الجمعة، فبراير 05، 2010

كلمة فى ودن حبيباتى وأحبابى


ودكتوررررات ودكاتيررررحبوبين
doctor Pictures, Images and Photos

حيستلموا الشغل لأول مرة
وحابه أقولهم كلمتين
يسمعوهم

animated doctor Pictures, Images and Photos
ولو عجبوهم ينفذهم
ولو ما عجبوهمش ما ينفذهمش
ولو عجبهم جزء منه وماله يعملو به
اهو كله فايدة
ومعلش لو كنتم حتشوفوا الموضوع
إنشاء وأوامر ونواهى
لكن والله ما أقصد
الأ النصح فى الله
ونبتدى الكلام
1-اشتغل بذمة وضمير واتعلم وأعتبر نفسك
Animated Man Medical Pictures, Images and Photos
لسه طالب كل حالة تشوفها روح اقرأها تانى فى الكتاب
ومش بس لحد الأمتياز ما يخلص
لألألألألألألألألألألأ
أعتبر نفسك طالب لحد ما تاخد الماجستر او الدبلوم

Animated Doctor Smiley Pictures, Images and Photos

فى مهنتنا مش كافى انك تاخد البكالوريوس
لكن لازم التخصص!
2-بص للمريض على انه قريبك اخوك ابوك جارك وأعمل
اللى يرضيك بعد كده مش قادر تعمل له حاجة على الأقل ابتسم

فى وشه بس مش ابتسامة تكلف لا ابتسامة شكر لله أن أنت فى
Animated Doc Pictures, Images and Photos
الجهة الاخرى من السريرأو المكتب او صالة الانتظار:
فاهمين قصدى
3-ماتستكبرش على عامل ولا ممرض ولا ممرضة
ممكن واحد من دول
ابنهم أوبنتهم دكاترة واساتذة كمان قى الجامعة :ليه لأ؟
وكمان حاجة ممكن الواحد منهم
من دول ماهيته وخبرته اكتر منك الف مرة
وشغلتنا مزاولة بالاساس قبل ما تكون كتاب أو كراس
(ايه ياخواتى العسل اللى انا بكتبه دا؟!)
4-حبيباتى الدكتورات خلى بالك من ضوافرك
ياريت تقصيهم بتكلم جد قصيهم زى أيام المدرسة الابتدائى
مش الثانوى لأ الابتدائى يعنى مفيش ضوافر
مش سنة الامتياز وبس
لأ على طول اعرفى انك طبيبة أولا ً
ولما ياستى تبقى رايحة فرح أو مناسبة ابقى حطى الضوافر
(المستعارة زى الرموش وحاجات تانية وش مكسوف)
ايووووووة صحيح ليه حتقصيهم؟
قصيهم رحمة بك اولا قبل ما يكون للعيان انتى حتشتغلى بحق وحقيق
يعنى حتشوفى ناس
(من كل لون ياباتتسة )
وبالتالى مهما حاولت ظوفرك
تنضفيهم حيلموا ياما ياما
doctor Pictures, Images and Photos
5-غلطة غلطتها زمان
ومش عايزاكوا تغلطوها
التكبر على الحكيمة أو الممرضة
ونصب روح العداء بينك وبينها
هى من غير حاجة ما بتحبكيش
ماتحاوليش
يبقى مفيش داعى كمان
تكرهك او تزعل منك
يبقى لو حصل ياويلك منها مش حترد عليك
وحتعّقد لك كل حاجة حاولى تكسبيها
(عارفة انه صعب بس حااااااااااااااااولى)
6-لبسك حبيبتى خلى بالك منه
بلاش الدي كولتيه الواسع بلاش البدى الضيق القصير أنتى
حتوطى على عيانين وناس منهم الكويس ومنهم الوحش
منهم الشبعان ومنهم الجعان
فاهمينى!
7-البارفان حبيبتى بالله عليكن بلاش منه
الدي اودرنت وبس
بلاش البارفان بالله عليكن
8-البالطو البسووووووووه اول ما تروحوا الشغل
انا عارفة انكم فى منتهى الشياكة
وعايزين تبينوا الحتة الآيافة :)
واللبس الجميل والشياكة والاناقة لكن معلش
البسوا

