الأربعاء، أكتوبر 21، 2009

...........سيدة القطار........

فيلم قديم
لكنه جميل
احبه كتير
لاجل اغنية
واحدة بس فيه
أحبها
واحب سماعها



::::::::::::::::::::::::::::::::
الملخص بس طويل شوية وكمان

على كيفى : محرف
اى به تحريف
وبردون شوية تخرييييف
ونبتدى الكلام
زكية(ليلى مراد) مطربة مشهورة جداً

(واخدين بالكم زكية مش نانسى ولا هيفا)
ومتجوزة من رجل
(يحيى شاهين)
بعيد عن السامعين
قمارتى خسران وفسدان
على رأى ستى الحاجة زمان.
المهم عمنا الشاطر لعب فى ليلة من ذات الليالى السودة عليه بفلوس العهدة
وطبعا علشان يبقى فيه عقدة خسرها على داير نكلة
يعنى بدد العهدة
اسم الله عليه.
يافرحة أهله بيه!
فى ذات الوقت تسافر الزوجة المطربة المكافحة
ياحبة عين امها لاجل ما تغنى فى حفلة
ماهو زمان كانت المطربة بتغنى ..
اه صدقونى كانت بتغنى مش بترقص ولا بتعمل
(حاجات تانية)
لأمغنية وبتغنى شفت ازاى؟
اهى مسكينة ياختى تجيب لقمتها ولقمة بنتها
اصل زمان المطربات ماكانوش بيقبضوا بالدولارات
ولا فيه معجبين سريين بيهادوا بالسوليتيرات
زى ما قريت فى احدى المجلات
وعلى لسان المغنية نفسها
مش اوشاعات ولا شععععععاعات
ولا افتراءات
المهم خلينا فى زكية زكازيكو زكزوكا
ينقلب القطر اللى ركباه زى عوايده طبعا وربنا ما يقطع للقطر عادة
وما أسودها دى عادة وإعتيادة
والكل يفتكر ان الست زكية
المغنواتية
ماتت.
طبعا فرصة وجت للاستاذ المتعوس
قصدى جوزها المحروس
وفعلا يصرف التأمين على الحياة
اللى كانت عملاه..
لكن الندل عرف انها لسه عايشة
وزى القطط بسبع ارواح
شيطانه طبعاً فكر بدل منه
واوحى له بفكرهـ
مشيطنه زيه.
قام قوام مفكر ومدبر
وهوبا على الصعيد يروح
قبل ما الخبر ريحته تفوح
ويطلب منها ان تفضل مختفية
حتى يصرف النقدية
وحلّنا بقى لما يكتشفوا الموضوع.
توافق الزوجة المضحية بنفسها
أنقاذاً له
(ياحبة قلبى ياأووووختتتتتتتتى )
وتعمل زكية (المضحية)خدامة عند بنتها باسم زكية !!
دون ان تعرف انها امها
لكن ياسبحان الله الغريزة غلابة يااولاد
البنت تحبها مثل امها
اللى اتحرمت منها !
و تمر السنين وتكبر البنت
وتقوم بالدور ليلى مراد برضه توفيراً للمصاريف
وتشتغل فى
شركة من الشركات مش مطربة ولا ممثلة
(بردون عبيطة)
اما الاب فيواصل لعب القمار (مش راضى يبطل!)
يعجب ابن صاحب الشركة ببنت زكية
ياسبحان الله من دون سائر الموظفات
ويفكر بالزو اج منها
وبعيد عنكم يارب وعن الناس المحترمة كلهم
فى احدى البرتيتات اى القعدات :
انا بسمعهم بيقولوا عليها كده يكسب الاب
(يحيى شاهين )
مبلغ كبيراوى
ولاول مرة يتبدل حظه
(ياسوء حظه!)
ويبقى مش مصدق نفسه
بعيد عنكم المكسب يلهى عقله ويعمى بصرهـ بصيرته
حتى انه من فرحته ما شافش ان الانسانسير عطلان
وغير موجود بالمكان
وووقع فى بئره
وقبل ان يلفظ انفاسه الاخيرة ويريحنا قال تودرى ياووووه قصدى قال
لابنته الحقيقة :انا مش ابوكى انا القط الاسود....
!لأ طبعاً!
قالها أن زكيه الدادة هى امها الحقيقية
واللى غابت عنها من سنوات بعيدة وطويلة التيلة..
وبكده اخد القمارتى الكذاب جزائه ومات بعيد عنكم شر ميتة والله يحفظكم .
معلش فيه شوية تغير عن سيناريو الفيلم
لكن وزى ما بيقولوا :دى رؤية المخرج
اللى هو انا المرة دى واعوذ بالله من قول انا
وفى الاول وفى الاخر
كلها افلام ×افلام
صح ولا بس كلام

هناك 51 تعليقًا:

Unknown يقول...

