السبت، ديسمبر 27، 2008

بووووووووووووستة !بوسته! بوستة





اسمحوا لى ابعت شوية الجوابات دى لاصحاب واصدقاء وكمان لناس ما شفتهم ولا سمعت حسهم لكن ربطت بينا شبكة النت او صفحة فى جرنال!ايوة ماتستغربوش حتعرفوا لما نقرأ سوا وكل شىء بوقته



اول جواب ابعته لصحباتى بنات صاحبةالجلالة صحفيات المستقبل جوجو وسمسم وحبيبتى ريمو مش حاقولكم اد ايه اتخضيت لما قرأت البوست الاخير لكم !! ليه؟وتقفلوا المدونة ليه؟ وكمان كنتم عايزين تعلموا ديلت لها ليه؟انتم صحفيات وعارفيين انها مهنة البحث عن المتاعب فليه اليأس السريع ده وتفتكروا اى مهنة تانية مالها متاعب زى المثل ما بيقول (اللى عليها بيقاسى)يارب بس شويه راحة كده وتشتاقوا لنا زى ما احنا بنشتاق لكم من اللحظة دى احنا منتظرينكم



تانى جواب لصديق عزيز محمد الفارس الملثم اقوله . انت صديق عزيز وحتفضل صديق عزيز وماأنسى وقفتك معايا فى يوم من الايام امام أزمة لم اقابل مثلها تانى الحمد لله .

الجواب التالت لانسان عزيز عارف نفسه كويس اقوله اين انت؟قافل كل حاجة ليه؟ ولغيت كل حاجة ليه؟ليه التقلبات الغريبة دى ؟ ربنا وتعالى قادر على أن يدلك على مافيه الخير لك .



الجواب الرابع لانسانة عزيزة واخت فى الله كمان يمكن ظنت هى بى ماليس بى!! ايوة انا ملتزمة واحب الله ورسوله واحب القرأن واحب سماعه وقراءته وترتيله ايضا ولكن مازال بى حب للموسيقى وسماعها وترديدها احيانا فهل هذا سيخرجنى من دائرة الاسلام والمسلمين ...وهل انقطاعها عنى سيردنى عن هذا ....لا ادرى.



الجواب الخامس لأبن نعم ابن ويمكن لاول مرة احس بها مع احد غير ابناء وبنات اخواتى ولكنى احس تجاهه بهذا
اخاف عليك من ثورة الشك التى تنتابك وادعو الله أن يثبتك على دينك وايمانك ويرد عنك كيد الشيطان واعوانه وادعو الله ان يثبتك فى فترتك المقبلة لتمر عليك على خير إن شاء الله كما مرت على من قبلك على خير.يارب
الجواب السادس لأميين ربنا يصبرهم هما الاتنين أم (الطفل إسلام) اللى مات بعد (المدرس هيثم)بتاعه ما خبطه برجله حين ما رفض يفتح ايده علشان يضربه بالمسطرة لانه ماعملش الواجب الولد وقع على الارض ونقلوه للمستشفى وهناك توفى بعد ساعات .ايضا قلبى على أم المدرس ده(23 سنه واول اشتغاله بالتعليم )اتحكم على المدرس بالسجن المشدد ست سنوات مع الشغل والنفاذ. حيخرج ايه وازاى بعد 6سنوات من السجن؟حيشتغل ايه؟ وحيعمل ايه لو قدر الله له الخروج بعدها ؟ما أدرى والله كيف مرت عليهم ليلة امس التلاتة ؟ام المرحوم اسلام وأم المدرس هيثم والاستاذ هيثم نفسه الله يكون فى عونهم جميعاً ويارب ماتحرق قلب والدة على ضناها ابدا.ربنا معاهم يقويهم فى محنتهم .