البالطو
اول ما تروحوا الشغل
مش دا البالطو اللى نفسنا كنا نلبسه من زماااااااااااااااااان
اهى جت الفرصة
وخلوا بالكم منه خلوه نضيف دايما
بتصرفوا كتير اشتروا بفلوس كسوة الصيف
السنة دى بلاطى بيضا ايوة بالفلوس اشتروا بيها بلاطى بيضا جديدة
متخليش الحكيمة بلطيها اجدد واشيك
و(ابيض)
من بلطيكى لانها بتغسه بالبوتاس وتغليه وتزهره بالزهــرة
وانتِ بتعملى كدهـ؟
لأ طبعاً
كمان لانها عارفة الراجل بتاع المخزن وكل شوية يديها واحد جديد
وانتى البالطو بتاعك هو بتاع سنة اولى بالكلية
9-الشوز بردون الجزم
(ايه حكايتها هى كمان؟دا اكيد انتو بتسألوا)
بلاش الكعب والتيك تيك تيك طول ما انتى ماشية
فى الممرات والاوض بتاعة المستشفى
وبلاش بردون كمان
اللبان!
(سوووووو باد سووووووو باد!)
Animated Doc Pictures, Images and Photos
10-اول ماهية بأذن الله حتقبضيها اشترى منها حاجة حلوة جاتوة تورتة
ربع كيلو بسبوسة أى حاجة المهم انك تشترى اى شىء للبيت عندك
وتدخلى عليهم وفى ايدك الحاجة الحلوة دى
اينعم بسيطة لكن حتدخل فرحة
ادددددددددددددددددددددد
كدددددددددددددددددة
عليهم
أن الأمورة الصغنونة بتاعتهم
كبرت واشتغلت
وبتجيب
ربع كيلو بسبوسة
وهى راجعة من الشغل
أنا لو قعدت اكتب مش حاخلص
لكن أنا حأترك الموضوع مفتوح واللى
عايز يزود حاجة او فيه سلوك أو مظهر فى
الأطباء أو الطبيبات الجداد
مش بيعجبه
يتفضل يقووووووووول
وكلنا
ودان صاغية
(على رأى تيمى)

هناك 82 تعليقًا:

norahaty يقول...

الحمد لله رب
العالميـــن
والصلاة والسلام
على خاتم المرسلين
سيدنا محمد وآلـه
وصحبه ومن أهتــدى
بهداهـ الى يوم الدين.
لو أتأخرت فى
الرد فسامحونى
يمكن أسافر يومين
أقضى مصلحة. المدونة
بتاعتكم والبيت بيتكم.

mohamed ghalia يقول...

حاضر يادكتور سمعا وطاعة ههههههههه

romansy يقول...

ايوه كده يا دكتور انصحى الدكاتره اللى بيقبضوا اد كده
وبعدين بقى الضمير والذمه فى الشغل مطلوبه فى كل المجالات
عاوزين نتحسن اكتر واكتر

مصعب صلاح يقول...

السلام عليكم
بما اني مش دكتور ول ناوي عليها
يبقى الموضوع مش تبعي

بنجاواتى يقول...

جزاكى الله خيرا يا دكتورة

ربنا ييسر ويجعلنا سبب فى تخفيف الام الناس

ممكن كمان نضيف للموضوع- بعد اذن حضرتك -ان لو فى عد كبير من الدكاترة وواقفين يتعلموا حاجة بلاش يا ريت البنات يتكتلوا قدام المصدر ويبقى الشباب واقفين ورا ولا شايفين ولا سامعين يعنى يبقى التعامل برحمة شوية ولا عشان الشباب مش هيعرفوا يزاحموهم ياخدوا راحتهم بقى؟؟

تحياتى

غير معرف يقول...

السلام عليكم
- متهيألي كل مهنة مش كفاية فيهاالبكالوريوس أو الماجيستير أو حتي ال بي اتش دي و خلاص. كل يوم في الشغل و بره الشغل بتقابلنا حاجات تخلينا نرجع نراجع و نجمع معلومات جديدة.
- كمان علشان خاطري لو راجل قالك انه شبعان نصيحة مني ماتصدقهووووش...
فمالوش لازمة البادي الضيق مع العاينين و مع غير العاينين.
- اقضي المصلحة و تيجي بالسلامة يا ست الدكتورة.
حازم

TIMMY !! يقول...

هههههههه
فكرتيني بأختي ,
ربنا يسهل لها و تكون كملت سنة و تقدر تنقل المحافظة بتاعتنا بدل ما هي متطوحة في محافظة تانية ,
مع إنها جايبة ج ج , بس الوزير المتخلف اللي جه على سنتها و خلى التوزيع على مستوى مصر مش على مستوى المحافظات ,
ربنا يشحططله ولاده زي ما هو مشحطط ولاد الناس كده ,

الجدير بالذكر إن جنابه من " حَدانا" من المحافظة !!

موناليزا يقول...

تسلمى ياحبيبتى على نصايحك دى
وتقريبا كل الوظائف بتقتضى كده يعنى انا فاكرة ان كان عندنا درس فى احدى المواد على ماترتديه (معلمة رياض الأطفال) والغالبية زى ما انتى كاتبه بالظبط

شمس النهار يقول...

ماشاء الله عليكي يادكتورة

صحيح الدين النصيحة

من وجهة نظري كامريضة مش طبيبة

لو الدكتورة اللي بتعالجني فيها وبتعمل كل اللي قلتية ده
بجد هخف من غير علاج


احترام اداب الحياة مع المهنة واجب


سلامي

Tamer Nabil يقول...

عينى ياعينى على النصايح

بجد تسلم ايدك

ياريت الدكاترة تعمل بيها

وكل موظف فى مكانة يراعى ربنا فى شغلة

ربنا يوفقك ويكرمك


مع خالص تحياتى

لولا وزهراء يقول...

