الثلاثاء، ديسمبر 01، 2009

الكفيــــــــل!!!


الكفيــــــل!!
نظام عشت معاه لمدةعامين كاملين
أولاً وطبعاً أقولك فيهم الحلو
وفيهم الوحش
زى أى بشر
فى الدنيا
الحمد لله
كفيلي
الحلو فيه كان أكتر من الوحش
ممكن تقول بنسبة
75%
طالما
(وخلى بالك من طالما دى)
ما بتعملش مشاكل مع الناس
والاهم
كنت بتجيب ايراد ممتاز او جيد جداً
للمستوصف
لكن لو الايراد
خستك!!
(بمعنى بقى جيد أوضعيف)
شوية
يبقى حتشوف حتة تكشيرة
ملهاش حل
وبرضه أرجع وأقولك صاحب مال
وعايز ارباح لماله!
البلد اللى كنت فيها
كانت منطقة قبلية
(بمنطقة الجوف بأقصى شمال المملكة)
كل اللى فيها اولاد أعمام وبنات خالات
وهكذا
بحيث ان اللى فى اول البلد
ييبقى قريب أو نسيب أو صهر اللى فى أخر البلد!
وبالتالى
كل حدث او حديث أو حادث
يحصل عندك فى المستوصف
او فى السكن او فى الدكان
تأكد انه حينقل للكفيل فى التو واللحظة
أن خيراً فخير
وأن شراً فشر!
بلا زيادة ولا نقصان!
الاحداث اللى مرت خلال السنتين
كتيرة اوى اواى اوى
وبالتالى مش حأقدر اقولها كلها
لكن اللى ممكن احكيه
مثلاً
انى كنت عايزة أعمل عمرة أول ما رحت
وكانت أختى وزوجها موجودين فى
الوقت دا فى
السعودية
للعمرة ايضاً
وفعلاً الكفيل سمح لى بالذهاب
بعد ما أتكلم على التليفون
مع اختى وزوجها
وبعد
(خلى بالكم من اللى جاية دى)
ما اعطانى
خطاب مختوم
منه
ومتسجل بالغرفة التجارية
او بحتة تانية مش فاكرة اوى
المهم الجواب يسمح لى انا بالسفر عبر المملكة
للعمرة خلال مدة معينة وبتاريخ معين
لو أتأخرت عنها
يبقى
(ياداهية دقى)
المهم سافرت برى
(ايووووة بخل وتقتير معلش وكمان وبصراحة تجربة)
وطول السكة يطلع العساكر
وموظفى
أو منسوبى الأمر بالمعروف
يفتشوا ويسألوا عن الباسبور أو الأقامة
أوريهالهم
واوريهم الجواب المتسجل
يبصوا كده وهم مضررين
وواحد مرة نطق
(مادرى والله ايش هذا كفيلك
اللى يسمحلك بالسفر لوحدك!)
بقيت والله حاسة كأنى
العبد الهارب من سيده
او كونتا كنتى
فى مسلسل الجذور.
تمت السفرية على خير الحمد لله
وعملت العمرة
(عقبال الحج يارب)
ورجعت بري برضة
(ما هو أنا غاووووووية بقى)
برضه فى الرجوع نفس التفتيش
بس فيه موقف ما أنساه
ابدا
كل اللى كان يطلع اثناء الطريق
ويعرف انى لحالى أو وحدى يعنى
ما يحاول يجلس جنبى
ويترك الكرسى التانى خالى
لعدم الازعاج
لحد وأحنا ماشين مرة
السواق كان عايز
يركب زبون من نص السكة
ويجلسه جنبى
الحقيقة انا ما بقيتش عارفة اقول ايه
غريبة فى بلد غريبة !
لكن ربنا سبحانه وتعالى قيض لىّ
من دافع عنى
واتنطر حتة نطرة
وقام على السواق كان حياكله
استحى! استحى !
عيب عليك والله
هذى حرمة لحالها
كيف تجّلّس راجل غريب بجانبها
والله أن سويت هذا لأشتيكيك للشرطة !
والحمد لله السواق خاف
وما طلع الراجل
أخر حاجة عايزة اقولها
أن السواق كان
مصرى
واللى دافع عنى كان
سعودى
والخلاصة
كل بلد فيها الوحش وفيها الحلو
وربنا يصلح
حالنا جميعاً
اللهم آمين
ملحووووووووظة
أنا عارفة ان النظام
أتغير الأن
ومبقاش حكاية الجواب دى ماشية دلوقتى
لكن أهى تجربة ومريت بها
والحمد والشكر لله
مرت على خير
أخر حاجة
ومههههههههمة
جداً محدش يسأل
هوأنا كنت
فى السعودية
أمتى؟
ولا سنة كام؟
حزززززززززززززعل
وكمان مش حأجاوووووووب
أهـ هو كدهـ!

هناك 92 تعليقًا:

norahaty يقول...

سبحـان الله
والحمـــد لله
ولا اله الا الله
والله أكبـــــــــر
ولا حول ولا قوة
الا بــــــالله

حمامة سلام يقول...

رئيك مهم جدا نرجو التواصل اكتب تعليق على الموضوع قول رئيك بصراحة
http://ana-wa-nafsy.blogspot.com

ahmedmisry يقول...