الجواب السابع لكل انسان يقرأ الكلام ده اعمل الخير وارميه فى البحر زى ما بيقولواعمره ابدا مابيضيع حيترد لك يمكن حيترد لك انت او اولادك او يبعد عنك شر لكن لازم لازم لازم لازم حيترد لان
ربنا



سبحانه وتعالى هو اللى قال



(فَمَن يَعْمَلْ مِثْقَالَ ذَرَّةٍ خَيْرًا يَرَهُ.وَمَن يَعْمَلْ مِثْقَالَ ذَرَّةٍ شَرًّا يَرَهُ)



الزلزلة7-8






جوابات كتير والله عايزه ابعتها لكن كفاية كده علشان ماتزهقوش منى

هناك 47 تعليقًا:

Ahmed Kamal يقول...

قرأت و تأثرت ، و عندما هممت بالخروج تذكرت عتابك على عدم التعليق :)

شكرا لك ، و أرجو أن تكتبي باقي الجوابات

romansy يقول...

ايه الجوابات الجميله دى ياريت كنت تقدرى تبعتى جوابات اكتر واكتر لانها بتدل على احساسك
وحبك للخير والناس

سمكه واحده يقول...

جوبات جميله اوي
بالنسبه لجوابي انا بما اني من اللي هيشوف البوست
فعلا عندك حق الواحد يعمل خير ويستني الرد من ربنا سبحانه وتعالي وميستناش رد من العبد اللي زيه لان كلنا فقراء اللي الله سبحانه وتعالي

بالنسبه بنات صاحبه الجلاله وانا كمان زعلت جدا جدا يارب يرجعوا عن الفكره
تقبلي مروري

جنّي يقول...

السلام عليكم

كان الله مع اهل غزة وليغفرالله لنا تقصيرنا معهم ..

لا للوقفات والاستنكارات ولكن اجمعوا المال والسلاح وليفعل كل منا ما يستطيع لايصال المال والسلاح لاهل غزة ..

ويارجال سيناء الشرفاء قوموا بايصال المال والسلاح لاخوانكم في غزة الصامدة..

ولعنة الله على الكلب الذي استقبل العاهرة اليهودية امس لاعطائها الضوء الاخضر لضرب غزة ..

وحسبنا الله ونعم الوكيل

Kiara يقول...

وانا من هنا ببعت برده لبنات صاحبه الجلاله بقولهم يرجعواااااااااااااااااا

وكمان انا صعبان عليا الاستاذ اوي حياته راحت

جوابات رقيقه ياقمر

ربنا مع اهل غزه

الفارس الملثم يقول...

هيييييييييه انا اسمي مكتوب

انا مش عارف اعلق عن اني رساله ممممممم

طبعا بداية الواحد اتغم لما شاف اللي حصل في غزه مفيش تعليق يتقال غير لا نامت اعين الجبناء !!!!

اعلق بقي علي رسالتي , وانت يا دكتوره انسانه طيبه ومحترمه لاقصي درجه وصديقه عزيزه واتفضلي كده ان شاء الله وانتي اول حد من المدونين عرفته وربنا يديم الصداقه والمعزه يا رب

اقلك تصبحي علي خير بقي وربنا يديم عليكي الصحه وراحة البال

سلاممممممممممممممم

عاشــــــ النقاب ـقــــة"نونو" يقول...

السلام عليكم
مش عارفة اعلق على ايه غير موضوع اسلام بجد حاجة مرعبة
بس المدرس ؟؟؟؟؟؟؟؟!!!!!!!
ربنا ينتقم من وزيره و؟؟؟؟؟؟؟
صاحبتك اللي انقطعت عنك للاسف سلمت بدري
معلش
احبك في الله ووحشني الكلام معاكي بقى

ahmed_k يقول...

طيب كويس والله أنا بلدي على البحر
علشان لما بيكون الواحد في مدينه مفيهاش بحر
بيحتار لما يعمل الخير يرميه فيييييين؟؟

أحــوال الهـوي يقول...

جوابات كثيرة لاصدقاء و صديقات و ابن

كلها رجاء و تتنفس بالامل و الصبر و كانها نداءات من حارس الجنة يهب بالناس ان يدخلوها و هم عازفون

ابنتي ذات القلب الكبير

خلقت لفعل الخير فافعليه و لا تكلي و لا تتعبي

تحياتي

HERO يقول...

