الجمعة، ديسمبر 05، 2008

ربنا ما حرمنيش !!!


السنة دة قلت حارتاح من الدبح والتنضيف والشيل والحط بتاع كل سنة وبتاع العيد الكبير وكل سنة وانتم طيبين وده ليه؟ اصلى اتفقت مع واحدة جارتنا زوجها عنده مزرعة كل سنه بيجيب كام بردون خروف على كام بردون برضة عجل ويطلقهم فى المزرعة واللى عايز يتفرج ويشترى وكمان يدبح يتفضل اهلا وسهلا عنده فى المزرعة واهو كله بحسابه سواء الدبح او التنضيف والتقطيع والتوضيب لهم حساب تانى ويكفى بس ان التاجر لا حيغشك فى ميزان ولا حتحمل هم الشيل والحط ....ياسلام حلم واتحقق لى المهم فعلا اتفقنا وانا حطيت بطيخة صيفى فى بطنى على رأى المثل لكن طبعا الهوا ماجاش سوا لازم يطلع لنا جار يجيب خروف ويحطه فى البلكونة اللى هى فين بقى ياسيدى .؟ بالظبط كده فى وش بلكونة اوضتى لزم وبقيت سامعه صوته الجميل ليل ونهار بقى لى 3 ايام لما انا حاسه ان ودانى اتخرمت اة بردون وانى انا نسيت الكلام وحمأمأ كمان شوية وايه بقى الخروف متعرفوش ماله مش بيمأمأ زى الخرفان التانيين لأده صوته اجش اه والله مش بيقول ماء لأ

بيقول ماق او ماج
حاجة زى كده وشكله يالطيف اللطف حاجة صعبة انا والله شاكة انه يكون هجين يعنى ممكن خروف على
خرتيت او خروف على سيد بيه قشطة ...ليه لأ بصحيح!! .ومن ضمن القرف كمان الخروف مابيسكتش ما بيفصلش اة يظهر كان عايش فى قطيع ولا ايه مش عارفة لكن طول النهار والليل بيمامأ ومأمأته حزينة اوى .
ده المأمأة اما الؤؤةؤؤؤؤؤه فده لان بنت اختى ولدت ايوه العروسة بتاعة شهر فبرايراللى حكيت عنها فى اول المدونة ولدت بالسلامة من كام يوم ورزقها ربنا ببنوتة حلوة اسمتها ملك لأ ياسيدى مش على اسم يسرا فى المسلسل لأ ياأسيادنا على اسم حماتها بأعتبار ان دى اول بنت تتولد فى عيلتهم فلازم تتسمى على اسم جدتها ام ابوها وسبحان الله للعام الثانى على التوالى(وربنا يصبرنى) بيتى يتوعد باللى يولودوا قبل الميعاد طب اعمل ايه ؟يلا ربنا يسهل ويستر ويجعل بيت المسلمين عمار .كنت عايزة احط صورة البت النونو او الخروف بتاع جارنا الاستاذ سليمان لكن للاسف لسه ماأعرفش التكتك ده ايه,بكرة اتعلمه ماعلينا الايام جايه كتير وطولة العمر تبلغ الامل وعقبالكوا جميعاً فى المسرات



لولولوىلوىىىلوى




هناك 116 تعليقًا:

Kiara يقول...

ياخبر علي الصداع

ايه ده

ربنا يكون في عونك

كل سنه وانتي طيبه ياقمر

عمرو يقول...

ألف مبروك لملك تتربى فى عزكم اٍن شاء الله و تفرحوا بيها و هى عروسه .. بس أيه الأسماء القديمه دى ؟؟ على فكره أنا بنت أختى برضو اٍسمها ملك و بيدلعوها بملك الجمل
كل سنه و أنتى طيبهو يا ستى أنتى متضايقه من صوت خروف الجيران ؟؟ غريبه !! أنا بأنتشى لما بأسمع حروف بيجعر و لا جاموسه بتنعر و قلبى بيهفهف كده لما بتيجى سيرة البهايم لامؤاخذه يعنى علشان دول العز و الفلوس و الخير و الفته و الهوبر
ههههه ما تستغربيش !!

زهرة الجنة يقول...

كل سنة وانتي طيبة
عيد سعيد عليكي وعلي كل أسرتك

maxbeta3zaman يقول...

بورك فى الموهوب وشكرتم الواهب ورزقتم برها ...ملك اسم جميل بارك الله فيها ..كان الله فى العون لكن بقى الضوضاء بقت شىء معتاد فى معظم المدن الكبرى ويظهر الجيران دول مجوعينه او ما بيطلوش عليه ...حكى لى زميل يسكن فى المنيل أنه كان شقيا جدا فى طفولته وكان يطلع السطوح يشاكس فى خروف العيد ويضربه على جبهته بكف يده مرددا الأغنية الشهيرة التى يقولها الأطفال فكان الخروف يتعصب جدا من هذه الحركة ويكتم فى نفسه لكونه لا يتمكن من نطح صاحبنا بقرنيه.. حكى صاحبنا انه فى يوم الوقفة طلع للسطح ليعطى الخروف طريحة الملاكمه اليوميه ففوجىء بالخروف يرجع للخلف ويندفع كما الصاروخ تجاه سور السطح ليقفز منتحرا من الدور الخامس بين ذهول المشاكسين ومات الخروف منتحرا..فليس الإنسان وحده اللى بيتنفسن ..وتصيبه الكآبة الخرفان والمعيز أيضا تفعل ..فاتركوه للسولفيج اليومى زى استار أكاديمى كده يمكن عالعيد تطلع منه حاجه ؟؟
كل عام وأنتم بخير

أفندينا يقول...