كل له ما له وعليه ما عليه

كل عام وأنت والأسرة الكريمة بكامل الصحة وموفور السعادة إن شاء الله

norahaty يقول...

حمامة سلام
قولت رأيى
والحمد لله
بس كان
يهمنى
تقول
رأيك أنت
كمان فيما
كتبت أنـــا!

norahaty يقول...

ahmedmisry
بالضبط!الكمال
لله وحده واضفاء صفة
واحدة وأطلاقها على شعب
أو طائفة بحالها خطأ.
وكل لحظة وانت
والاسرة بألف
خير وسعادة.

donya يقول...

صباح الخير
المصريين في الغربه اغلبهم وحشين في قلب بعض جدا
وخصوصا في السعوديه والواحد لو حكي هيحكي بلاوي كتير
مش عارفه ليه بنعمل في بعض كده في الغربه
ان شاء الله تحجي وربنا يكتبها لنا جميعا

تحياتي

norahaty يقول...

donya
صباح الفل
باذن الله
سبحانه وتعالى
كلامك مضبوط وللأسف
لكن ارجع اقولك بلاش
التعميم لاننا بشر
فينا الكويس وفينا
اللى نص نص.ربنا
يهدينا وينولنا
جميعاً حج بيته
الكريم.آمين
يـــــارب.

Somaya Kamal El Din يقول...

التجربة دايما حلوة ومفيدة

بختك عملتى عمرة عقبال الحج

وحمد لله على سلامتك

بس معلش فى حاجة كده غلاسة منى

ايه الكفيل ده اصل مش فاهمة

على عبدالله يقول...

السلام عليكم

كيف تسافرين بدون محرم !!
:)
تقبل الله منا ومنك يا دكتورة
وكل عام وانت بخير وأحسن حال

غريبة انهم يسمحولك بالسفر بدون محرم !
لكن عامة فى السعودية بيحترموا النساء جدا جدا جدا
والمصرى حيفضل مصرى !!!!

العبد لله (انا يعنى) كفيلى فلسطينى غزاوى !!!
وبس مش حقول حاجة تانى

عابرة السبيل يقول...

طيب الحمد لله انك كويسة وبخير
وبعدين حكاية ان السواق مصرى فهو متعود ان مصر زحمة واللى يلحق كرسى بيقعد حتى لو هيقعد جنب مين هيقعد برضه

يللا خير
كل سنة وانتى طيبة

لولا وزهراء يقول...

قبل اى كلام ان شاء الله ربنا سبحناه وتعالى يكتب لكى الحج العام القادم ونكون صحبه بس خدى بالك هنسافر فى الطياره مش برى احنا متفقين
على فكره اسلوبك تحفه فى الكتابه بجد والصوره اكتر من رائعه
دلوقتى انتى بتحكى الكلام ده ذكريات لكن فى وقتها كان مش ممكن تتخيلى انه هيجى الوقت اللى تقعدى تفتكرى الكلام ده على انه ذكريات
هو صحيح انتى كنتى هناك سنة كام " انا عارفه ان وشك دلوقتى بقى لونه احمر لانك متغاظه منى "
ربنا يكرمك يا نورا ويفرح قلبك ويسعد ايامك

زهراء

لولا وزهراء يقول...

الدكتوره نوراااااااا
بارك الله فيكى على كلامك اشعر بمدى عمق التجربه وتأثيرها على حضرتك ومن ثم تأثيرها على شخصيتك
زى ما زهراء قالت ربنا يكتب لنا الحج صحبه مع بعض ان شاء الله بس السفر يكون بالباخره مش الطياره
انتى عارفه ان كل نظام له المساوئ وله المزايا بس نظام الكفيل اتغير دلوقتى خالص مالص

فى انتظار كل ما هو جديد منك

لـــــــولا

خواطر شابة يقول...

نظام الكفيل صراحة لم استطع يوما استساغته انه نوع من العبودية المبطنة عموما حتى في الخليج مؤخرا ابتدؤا يقتنعون ان به سلبيات فالكويت ستلغي العمل به
انا لاأريد ان أعمم كما دكرت لكن مشكلة التدين في السعودية انك تحسين انها مفروضة عليهم بدليل النماذج التي تزورنا في بلادنا العربية ينطبق عليهم المثل الذي يقول كان في جرة وطلع لبرة يرتكبون كل الموبقات التي تخطر على بالك وأنا هنا لاأتجنى عليهم عملي هو في قطاع السياحة وأنا أتكلم من واقع مشاهداتي.
تحياتي لك وعقبال ما نبارك لك بالحج ان شاء الله

salma mohamed يقول...

لاشك ان كل تجربه حلوه او وحشه في حياتنا بتزود وتثري خبراتنا,
عموما ربنا يكتبلنا جميعا زيارة بيته الحرام مرات ومرات.

أ / أحمد عبد المنعم يقول...

بسم الله الرحمن الرحيم

الأخت الفاضلة د / نورا

ما أسرع موضوعاتك ! وما أجمل تنوعها !

كل بلد تحتاج إلى ما يضبط نظامها الأمنى والاجتماعى و نظام الكفيل هو أحد الأنظمة البشرية التى احتاج لها المجتمع الذى تتوافد إليه عمالة خارجية ضخمة وهو نظام له وعليه وهو فى البداية والنهاية اجتهاد بشرى .