ارق واغلى دكتوره نورا
-*-*-*-*-*-*-*-**-*-
صباح الفل
تسلم الانامل اللى كتبت النصايح دى ربنا يجعها فى ميزان حسناتك وياريت كل الدكاتره يبقوا كده بجد
ياريت كل دكتور يعرف انه بيقدم رساله جميله اوى وان جزائه عند ربنا كبيييييييييييييييييير
ربنا يوفقك ويسعدك ويحفظك

زهراء

د. ياسر عمر عبد الفتاح يقول...

الله يكون في عونهم
الحمد لله إمي مكتبتش طب في التنسيق رغم إن مجموعي كان يجيب
الحمد لله على نعمة صيدلة ..

دفعتي هيه اللي هتمسك من بداية شهر مارس إن شاء الله
وبجيبهم عندي الصيدلية أدربهم على الأدوية
علشان بعد كده يبعتولي الروشتات :)

صيدلي بقى :)

لا بجد نصايح حلوة
وياريت تتاخد بعين الإعتبار

القدر و انا يقول...

صباح الجمال يا دكتور
والله كلامك كله فى موضعه تمام
واللى يبدأ صح فى اى مجال ينجح اسرع ويكسب احترام النفس واحترام المحيطين
تحياتى

z!zOoOo يقول...

السلام عليكم

ازيك يا دكتوره

والله مدونتك ليها وحشه

وشكرا علي سؤالك الغالي في غيابي

اما بالنوسبه للبوست

حلوه بالنوسبه ديه

D:

بصراحه مفيش غير رفع القبعات

بوست هايل ورائع جدا

والاجمل النصايح الي فيه للمستجدين

من حضرة الصول نورا

D:

اوعي تزعلي انا بهزر يعني زي المستجدين في الجيش بييجي الصول يعلمهم كل حاجه

بس بصراحه نصايح روعه بجد

احب اضيف اضافه بسيطه

ياريت اي دكتور جديد سواء ولد او بنت مايستكبروش علي المرضي يعاملوهم كإنهم أقل منهم

والزم يعاملوهم بالقلب الرحيم

يعني لازم قبل ما يشتغلوا يكون عندهم النيه يتصفوا بإسم الله الرحيم وإخلاص النيه قبل البدء في العمل

والاهم مايستهونش بالمرضي ويشوفوا الواحد بيموت ويقولوا لا ده حالته مش خطيره قوي في الاخطر منها يهملوه

ويستهونوا بألام الناس


أتمني فعلا الابتسامه ما تفارقش وشهم
حتي رغم القرف والضغط الي بيلاقوه وبيشوفوه

واهم نقطه إن الي هيقرا الكلام ياريت يراعي ضميره ويعرف إن ربنا سخره لخدمه الناس

ويفتكر دايما إن ربنا شايفه وشايف بيعامل خلقه إزاي

وأخيرا احب اشكرك قوي يا دكتوره

علي كلماتك الجميله الغاليه

دمتي لنا أختا عزيزه

ولا حرمنا الله من وجودك وزيارتك

ربنا يوفقك ويكرمك ويثوبك بالخير دائما

تحياتي

سمع هوص (Abo 3li) يقول...

انا فعلا عندي نصيحة صغيرة لكل الدكاترة الحلوين.. ال لسه متخرجين والقدام كمان...
ويريت محدش يزعل مني ولا يفهمني غلط.. وخصوصا انتي يا دكتورة نور...

"اتقو الله في المرضي.. وبلاش (فتي) ... من قال لا أدري فقد أفتي"

اصل امبارح والدة واحد صاحبي تعبت.. وراحت لدكتور كبير. منغير ذكر اسمه...

وطبعا سيادته ميقدرش يقول مش عارف المشكلة ايه...
فراح كاتب علي خمس ست ادوية كده..
المهم قاعدين بليل انا واصحابي .. ومنهم صديق صيدلي.. ف صاحبي الولدته كانت تعبانة سأله علي الادوية ال كتبها الدكتور الكبير..

واكتشف انها كوكتيل من المهدئات العصبية والنفسية.. وادوية الحموضة.. والالتهابات.. الخ الخ ... وكذا حاجة ملهومش دعوة ببعض...

يعني تقريبا الدكتور استسهل.. وراح كاتب كل الادوية لكل الاحتمالات ال سيدته شاكك فيها..
رغم انها ست ((كبيرة)) في السن... ده غير الامراض ال عندها اصلا...



تحياتي ليكي يا نورا

تركي الغامدي يقول...

عشان كدا الدكتور إللي بيعرف ماله وماعليه يوفق بإذن الله تعالى متى أخلص النية وجعل من شخصه أقرب إنسان للمريض قبل أن يكون التطبيب مجرد مهنة بياخذ عليها أجر وهو يستحقه متى استعان بالله تعالى واستفاد من تجاربه وتجارب الآخرين وعدم التوقف عن النهل من الجديد في مجاله .
صدقاً دكتوره أنت تضعين خلاصة تجاربك في مجال عملك أمام الأطباء والطبيبات الجدد , بوركت وووفقت دوماً .