كل عام وأنت وأسرتك بكل خير
ومعش يا ستي هانت كلها يومين وتستريحي من الإزعاج ده ...
:)

Unknown يقول...

كل سنة وانتي طيبة
وبعوده الايام
وانتي في احسن حال يارب


ومبروك ليكم كلكم علي البنوته الجميله
ويارب تكون ملك فعلا

واحمدي ربنا ان اسم جدتها ملك

مش فتكات ولا ست ابوها

هههههه

تحياتي ليكي
وقولي لملك اونكل برقش بيقولك كل سنة وانتي طيبة
(ملك الصغيرة طبعا)

mohamed ghalia يقول...

كل سنة وانتى طيبة
عيد سعيد عليكى وعلى كل اسرتك
دمتى بكل الود

الفارس الملثم يقول...

طبعا الاول نقول مبروك علي وجود ست ملك في الدنيا هي طبعا هي لسه مش عارفه وجع القلب اللي اتلاقيه في الدنيا ..

وبالنسبه لعم خروف معلش استحملي كلها يومين واترتاحي منه ,ماهو كمان لو كان يعرف اللي ايحصله مكنش بقي ليه نفس يمأمأ كده

كل سنه وانتي طيبه يا دكتوره بس برده متنسيش حقي في الخروف بتاع المزرعه ده احنا مش جيران ولا ايه وبينا عيش ومدونات مممممممم

سلاممممممممممممم

ghoneem يقول...

السلام عليكم

طبيبتنا وزميلتنا وصديقتنا الفاضلة

كل عام وانت بخير وكل أحبابك وأهلك يارب وعيد سعيد

ربنا يتقبل منك ويرزقك الثواب يارب

دايما يارب بخير وصحة وبتنورينا وبتسعدينا بتعليقاتك وتفيدينا بموضوعاتك

تحياتي

بالتوفيق...................

msafa يقول...

ههههههههههههههههه روعه خفه الدم دى
ربنا يصبرك
لحد الدبح
سعيد انى بشوف المدونه

Dr. Ibrahim يقول...

أجمل إحساس فى الدنيا صوت عيل صغير نونو

وأجمل إحساس فى الدنيا برده إن الواحد يشاهد ذبح الضحية فى بيته وياسلام لو بيعرف يعملها بإيده انا عندى إصحاب ليهم مزاج فى كده

وأجمل إحساس فى الدنيا برده صوت المأمأة بتاع الخروف ..سيمفونية..:)

د إبراهيم

Dr. Ibrahim يقول...

بس سؤال واحد ظريف قالهولى ولا تعليق..

الخروف بالعربى بيقول ماء

هل الخروف الإنجليزى بيقول water!

هههههههههههههههه

تحياتى

د إبراهيم

ahmed_k يقول...

اولا حمدالله على سلامة ملك
وألف حمدالله على سلامة ام ملك
والصور ممكن تلقطيهم بالموبايل
وتحمليهم على الكمبيوتر بفلاشه من كارت الميموري أنا بعمل كده
وبعدين تضيفيهم للبوست اللي حتنزليه
شوفتي إزاي دي وصفه سهله دي وصفه هايله
والخروف ابو بااااج بااااج كلها كام يوم وياخد جزاه بسبب إزعاجك وحيتدبح
اوعي تقولي على اني بقرأ البخت ولا حاجه
بس انا زي ما تقولي بشعر بالأحداث
وأراهنك لو ما أتدبحش
وده جزات اللي يضايق الدكتوره نورا

وكل سنه وأنتي طيبه
وعيد أضحى سعيد عليكي يا رب

أحــوال الهـوي يقول...

السلام عليكم

اذا كان الجار يشفي غليلك بهبرة من لحم الخروف الاخنف سالف الذكر ماشي

و مبروك عروسة العيلة الجديدة و دي فرصه لو الحماه ضيقتها تنادي بنتها
بالصفة اللي تريحها

كل سنة و انت طيبة

HANY YASSIN يقول...

ربنا معاكي
وكل سنة وحضرتك بالف خير وصحة
تحياتي
هاني يس

مها يقول...

مع ملك الجميلة العيد أكثر روعة وبهجة


كل سنة وانتي طيبة وسعيدة وبالك مرتاح :)

Unknown يقول...

اولا انا مخنوق انا كمان
عشان الدبح
وبرضون حشيل واحط
ربنا يستر
والنكد ان الدبيح السنادى تانى يوم
يعنى حقعد قلقان يوم كامل
على العموم كل سنة وانتى طيبة
****
وبورك فى الموهوب
جعلها اللة قرة عين لابويها

Maha Shahen يقول...

هههههههههههههه
انا صدعت ليكى علي القرايه
الله يكون في عونك
بس كتبتى بوست يهلك من الضحك بجد
زي السكر انتى

اما بعد

المرور دا للتهنئه بالعيد

كل عام وانتى بخير... نظرا للظروف الأقتصاديه وارتفاع الأسعار هذه التهنئه صالحه لمدة سنه وتشمل: عيد أضحى _ تعيين _ ترقيه _ نجاح _ سنه جديده _ مولود _ نقل _ زواج ... الخ

بوفر بقى انتى عارفه اصلى منوفيايه ههههههههههههههههه

المستنصر بالله يقول...

كل سنه وحضرتك بخير
ومبروك عليكم المولودة ربنا يبارك فيها

تحياتى

maYHam يقول...