وإن رغبنا فى مناقشته بموضوعية فلنتخيل أن مجتمعنا مجتمع جالب للعمالة وأن كل منا صاحب عمل ومال ضخم يريد أن يستثمره لا شك حينها سنفكر فى نظام عمالة قريب منه أو مماثل له.

وتبقى المسألة فى البداية والنهاية علاقة صاحب عمل بعماله فقد يكون حسنا وقد يكون سيئا مثلهم مثل بقية البشر فى كل مكان .

وأما عن أهل البلاد الأصليين فهم أيضا كذلك وتبقى شخصية المرء منا هى حاكمته فى المعاملة ودافعته إلى قبول أو رفض مواقف الآخرين.

أما عن المصريين فى الخارج معاملة بعضهم مع بعض فهى أيضا لا تعدو كونها طبائع شخصيات الأفراد وكما ذكرت حضرتك لا تعميم فيها فمنا الصالح ومنا دون ذلك !!

وتبقى الغربة عاملا لتحديد الفكر عند الغالب فى المال لا غيره مما يولد مشاكل ضخمة بين المغتربين بعضهم البعض عامة وبين أهل الدول الفقيرة خاصة فقد كنت أشارك فى فض النزاع بين بعض البنغال وبعضهم وكنت أحتمل ما يفعله بعض المصريين محاولا إيجاد مبرر ولو معنوى لبعضهم

أختى :
بارك الله فيك وفى قلمك المبدع فكرا
ولن أسألك متى كنت هناك لأنك لن تيجيبى !!ههههههه

أقترح عليك موضوعا تكتبين فيه
( كيف نعيد الروابط بين شعبنا وشعب الجزائر ؟؟ وهل لتلك العودة قيمة فعلا؟؟)

تركي الغامدي يقول...

المكرمة نور حياتي ... كنت منصفة جداً في طرحك ... والأحوال بتتحسن بإذن الله تعالى ... ولو ببطء في عالمنا العربي (كله على بعضه) ... ولأني أرتحل إلى مصر ، وأكتبها صادقاً أن تظل مصر بيت العرب الكبير ، وأن تكون التنمية فيها وفي كل البلاد العربية شاملة وماذلك على الله تعالى بعزيز .
تبقى إشارتك إلى عمرك المديد بالصحة والعافية بإذن الله تعالى ، مايحتاج فصال طرحك الموزون يشير إلى عمرك بوضوح !

موناليزا يقول...

ازيك يانور
تعرفى فيه حاجات كتير كانت عاجبانى فى السعودية (ماهو انا كنت هناك فترة)
ومن أهم الحاجات دى احترامهم للمرأة واعتبارها من محارم الله وده شئ نفتقده هنا للاسف

خواطر شابة يقول...

كنت ارغب في حذف تعليقي السابق لكني لم أعرف كيف أقعل ذلك
أعترف ان التعبير قد خانني لذا اعتذر عن ما ورد فيه عن الشعب السعودي انا فقط أحببت ان أوضح نقطة وكا قلت سابقا خانني التعبير وهي أنني اؤمن بالتزام شخص عندما يكون متاحا أمامه أن يغلط ولا يفعل أكثر من ايماني بألتزام من لايغلط لان واقع الحال في مجتمعه يفرض عليه ذلك وبالتالي اول ما يغيب عنه ضغط المجتمع يضيع الالتزام
اتمنى ان تكون فكرتي توضحت

واحدة مفروسة يقول...

اولا كل سنة و انتى طيبة يا نورا
و كل عائلتك بخير
مش عارفة بس انا اعرف ان موضوع الكفيل ده كان سبب لكثير من المشاكل لكثير من الناس

اما بقا حكاية ان السعودى دافع عنك ..علشان مش حد يقعد جنبك
ده لأنهم بيحترموا ان ما يصحش ان الست يقعد و يتلزق فيها حد غريب
اما السواق المصري بقا عاوز يركب و خلاص
عادى الست بميت راجل فى نظرهم
تحياتي

Tamer Nabil يقول...

حمد الله على السلامة

وعمرة مقبولة ان شاء الله


كلامك صح كل مكان فى الحلو والوحش وكما نقول صوابع ايدك ليست مثل بعضها

ربنا يوفقك ويكرمك

مع خالص تحياتى

اللؤلؤة يقول...

دكتورة نور
السلام عليكم
كل عام وحضرتك بألف خير
ربنا يجعل مشقتك هذه فى ميزان حسناتك
وكل مكان فيه الصالح وفيه الطالح
خالص تقديرى

الزنارى يقول...

السلام عليكم
لا أقتنع بهذا النظام الذى ليس لة فائدة فقط يكرة الناس فى البلاد و يجعلهم يشعرون بالضيق و الحنق .
مع خالص الاحترام و التقدير
أحمد الزنارى

حاول تفتكرنى يقول...

أكيد فيه الكويس وفيه الوحش ، وبما اني فى بلد تختلف كما ونوعا عن السعودية فالامر هنا مختلف تماما تماما ومن كل الوجوه .

