كملى ا لقطر وقف ولا لسه والعربيات كمان عملت ايه

واخيرآ القطر والعشر عربيات اللى فضلت متبتة وماسكة فيه بايديها وسنانها وقفوا فى محطةسكة

حديد طما

**والعربيات ؟


ما لقتش فايده من العند وكمان شوية السرعة اللى كانت واخداها من القطر وماشيه بيهم

خلصوا فوقفت فين؟

***فين؟

فى محطة سكة حديد بنجا واول ما وقفوا خدوهم فى الحجز

**؟؟؟؟؟اايه؟؟

قصدى على المخازن علشان يفحصوهم ويكتتتتتتتتبوا التقارير


****ويبعتتتتتتتتتتتتتتتتتتتتتتتتوا التقارير

والعوض على الله

ولله الامر من قبل ومن بعد

ونقول ايه؟؟

لله ما اخذ ولله ما اعطى

والعوض على الله

هناك 12 تعليقًا:

Abo-Harees يقول...

السلام عليكم ورحمة الله وبركاته
أختى الكريمه
كان أسلوبك أكثر روعة وسردك للواقعة ممتع ومعبر
ولكن هذه القصة قصة قصيرة صغيرة من قصص كثيرة كبيرة
أصبحت فكاهة وسبب من أسباب التفريح والتفريج عن النفس
وذلك لكثرة الأخطاء والعلل فى ما يحدث فى حياتنا فى مصر
بل إن حياة المواطن المصرى نفسها أصبحت خطأ كبير وعلة تحتاج لحكم وتحكيم
والسبب راجع لذئب يظن انه أسد فراح يجرى خلف القطيع أو ظن أنه كلب فى الوفاء والحراسة أمين على القطيع .
لكن رغم هذا أو ذاك لا بد لنا أن نوقظ الضمير الذى مات وقبر والذى مرض أو بتر
نوقظه فينا ونوقظه فيهم ونوقظه فى كل شىء
عامل القطار مواطن مصرى وكذا السائق وكذا رئيس الهيئة كلهم مصريون لكنهم فقدوا الضمير أو .. حريصون على عدم رفدهم وقطع مورد رزقهم .
لكن ههيات لنفع قد يأتى على جثث الأبرياء وبيع الضمير 0

شكراً لكى على ما سطرت يداكى

أخيكى
الراعى

wael يقول...

هي دي مصر
قطر يفك قطر يولع احنا نولع بأوسخ جاز مش فارقه احنا ضيوف عند اصحاب البلد اللي هما بابا حسني واعوانه
لنا الله بجد

Hossam Nasr يقول...

قُلْ بِفَضْلِ اللّهِ وَبِرَحْمَتِهِ فَبِذَلِكَ فَلْيَفْرَحُواْ هُوَ خَيْرٌ مِّمَّا يَجْمَعُونَ [يونس : 58]

بتوفيق من الله وفضل تم تحويل طلب الحملة التي تقودها المدونة بشأن سن قوانين للحد من التجديف على الإسلام خاصة والأديان عامة إلى المسئولين في هولندا
http://kawlansadida.blogspot.com/2008/04/blog-post_28.html

ساهم بتوقيعك في مطالبة الحكومة الهولندية بسن قوانين من شأنها حماية المسلمين من العبث بمقدساتهم الدينية خاصة ومن التجديف على الأديان عامة على الرابط التاليhttp://kawlansadida.blogspot.com/2008/04/blog-post_21.html
وجزاكم الله عن إسلامكم خيراً"

بنات صاحبة الجلالة يقول...

ممكن تكون الزبدة ساحت مع الحر دا قطار الصعيد مش اي حر هههههههه

اسلوبك بجد اكثر من رائع احيكي عليه لذيذ جدا

بس متسنيش ياقمر ان هي دي مصر بلد اللي بتغرق فيها العبارات في عرض البحر والسمك يشوف شغله ويدعي للحكومة وهي برضوا نفس البلد اللي بيولع فيها قطارات الصعايدة الغلابة ماهو الانسان في البلد دي ملهش ثمن لو كان ليه ثمن كان زمانه اتباع هو كمان

بجد بوست هايل الله عليكي ياجميل تسلم الايادي

لكي خالص التحية والتقدير

غير معرف يقول...