كل سنة وحضرتك طيبة وي أتم صحة وخير إن شاء الله
وألف مبروك لملك وأم ملك وقرايب ملك كلهم وعقبال كدا لما يجيبوا نوراهاتي تانية عشان الدنيا تحلو أكتر

كل سنة وإنتي طيبة

blue-wave يقول...

ربنا يكون فى عونك
مأمأة و وأوأة كمان؟
هههههههههههههههههههه
بس الف مبروك عليكم البنوته ملك
وكل سنه وانتى طيبه

ABUL_HASAN يقول...

السلام عليكم وكل عام وانتم بخير
واعاد الله عليكم العيد اعواما عديدة بالخير واليمن والبركات
وكل سنة والخرفان اكتر واكبر والثواب اعظم واعظم

TIMMY !! يقول...

كل سنة و انتي طيبة يا دكتورة ..

و كل عيد و انتوا " خاليين من الكوليسترول " :)

و مبروك المولودة الجديدة ملك .. ربنا يهيدها و تبقى حاجة حلوة كده في المستقبل ..

و .. و بس علشان أنا مش عارف أقول ايه :)

romansy يقول...

كل سنه وانتى طيبه

عيد اضحى سعيد
عليكى
وعلى كل المسلمين

الحمد لله انك ارتاحتى من الدبح والتنظيف
بس الاهم انك تشاهدى الاضحيه

سفروتة يقول...

معلش يا دكتورة الخروف مسيره يتخطف من الدنيا اول يوم العيد
ههههههههههههههههههههههههههههههه
وتستريحي من الصداع والوش ده

ومبروك ولادة ملك ...تتربي في عزكم ان شاء الله

وكل سنة وحضرتك طيبة
وعيد سعيد عليكي يارب

Beram ElMasry يقول...

norahaty
السلام عليكم ورحمة الله وبركاته اجمل التهانى بمناسبة عيد الاضحى المبارك اعاده الله عليكم وجميع الاهل بالخير والبركة ، وجعلنا واياكم من الملبين فى العام القادم
والسلام عليكم ورحمة الله

رحــــيـل يقول...

كل سنه وانتى طيبه
معلش هانت كلها النهارده وترتاحى من الخروف

وسلمى على ملك نورت الدنيا
ربنا يهنيها ويهنيكى

Unknown يقول...

كل عام وانت بالف خير
تقبل اللة من ومنكم

هى فوضى يقول...

ماااااااااااااء مااااااااااااااء
مااااااااااااء مااااااااااااااااااااااء ماااااااااااااااااااااااااء


عيد سعيد
وكل عيد اضحى وانت بخير
وان شاء الله العام القادم على عرفات متجمعين

من غير عنـــوان يقول...

أولا كل سنة وانت وكل اللي بتحبيهم بخير وصحة وعافية..

وشكرا على سؤالك..

ثانيا
بأحب جدا اقرأ اسلوبك الساخر السحر في تناول المواضيع
... ممكن تكتبي سيناريوهات


ثالثا مبروك وعقبال عندك ياللي بتزغرتي .. أو بتزغرطي..أو بتزغردي... مش عارف...


أما عن حكاية المأمأة أو المقمقة... فالموضوع ده حيتحل فقط لو هاجرتي سويسرا


وكمان مرة كل سنه وانت طيبة وسعيدة

أمنياتي

حسن حنفى يقول...

كل سنه وحضرتك طيبه


وعيد سعيد

نعكشة يقول...

هههههههههههه

انتي موعودة ربنا يعينك



و هو كلو بثوابه


كل سنة وانتي بالصة و السلامة

عيد سعيد عليكي و علي اهلك و اصحابك و جيرانك
و السنة الجاية ان شاء الله علي عرفات

آمين

سلام عليكِ

غير معرف يقول...

كل سنة وجميعكم بخير

كل سنة وجميعكم فى سعادة وهناء

كل سنة ونحن أوثق وأقرب

جمعنا الله معا على عرفات

daktara يقول...

كل سنة وانت طيبة
عيد اضحي سعيد

انظر حولك
د. خالد عزب

حاول تفتكرنى يقول...

كل عام وانت بخير

تحياتي

مهرة سالم يقول...

هههههههههه
إيه الصداع ده...
...............
مبروك البيبي ..
جعلها الله من مواليد السعاده..
وبارك الله فيها وأصلحها..
..........
كــل عــام وأنتـــي بخيـــر ..
وعيـــد سعيـــد..

غير معرف يقول...

ربنا معاكى :)

و كل سنة و انتى طيبة

شخـا بيــط مـحـجـوب يقول...

كل عام وانتى بخير وعيد سعيد عليكى ومدونتك جميل
تحياتى ليكى وتقبلى مرورى

شخابيط mahgoub

tarek alghnam يقول...

وامرت بذبحك يا ولدى فانظر فى الامر وعقباه ؟؟؟

ويجيب العبد بلا فزع افعل ما تؤمر ابتاه من يعصى لله امرا من يعصى يوما مولاه

واستن الوالد سكين واستسلم ابنا لقضاه

وتهز الكون ضراعات ودعاء يقبله الله تتوسل للملأ الاعلى ارض وسماء ومياه

ويقول الحق ورحمته سبقت فى خير عطاياه صدقت الرؤيا لاتحزن يا ابراهيم يا ابرهيم فديناه .....كل ثانيه كل دقيقه كل ساعه كل يوم كل اسبوع كل شهر كل سنه وانتم طيبين وعيد سعيد

DR.HAMAS يقول...

كل عام و انتم الى الله اقرب

و على طاعته أدوم





د.جماس

غير معرف يقول...