فعلا منهم الحلو ومنهم الوحش ن والوحش هنا بمعني الطماع ، ومن وجهة نظري ان السبب الوحيد الذى يجعل فيهم هذه الصفة هو المكفولين الذين يدفعون اموالا طائلة للسفر

عموما تختلف القوانين حسب كل بلد ، واحمد الله اني اعيش فى بلد اتمتع فيها بكامل حريتي

لهذا لي رأي قد يراه البعض رأي شاذ ، خاصة فيما يخص الغاء هذا النظام ، فأنا ضد ذلك تماما ، فقط ان يكون القانون المنظم لهذا النظام عادلا ويحقق مصلحة الطرفين

أما التنقل بخطاب شىء صعب جدا

ملحوظة
اراك تقمصتي اللغة فى المقال فكثرا ما كررت ما اعطاني ، ما انساه بدلا من لم يعطيني ولم انساه بما يوحي ان الوقت قريبا جدا لدرجة انك مازلت محتفظة باللكنة

ولكن هذا النظام كان قديما جدا واعتقد انه تم الغاءة فى بداية التسيعنيات

ايام السجاير البلومنت

تحياتي

سهيل ولى الدين علام يقول...

نظام الكفيل هذا اعتقد انه مطبق فى هذه الدول فقط ولااعتقد انه فى اىدوله متحضره وكما قالت خواطر شابه قبل تنازلها عن ما قالته !! انه نوع من العبوديه ولم يطبق حتى فى العصور الوسطى..اما المصريين فى الخارج فكما قلتى
مش كلهم زى بعض ولكن من تجربه لى بالامارات فعندما يمر الانسان بأزمه فكل ابناء وطنه يساعدونه ويقفوا معه الا المصريين ..وهذا راجع لاسباب كثيره اهمها
الخوف من التفنيش او الترحيل..
سعدت بزيارتى يادكتوره..

soly88 يقول...

كل اضحى وانت بخير
اسلوبك الساخر بسيط ومعبر جدا
بس مش عارف ازاى تبقى طبيبه ورغم كده دمك خفيف !!

well يقول...

كيف تجّلّس راجل غريب بجانبها ...من ضمن الحجات اللى بتخلينى احب العرب
نورتى مصر
تحياتى

Lady E يقول...

ربنا يكتبلك ويكتبلنا الحج يا رب

"(مادرى والله ايش هذا كفيلك اللى يسمحلك بالسفر لوحدك!"

انا حسيت ان كلام الشخص ده خوف عليكي يا دكتر علشان مسافرة لواحدك

وفعلا الشهامة والجدعنة والنخوة ملهمش وطن

وبره مصر معظم المصريين مبينفعوش بعض وكمان مبيحبوش بعض عكس اي ناس من اي جنسية زي الهنود او السودانيين مثلا بيبقوا مترابطين وبيحبوا بعض وبيساعدوا بعض

ضكتور جدا يقول...

السلام عليكم

كل سنة وانتي طيبة يا دكتورة

وعلى رأيك كل بلد فيه الحلو والوحش

بس حاسس ان المصريين بالذات متبهدلين في دول الخليج


الله المستعان

تحياتي

Asmaa Fathi يقول...

كل سنة وأنتِ طيبة وبخير
وأعتذر عن أنقطاعي الفترة السابقة عن متابعة مدونتكِ وأتمنى التواصل مجددا
دمتِ بود
تحيـــــــاتي
Asmaa Fathy

م/محمود فوزى يقول...

جزاكم الله خيرا يادكتوره
موضوع مهم جدا
طبعا موضوع الكفيل بدأ يتحسن شويه عن قبل كده
انا صحيح لم اذهب للسعوديه
ولكن اعرف الكثير ذهبوا الى هناك

نقطه احترام المراه موجوده بشكل كبير
وتجدها موجوده عند اغلب الناس وحتى القوانين ايضا وتراجع السائق المصري يدل على ما اقول فهويعلم انه اذا تم ابلاغ الشرطه فانه قد يعاقب بينما هو يبحث عن المكسب
وبالطبع الامرهنا لايتم تعميمه على كل المصريين فى الخارج او السعوديين
ولكن ايضا الصوره بالتاكيد مختلفه عن مايردده البعض من ان الخليجيين يكرهوننا ويذلوننا
هم مثلنا فيهم الكويس وفيهم الوحش

ولكن حتى فى ظل نظام الكفيل فهناك سفارات مصريه يجب ان تبحث وتتدخل لحمايه المصريين اذا حدثت لهم مشكله
ولا ادرى ان كنت مخطئا فى اعتبار ان هذا هو اهم وظيفه لتلك السفارات
لا ادرى ان كنت مثاليا فى التفكير
ربنا يصلح الاحوال

osama44 اسامه 44 يقول...

عذرا هذا شكل من اشكال المهانه التى افرزتها حكومتنا الكريمه باذلال الشعب بره وجوه

احمد الله انك بطلت العمل بالكفيل
دمتى رائعه

norahaty يقول...

Somaya Kamal El Din
فعلاً التعلم عن طريق
التجربة من أفضل
التعليم أما الكفيل
فأجاوبك بكلمة سوسيلا
الهندية اللى كانت معايا
(كفيل هذاsame same)بابا
هو كلام لازم اسمع!عرفتى بقى!
نورتنينا يافيلسوفة
القرن الواحد
والعشرين.

norahaty يقول...