د/عرفه يقول...

الف شكر يا دكتورة

الموضوع ده موجه لىّ ولزمايلى فى الدفعة طبعا


علشام كده ان شاء الله هحط لينك الموضوع على جروب الدفعة علشان الجميع يستفاد منه ان شاء الله


وشكرا على النصايح دى
وكمان يا دكتورة علاقة الدكاترة مع بعضهم بصراحة انا بشوف حاجات عجيبة من تريقة وشتيمة وسخرية ويمكن قدام المريض كمان




وربنا ييسرلنا الخير دايما ان شاء الله

نـــــــــــــور يقول...

واحنا ايه يعنى فى البلد دى؟
مفيش حد يقولنا بؤين حلوين زى دول
لا يادكتوره ماينفعش كده
فى تفرقه عنسريه فى البلد
ولا عشان الدكاتره هيستلموا فى شهر 3 واحنا مش لاقيين حد يعبر تفوقنا يبقى هما يتنصحوا واحنا لا

يعنى ياربى لا بخت فى الشغل ولا بخت فى النصايح؟
انا لازم اهج من البلد دى
بس
هه

abo-omar elmasry يقول...

عزيزتى : ميرسى أوى على النصايح الغالية بس للأسف جتلى متأخرة شوية .. المهم ميرسى ليكى النصيحة وبوستك دمه خفيف وجميل. وفقك الله

كلمات من نور يقول...

ربي يبارك فيكي يا نورهاتي ويجعلك دايما اخت ناصحة بكل خبرة اكتسبتيها ...فالدين النصيحة وربي يوفقكم جميعالما يحب ويرضى

أبو العريف يقول...

ازيك يا دكتوره

نصايح ف الجوووووووون

الاقيش عندك شويه للمهندسين

اللي شغالين ف السعوديه وقربوا يرجعوا مصر

واسمهم محمد علي بالمره

حاول تفتكرنى يقول...

متخليش الحكيمة بلطيها اجدد واشيك
و(ابيض)

كدة حضرتك بتمسحي النصيحة التي تسبقها بخصوص الحكيمة ، يعني نعتبر ده اسفين ؟

طبعا لا استطيع التعليق على موضوعك لأنه ليس مجالي ، لكن نحييك على النصائح فى حد ذاتها فإعطاءلمن فى حاجة إليها

دائما اتي أمنياتي فى غلق التعليقات عكسية

تحياتي

أحمد شريف يقول...

السلام عليكم
بوركتِ يا دكتور نور
وأضيفي لها نصائح أخرى منها الحفاظ على المعدات والأجهزة والحرص لهذا وبشدة ليس لأنها عهدة لكن لأنها تخدم أُناس ومرضى وتُيسر العمل
======

قلم رصاص يقول...

حاضر يادكتور
رغم اني مش طبيب
بس حاضر برضه
هههههههههههههههه

بجد نصائح رائعه
جزاكم الله عن الجميع كل خير

في امان الله

Dr-Ibrahim يقول...

شكرا يا طبيبة :)

norahaty يقول...

السلام عليكم ورحمة
الله تعالى وبركــاته
السفر حيكون النهاردة
باذن الله الساعة 9صباحاً
الحق أرد على كــام تعليق
وربنا ما يحرمنى منكم ابداً
يااااااااااااااااااااااااااااااارب

norahaty يقول...

mohamed ghalia
ربنا يخليك يارب.
ياريت كل الناس
بيسمعوا الــكلام
على طول زيك يامحمد

norahaty يقول...

romansy
مضبوط كلامك
يارومنسى لو
عملنا كده حالنا
حينصلح فى كل شىء.

norahaty يقول...

مصعب صلاح
وعليكم السلام ورحمة
الله تعالى وبركــــاته
وبركة أننا أطمنا عليك
يامصعب وعامـة العمل بذمة
مطلوب فى كل شىء:مضبوط كلامى؟

norahaty يقول...

بنجاواتى
وجزاك احسن الجزاء
ياطبيب أهم على العموم
سامعين الكلام يارب يعملوا
بس الدنيا أتطورت والله على
أيامى الشباب هو اللى كان
بيتكتل على الدكتور وما كنا
بنعرف نشوف حاجة الأ بالعافية:(

norahaty يقول...

حــازم
مضبوط كلامك
بس فى مهنتا اكثر
شوية لاية؟الهندسة
بيتخرج مهندس بور
أو معمارى أو طيران
مثلاً لكن أحنا !!!!؟
اول ما تقول لاى حد أنك
دكتور بيسألك :دكتور ايه
حضررررررررررررررررررررررتك؟:(

norahaty يقول...