كل عيد وأنت وكل من تعزين بخير وفي أحسن صحة وأسعد بال.
وألف مبروك للمولود الجديد، ولو إن التهنئة متأخرة شوية

نـــــور يقول...

:))

كان مفروض جار حضرتك ياخدك معاه تنقوا الخروف قبل مايشتريه مادام حضرتك هتتفرجى عليه تلات ايام متواصله :)
وبعدين ممكن يكون ابن خاله سيد بيه صحيح؟
طب ابقى قوليله يسلملى عليه :)
حضرتك بتقولى احط صوره النونو او الخروف ؟؟!!!!!!!
بئس المقارنه :))

كل سنه وحضرتك بخير واسفه لتأخيرى فى التهنئه بس حضرتك قلبك كبير وهتسامحينى :)
كل عيد وحضرتك بخير

وفاء بركات يقول...

السلام عليكم
الف مبروك علي النونا..وعقبال متشوفيها عروسه..
ودى لوووووووووووووووووووولي للست ملك
من تيته وفاء وربنا يخلي..
وأيه الخروف العسل ده ده ناقص يقول
ماق ماق وآآآآآآآآآآآآيه بص خلاص
كل سنه وانتم والأسره الكريمه بخير وصحه
وعافيه

م/ الحسيني لزومي يقول...

تقبل الله منا ومنكم
وكل عام وانتم بخير

صابر وراضى يقول...

وعليكم السلاااااااااام:

الحروف لازم يقول ما وما وما هو بردو اللى نفسه فى حاجه قبل ما يموت يبقى يعملها
اعتقد انى لو كنت خروف وهيدبحونى على العيد كنت ليل ونهار وانا اقول ماااااااااااااااااااااااااا
مااااااااااااااااااااااااا
والعمر واحد والرب واحد
وعيدكم مبارك

saragebaly يقول...

ههههههههههه

اظن بقى دلوقتي مفيش ولا مااااء ولا يحزنون

كل عام وانتِ بألف خير يارب

عيد سعيد عليكي وعلى كل احبابك يارب

كل عام وانتِ إلى الله اقرب

تحياتي وكل التقدير

دمتِ بكل الحب

سارة

وفاء بركات يقول...

ايه ده كل ده غياب مش معقول
احنا منقدرش علي كده ..
متنسنيش في كيس السبوع ولا حته لحمه من خروف العيد ولا العقيقه بتاعة ملك هانم
احنا برضه حبايب وأخوات..
في إنتظار الجديد

Wael يقول...

3000 مبرووك
1000 للننه الصغننة
و1000 للعيد
و500 للخروف
و500 زيادة

وكل سنة وحضرتك طيبة :)

حسن حنفى يقول...

هههههههههههه


وفيها ايه الخروف هيدبح وتزعلي بعد كده انه مش عاد موجوووود

:d

الف مبروووووووووووووووووووك

وكل سنه وحضرتك طيبه

mohamed ghalia يقول...

يلا خير المهم ضحيتم
والخروف زمانه خد نصيبة
كل سنة وانتى بخير
مبروك المولود الجديد ملك

Mafrousa يقول...

كلسنة وانتى طيبة و بخير
و مبروك
يتربى فى عزكوا

رومانسى مشاكس يقول...

بوست جميل

تسالم الايادى


وكل سنة وانتى طيبة


تحياتى


رومانسى مشاكس

SemSem يقول...

كل عام وانتى بخير

ويارب يعود على المسلمين بالخير دائما

مع تحياتى

سفروتة يقول...

اين انتي يا دكتورة؟؟؟؟؟؟؟؟؟؟؟؟؟
لماذا كل هذا الغياب
ياريت تطمنينا عليكي
سلامات

Unknown يقول...

السلام عليكم ورحمة
الله تعالى وبركاته
وكللللللللللللل
لللللللللللللحظة
وأأأأأأأأأأأأأنتم
بالألألألألألألألألألألألألألأف
خيرررررررررررررررررر
ومعلش على التأخيرررر
وسماااااااااااااااااح
النوبة كوا النوبة
ونرددددددددددددددد
بقى يالا ولا لسه شوية:;!

Unknown يقول...

السلام عليكم ورحمة
الله تعالى وبركاته
مولان
اه يامولى ياحبيبتى
لو كنتى جيتى وسمعتى !!
الحمد لله نص الدوشة خلصت
فاضل النص التانى الواؤاواؤة
ربنا يسهل ويروحوا بالسلامة هم كمان
ياااااااااااااااااااااااااااااارب
كل لحظة وانتى بالف خير ياجميلة:) :) :)

Unknown يقول...

السلام عليكم ورحمة
الله تعالى وبركاته
أستاذ /عمرو
الله يبارك فى حضرتك يافندم ومتشكرين لدعواتك وربنا يهدى الجميع للخير .
خروف الجيران (الله يسامحه)كان صوت وصورة وريحة !!!كمان كل ده من غير حتى العشم فى حتة منه (على الاقل لىّ)والحمد لله ربنا يخلى الهوبر والفتة بتاعتنا ياسيدى
وربنا يفرح قلبك دايما يارب
زى ما بتفرحنا بكلامك ومرورك:)

Unknown يقول...

السلام عليكم ورحمة
الله تعالى وبركاته
زهرة الجنة
كل لحظة وانتى وجميع
من تعزين وتعرفين
بالف الف الف خير
ياااااااااااارب

Unknown يقول...