جوابات جميلة وياريت تكمليها
بتسيب اكيد اثر حلو في النفس

وتحياتي

غير معرف يقول...

عاجبك اللى بيحصل فى غزة دلوقتى

لو مش عاجبك وعايز تاخد موقف

تعالى عندى فى المدونة وشارك

غزة تصرخ

فهل سنجيب ؟؟؟

maxbeta3zaman يقول...

ما جاء فى الجواب السابع حق ..وجربته فجاءنى الجزاء من حيث لا أدرى ولا أحتسب وعلى يد أناس ماكنت أتصور أن التقيهم أو ربما لا أعرفهم ..فهم جنود المولى عز وجل يرسلهم لقضاء الحاجات وتوصيل جوائز عاجلة لمن توكل على الله وفعل الخير دون انتظار لشىء سوى مرضاة الله ..هناك قصة عن الإمام أحمد ابن حنبل ارسلها لى صديق فى البريد تحكى عن هذه الفكرة وعن فضل الاستغفار ..أذهلتنى لما قرأتها وتأملت معناها ..
فعلا ما قلتيه حق

Beram ElMasry يقول...

norahaty

فى مستهل العام الهجرى الجديد ادعو الله لكم وللاهل ، ان يجعله عام خير ورغد ، وان يحفظكم وجميع العرب من كل سوء ومكروه ، وان يسبغ علينا نعمة الامن والامان وكل عام وانتم بخير
بيرم المصري

حاول تفتكرنى يقول...

تتفاوت تعبيراتنا بفلسفات مختلفة عن القضايا المتباينة ، واستخدام ساعي البريد الذى اضمحل وجوده ، فلسفة جديدة فى اسداء ما تكن به أنامل من كلمات

نحييك بشدة

Unknown يقول...

السلام عليكم ورحمة
الله تعالى وبركاته
الاستاذاحمد كمال
هنا يامرحبا يامرحبا
لولا الظروف كنت زغردت
لكن انت ادرى بما نحن فيه
ونورتنا وشرفتنا بمرورك
وسلاااااااامك وكلاااااامك
وباقى الجوابات ربنا
يسهل عليها لان اللى
اتكتب كان شحنة
عاطفية من
موقف
وربنا
يسهل

Unknown يقول...

السلام عليكم ورحمة
الله تعالى وبركاته
romansy
الله يحفظك كل ده!!
ده بس من ذوقك
نورتنا بمرروك
وتعليقك يارومنسى

Unknown يقول...

السلام عليكم ورحمة
الله تعالى وبركاته
سمكة واحدة
ياهلا ياهلا ياهلا
(وما ربك بظلام للعبيد)
تعملى الخير حتلاقيه والعكس
صحيح فى جميع الاحوال .
ربنا يهدى حبيباتى
بنات الجلالة ويرجعوا
لنا تانى يارب
نورتينا فى اول زيارة.

Unknown يقول...

السلام عليكم ورحمة
الله تعالى وبركاته
جنىّ
الله معهم يثبتهم
ويقويهم ويشد أزرهم
ماأملك الا الدعاء وقلبى
ربنا يقويهم فى كل وقت وحين
اقولها ليل نهاروحسبناالله ونعم الوكيل

Unknown يقول...

السلام عليكم ورحمة
الله تعالى وبركاته
كيارا كيارا كيارا
معلش اصل الاسم واحشانى
والاستاذ هيثم عينى عليه وعلى اسلام وامهاتهم الله يصبرهم جميعا يارب.
نورتينا ياكيارا وشرفتينا.

Unknown يقول...

السلام عليكم ورحمة
الله تعالى وبركاته
محمدالفارس الملثم
ايوووووووووووة انت اسمك مكتوب اهوه ومنور هو انا اقدر اكتب رسائل وما ابعت لك .....يناداشة !!!!!:)
وصداقتك غالية علىّوالله يامحمد.
وكفاية كده احسن حأعيط :(
وتسلم للمرور والتعليق
يامحمد
ياصاحبى

Unknown يقول...