ربنا أغفر لنا
ماقدمنا وما آخرنا
وما أسررنا وما آعلنا

غير معرف يقول...

تعرفى يا نور
ساعات اخطف نفسى من مشاكلى ومسؤلياتى واتفرج على اللى بحبه اذا عرض فجأة اكون سعيده
بحب وبعشق فيلم الطريق المسدود
فاتن حمامه واحمد مظهر
لو استمعتى للحوارات اللى فيه هتعرفى ان زمان كان الناس حتى اللى مش ملتزمه محترمهساعات بنحب حاجات غيرنا مش بيحبها
بس بتكون بالنسبه لينا شئ ممتع


بحبك قوى وبحب حنينك للماضى ..انا كمان عندى حنين للماضى

بس الواقع بتاعى يعيث فيه عفاريت الانس
لدرجة ااقول الصبح انس ده ولا جن ياناس
يضحك لى الانس الجنى وابدأ مشوارى اليومى

ربنا يسعد أيامك

أم البنات الكسلانه

Unknown يقول...

أم البنات الكسلانة!
لالالالالالالالالالالالالالا
وانتى صادقة
أم البنات
اللى منورانا
سواء فاكرنا او كسلانة!
افلام زمان وأغانى زمان فيها
كتير حاجات حلوة وجميلة يكفى المعانى
والقيم كمان ساعات الملابس أو الالحان
حاجات كتير اوى فيها ممكن يفكرنا
بذكرى أو انسان عزيز مش موجود
معانا فى الوقت الحالى .ربنا يخليكى
ويخلى البنات يارب وتطمنى عليهن
وتفرحى بهن (حلوة بهن دى:)

جلال كمال الجربانى يقول...

أقدر أقول إن الأفلام زمان كانت بتصنع بفن وبحب وليس بهدف المال
وكان للفيلم قصه ومغزى
وكان لا ينسى مهما مر من زمن يعنى كان بيعلم فى الذاكره
ويجب أن لاننسى الظروف والزمن الذى صنعت فيه
كان زمن لسه بكر وخام
وليلى مراد كان صوتها رائق وقوى
الله يرحمها إن كانت ماتت مسلمه

ودمتِ فى أمان الله

Unknown يقول...

واحد من العمال
فعلاً كانت أفلام لها
معنى وهدف مش مجرد
افيهات ومناظر
وكسب بالألاف
بعد كدهـ
وليلى مراد كانت
رقيقة وصوتها ارق منها.

زهراء يقول...

ايه الجمال ده كله يا نورا يا قمرايه
انتى عارفه ان الفن زمان كان حاجه ودلوقتى حاجه تانيه خالص مالص
لو فتحت فى الكلام معاكى على الفن زماااااان والان مش هاخلص قبل ساعتين تلاته كده
ليلى مراد بقى ليا معاه ذكرى حلوه اوى انتى عارفه ان اغنية قلبى دليلى هى اول حاجه انا غنيتها وكنت ارقص عليها كمان وانا بيبى صغنون خالص
يا نورا يا اختى دلوقتى مش ممكن تقدرى تدخلى السنيما ومعاكى طفل الا اذا كان حد شاف الفيلم قبل كده ويقول اه ماشى ادخليه لكن ممكن وانتى فى الفيم لا بيكى ولا عليكى تلاقى نفسك مع الابطال والجمهور فى حجرة النوم واستغفر الله العلى العظيم
يااااااااااااااااارب على طول منوره متالقه متفوقه
على فكره انا ادمنت المدونه هنا عندك
لانك كل مره بتكونى متميزه عن المره اللى قبلها

غير معرف يقول...

صباح الخير يا دكتورة نور
اتمني تكوني بصحة كويسة وبخير




تامر

Unknown يقول...

زهــــراء
اللى منورنا وبخلانا
علينا تعمل مدونة نرد
فيها على كلامها الحلو دا
الافلام والاغانى لها ذكريات كتير
مع اى انسان وممكن كلمة فى فيلم
او أغنية واحدة تفكرك بعمر كامل يخيل اليكى انكى نسيتيه.اما الافلام الجديدة (ولو ان بعضها كويس برضه الحقيقة )
معظمها شوية صعب والذهاب للسينما
كااااان زمان اوى ربنا يخلى
الفيديو الاول ودلوقتى النت
نزلى اى فيلم منه واتفرجى
عليه وانت معززة مكرمة
فى بيتك :)

Unknown يقول...