السلام عليكم ورحمة
الله تعالى وبركاته
maxbeta3zaman
شكرا لله وحضرتك
وفكرتنى بجدتى كانت مربية
بطة مع مجموعة من الحمام
المهم كل يوم نلاقيها(البطة) واقفة
على السور نيجبها ونأكلها المهم زى ما تقول تلبستها روح الحمام وفى يوم طارت بس للاسف كانت تقيلة ...وافهم انت الباقى:( :( :( اهىء اهىء اهىء
فكرتنى ليه بس بالذى مضى !!اهىء اهىء
ومتشكرييين للمرررور والتعليق:)

Unknown يقول...

السلام عليكم ورحمة
الله تعالى وبركاته
أفندينا
وكل لحظة وحضرتك بالف
خير افندينا الكبير
وماكانش يومين يافندم
جيراننا ماشين على سنة
الدبح تالت يوم العيد
شفت ازاى:( :( :( عايزة اقولك
انه(الخروف ابدع اليومين الاخيريين
وهو لوحده فى الشااااااااااااارع
الحمد لله خلااااااااااااااااااااص
ومتشكرين افندينا الكبير
للمررررررررور والتعليق

Unknown يقول...

السلام عليكم ورحمة
الله تعالى وبركاته
bar2ash
كل يوم ولحظة وانت بالف خير
ياصيدلى المنصورة والوجة البحرى كله
وربنا يبارك فيك يارب
عقبال لما نبارك لك الشهادة والتخرج
وبعد كده الصيدلية الخاصة ونفرح فيك:) قصدى معلش :)نفرح لك بالزواج كمان:)
ووصلنا السلام يافندم وبتقولك واءءءء
واءء واءءء واءءء(الرسالة طبق الاصل:)

Unknown يقول...

السلام عليكم ورحمة
الله تعالى وبركاته
mohamed ghalia
وكل لحظة وانت
ومن تحب وتعرف
وتود بالف خير يافندم
تحياتى للمرور والتعليق

Unknown يقول...

السلام عليكم ورحمة
الله تعالى وبركاته
محمد الفارس الملثم
كل لحظة وانت بالف خير
يامحمد ياللى واخدها حجة تاخد اجازة فى المواسم دى لاجل لا تعطى عيدية ولا لحمة وكمان عايز لحمة :) :) :) :)
على العموم حقك محفوظ يافندم
حابعته على مدونتك لما تفتحها
قريبا إن شاء الله تعالى
وكل لحظة وانت بالف خير
يامحمد
ياصاحبى

Unknown يقول...

السلام عليكم ورحمة
الله تعالى وبركاته
Dr.Ghoneem
كل لحظة وحضرتك بخير ياطبيب ويازميل وقبل هذا صديق كمان .ربنا يتقبل ثنائك ويجعل لك نصيب وافر منه
ان شاء الله تعالى .
وربنا يوفقك فى عملك ودراستك وتخصصك
وووووووو حد كده كمان:) :) :)
ودايما منورنا يادكتور غنيم يارب
تحياتى واحتراماتى للمرور والتعليق

Unknown يقول...

السلام عليكم ورحمة
الله تعالى وبركاته
msafa
الله يخليك. الحمد لله دبحوه اول امبارح:)
والدنيا بقت هادية كده! وبقيت مفتقدة صوته ومنظره الجميل ولاريحته!!!
وانا الاسعد يافندم بمرورك ومنتظريين زيارتك كمان وكمان وكمان

Unknown يقول...

السلام عليكم ورحمة
الله تعالى وبركاته
Dr.Ibrahim Samaha
(أجمل إحساس فى الدنيا
صوت عيل صغير نونو)
والاجمل منه ياطبيب انك تتلقاه بين ايديك فى لحظة ميلاده ياالله!! لحظة من لحظات ربك العظيم لا ينفع ُيحكى عنها ولكن سوف تمارسها بأذن الله
بعد التخرج
هانت إن شاء الله
وربنا يارب يرزقك
بكورال من اللى بتقول
عليه سيمفونية ده ويقعد تحت بلكونتك
وابقى قولى حتغير رأيك ولا لأ
تحياتى ياطبيب للمرور
والتعليق كمان :)

Unknown يقول...

السلام عليكم ورحمة
الله تعالى وبركاته
Dr.Ibrahim Samaha
سؤال عويص يافندم
يسأل عنه بتوع الطب
البيطرى؟؟؟؟:) :) :)
ولا نتعليق برضه مثل حضرتك
منورنا ياطبيب!.

Unknown يقول...

السلام عليكم ورحمة
الله تعالى وبركاته
ahmed_k
جزاك الله كل خير يافندم على التعريف والتعليم بس تعمل ايه فى اللى تقوله الحاجة الف مرة وبرضة مابيتعلمش!!! ربنا يسهل ونعرف بأذن الله اما (الخروف المحترم)فجنابه ونّسنا ثلاثة ايام العيد كمان (الجماعة متبعين العادة دى وفعلا هو اخذ جزاءه :) ربنا يرحمنا ويسامحنا اجمعين .ويرزقنا ويرزقك ويرقك الناس جميعا بالستر والرضا والسماح
نورتنى ياأستاذ أحمد ونورت المدونة

Unknown يقول...

السلام عليكم ورحمة
الله تعالى وبركاته
احوال الهوى
وللهوى أحوال
لأ للاسف يافندم لا بيشفى غليلى بهبرة:) ولا بيريحنى من روايح هوبره كمان:)
وربنا يصلح حالنا ويغنيناعن الهبر:)
نورتنا وشرفتنا
للمرور والتعليق

Unknown يقول...