على عبد الله
وعليكم السلام يافندم
معلش غلطة ومش حتكرر تانى:)
فعلاً ياأستاذ على عكس ا كنت فاكرة
وكمان عكس ما بيصورا فى الافلام أو
المسلسلات العربى وأعانك الله على كفيلك
كان الله بعونك وصبرك على حالك.

norahaty يقول...

عابرة سبيل
وأنتِ بالصحة
والسلامة .ربنا يهدى
الجميع سواء مصرى أو غيرهـ
نورتينا فى اول زيارة أرجو
المداومة عليها.

norahaty يقول...

لـولا وزهـرة
يارب يتقبــل
منك يازهرة يارب
ويكون لنا نصيب فيها
لأ متخافيش وشى بقى
برتقاااااااااااالى:)
ويكرمك ويصلح حالك يارب

norahaty يقول...

لولا وزهرة
السفر والشغل بره
بلدك وبعيد عن أهلك
فعلاً تجربة بتفيد الانسان
كتير أشحال لو كان أنسانة
ولوحدها .عارفة يا لولا بتفكرينى
انت وزهرة بثلاثة صحفيات كانوا عاملين
مدونة اسمها دموع بنات صاحبة الجلالةادى ايه كانوا لطاف
وظراف جداً وكانت واحدة فيهم
صديقة لى اوى (روبى)ربنا
يوفقهم اينما هم.

Sherif يقول...

تجارب مثيرة جدا .. وجريئة جدا ان تسافرى برا ولحالك .. صحيح ان الله هو الحافظ لكن الاحتياط واجب

ان شالله عمرة مقبولة وعقبال الحج ..

ألا باحق .. امتى ؟؟

(((((:

كلمات من نور يقول...

إيه داه يا نورهاتـــي

داه أنا كنت باعتبرك من أبنائي

هههههههههه كده لو قعدنا نحسب ونفكر ونتقصى الحقائق حاقولك يا أختاه

هههههههههههههه..هزار هزار عديه معلش عمودي الفقري تعبان وحبيت اخرج من موود الألم

عمرة مقبولة إن شاء الله ويجعلنا صجبة إلى الحج العام القادم.يارب آمين آمين آمين.. أهو يبقى معايا طبيبة تسند وتعالج (:

مدونتى إسمها مرايتى يقول...

كل سنه وانت طيبه ده اولا
ثانيا ربنا يرزقك الحج العام القادم ان شاء الله ويكون معاكى زوجك ان شاء الله وما تتحطيش فى المواقف دى
بس احلى حاجه بقى التجربه هى الى بتعلم وبتعرفك حاجات كتيره جدا ومميزاته بتغطى على عيوبها
ربنا يكرمك ويعزك يارب
تحياتى

قلم رصاص يقول...


السلام عليكم
ازيك يادكتورة عسى ان تكوني بكل خير
وكل سنة وانتي طيبة

معاكي انه نظام الكفيل من اساسه خاطئ ميه بالميه..لكن بالنسبة للكفيل نفسه .. هناك الصالح وهناك الطالح .. والحمدلله انك رجعتي مصر بالسلامة

بس موقف المصري زعلني بجد بجد بجد اوي

ربنا يهدي الجميع

اول مرة اعرف انك كنتي في السعودية

حمدلله على السلامة

وربنا يكتب لك الحج وايانا جميعا

في امان الله

norahaty يقول...

خواطر شـابة
أن جيتى للحق النظام
نفسه مش وحش بأعتبار
أن المملكة كبيرة أوى
والقادمين اليها كثيرين
ومن جنسيات مختلفة لابد
من وجود مرجــع لهم إن
حدثت مشكلة او شىء!!
لكن الوحش هو تصرفات
البعض منهم وعدم وجود
مراعاة لك من القنصليات
او السفارات اللى مفروض
ترعاكِ وتهتم بمشاكلك!
نورتينى .

norahaty يقول...

salma mohamed
اللهـم آمين
يارب العالمين
لنا جميعاً أحنا
وكل مشتاق ياسلمى.

norahaty يقول...

أ/أحمد عبد المنعم
كلامك مضبوط يااستاذ
احمد وهو ما قلته
(لخواطر شابة) من قبل
النظام حلو المهم الانسان
من يطبق النظام وليس البشر
سواء منهم الصالح ومنهم
من هـم دون ذلك.
أما موضوعك المقترح
مش عارفة !
لكنى اعتقد أن عدم
الكتابة وترك الموضوع
أحسن من أثارته وخاصة
فى الوقت الحالى(والاعصاب متوترة!)
شرفتنا ونورتنا
يااستاذ أحمد.

norahaty يقول...

أستاذ تركى الغامدى
اللهـم آمين
يارب العالمين
ويُبقى بلادنا فى
سلام ووئام
بلاش عمــــرى
حزززززززعل:)
نورتنا أستاذ تركى.

norahaty يقول...

موناليزا
بالضبط يامونى
أنا أذكرهم بالخير
فى مناسبات كتيرة بهذا
الشأن.نورتينى يامونى

norahaty يقول...