TIMMY !!
يارب ياتيمى
ربنا يهيىء لها
ولك وللناس كلها
كل خير وبلاش كلمة
(المتخلف)دى بكرههاااااا
لكن ياتيمى واخدلى بالك أنا
حافظت على حقوق ابداعك الفكـرى
وذكرت المصدر بتاع(كلنا ودان صاغية)
يوفقك ربنا انت وكل الشباب يارب.

norahaty يقول...

موناليزا
الله!يعنى أفكارى
زى بتاعة المؤلفين
والمدرسين :حاجة أتشرف بها:)

norahaty يقول...

شموســــــة
البرنسيســـة
دا كلامك وذوقك
هو اللى بيخفف أى
ألم أو جرح ياشموسة

norahaty يقول...

Tamer Nabil
ياريت مش بس
الأطباء لكن كل
موظف أو عامل كان
حالنا بقى غير الحال.

norahaty يقول...

لولا وزهراء
صباح الورد كله
يازهراء تسلملى يارب
على كلامك الحلو دا وربنا
يهدى الجميع للخير وسلامنا
لـلولا الف سلام وتحية.

norahaty يقول...

د.ياسر عمر عبد الفتاح
تعرف أنى كان نفسى
ادخل الصيدلة لكن
طلبات الوالد الله
يرحمه وطلبات الوالد
أوامر زى ما أنت عارف
مش حأوصيك تدرب الصيادلة
كوووووووووووووووووووووووووويس:)

norahaty يقول...

القدر وأنـا
صباح الفل يافندم
كلام عن خبرة والله
لو نعمل بــه
حنكسب اوى.

norahaty يقول...

z!zOoOo
وعليكم السلام ورحمة
الله تعالى وبركـــاته
الحمد لله اننا أطمئننا
عليك يازيزووو غايب بقى
لك مدة.كل اللى تقوله حلو
يازيزووو انت عارف ويارب الكل
يسمع كلامك وينفذه يكفى شكراً لكل
عامل عملك خدمة او كلمة لطيفة لمريض
عمل الخير مش صعب ابداً.

norahaty يقول...

سمع هوص (Abo 3li)
للأسف اللى حكيت عنه
منه كتير والله ياأبو على
مش أطباء جداد بس لكن خبرة
ساعات بيكتبوا كل شىء.ربنا
يهديهم يارب.

norahaty يقول...

تركى الغامدى
تركي الغامدي
مضبوط كلامك يااستاذ
تركى وعز من قـــــائل
(إن الله لا يضيع أجر من أحسن عملاً)

norahaty يقول...

د/عرفه
دا أنا اللى بشكرك
لأهتمامك بكلامى وكمان
أهتمامك بزملائك ورغبتك
فى أفادتهم ومعاك فى أهمية
تعامل الزملاء مع بعضهم
وطريقة نداء بعضهم لبعض
أو حتى تسمية بعضهم البعض
(أنتى يا.....)والله ما قادرة
اقولها طب ازاى صحبتى أو زميلتى
وأقولها يا.......؟!حاجة غريبة!

norahaty يقول...

نــــــور
يانورررررررر
يانوووووووووور
ياباشمهندسة متعمليش
أنتى وأبو العريف حلف
ضدى اشطرى انتى وخلى ابو
العريف وأهو باشمهندس بقى له
مدة وخبرة يعمل تدوينة باللى هو
شايفة عايز تصليح أو أصلاح بين
شبببببببببببباب الباشمهندسين

norahaty يقول...

abo-omar elmasry
ليه متأخرة؟هل التبسم
فى وجه مريض أو حسن
معاملته تأخر.
ومتشكرة لكلامك

norahaty يقول...

كلمات من نور
الله يخليك ياأم الابناء
وربنا يباركلك فى عمرك
وصحتك واولادك وبيتك.

norahaty يقول...

أبو العريف
دا أنت اللى
تُسال فى هذا
يابـاشمهندس
وباقترح عليك
تعمل تدوينة
بشأنه ايه اللى
تنصح به زملائك سواء
المسافرين أو اللى
عايزين يسافروا
للعمل بالسعودية
أو فى أى مكان أخر؟
ايه رايك ياأبو العريف
العارف كل حاجة واسمهم محمد:)

norahaty يقول...

حــاول تفتكرنى
ليه بس يافندم؟
مفيش مسح ولا تنضيف
انا كل همى تبقى الطبيبة
فى احسن صورة وماتعتمد على
(اناااااا دكتوررررررررررة!)
مين قدى هنا عايزاها قلبا وقالبا:)

norahaty يقول...

أحمد الشريف
مضبوط كلامك لو
كل واحد فينا عامل
ممتلكات الدولة وكأنها
خاصة به كانت بلدنا بقت
حاجة تانية .

norahaty يقول...

قلم رصــاص
يحضر الخير ياقلم دهب
يارب ياسلام لو كل
المحامين كانوا امراء
وبيسمعوا الكلام زيك
كانت المحاكم قفلت:)
نورتنى ياقلم دهب 24.

norahaty يقول...