غير معـــرف
استاذ تــامر
انا بخير والحمد لله
ياأفندم كيف احوالك أنت؟

خواطر شابة يقول...

تعرفي ممكن بعد سنين يجيجيل يحن لايامنا دي وتيجي مدونة تكتب فاكرين زمان ايام فيلم سهر الليالي كانت ايام.
لان احنابنحن للزمن القيد واللي عاشو فيه بيحنو لزمن أقدم وهكدا دواليك مفيش حد راضي

خالد فوده يقول...

السلام عليكم ورحمه الله وبركاته

نعتذر علي عدم المتابعه الفتره الماضيه بسبب ظروف الدراسه

عندكم في مدينه نصر اللي حضرتك بتاخدي فيها دوره

وان شاء الله نتاابع

دعواتكم

فيه موضوع جديد عندي
اقرأييه

donya يقول...

اول زياره
مدونتك جميله

بس انت مسمياها نور اهاتي
ولا نورهاتي

بشكرك علي زيارتك لمدونتي الوليده
واحب تزوريني تاني وتالت ......الي مالانهايه

البوست جميل والفيلم من افلام الحنين للماضي لما كنت بتفرج عليها وانا صغيره
وخصوصا افلام فيروز والاستعراضات

والاغنيه حلوه

*حياتي

زهراء يقول...

والله يا نور يا قمر مش موضوع بخل فى عمل مدونه لكن الموضوع ان ربنا يسهل احتمال كبيييير ان شغلى يتعرض على الملا وعلى الجمهور واذا لم يحدث يبقى ربنا يكرمك ونعمل مدونه لو انها عمرها ما هتمون واحد على عشره منش كلامك وشغلك الجميل اوى اول بجد
تسلمى على كلامك وذوقك العالى وبجد الواحد بيخجل من كلامك

ثرثارة يقول...

هههههههههههه
ماادري حبيبتي كل ماشفت افلام ابيض واسود احس انهم في عالم واحنا في عالم ثاني

والأفلام يوميتها كانت افلام في زمنا الحياة افضع من الأفلام .

سجود يقول...

البوست جميل ماشاء الله
وفيه افلام فعلا هادفه
وكمان فيه افلام عايشه الواقع
ومفيده بس ذي ما فيه الحلو فيه الوحش

وعموما جززززززاكم الله خيييييير

micheal يقول...

هههههههههههههههههه..شوفي الدنيا
والله الأفلام العربي دي عليهم شوية حاجات
القصة ممكن تتعمل بشكل أظرف واكثر واقعية من كده وبرضه حتقول نفس المعاني الحلوة
تحياتي

حاول تفتكرنى يقول...

اي عمل يقدم عظة نتعلم منها يحترم

شكرا على الرؤية ، ونتحفظ على الديكاتورية التي تمنعنا احيانا من التعليق

تحياتي

Heba Faruq يقول...

الأغاني اللي في الفيلم فعلا رائعة
وأنا بصراحة بتفرج عليه بس عشان اسمعها خصوصا "من بعيد يا حبيبي بسلم ويا صغيرة و يا بهية وخبريني " فليلى مراد من أرق وأجمل الأصوات
شكراً لكي أعدتيني إلى زمن الغناء الجميل

مع تحياتي

rovy يقول...

السلام عليكم
ازيك يا دكتوره وحشااانى جدااا و الله و بجد انتى بنت حلال جدا لانك كنتى فى بالى قبل ما اشوف تعليقك عندى و عاوزه ادخل ارتاح فى مدونتك اللى بأحس انها بتحضنى بحنانها و بتأخذنى دايما لمكان تانى و المره دى اخذتينا فى رحلة مع فيلم جميل للرائعه ليلى مراد و رجعتينا لأيام الزمن الجميل و البرأه و المبادىء و حاجات كثير جدا ضاعت فى زحمه زمانا و مش بنشوفها و لا فى الافلام ..

اشكرك جداا لكلامك الجميل اللى كتبتيه عندى و اللى طبطب عليا بجد .. ربنا يكرمك ياارب و ما يحرمنى منك ابدا

ارق تحياتى و مودتى لكى دائما

Ahmed Kamal يقول...