خواطـر شابة
أنا فاهمة حبيبتى
ربنا يهدينا ويرشدنا
الى اتباع هديه فى
السر والعلن.
نورتينى.

norahaty يقول...

واحدة مفروسـة
كل لحظة وأنتِ بخير
يارب وأسرتك يارب.
عيب أشخاص لا يعيب
النظام زى ما قلت
البعض ممتاز والبعض
غير ذلك وللأسف عندنا
ما ينشر من أخبار فى
الصحف أو البرامج
هو الأمثلة السيئة
فقط!!

norahaty يقول...

Tamer Nabil
الله يسـلمك يارب
ويكتب لنا السلامة
جميعاً والتوفيق والسداد.

norahaty يقول...

الزنارى
بحكم اتساع البلد
وحجم العمالة الغريبة
فيه فهو نظام مطلوب جداً
المهم التطبيق وكمان وجود
متابعة وحماية من سفارتنا
بكل البلاد مش السعودية بس!

norahaty يقول...

حــــاول تفتكرنى
ده اللى بقوله هذا
النظام لطبيعة البلد
واتساعها وتنوع العمالة به
وبلااااااااااااااااااااااش
تزعلنى منك :مالها السجاير
البلمونت :هى كانت من
زمان اوى يعنى؟:)
نورتنى

norahaty يقول...

سهيل ولى الدين علام
بحقيقى النظام ده مطلوب
عندهم زى ما قلت لأتساع
البلد وتنوع العمالة به
المهم الانسان اللى الكفيل
فيهم الكويس وفيهم الغير هذا
وأقولك ايه ربنا يهدى الناس
لبعضهم سواء داخل أو خارج مصر
وأنا الاسعد يافندم.

norahaty يقول...

soly
كل سنة وأنت
بالف خير ياسولى
وشكراً لمجاملتك:)

norahaty يقول...

well
كان حياكل السواق
بصحيح ياويل وكأنى
أخته او بنته صحيح
ومصر منورة بأهلها
الموجودين والراجعين لها:)

norahaty يقول...

Lady
ترابط غير
المصريين بره
كان مصر حسد
منى وتساؤل ليه
أحنـــا مش كده؟
نورتينى ويكتب لنا
وينولنا الحج يارب.

norahaty يقول...

ضكتور جداً
وعليكم السلام ورحمة
الله تعالى وبركاتـه
كل بلد فيه الحلو
والوحش ولكن ما ينشر
فى الجرايد والتليفزيون
هو السىء فقط وللأسف.
ودعواتى بالتوفيق
فى دراستك وحياتك.

norahaty يقول...

Asmaa Fathy
حمدلله على السلامة
ونورتينى بالزيارة.

norahaty يقول...

م/محمود فوزى
وجزاكم أحسن
الجزاء بأذن الله
فعلاً ياباشمهندس
كل شعب فيهم وفيهم
وللأسف التعميم وتعمد
نشرالأمثلة السيئة فقط
يسىء الينا أكثر مما يخدمنا
وزى ما قلت كتير من سفاراتنا
وللأسف (لا تحس بالمصريين بالخارج)
نورتنا بتواجدك وتعليقك
ياباشمهندس محمود.

norahaty يقول...

أسامه 44osama
نظام ومطلوووووب
لبلادهم الـــواسعة
المهم التطبيق من الاشخاص
والمتابعة والحماية من السفارات!
وشكرأ لتمنياتك ودعواتك ياأسامة.

norahaty يقول...

Sherif
تجارب احلف بيها
وبمريت فيها وأحمد
الله فى كل وقت على
عملها.عقبالنا جميعاً
ياأستاذ شريف وبلاش
تززززززعلنى منك :)

norahaty يقول...

كلمات من نور
وتحسبيها ليه؟وتوجعنى
دماغك بحبحيها وأعتبرينى
الجدة مش الاخت كمان انا
موافقة بس المهم تضحك
ويسعد قلبك ويشفى
مرضانا جميعاً يارب
نورتينى من غير
حســــــــاب
ولا حسابات:)

norahaty يقول...

مدونتى أسمها مرايتى
وانتِ بالصحة والسلامة
يارب ويرزقنا جميعاً
حج بيته الكريم
ويتقبله منا
ويفلح ويصلح
كل امورنا الدينية
والدنيوية.نـورتينى

norahaty يقول...

قلم رصاص
وعليكم السلام ورحمة
الله تعالى وبركــاته
كلامك مضبوط وصحيح
والتعميم على شعب
بحاله أكبر خطأ وللأسف.
وربنا يكتب لنا دوام
الحج والعمرة يارب
نورتنا ياقلم دهب.

norahaty يقول...

اللؤلؤة
وعليكم السلام ورحمة
الله تعالى وبركاته
وحضرتك بألف خير
وصحة وعافيةيارب
كلامك مضبوط يافندم
التعميم فى الأحكام
على الشعوب يفسد
المودة بينهم.نورتنى
وحمدلله على السلامة.

norahaty يقول...

والحمد والشكر
لله رب العـالمين

dr.lecter يقول...

علشان كده عمري مهسافر الا تبع مؤسسه او هيئه او الوزاره نفسها السعوديه لكن كفيل اعتذر

اقصوصه يقول...