السلام عليكم ورحمة
الله تعالى وبركاته
HANY YASSIN
الله يخليك يارب
وكل لحظة وأنت
بالف خير وسلام
ياأستاذ هانى يارب

Unknown يقول...

السلام عليكم ورحمة
الله تعالى وبركاته
مها الغالية
الدنيا احلى مع اصدقاء مثلك يامها
اسعد الله ايامك ولياليك كلها يارب

Unknown يقول...

السلام عليكم ورحمة
الله تعالى وبركاته
أحمد بدر الدين
سلامتك من الخنقة يافندم! الف بعد الشر عنك يارب ! معلش اهو يوم بيجى فى السنة وربنا أمرنا بكده يبقى ده امر من الله وتعبنا فيه هو طاعة لله
سبحانه وتعالى.
وشكرا لدعواتك وربنا ينجحك فى دراستك وحياتك ويحقق لك ما تصبو اليه من خير.

Unknown يقول...

السلام عليكم ورحمة
الله تعالى وبركاته
Nour Shahen
صدعتى على القراءة!!! لأ تعالى واسمعى وشوفى الصداع على حقيقته كان ...الحمد لله خلص على خير والا الريحة يانور حاجة صعبة اوى!!
وايه منوفيايه دى؟انت عايزةتقومى علينا ثلاثة ارباع البلد اجدع ناس انا بقول اهوه :) ساعة الجد مليش دعوة بكى انتى حرة :) :) :)
نورتينا يانور
وما تحرمينا من
تكرار الزيارة

Unknown يقول...

السلام عليكم ورحمة
الله تعالى وبركاته
المستنصر بالله
الله يبارك فيكم
ولكم وعليكم يافندم
وكل لحظة وانت بالف خير

Unknown يقول...

أنا من كنت محتاجا
واغناك الله من فضله
الله يبارك فيك ياطبيب
وعقبال مانبارك لك على
شهادة البكالوريس قريبا يارب
لأ معلش نوراهاتى تانية لأ معلش
مانحبش التقليد ولا التكرار
انا ماليش نسخة تانية
الحمد لله رب العالمين

Unknown يقول...

السلام عليكم ورحمة
الله تعالى وبركاته
blue-wave
تصدق يادكتور !!
مأمأة وأوأوأة كمان !
وانا اللى بحب الهدوووووء
يلا الحمد لله على عطاياه
وشكرا ياطبيب وياشاعر
على المرور والتعليق كمان

Unknown يقول...

السلام عليكم ورحمة
الله تعالى وبركاته
ABUL_HASAN
الف شكر لحضرتك يافندم
وربنا يزيد الخير كمان
وكمان يارب للناس كلها
نورتنا بالمرور والتعليق

Unknown يقول...

السلام عليكم ورحمة
الله تعالى وبركاته
TiMmY
وكل لحظة وانت بالف
خير ياتيمى يارب يارب
ويطمنك ويفرحك ويريح بالك
من كل شىء وتاخد الاعفاء
من التجنيد كله قادر ياكريم
يااااااااااااااااااااااارب

Unknown يقول...

السلام عليكم ورحمة
الله تعالى وبركاته
romansy
وكل لحظة وانت بالف خير ياأستاذ احمد يارب ,لكن موضوع اشاهد الاضحية وقت الدبح بقى وشىء بطلته من زمن بعيد والله ياأستاذ احمد عارفة انها سنةّ عن النبى عليه افضل الصلاة والسلام لكن ما بقدر اشوف شىء بيندبح .ربنا يسامحنى
وتسلم يارب
ياأستاذ احمد
للمرور والتعليق

Unknown يقول...

السلام عليكم ورحمة
الله تعالى وبركاته
ونكمل بعد صلاة العصر
بأذن الله لو سمحتوا لى
وشكرا وتسلمولى يارب

Unknown يقول...

السلام عليكم ورحمة
الله تعالى وبركاته
سفروتة
الحمد لله (اتخطف صح )بس تالت يوم اصله ما كان هاين عليهم يدبحوه يظهر!!عشّرة بقى والعشرة ماتهونش الا على ابن الحرام:) :) :) .والله يبارك فيكى ياسكر وعقبال مانبارك لكى بالشهادة والبكالوريس عن قريب يارب يارب يارب
وكل لحظة وانتى بالف خير وسعادة

Unknown يقول...

لسلام عليكم ورحمة
الله تعالى وبركاته
Beram ElMasry
كل لحظة وانت والاسرة الكريمة بالف خير ياأستاذ بيرم يارب ونكون جميعا العام القادم من الواقفين على جبل عرفات ربنا يتقبل منك ومنا ومن المؤمنين جميعا صالح الاعمال والدعوات
نورتنا يااستاذ بيرم
ومرة تانية
كل سنه وانت طيب

Unknown يقول...

السلام عليكم ورحمة
الله تعالى وبركاته
رحيل
كل سنة وانتى طيبة يارب
ومعلش (حضرته) آنسنا يومين زيادة اصله
ما اندبح الا تالت يوم..شفتى الهنا:):)
وربنا يخليكى يارب وعقبال مانقول لكى مبروك ان شاء الله .
وتسلملى للمرور والتعليق.

Unknown يقول...

السلام عليكم ورحمة
الله تعالى وبركاته
هى فوضى
لألألألألألأ لألألأ!ربنا يخليكى
انا ما صدقت هو (سكت )
حتيجى لى انتى:) :) :):)
كل سنه وانتى بالف خير وامين
على كل دعواتك يارب يارب
نورتنا بالمرور والتعليق
وكل لحظة وانتى بالف خير

Unknown يقول...

