الأربعاء، مارس 05، 2008

سلامآ قولا من رب رحيم

على صباحة ربنا طوبتين قصدى قرارين نزولوا على دماغنا تك تك , وخدى يادكتورة امضى بالعلم ياسادة هيئتنا الموقرةاصدرت فرمان هيمونى باننا نكتب الاسم العلمى فقط للادوية فى تذاكر العيانين والويل والثبور لكل من لاينفذ الامر خد عندك مثلا:
R/Hypoton or Brinerdin ,no ,no ,no you should write
Reserpine 0.1+clopamidHcl-thiazde 25mg
R/Farcopril pluse or capozide no no no
Captopril 50 mg+hydrochlero-thiazide 25 mg

وخد من ده كتير والواحد بيكتب يمكن 70 روشتة فى اليوم واكتر حيلاقى وقت منين وحتى كمان انا ومش انا وبس كلنا نسينا الاسماء العلميه دى. الفارماكولجى ده كان مشكلة حياتى (بصراحه كده الملحق الوحيد فى تاريخى الدراسى)ولولا ربنا ستر وما حب اهلى يزعلوا وانا اتقهر كنت عدت السنه(اللى هى سنه ثالثه )طب مااعرفش دلوقت الفارما بياخدوها فى اى سنه
دى اول طوبة ا,التانيه بقى ياجماعة لو سمحتوا (والكلام موجه الى الحكيمه اللى بتشتغل معايا) تكتب اسم المريض ثلاثى وكذلك رقم البطاقة الصحيه ثلاثى برضه و اسم جهه العمل كامله ....ياسلام ياختى!!!!!!!ناقص نكتب مرتبط ولا مش مرتبط علشان زكيه قربت على رأى ابراهيم نصر فى حلقات الكاميرا الخفيه
والله والله والله اللى بيطلع القرارات دى تلاقيه ما بيخط خط بايده طول النهارواهى اوامر والسلام علشان يحللوا الفلوس اللى بيخدوها للاجتماعات واللجان والهبببببببببببببببببببر اللى بيهبروه
ومانشوف بكره حيطلعولنا بيه تانى وعجبى على رأى صلاح جاهين
--

هناك تعليقان (2):

Wael يقول...

معلش هى القرارات جات على دماغكم انتم
بس هو قرار مفيد جدا طبعا برغم كل شئ
على الاقل هايسيطر حبة على الصيادلة اللى بقول يشخصوا هما الامراض , وتلاقى الواحد بياع ف صيدلية بيشخص الامراض للى رايح واللى جاى وحافظ اسماء الادوية التجارية طبعا زى اسمه .

وعجبى , على راى صلاح جاهين برضو .

نصيحه بس قبل مامشى : تشيلى حكاية " تاكيد الكلمة " بتاعة التعليقات عشان بتخلى الواحد يكسل يعلق على الموضوع , ويقعد بقا يحول من عربى لانجليزى و" الت + شيفت " وكتير اوى الكلمة تطلع غلط ويضطر يعيدها , وحكاية مايعلم بيها الا ربنا .

Unknown يقول...

طلباتك اوامر ياد.وائل

علم وتم التفيذ بالفعل ولاتحرمنا من نصايحك ياد.وائل باشا.
norahaty