Dr-Ibrahim
الشكر لله يادكتور
وعن قريب تعمل بها
وتعمل احسن منها كمان:)

م/محمود فوزى يقول...

السلام عليكم
ازيك يادكتوره نورا
جزاكم الله خيرا على الموضوع الرائع
وانا فعلا اعتبره نصايح للناس كلها
مش للدكاتره بس
فمثلا التواضع مع الناس والمظهر الطيب وقص الاظافر والاحتياط من نظرات الناس
وغيرها
بصراحه نصائح رائعه جدا
فيها طبعا نقاط ممتازه
منها الاستمرار فى التعلم ومتابعه الجديد لانه فعلا العلم بيتطور كل شويه
اشكرك مره تانيه
ويارب الناس تنفذ مش الدكاتره بس
ربنا يكرمك دايما ويسعدك

نهــــــــــار يقول...

السلام عليكم...
إيه العسل إلي بتكتبيه ده...
جزيتِ خيرا وجعله الله في ميزان حسناتك...
...
بجد التيك تيك دي بتفقع مرارتي ...
واللبان ...
.....
في أمان الله

قبلاوى يقول...

شكرا يا دكتوره

بس متنسيش تكررى البوست ده السنه الجيه زى دلوقتى عشاننا ان شاء الله

لولا وزهراء يقول...

" ازي حضرتك يادكتورة بالرغم من اني مش دكتورة لكن والله استفدت كتيير جداً ربنا يجعله في ميزان حسناتك
بس ليا سؤال هي ليه الحكيمة بتكرة الدكتورة ؟ اول مرة اعرفها
ثانياً دي اكتر حكمة ونصيحة عجبتني قوووووووووي

10-اول ماهية بأذن الله حتقبضيها اشترى منها حاجة حلوة جاتوة تورتة
ربع كيلو بسبوسة أى حاجة المهم انك تشترى اى شىء للبيت عندك

وتدخلى عليهم وفى ايدك الحاجة الحلوة دى

اينعم بسيطة لكن حتدخل فرحة
ادددددددددددددددددددددد

كدددددددددددددددددة
عليهم
أن الأمورة الصغنونة بتاعتهم

كبرت واشتغلت
وبتجيب
ربع كيلو بسبوسة
وهى راجعة من الشغل


ربنا يعزك ويجعله في ميزان حسناتك يا اجمل دكتورة انسانة ):):

لـــولا

norahaty يقول...

م-محمود فوزى
وعليكم السلام ورحمة
الله تعالى وبــركاته
يارب ياباشمهندس يهدى
الناس كلها لما فيه خير
العباد والبلاد وجزاك
خيراً على دعواتك الجميلة.

norahaty يقول...

نهــــار
وعليكم السلام ورحمة
الله تعالى وبركـاته
انتِ زيىّ ما باحبيش
التيك تيك ولا اللبان
ممتاز يبقى انتِ حبيبتى
لأنهم فعلاً مظهر مش كويس
ابداً.

norahaty يقول...

قبلاوى
العفو يافندم
الاسهل يادكتور
اعمل انت كوبى
وخليها عندك
ايه رأيك؟:)

norahaty يقول...

لولا وزهـرة
ود مفقود فى الجينات
ما تعرفيش ليه؟بالضبط
زى القط والفار ما بيكرهوا
بعض وخصوصاً الشابات من المهنتين
بمعنى الطبيبات والممرضات يمكن لما
بنكبر كلنا بنتغير لكن واحنا شباب
عدووووووووووووووووووووووووووك:)
نورتينى يالولا ويارب صحة الوالدة
تكون أحسن دلوقتى.

د/ أحمد لاشين يقول...

ربنا يكرمك يادكتورتنا الفاضلة
وما اعظم واجمل ان يسدي الانسان النصح لغيره
خاصة اذا كان في امس الحاجة اليه
فاختيار التوقيت مهم جدا ولو كل الناس عملوا زي حضرتك كده اعتقد الدنيا هتنور من تاني ان شاء الله
اتمني ان تتحفينا دائما بهذه الفوائد
سعدنا واستفدنا وجزاكم الله خيرا

حصان المرجيحة يقول...

مع اني مش دكتور بس بجد شوية نصايح مالهمش حل
يا ريت حد ينصحني كده في المحاسبة هههههه
تسلمي

عندما يرحل السنونو يقول...

hi
these are very nice advises for your doctors but..
not to your medical team !

medical team should be collaborate doctor and nurse side to side and other members of team
because ..

1-the patient first
2-doctor has domain because he have knowledge and have the right to write medication but the staff nurse has knowledge although that is less your but its enough to give care for patients
3- the nurse has his own ability for communication not like doctor so he can get his form because he have good relationship with other persons in the hospital not other reasons
4- we are muslims .. so we must respect us .. doctors nurse or worker

staff nurse\saleh khader

أحــوال الهـوي يقول...