السلام عليكم ورحمة
الله تعالى وبركاته
من غير عنوان
اولا :كل لحظة وانت بالف خير
وجميع من تودهم وبحبهم ويحبونك.
ثانيا :شكرا يافندم مديح كتير علىّ
ربنا خليك يارب (فرحت قلبى آلهى يفرح قلبك ياباشمهندس )
ثالثا:حاضر يافندم حاأبلغها الدعوة بتاعتك وعلى ما اعتقد تزغرد: لغة عربية .لأ الان انا متأكدة ياباشمهندس
هى تزغرد حسب المعجم الوجيز(شفتها لحضرتك فى الكتاب :)
والهجرة لسويسراامممممممم متهيالى بعيدة شويه خلينا هنا احسن:):)
ومرة تانية كل لحظة وحضرتك بالف خير

Unknown يقول...

السلام عليكم ورحمة
الله تعالى وبركاته
حسن حنفى
وكل سنة
وانت طيب
ياحسن وناجح
ياااااااااااارب
(روح ذاكر ياحسن )

Unknown يقول...

السلام عليكم ورحمة
الله تعالى وبركاته
نعكشة
موعودة صحيح أة بجد:) السنة اللى فاتت برضه واحدة قريبتى جت تحضر فرح بنت اختى (اللى هى ام ملك دى )المهم الضيفة ولدت عندى وقبل الميعاد باسبوعين يمكن وكانت(....)بالظبط زى ما قلتى ناس محظوظة :)
يلا الحمد لله ربنا بيسترها دايما معانا
وكل سنة وانتى بالف خير ويارب متجمعين كلنا وكل مشتاق على جبل عرفات العام القادم.....امين امين امين

Unknown يقول...

السلام عليكم ورحمة
الله تعالى وبركاته
المحارب المتيم
كل سنه وانت بالف خير
ياعرفة يارب ويطمنك على
كل عزيز لديك ويشفى
مرضانا ومرضى المسلمين اجمين
ويارب امين لكل دعواتك الطيبة

Unknown يقول...

السلام عليكم ورحمة
الله تعالى وبركاته
daktara
كل لحظة وانت طيب
وعيد سعيد عليك
نورتنا يادكتور خالد:)

Unknown يقول...

السلام عليكم ورحمة
الله تعالى وبركاته
حاول تفتكرنى
وكل لحظة وانت بالف خير
تحياتى واحتراماتى يافندم

Unknown يقول...

السلام عليكم ورحم
الله تعالى وبركاته
M.K
كل عام وانتى واهل الامارات
بالف خير وفى ازدهار دائم يارب
وجزاكى الله خيرا على دعواتك الطيبة
جعل الله لك مثلها واكثر يارب
وتشكراتى للمرور والتعليق

Unknown يقول...

السلام عليكم ورحمة
الله تعالى وبركاته
Dr.Invisible
الله يخليك يارب
ويبارك فيك ولك
ويشفى مرضى المسلمين اجمعين
وكل لحظة وانت بالف خير

Unknown يقول...

السلام عليكم ورحمة
الله تعالى وبركاته
شخابيط محجوب
وكل لحظة وانت
بالف خير يارب وبصحيح
اعجبتك المدونة؟؟شكرا
كتيررررررررررررررر
احتراماتى يافندم.

Unknown يقول...

السلام عليكم ورحمة
الله تعالى وبركاته
tarek alghnam
سبحان الله ياأستاذ طارق
فالله سبحانه وتعالى ارحم علينا من أنفسنا ولم يرضى بان يقاسى كل ابن او كل اب بعد ذلك (وفديناهبذبح عظيم)
اللهم ارحمنا ياأرحم الراحمين
واحتراماتى للمرور والتعليق

Unknown يقول...

السلام عليكم ورحمة
الله تعالى وبركاته
انت تسال والكومبيوتر يجيب
شكراًللدعوة يافندم لكن وقت اذاعة البرنامج هو نفسه وقت الذروة لعاملين والطلبه فيما اعتقد على الاقل هذا ماهو حادث عندى فارجو ان كان فى الامكان ابداله بموعد اكثر ملائمة
وشكرا

Unknown يقول...

السلام عليكم ورحمة
الله تعالى وبركاته
DR.HAMAS
كل عام واهالينا فى الوطن العربى والاسلامى بالف خير يارب اللهم ابدل خوفهم أمنا واحزانهم فرحا وكفاحهم عزيمة ونصرا اللهم امين .امين
واحتراماتى للمرور والتعليق

Unknown يقول...

السلام عليكم ورحمة
الله تعالى وبركاته
Hina wi Hinak
وكل لحظة وانت بالف خير يافندم
وشكرا لتمنياتك الطيبة وعمر التحية
ما تكون متأخرة مادامت قد جاءت!!
احتراماتى للمرور والتعليق

Unknown يقول...

السلام عليكم ورحمة
الله تعالى وبركاته
أحمد بدر الدين
كل لحظة وانت بخير
وتقبل الله من الجميع

Unknown يقول...

السلام عليكم ورحمة
الله تعالى وبركاته
habiba
كان المفروض انا كنت خدت جارنا وقلت له على الفكرة العبقرية بتاعة الدبح فى المزرعة أكيد زوجته كانت حترحب بالفكرة لان مفيش حدغاوى تعب لكن يلا
اهو العيد عدى على خير الحمد لله وعمرى ماأزعل منك ياحبيبة اللى منى قريبة
وزى مابقول بدال وصلت التهنئة يبقى ماتأخرت .كل لحظة وانتى بالف خير.