أنا شايف إن المخرج ينتقم من الأب الظالم ده و يطول عذابه شوية ، يعني بدل ما يقع في بير الأسانسير : يتكعبل على السلم ، و يفضل يتكعور عدة أدوار متتالية ، و يكون في مجموعة أولاد شياطين في ثانوي طالعين متأخرين على درس في الدور الرابع فيدوسوا عليه و هم مش واخدين بالهم ، و في الآخر يعترف لبنته .

إيه رأيك يا دكتورة ؟

Yusuf يقول...

حلوة قصة الفيلم

انا مشفتوش قبل كده

وحشني التدوين وبلوجر

بس هنعمل ايه بقا ف الدراسة

تحياتي

Unknown يقول...

خواطر شابة
أكيـــد طبعاً
ماهو دا الزمن
متغير ولا يثبت على حال
والرضا دا نعمة من ربنا
يوهبها لمن يشاء.

Unknown يقول...

خالد فــوده
وعليكم السلام ورحمة
الله تعالى وبركـــاته
كـان الله فى العـــون
على الدراسة وعلى المشوار
وتمت الزيارة والتعليق كمـان
امال ايه:)بسرعة كده مفيش وقت
العالم يجرى من حولنا ياخالد
عايزين نلحقه بسرررررررعة

Unknown يقول...

donya
ياأهلاً وسهلاً
سميها انت اللى تحبيه
نورهانتى ,نور اهاتى
از يو لـــــيك
اى ويل اجرى:)
وفعلاً افلام فيروز
الواحد يحب يتفرج
عليها لحــد الان
ومابيزهقش منها

Unknown يقول...

زهـــراء
خلاص نحن بالأنتظار
سواء مدونة أو غير مدونة
ونتمنى لكِ التوفيق فى المجال
اللى تختاريه.ربنا يوفقك.

Unknown يقول...

ثرثارة
أهلاً بك فى
أول زيارة لىّ.
على رأيك الواقع
الآن صار اكتر من الأفلام.
ربنا يرحمنا ويلطف بنا.

Unknown يقول...

سجود
عجبتك التدوينة؟
طب كوووووووووويس
كل حاجة فيها الوحش
والحلو والعاقل من
أخذ الصالح وترك
الطالح!

Unknown يقول...

micheal
سواءالأفلام العربى
او الأجنبية ممكن تتعمل
بميت شكل وشكل على حسب
روية المخرج وخدلى بالك
رؤؤؤؤؤؤؤية المخرج
ههههههههههههه

Unknown يقول...

حـاول تفتكرنى
الشكر لله يافندم
مش دكتاتورية بجد
لكن راحة للناس
وكمان ساعات انشغال
وما بيبقى فيه وقت للرد
وانا ما أحب حد يكتب تعليق
وما اردش عليه:اكره هذا
جددددددددددددددددداً

Unknown يقول...

Heba Faruq
هو فيلم جميل الصراحة
وكمان ما بيجيش كتير
فى التليفزيون مش
عارفة ليه؟
ليلى مراد فنانة
رقيقة وصوتها جميل.

Unknown يقول...

rovy
تستحقين أكثر من
هذا ياأم ياسمين
وما قلتش الا أقل
القليل مما تستحقينه.
ربنا يسعدك ويطمنك
على بناتك يارب.

Unknown يقول...

أحمد كمـال
ايه الشر دا كله؟
ليه بس كدهـ؟دا أنت
مستحلف له بقى؟ بس عارف
لأ خليه يموت على طول اول هام ما
ياخدش اجر ولا ثواب فى الدنيا من
المرض او (كسر رجله) وكمان علشان
بنته تفضى على طول للى وراها:)

Unknown يقول...

رابطة هويتى إسلامية
شكراً لاعلاننا بهذا
تمنياتى بالتوفيق.

Unknown يقول...

الحمد لله رب العالمين.

Unknown يقول...

Yusuf
فيلم جميل يايوسف
تابع انت روتانا
زمان يمكن يكون
لك نصيب وتشوفه.

Aиgel يقول...


صباح الخير
نوره

أتمنى تكوني بخير يارب

الفيلم ده حلو أوي والأغنية كمان أنا بحبها خالص

بس قد إيه القصة محزنة بسبب الطمع والجشع اللي فيها

......

حبيت كمان أقولك حلوة أوي صور البيبي
اللي في البوست الجديد

تقريباً أنتِ لاغية الكومينت عليها
):

دمتِ بكل حب واحترام

Angel love

فكرة من الزمن ده يقول...

حلوة الصور يانور
ليه قافلةالتعليقات
وفينك من زمان مش شفتك عندي
يارب تكوني بخير في البعتة الجديدة
تحياتي

غير معرف يقول...