السلام عليكم
نصايح بمليون جنيه
و خصوصا العلاقه مع الحكيمة اللي ممكن تحول حياة الطبيب الجديد لجنه او نار
و ياريت الناس تقرا و تستفيد و تطبق ده علي اي وظيفه مش الدكترة بس

عموما الاخلاص في النصيحه بتخللي الناس تصدق و تنفذ
وانا حاسس بكل الصدق في كلامك

و من المهن التي تحتاج التعلم اليومي بلا كلل هي الطب لان الغلطه فيها تساوي حياة انسان

ربنا يبارك لنا فيكي

تحياتي

صفــــــاء يقول...

هو صحيح الواحد مش دكتور
ومش هيبقى
بس برضه استمتعت جدا بأسلوبك وطريقتك فى الكلام
ولو عايزة تعرفى ايه اللى مش بيعجبنى فى الدكاترة ... يبقى التطنيش
تلاقى الواحد او الواحدة من دول لسه يعنى مبقاش مجدى يعقوب لكن تكلميه اما ما يردوش او لو ردو يبقى بسرعه وبمصطلحات مش مفهومه ... فيه ناس منهم مش بتاخد بالها أن اللى قدامه دة قلقان على امه او ابوة او ابنه ومفيش قدامه حد يطمنه ويبل ريقه غير الدكتور ... بس الحق يتقال الدكاترة الكبار تلاقى فيهم تواضع رهيييب ويفضل يسمعك وهو مبتسم ويكلمك بطريقه مفهومه وبسيطه
طولت انت عارفه ... طب خلاص همشى اهو
تحياتى لك

الشاعر الفنان أحمد فتحى فؤاد يقول...

بوست رائع
لو كل طبيب عمل زى ما بتقولى كده ... ماحدش هيتعب تانى
أقولك حكاية غريبة ... ؟ أوكى هاقول
حكاية بجد و الله ... وتحد صاحبى أبوه عمل حادثة و هو فى طريقه إلى الصعيد دخلوه بسرعة مستشفى سوهاج الجامعى ... أسف إنى باقول مستشفى لأنى كنت فى مصر وقتها و رحت أزوره .. لقيت مزبلة ... أسف فى التعبير ... بس فعلا مزبلة ... حتى الطبيب المسئول لما صاحبى قالله خللى الوالد يبات الليلة على السرير اللى لقيناه بالعافية و بالرشوة فى الطوارىء لحد ما ننقله القاهرة فى الصباح ... بدون أى رحمة و لا أخلاق و لا دين قالله هو ده فندق ....؟ هاهاهاها و قاله إما بالإكراه يدخل العمليات و طبعا مستشفى بالسوء ده ما ينفعش يعمل فيه حتى اللوز .. و إما يطلع حالا ....و فعلا طلعناه و سفرناه القاهرة فى الفجر
و حسبى الله و نعم الوكيل

خلصت الحدودتة ... إيه رأيك ؟

دمتى بخير و ربنا يجازيك خير عن كل ما تفعليه للمرضى و المحتاجين
شكرا لك

حفيدة عرابى يقول...

النهارده أنا أجازة
ومعملتش حاجةخالص فى البيت
ليه طيب ؟
لانى قضيت الصباح بأكمله
بقرأ مدونتك
الجديد شوية والقديم شوية لغاية ماخلصتها تقريبا
استفدت كتير
واستمتعت كتير
ودمعت وضحكت كتير
وحاجات كتير كنت عايزة أكلمك عنها
وحاجات كتير حسيت ولى الشرف
انى شبهك قوى فيها
بس فى الاخر قررت أقول لك حاجة مهمة
أنا بحبك
مش الرسول عليه الصلاة والسلام أمرنا نخبر من نحبه
أنا بحبك فى الله
يمكن قبل كده
كنت شايفاكى عسولة ولذيذة
لكن بعد القراءة بحبك
لله فى لله كده بدون أى غرض :)
ممكن تساعدينى فى البيت اللى مشقلب من الصبح بسببك:)

محمد الجرايحى يقول...

الأخت الفاضلة: د/ نور
السلام عليكم ورحمة الله وبركاته
نصائح طيبة ولعلها تجد آذاناً صاغية
بارك الله فيك واعزك
أخوك
محمد

م/ محمد صالح يقول...

السلام عليكم ورحمة الله
دى يمكن اول زيارة للمدونة الرائعة دى ويشرفنى جدا دعوتك للمشاركة بحمله " اسمها
فكرة من كل مصرى من أجل مصر" ياريت تشاركينى فيها وكمان تنشريها انا نفسى بجد بلدنا تبقى أحسن بينا وبأفكرنا كلنا تفاصيل الموضوع موجودة فى البوست الجديد يا ريت تقرأيها

واحد من العمال يقول...

السلام عليكم

أيوه يادكتوره لازم تراكم الخبرات ينتقل من الخبراء الى الدكاتره المستجدين
بس ياريت تفكريهم كمان أن لا ينسوا فى المستقبل فضل المرضى عليهم
وأننا محتاجين للدكتور الأنسان وليس الدكتور الجزار

ودمتِ بخير حال

norahaty يقول...