السلام عليكم ورحمة
الله تعالى وبركاته
عاشقة النقاب (نونو)
ام يوسف
حادثة اسلام الكل فيها صعبان علىّ
يمكن كير يقولوا لأ المدرس قاتل مايصعبش عليكى !لكن والله صعبان علىّ لانه مش ممكن كان عامد يقتله أو يموته لكن قدر الله وماشاء فعل .وانتى كمان وحشنى الكلام معكى .
احبك الله الذى احببتنى فيه
وتسلمى للمرور والتعليق

Unknown يقول...

السلام عليكم ورحمة
الله تعالى وبركاته
ahmed_K
منور انت الغردقة
والغردقة منورة بك
ياأستاذ احمد
ومرورك وتعليقك
زادنا نورا

Unknown يقول...

السلام عليكم ورحمة
الله تعالى وبركاته
احوال الهوى
والهوى أحوال
أنا كل الحاجات الحلوة دى !!!!
جزاك الله كل الخير على الكلام الطيب ده
(أخجلتم تواضعنا)ويارب اكون عند حسن الظن.نورتنا وشرفتنا بالمرور والتعليق

Unknown يقول...

لسلام عليكم ورحمة
الله تعالى وبركاته
HERO
انت شايف كده؟
الحمد لله اتها عجبتك :)
ويارب بس اللى مبعوته لهم
يكونوا عرفوا ويسمعوا الكلام.
وتسلم للمرور والتعليق يابطل.

Unknown يقول...

السلام عليكم ورحمة
الله تعالى وبركاته
المحارب المتيم
عرفة الاسيوطى
لأ والله مش عاجبنى
وحاضر اجى واشوف عندك
ربنا عنده العون والمدد
ويقدرنا نعمل ما نستطيعه.

من غير عنـــوان يقول...

أكتر حاجة حلوة في الدنيا إن الواحد يلاقي صداقات وقلوب بتحس بيه من غير ما تعرفه

أمنياتي

Unknown يقول...

السلام عليكم ورحمة
الله تعالى وبركاته
Maxbeta3zaman
أمثال الجماعة بتوع زمان مابتخيبش الا فيما ندر(زى كترة السلام يقل المعرفة!)
وفعلا اعمل الخير لله وساعتها هو الكافل والكفيل برده اليك (مش حيروح !ماعند الله يبقى تأكد من هذا وثق فيه)
ونورتنا وشرفتنا بالمرور والتعليق.

Unknown يقول...

السلام عليكم ورحمة
الله تعالى وبركاته
استاذ/Beram El Masry
وكل سنة وحضرتك بالف خير
وينصر الاسلام والمسلمين يارب
(وحمدلله على سلامة حضرتك بقى لك
مدة مش باين لعل المانع خير ؟)

Unknown يقول...

السلام عليكم ورحمة
الله تعالى وبركاته
حاول تـفتكرى
انا مش عارفة اقول ايه من الكلام الطيب ده .جزاك الله كل الخير لكلامك .
وشرفتنا ونورتنا بالمرور والتعليق.

Unknown يقول...

السلام عليكم ورحمة
الله تعالى وبركاته
من غير عنوان
هم اصدقاء الروح ياشمهندس محمد
وعلشان نصدق كمان قول رسول الله صلى الله عليه وسلم(انما الارواح جنود الله
ما تعارف منها أأتلف وما تنافر منها اختلف)او كما قال. سبحان الله!
وتشكراتى للمرور والتعليق

مصطفى محمود يقول...

السلام عليكم ورحمة الله وبركاته

استلمت البوستة بتاعتي يا دكتورة

حاضر هاعمل الخير وأرميه في البحر :)

كل سنة وحضرتك طيبة ,,,

Unknown يقول...