Unknown يقول...

السلام عليكم ورحمة
الله تعالى وبركاته
kochia
وكل سنة وانتى بالف خير
أممممممممممممممممممممم
(`'·.¸ (`'·.¸*¤* ¸.·'´) ¸.·'´)
♥*** happy feast ***♥
(¸.·'´ (¸.·'´*¤* `'·.¸) `'·.¸)

Unknown يقول...

السلام عليكم ورحمة
الله تعالى وبركاته
أستاذة وفاء بركات
ربنا يخليكى لى يارب وما اتحرم من دعواتك الجميلة وادينا بقى عندنا عروسة لاحمد حفيدك ماتدوروش بعيد
ربنا يطمنك على اولادك يارب وتفرحى بيهم .الخروف ماتفكرنيش ياأستاذة
ايام صعبة فاتت ولا ريحته ......اف
ونورتينا ياأستاذة وكل لحظة وانت بالف خير

Unknown يقول...

السلام عليكم ورحمة
الله تعالى وبركاته
م/الحسينى لزومى
تقبل الله منا ومنكم يافندم
وكل عام وحضرتك بالف خير

Unknown يقول...

السلام عليكم ورحمة
الله تعالى وبركاته
صابر وراضى
كل سنة وساعة وانت بخير ياصابر
وادينا احنا كمان بقى عندنا نونو صغير زى بنت اخوك( تنسيم) ربنا يخليها يارب والحمد لله المأمأة خلصت أما الواء
ؤاؤاة لسه شوية لما يسافروا بلدهم
ومتشكريين للمرور التعليق اللطيف

Unknown يقول...

السلام عليكم ورحمة
الله تعالى وبركاته
saregebaly
الحمد لله ياسارة ان حكاية الخروف دىمابتجيش الا مرة واحدة فى السنة والا كنت عملت بنصيحة الباشمهندس محمد البنا (مدونة من غير عنوان) وهاجرت سويسرا!!.
وكل سنه وانتى ومن تعزين وتحبين بالف خير.

Unknown يقول...

السلام عليكم ورحمة
الله تعالى وبركاته
أستاذة وفاء بركات
معلش على التاخير
اصلى كنت بشرب الموغات
على رووووووووووواقة
وعيونى لكى فى كل اللى
تطلبيه دااحنا حبايب
واخوووووووووووووووات
والجديد اهوه نزل سمعينا
تعلقاتك الحلوة بقى

Unknown يقول...

السلام عليكم ورحمة
الله تعالى وبركاته
Dr.Wael
معلش احنا اصحاب وكل حاجة:) بس معلش نراجع: قولتلى 1000 للننه الصغننة
+1000 للعيد+500 للخروف 500 زيادة=3000مبروك !!!صح مضبوط يبقى لحضرتك عندنا 3000مبروك يوم التخرج إن شاء الله تعالىوكل لحظةوانت بالف خير يارب:)

Unknown يقول...

السلام عليكم ورحمة
الله تعالى وبركاته
mohamed ghalia
الحمد لله يافندم
اندبح دبحآ فهو مدبوح
والله يبارك فيك يارب
وكل لحظةوانت بالف خير

Unknown يقول...

السلام عليكم ورحمة
الله تعالى وبركاته
واحدة مفروسة
كل لحظة وانتى بالف خير
والله يبارك فيكى
ولكى وعليكى

Unknown يقول...

السلام عليكم ورحمة
الله تعالى وبركاته
رومانسى مشلكس
عجبتك التدوينة؟
طيب الحمد لله يارب على طول
كده لاجل ما نشوفك
دايما يافنان
احتراماتى

Unknown يقول...

السلام عليكم ورحمة
الله تعالى وبركاته
SemSem
كل سنةوانت ومن تهتم
بهم بالف خيروالمسلمين
اجمعين يارب العالمين.
نورتنا للمرور والتعليق

Unknown يقول...

السلام عليكم ورحمة الله تعالى وبركاته
سفروته
شكرا لسؤالك ياجميلة
واهتمامك بأصدقائك
ومعلش انت عارفة الظروف
وادينى جيت الحمد لله .

Unknown يقول...

السلام عليكم ورحمة
الله تعالى وبركاته
خلااااااااااااااااااااااص
الاجاااااااااااااااازة خلصت
ورااااااااااااااااااااااجعين
للشغل تاااااااااااااااااااانى
ربنا يقوينا ياااااااااااااارب
ويصبرنا لحد الاجازة الجاااااااااية
يوم ااااااااااااااااااااا.االجمعة

مصطفى محمود يقول...

ماءماءه
وزغاريد
دا ايه الهنا دا كله
:))

أنا مش بقر

بس جاي اقول بس عيدكم مبارك وكل سنة وانتوا طيبيين

وتتربى الامورة ملك في عزكم يارب :))

اذا حبيتوا تدورا على عريس أنا موجود ورقبتي سدادة إن شاء الله :))
بس انتو انوا بس

يلا سلام

Unknown يقول...

السلام عليكم ورحمة
الله تعالى وبركاته
TeVa
كل سنه وانت طيب
يامهندز وإن شاء الله
نبارك لحضرتك قريبا على الشهادة
لكن حكاية انك عريس لملك دى شوية:( صعبة اصل لازم ناخد رايها مش كده ولا ايه؟وهى حاليا مابتتكلمش بتؤؤؤؤبس
وساعات بردون كمان (بتجعر)اه بصحيح! ولا الكونترباص بتاع الفرقة الموسيقية !

غير معرف يقول...

~.....................................................

غير معرف يقول...

~.....................................................