د/أحمد لاشيـن
ويكرمنا جميعاً يارب
ويهدينا ويصلح شأننا
وشأن أمتنا وبلدنـــا.

norahaty يقول...

حصـان المرجيحة
الف شكر يافندم
وقالـــولك ايه:
ابدأ بنفسك:)بمعنى
قول انت اللى ممكن
تنصح به غيرك فى دنيا
المحاسبة والعمل وخصوصا
للى بيبدأوا جديد :ايه رأيك؟

norahaty يقول...

عندما يرحل السنونو
بيقولولك إذا صلح شأن
الراعى صلح شأن الرعية
وبالتالى لو صلح شأن الاطباء
بينهم وبين بعضهم سينصلح حالهم
مع مرضاهم مع العلم بأن اول
كلمة قولتها ايه؟أشتغل بذمة
وضمير وبص لكل مريض أنه قريبك
اخوك ابوك جارك يعنى لم أنس
مرضاى:ازاى أنساهم بس؟:)

norahaty يقول...

أحـــوال الهوى
والهوى أحوال
جزاك الله
خيراً وزى
ما بتقول
مهنتنا لها
خصوصية شديدة
لان الغلطة فيها
تساوى حياة إنسان.

norahaty يقول...

صفــاء
شكراً لكلامك
وصدقينى عدم الالتزام
أو(التطنيش)بيضايقنى
أنا كمان كزميــلة له
مفروض فيه شغل أو مواعيد
يجى فيها أو يعملها تلاقيه
(ضاربها طناش)طب والشغل والناس
مين يخلصهم؟طبعاً الموجود!لازم يشتغل
ولو أضعاف ما هو مطلوب منه.

norahaty يقول...

الشاعر الفنان
أحمد فتحى فؤاد
بيكسفونا الجماعة
دول للأسف وبيشوهوا
صورتنا سواء هنا
او فى الخارج.ربنا
يصلح حالنا وحالهم.

norahaty يقول...

حفيدة عرابى
لو تعرفى كلامك
أسعدنى قد أيه؟
أن يحبك أنسان من
على البعد ويقول لك
الكلام الحلو ده دون
مصلحة بينكم الأ الحب
فى الله:جزاكِ الله خيرا
وأبعد عنك شياطين
الأنس والجن وأصلح
لك شأنك كـــــــله.

norahaty يقول...

محمد الجرايحـى
من بعض ما عندكم
ياأستاذ محمد ما
نحن الأ تلاميذك.

norahaty يقول...

م/ محمد صالح
وعليكم السلام ورحمة
الله تعالى وبركاتــــه
شكراً لكلامك الجميل وبأذن
الله لمّا ارجع من الشغل أشوف
الحملة والمدونة المقصودة:حاضر.

norahaty يقول...

واحد من العمــال
وعليكم السلام ورحمة
الله تعالى وبركـاته
محتاجين للأنسان أولاً فى كل
مهنة والله مش بس فى الطب.

لولا وزهراء يقول...

norahaty يقول...
لولا وزهـرة
ود مفقود فى الجينات
ما تعرفيش ليه؟بالضبط
زى القط والفار ما بيكرهوا
بعض وخصوصاً الشابات من المهنتين
بمعنى الطبيبات والممرضات يمكن لما
بنكبر كلنا بنتغير لكن واحنا شباب
عدووووووووووووووووووووووووووك:)
نورتينى يالولا ويارب صحة الوالدة
تكون أحسن دلوقتى.

08 فبراير, 2010 02:23 ص

الحمد لله يادكتورة في تحسن بفضل من الله دعواتك ياقمراية يا اجمل دكتورة بنوتاية بنبوناية

norahaty يقول...

لولا وزهـرة
الحمد لله رب العالمين
ويارب فى صحة وسعادة
وربنا ما يحرمك منها
ابداً يارب يالولا
نورتينى وأسعدتينى.

maxmannour2 يقول...

ولو انى موش دكتور وأيضا موش حديث لكنى فتحت ودنى ومليتها بالكلام العاقل المتزن اللى قرأته هنا ...اننى ارى مثلا دكتور مجدى يعقوب وهو يقدم خدماته الجليله فى تواضع جم وعناية بالمريض لم اجد لها مثيلا وكيف انه يعكس روحه الهادئة المعطاءه على كل من حوله من فريق عمل فيصبغ المكان كله بروح انسانيه غاية فى الرقة والحزم وهو يفعل ذلك دون اى معرفة مسبقه بالمرضى ولا محسوبيه لديه..هو مثال ياليت كل من يمتهن هذه المهنة ان يكون لديه بعض مما يملك هذا الطبيب العظيم من خلق وعلم وتواضع

norahaty يقول...

maxmannour2
الحقيقة لم يسعدنى الحظ بلقاء
الدكتور مجدى يعقوب ولكنى ارى واسمع
الجميع بثنون على سمو اخلاقه وعلمه الغزير