السلام عليكم ورحمة
الله تعالى وبركاته
TeVa
جزاك الله خيرعلى الاستلام والقراءة
فاضل بقى اخر جزء:التنفيذ!!!
ربنا سبحانه وتعالى يوفقنا
جميعاً فيه .اللهم امين.

عمرو يقول...

يا دكتوره الجوابات و البوسته خلاص بقت موضه قديمه رغم أنى مازلت أعتز بالبريد و بأظرف الجوابات و على أيامنا كانت المراسله بالبريد من ضمن أجمل الهوايات اللى كانت بتمارس و كنت من ممارسيها و عملت بالفعل صداقات كتيره مع ناس بأعتز بيهم و بصداقتهم لليوم يعنى صداقه بدأت بهواية المراسله بالبريد و تطورت لتكون الآن صداقة العمر
دلوقتى يا سيدتى الموضوع بقى أسهل من زمان .. يعنى البريد الاٍليكترونى و رسائل الموبايل و كمان الرسائل عبر شاشات الفضائيات كل ده خلى المراسله أسهل و لكن فقدت الحميميه بتاعت البلوك نوت و الأظرف الملونه و طوابع البريد الجميله
و أسمحى لى من عندك أكلم بنات صاحبة الجلالة اللى واضح أن الكيل فاض بيهم من أشياء كتير
الصبر يا بنات الصبر
لا تيأسن و تنسحبن و تتركن الساحه فاضيه لأن ده لا يتناسب مع ما تقوموا به من مهام جليله فى خدمة الناس و المجتمع و الله المعين
تحياتى يا دكتوره و عذرا للتطويل ,,

rovy يقول...

السلام عليكم
ادعوا الرحمن ان تكونى دائما بخير و ان تظلى تكتبى جوابات التى تدل على احساسك و انسانيتك ..
اناشد معكى بنات صاحبة الجلاله بالعوده
و فتح المدونه
صديقتك التى تركتك سامحها الله و من منا كاملا فنحن بشر و من يغفر الذنوب الا الله و هل وصلت هى الى الكمال !!! فليهينا الله جميعا الى ما فيه الحق .
اما عن جوابك لام الطفل اسلام فقلبى يعتصر عليها و لكنى اصدقك القول لا اجد اى تعاطف مع المدرس الذى تعامل مع طفل صغير بمثل هذه الوحشيه التى ادت الى قتله فاذا كان خسر من عمره 6 سنوات فقد قضى على مستقبل اسره و قطع فؤاد ام ادعوا الرحمن ان يثبتها و بصبرها و لا يرينا ابدا مكروه فى حبيب
دمتى بكل خير
تحياتى

Unknown يقول...

نور حياتى
اختى العزيزة
هذا ليس وقت التبريرات
لن يمنعنى احد
هناك فتوى تجيز فى مثل هذة الايام
ان يخرج الابن دون اذن ابية
والدائن دون اذن مدينة
والعبد دون اذن ولية
الموقف ايام النبى يختلف كثيرا عن الموقف الان
لقد قمت بخطوة فعلا
وساظل كذلك
لست اخاف من دولة او حكومة او غيرها
الى متى سنظل كذلك

TIMMY !! يقول...

مش عارف عاوز أعلق بس مش لاقي حاجة أقولها ..

شكرا بجد يا دكتورة ..

و إن كنت سمحت لنفسي أظن إني أحد المُرسَل إليهم :)

جزاكِ الله خيرا ..

و الحمد لله الواحد بخير , هي تقلبات بس ..

دعواتك ..

وفاء بركات يقول...

السلام عليكم
أتمني من الله عز وجل في مطلع العام الهجرى الجديد أن يمر عليك وانت طيبه وبخير وصحه وعافيه وفرحانه بكل اللي بتحبيهم ..وربنا ينصر أخوان لينا في غزه وتستقيم الأمور والأحوال في الشرق الأوسط ونعدى الأزمات وتتحل
كل يوم بيعدى عليه بكتشف في حضرتك أشياء جميله ربنا يديمها عليك ويزيدك طاعه وتقرب لله عز وجل ويزيد رصيد محبتك في قلوب المحيطين بك
دمت

وفاء بركات يقول...

