تنهيدة إرتياح!
لما الزوجة الاولى (بردون القديمة يعنى)
عرفت انها حامل وأن ضرتها الجديدة
مش حامل بالرغم من مرور سنة
كـــــــــــاملة! على الزواج.
حادثة مجهولة!
نُشرت فى جرنال الاهرام من مدة
طويلة عن غرق 3عمال صـــرف
صحى اثناء عملهم وأن واحد
منهم له 3اطفال أصغــرهم
عنده سنة وشهرين ومــن
يومها حاولت قدر الامكان
الاحتراس فيما القيه فى البلاعة وخاصة
(تفل الشاى)واستغربت من الكمية الهائلة
اللى باصفيها كل يوم وأخرجها مع (القمامة)
نظرة فرح!
نظرة ابويا رحمة الله عليه حينما ايقظته من
(نومة العصرية)لأخبره انى قد نجحت فى سنتى
الأولى فى الكلية وبعد ما كنت فــــــــــاقدة
وافقدتهم معايا طبعاً الامل فى هذا!
جملة!
ليه هو احنا مالناش فى نفسنا 10دقائق؟
قالتها لى حكيمتى وكانت (كبيرة وعاقلة) حينما أخبرتها
انى لا اتذكر ان كنت شربت كوباية الشاى الصبح ولا نسيتها
على التسريحة من السربعة اللى الواحد بيبقى فيها الصبح وهو
نازل الشغل فقالت ما سبق وأضافت لازم تقعدى وتشربى
الشاى الصبح براحتك مادام بتحبيه لاجل ما تتحضرى للدوشة
طول اليوم وعنها ومن يومها بقيت اصحى بدرى بقدر الامكان
لأجل ما اقعد وأنا بشرب حبيبى الشاى ابو لبن الصبح .
ربع سطر فى رواية
Every man has his price
من قصة (رجل لكل العصور)
(Man for all seasons)
كانت مقررة على اولاد أخواتى فى المدرسة
وقراتها انا لمّا كنت بحاول اساعدهم فى الدروس
وبعد كده شفت الفيلم كمان كذا مرة
(ومستعدة اشوفه تانى وتالت ورابع!)
والجملة معناها أن لكل انسان ثمنه
أو له مفتاحه اللى ممكن تدخله من خلاله
(الا من قليل من الناس طبعاً)
ضحكة صفراء
ضحكة مديرة شئون العاملين
عندنا فى الشغل الصبـــح
وأحنا بنصبح عليـها
صورة
نشرتها جريدة الأهـرام
ايام حادثة العّبارة السنة قبل اللى
فاتت لجدة وأم وطفل ينتظرون
على رصيف ميناء سفاجة لعل الله سبحانه وتعالى
يُرجع لهم احبائهم سالمين ولا أنسى نظرة اللوعة
على وجه الجدة ولا نظرة البراءة على وش الطفل
للأسف مالقيت الصورة المقصودة لكن ممكن دى تسد!
اكيد فيه حاجات وكلمات
وصور وحكم معلقة فى نافوخى
بس اهم دول اللى فاكراهم دلوقتى.
وكمان علشان ماطولش عليكم الناس بتزهق.
وكمان حأريحكوا من التعليقات ونقفلها المرة دى!
ترررم وحاجـات تانية كمان
ليست هناك تعليقات:
إرسال تعليق