ما يبقالنا الا ال1كريات :)

والله اول مره اعرف عن سالفة الخطاب هاي

الحمدلله ان الوضع تغير :)

د/ أحمد لاشين يقول...

اكيد موضوع العمر ده سهل
وامتي كنتي في السعودية برضه سهلة
هنسأل في العايلة قصدي البلد اللي كنتي فيها عن طبيبة مصرية شابة وخلت الريت بتاع المستشفي عالي بدليل انها استمرت سنتين وكانت لوحدها وكده
وهنوصل برضه :):):)
سافر تجد عوضا عمن تفارقه وانصب فان لذيذ العيش في النصب

يا مراكبي يقول...

:-)

موضوع طريف

عموما التعميم طبعا مش سليم لأن الموضوع ده له أشكال متعددة .. أولهم إن الكفيل ممكن يكون شركة أو مؤسسة (مش فرد) .. وممكن يكون فرد كويس جدا .. وممكن يكون فرد مش كويس .. والتنوع ده بيؤدي لإختلاف وتباين في ردود الأفعال .. فيه ناس ما بتحسش إن فيه مشكلة مع كفيلهم أبدا .. وفيه ناس بتتضرر .. حسب .. وما ننساش إن المصريين في الخليج العربي ملايين ومش كلهم في معاناه

كمان الأماكن بتفرق .. المدن الرئيسية الكبيرة غير المدن الصغيرة غير القرى .. لكل مكان خصائصة السكانية المختلفة .. ممكن تلاقي مشاكل في مدينة مش موجودجة في مدينة أكبر لأنها أكثر تحضرا وأهلها أكثر تعليما وفيها أجانب أكتر

آخر نقطة أحب أقولها إن لو حد فيكم كان على رأس شركة أو مؤسسة وبيعاني في توظيف وإستقدام العمالة والموظفين .. هيكتشف إن النظام ده بيحفظ ليه بعض الحقوق زي مثلا ما نلاقيش حد يختفي فجأة من الشغل ومالوش بديل والدنيا تقف عليه .. لأن أغلب العمال والموظفين بيكونوا مستقدمين من خارج البلاد والبديل مش متوفر فورا وإستقدام غيره ممكن يآخد وقت .. أو إن حد يكون في إيده عهدة مهمة ويختفي في أي وقت من غير ما نستلمها منه .. والأمثلة كثيرة

الخلاصة .. النظام فيه الكويس وفيه الوحش .. ودي سنة الحياة .. لكنه ليس جيدا أو سيئا على إطلاقه هكذا

الشاعر الفنان أحمد فتحى فؤاد يقول...

أختنا الغالية
أنا مصرى مقيم فى الإمارات
الحكاية برضه فيها كفيل لكن كفيل الإمارات و قوانين العمل بالإمارات تعتبرى نفسك فىها كأنك فى الجنة بالنسبة للسعودية
عايز أقولك إن المصريين اللى فى الغربة هم أسوا المجموعات .. بس برضه أنا متأكد إنهم مش هما المصريين اللى فى مصر
دول غير ..
حسبى الله و نعم الوكيل
تشرفت بزيارة مدونتك
أحمد

norahaty يقول...

dr.lacter
ماشى ولكن فيما أعلم
أن حتى التعاقد مع الوزارات
الان يتم من خلال شركات أو كفلاء
وزى ما قلت الخطأ مش النظام
ولكن بعض القائمين عليه.
نورتنى فى اول زيارة لى.

norahaty يقول...

أقصوصة
وكيف تعلمين عنها
وأنت ما تعملين هناك؟
والف حمد وشكر لكل شىء:)
نورتنى أقصوصــــة

norahaty يقول...

د/احمد لاشين
ماتشغــلش بالك
أنت بالمواضيع دى:)
وصح العمل حق
العمل شـــرف
العمل واجـــب

norahaty يقول...

يــامراكبى
شكراً ياباشمهندس
لكلامك وشكراًلتعليقك
القيم.تعميم صفة على
شعب بحاله متهيألى خطأ
وخطأ كبير كمان.
ومساحة المملكة وحجم
العمالة الاجنبية فيها
دعاها الى اتخاذ هذا النظام
لا ألوم عليها ولكن الوم على
الافراد على سوء التطبيق.

norahaty يقول...

الشاعر الفنان
أحمد فتحى فؤاد
(عايز أقولك إن
المصريين اللى فى
الغربة هم أسوا
المجموعات ..)لا حول
ولا قوة الأ بالله ...
ربنا يهدى الجميع يارب.
تشرفت بزيارتك يافندم .

ahmedmisry يقول...

السلام عليكم
لقد طرحت موضوع جديد عن مكتبة الأغاني الوطنية حيث أعدت الرفع من خلال تجميع أغاني كل مطرب في مجلد واحد أو عدة مجلدات وضغطها ومن ثم رفعها على مواقع سريعة تدعم استكمال التحميل مع وضع نسخ ذات أعلى جودة وإصلاح بعض الملفات الصوتية السيئة بقدر الإمكان
http://ahmed-abdelrahman.blogspot.com/2009/12/blog-post_04.html

norahaty يقول...

ahmedmisry
شكراً أستاذ أحمد
لأعلامى بهذا الموضوع

mhmdwahab يقول...