لسلام عليكم
سرد أكثر من رائع ..لوحبيتي تكفرى عن سيئاتك ويغفر ليكي ربنا كل ذنوبك اركبي قطار الصعيد بس علشان يتحقق الغفران اصبرى علي ...تكييف معطل أوبينقط عليكي ميه ..شرب السجاير من بلادينا القاعد بفلوسه ده علي إعتبار إن إحنامسطاحين وحلني لما يجي حد مسئول يوضح الصراصير ةالفئران حاجزه معاكي..اناوبناتي قعدنا علي ظهر الكرسي من الأسكندريه حتي بني سويف وسط صراخ بقيت الركاب وهرج ومرج كان يوم مسخرهوالتكييف بيعلي ويوطي لوحده تومتيكي تومتيكي ....نسيت اقولك جه متأخر ساعتين وده علي طول ولأني لاأركب غير القطار لأصابتي بدوار مع قي~ أعزك الله فلي معه نوادر كثيره ...مره بسبب التأخير ضاعت من إبنتي ماده وايه الأسبــاني ...اق4ولك آيه قلبتي علييه المواجع

Unknown يقول...

السلام عليكم ورحمة الله وبركاته

Abo -Harees
شكر الله لك وجمعنا الله نحن واياك على حب وطاهة الله و الرسول
وهدانا واياكم سبل الرشاد
ووفقنا واياكم لما يحب ويرضى
وزيارة اولى مشكورآ عليها ارجوا ان تكون دائمة ومتكررة والا تمل كلامنا ابدآ
ودمت بألف خير
norahaty

Unknown يقول...

السلام عليكم ورحمة الله وبركاته
دكتور wael**
لى صديقة دائمآ تقول :
(والله كتر خيرهم انهم ما بياخدوا منا اقامة بأعتبار ان احنا ضيوف على البلد دى)
وبصراحة هم لهم حق ما هم اللى بنوها وزرعوها وعمروها
وربنا يخليلنا اعلام التمجيد والتهليل
وعمار يامصر باهلك
وتسلم على المرور والتعليق.
norahaty

Unknown يقول...

السلام عليكم ورحمة الله وبركاته
عبد الله**
whispers just 4 a night

قال تعالى فى كتابه العزيز
(وَلاَ تَحْسَبَنَّ اللّهَ غَافِلاً عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الْأَبْصَارُ- 24-

مهطعين مقنعي رؤوسهم لا يرتد اليهم طرفهم وافئدتهم هواء
مُهْطِعِينَ مُقْنِعِي رُءُوسِهِمْ لاَ يَرْتَدُّ إِلَيْهِمْ طَرْفُهُمْ وَأَفْئِدَتُهُمْ هَوَاءٌ-43-)(ابراهيم)

علم يافندم وجارى التنفيذ

Unknown يقول...

السلام عليكم ورحمة الله وبركاته

بنات صاحبة الجلالة**
مش فاكرة بالضبط مين اللى قال
مصر كم بك من المبكيات والمضحكات
بلدنا حتفضل بلدنا هى هى
وومهما عملوا هم الضيوف واحنا الاصل
وفعلا متهيالى البيعة الوحيدة(اللى مزرجنة معاهم )
احنا !!!!!
وربنا يخليكو لىّ وما يحرمنى من طلتكم وكلامكم
norahaty

Unknown يقول...

السلام عليكم ورحمة الله وبركاته
الاستاذة وفاء بركات**
من الواضح انك فعلا لك معه مواقف كثيرة
بس اقولك انظرى للنصف المليان من الكوب
1- بيخلص ذنوبك
2-بتشوفى مخلوقات الله الاخرى دون الذهاب الى حدائق الحيوان ( الفيران-الصراصير)
3- القعدة الابهة (فوق ضهر الكرسى)
ايه ده الناس مش بتحمد ربنا عليه على النعمة!!!
اقولك ايه يا استاذة انا اللى اسفة انى اثرت فى هذه الذكريات
وتسلمى لى على المرور والتعليق
norahaty

الفارس الملثم يقول...

فعلا يا دكتورة شر البلية ما يضحك , بس انتي عرفت المعلومات دي كلها منين ,انتي تعرفي القطر ولا ايه مممممممم

بجد عجبني اسلوبك اوي اوي في قصك حكاية القطر , بس تفتكري مين الغلطان القطر ولا الجرار ولا السواق ولا اللوري ولا العيل اصل طبعا مش ممكن تكون الحكومة هي الغلطانة !!!

سلام يا فندم

Unknown يقول...

السلام عليكم ورحمة الله وبركاته
محمد**
الفارس الملثم
ضحك كالبكاء والله يامحمد من احوالنا العجيبة
وبعدين انت حتجيب لىّ شبهة يامحمد ؟اعرف القطر ازاى ياعنى ؟كنت جرار انا ولا سبنسة؟وبعدين ده قطر اجرام زى ما قلت لك خلع ومشى حضرته خفيف بالعشرة عربيات بس فاكر نفسه غزال؟؟
وبتسأل مين الغلطان؟
انت ..!!هو كده ...حكمت المحكمةخلاص. ويكفينا ويكفيك شر الحاكم الظالم
وتسلم من كل شر.
norahaty