مساء الفل والجمال
لقيتك مبقتيش بتسالي وانتي علي بالي دايما مفتقداكي جدا يارب تكوني بخير انا سبتلك اوف لاين كتير علي الميل ابقي طمنيني عليكي انا مسافرة برة مصر قريب وهعد فترة كبيرة ومحتاجة اكلمك ضروري ياريت شوفي هتبقي اون لاين امتي وانا هكلمك باذن الله
اختك الصغنونة مش هقولك الاسم لانك اكيد عارفة انا مين
اسيبك في رعاية الله يانور

Unknown يقول...

Angle
مساء النور حبيبتى
فعلاً القصة جميلة وحزينة
لكن الدنيا ياما فيها من
الفرح والحزن أحياناً بيبقوا
مع بعض فى وقت واحد .
أما التعليقات فى
التدوينة الجديدة
فأنا فعلاً قفلاها
معلش:( شوية انشغالات
وحيعودا على خير بأذن الله.
*انجل كنت عايزة اسألك
سؤال خاص كدهـ:هو انتى شقيقة
الاستاذ:احمد(الرومنسى الكبير اوى)؟

Unknown يقول...

فكرة من الزمن ده
الحمد لله رب العالمين
ادينا صابريين وصامديين
لحد دلوقتى:)ربنا يسهل على
الباقى يامسهل يـــــــارب.
وحاضر انا جاية جررررررى اهوه:)

Unknown يقول...

غير معرفة!
اختى الصغننة!
تروحى وترجعى
بالف ألف سلامة
انا اون لاين أهوة
انتى فين بقى :بأذن الله
عامة انا بكون موجودة
بعد صلاة العشاء ولحد 9
او عشرة ينفع الميعاد
دا؟ أنا بالانتظار
وربنا يكتب لك
السلامة فى كل
مكان وزمان

micheal يقول...

الصور تحفة يا نورهاتي بالذات صور القطط
أنتي ليه لغيتي الكومنتات في البوست بتاع الصور
:)

Unknown يقول...

micheal
مبسوطة ان
الصور عجبتك
يامايكل اما عن
إيقاف التعليقات
لأنى الايام دى مواعيدى
(واحوالى كلها إن جيت للحق)
مش مضبوطة وعامة مش مبسوطة
فقلت اريح الناس من التعليقات
وكمان لانى ما أحبش اسيب تعليق
من غير ماأرد عليه.سحابة
وحتعدددددددددددددى
بأذن الله.

z!zOoOo يقول...

السلام عليكم

ازيك يا دكتوره نورا

يارب تكوني بخير

انا مقصر جدا وعارف اني مقصر

بس انا جاي اسلم واطمن

واكيد ليا عوده عشان اقري بس البوست الاخير حلو قوي

وخفيف

متشكر جدا علي سؤالك المستمر

ربنا يوفقك ويكرمك يارب وإيانا

تحياتي

Aиgel يقول...


مساء الجمال يا نوره

ازيك يا حبيبتي ؟ يارب تكوني بخير

أنا حبيت اجاوبك على السؤال

أنا مش أخت الأستاذ أحمد
( الرومانسي الكبير أوي )

بس هو مين أستاذ أحمد مدون مننا
ياريت لو تقوليله اللينك بتاع مدونته

(:

Angel love

Unknown يقول...

z!zOoOo
انت تستاهل
كل خير يازيزووو
واتفقنا قبل كده
مفيش إعتذارات بين الاصدقاء
ربنا يوفقك فى شئونك كلهـا.

Unknown يقول...

Angel
متشكرة لردك ولذوقك
يبقى المعلــومة بتاعتى
غلط او انا اللى فهمت غلط
على العموم استاذ أحمد الدسوقى
من الناس الممتازين فى عالم التدوين
ودهـ الرابط لمدونته
(http://alsaherlove.blogspot.com/)

soly88 يقول...

اتكلى على الله واشتغلى مخرجه
استمتعت جدا بفيلمك (زكيه المغنواتيه
وأرشحك لأخراج فيلم الشموع السوداء

Unknown يقول...

soly88
الشموع السوداء!
حتة واحدة ياسولى!
عمونا صالح سليم
والست نجاة الصغيرة
على العموم افكر:)

ياسمين يقول...

محتاجة استفسار منكم من فضلكم
اتفضلوا عندى فى المدونة
ضرورى وشكرا

Unknown يقول...

ضحكة مجروحة
ردينا على الأستفسار
يافندم وارجو أن يفيد
حضرتك ومن يقراءه بعد ذلك