والله كتير عليه كل ده أروح من ذوقك وكرم أخلاقك فين ...يارب خليكي ليه
ونتقابل علي خير شاء الله في محبة الله ورسوله عليه الف صلاه وسلام

Unknown يقول...

السلام عليكم ورحمة
الله تعالى وبركاته
أستاذ عمرو
ابداً فيه حاجات مش حتروح عليها ابدا مهما طلعت عليها حاجات جديدة طب ليه بنشترى الجرايد للحين؟ الجوابات والجرايد بتبقى مرجع لنا فى اى وقت ناخدها معانا اما المراسلة فأنا برضة راسلت لكن اصدقاء اجانب واستمرت فترة لكن واه من لكن انت عارف الايام وانشغالاتها
أما اظرف البريد والورق المعطر وطبعا الطوابع وهواية جمعها كلها هوايات وذكريات اذكرها بمنتهى السعادة .
بضم وتى لصوت حضرتك لبنات الجلالة انهميرجعوا وربنا يقويهم ويقوى الشباب كلهم على الزمن الصعب اللى احنا فيه
تشكراتى واحتراماتى للمرور والتعيق

Unknown يقول...

السلام عليكم ورحمة
الله تعالى وبركاته
rovy
ام ياسمين
بداية اقول هدى الله الجميع للخير
وجزاكى الله خيرا على شعورك الطيب. انا أصف ما أشعر به ناحية المدرس هو صعبان عليا لا استطيع ان اوقف تعاطفى عليه فلا يمكن ان يكون وحشا هو انسان كافح اهله حتى صار هو ماهو ولكن الغضب اقول نعم الغضب هو ما اوصله لهذا.قلبى مع الجميع وعلى الجميع فى تلك الحادثة.ويارب ماتحرق قلب ام على ضناها ابدا.
ودعواتى لك بدوام الصحة
والعافية لك ولاسرتك الغالية

Unknown يقول...

السلام عليكم ورحمة
الله تعالى وبركاته
احمد بدر الدين
اللهم انصر الاسلام
والمسلمين فى كل مكان
وتمت الزيارة يافندم
وكمان قلت رايىّ فأرجو
الا يفسد اختلافنا فى
الرأى اخوتنافى الله

Unknown يقول...

السلام عليكم ورحمة
الله تعالى وبركاته
أحمد بدر الدين
رايىّ وقلته. اخاف
عليكم كلكم من
بطش الظلمة .
ادعو الله ان يسلمكم
كلكم ويوفقكم فيما
تنتّون عمله.يارب.

Unknown يقول...

السلام عليكم ورحمة
الله تعالى وبركاته
TiMmY
نعم تيمى انت احد المرسل اليهم:)
مش انا فى اخر خطاب قلت الى كل من يقرأ هذا الكلام ومتهيأللى انت قرأت الكلام ...صح؟ربنا يطمنا عليكم كلكم
ويهدي شباب المسلمين للخير ويبعد عنهم الشيطان واعوانه

Unknown يقول...

السلام عليكم ورحمة
الله تعالى وبركاته
أستاذة وفاء
أسعد الله ايامك ومتعك بالصحة والعافية وباركلك فى أسرتك واولادك
وربنا سبحانه قادر كريم ينصر كل
مظلوم فى كل مكان .اللهم امين .
بتخجلينى بكلامك والله ياأستاذة
وربنا يديم الود والصداقة
والاحترام والحب بيننا
شرفتينى ياأستاذة
ويارب اكون عند
حسن الظن.
يارب.

Unknown يقول...

السلام عليكم ورحمة
الله تعالى وبركاته
استاذة وفاء
لأ مش كتير
هذاجزء من
كثير أود قوله
لكى أن تستحقين كل خير.
وشكرا لصداقتك وكلامك .

غير معرف يقول...

can you email me: mcbratz-girl@hotmail.co.uk, i have some question wanna ask you.thanks

غير معرف يقول...

~.....................................................