السلام عليكم فى مصر المحروسة كان هناك ما يعرف باسم الكتاتيب والتى كانت تقوم بتعليم الناشىء الصغير حتى قبل التعليم الحكومى وكان التعليم فيها عبارة عن اللغة العربية وحفظ القران الكريم و من هذا الاسلوب فى التعليم تفوق وتخرج الكثيرون من كبار الكتاب والادباء والعلماء فى كثير من المجالات فى القرن الماضى بل لا ادعى ان اقول ان هذا كان السبب فى ريادة مصر وقيامها بتعليم الاشقاء العرب وبعد اختفاء والغاء هذة الكتاتيب وانحطاط وتدهور التعليم الحكومى اصبح الشارع ولغة المنفعة والفهلوة هى من تقوم بتثقيف المواطن المصرى حتى اصبح خريجى الجامعة فى مصر من اقل المستويات وانحدرت ايضا الاخلاقيات

mhmdwahab يقول...

قولى وماتجرحيش
http://mhmdwahab.blogspot.com

norahaty يقول...

mhmdwahab
مضبوط كلامك
وذلك فى رأيىّ
يرجع لأاسباب
كثيرة جداً جداً
أذكر منهم سببين
تفرغ (المعلم)
وقلة عدد المتعلمين

norahaty يقول...

mhmdwahab
قرأت يافندم
وقلت رأيىّ كمان:)

mhmdwahab يقول...

الحياة ممكن تستطال بالاجهزة االاصطناعية
وهى دى تبقى حياة ولا مرمطة والحب الزائف ليس بحب ولكن بيع وشراء و نعم اقصد الملائكة المفروض انهم يستقبلو الانسان واما يسحبوة على الجنة او النار هل نستطيع فى ذلك الوقت ان نخرج مبلغ كدة تحت التربيزة علشان ندخل المكان اللى على هوانا
لو عندك وقت بعد الصلاة ابقى طلى طلة على
http://scandal-mhmdwahab.blogspot.com

فكرة من الزمن ده يقول...

ازيك يانور
بتوحشيني
وكل لما اجي الاقي تعليقات معطلة واخر بوست مافي تعليقات اصلا
ليه كده
كلامك عن الكفيل والفروق بين الدول حقيقي
لان دايما كل مكان يجمع اصناف مختلفة من البشر الطيب والشرير والخليط بين الصفتين
في كل مكان في ا
لارض

اما عن الصحفي فلا اقول الا ربنا يريح الارض من امثاله محبي الظهور والساعين للشهرة


والبوست الاخير انا لله وانا اليه راجعون
قوليلي بقى قافلة التعليقات ليه



تحياتي

mhmdwahab يقول...

شكرا على مرورك الكريم ودى كانت اساب كتابة القصة بالانجليزى
هى ظروف كتابة القصة كانت لابد ان تكتب بالانجليزية حيث كنت ادرس برنماج الترجمة يعنى ظروف دراسية وليس المقصود التحيز للغة معينة المهم ان يكون المعنى واضح

د/ أحمد لاشين يقول...

ايه الديكتاتورية دي !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
موضوعين والتعليقات فيهم ممنوعة
اصلك مصرية يا دكتورة
ومن اصل فرعوني كمان :):):)
ربنا يكرمك وتقبلي مروري "السخيف"
:):):)

mhmdwahab يقول...

اهلا نور هناك ايضا قصص بالغة العربية ولكنك لم تلاحظيها الفرصة الاخيرة وهى تصور لاحظات الموت وايضا التحرش ونلاحظ الاختلاف والتنوع الكبير بينهم وايضا فى القصتين بالانجليزى اى اقصد بين الجدية والساخر وهذا مقصود للتنوع
وشكرا للمرور

Dr Ibrahim يقول...

ربنا يصلح حالك وحالنا
مش أهم حاجة عايشة وبترزقى يبقى هنسأل ليه لعى امتى والكلام دا
أهم حاجة عندنا الدكتور نورة اللى بتكتب مقالات حلوة:)
كل سنة وحضرتك طيبة

norahaty يقول...

mhmdwahab
وللأسف بعض الناس
يشترون ما تسميه أنت
(مرمطة والحب الزائف)
بأى مبلغ الناس مش كلهم
واحد او لهم رأى واحـد
وطليت يافـــندم
وقــــلت رأيى:)

norahaty يقول...

فكرة من الزمن ده
حمداً لله على السلامة
ومعلش بريح الأصدقاء
من الكتابة شووووووية
بس الحمد لله ادينى فتحت
التعليقات فى التدوينة
الجديدة :ورينى شطارتك :)

norahaty يقول...

mhmdwahab
قولى أنت هل
تعليقى يبين أنى
قد فهمت انا المعنى:)

norahaty يقول...

د/أحمد لاشـين
لأ ابداً بالعكس
دا لطيفففففففف:)
ربنا يكرمك يارب
وتنورنا دايمـاً

norahaty يقول...

mhmdwahab
اهلاً بك أنت
أستاذ محمد
بأذن الله
اعمل جولة
فى باقى
التدوينات
وارى ما فاتنى
حااااااااضر:)

norahaty يقول...

Dr Ibrahim
اللـــهم آمين
يارب العالمين
شكراً لدعواتك
وكل لحظة وأنت بخير