الثلاثاء، مايو 05، 2009

..... بيللا بيللا......من أعاجيب شارعنا .......بيللا بيللا




عايزة احكى عن حاجة حصلت بشارعنا




المهم انها حكاية حقيقية بصحيح




عن بنت الناس اللى على اول الناصية




اللى ساكنين ب(شبة ناطحة السحاب بتاعتهم)




ناس مقتدريين وعلى مستوى





ابوهم مقاول ياسيدى






وعنده شركة مقاولات كبيرة





(اه طبعاً امال عربية كشرى يعنى )




المهم البنت كان عندها بردون كلبة لولو




جميلةاوى اسمها بللا




اسم على مسمى صحيح




كانت بتنزل تفسحها كل يوم




و(اتفسحى يازكزوكا اتفسحى يابكبوكا)




على رأى مارى منيب




البنت انشغلت فى امتحانات الثانوية العامة




ومابقتش فاضية لبلللا تفسحها




بس بللا دى روح ولازم تتفسح






ادوها ياسيدى لحارس الجراج بتاعهم








يفسحها ويمشيها كل يوم





شوية ادام البيت



وفعلا عم بخاتى بقى كل يوم يقوم بالمهمة على خير وجه




البنت خلصت امتحان ورجعت تفسح هى بللا



بس لقيت كده حالتها متغيرة



ومش زى عوايدها



ودوها للدكتور البيطرى




(مبروك المدام حامل قصدى الكلبة حامل)




الدنيا هاجت وماجت




وحاولوا يعرفوا مين




(ال... ابن ال....)




اللى عمل العَمله السودا دى!!!)




لكن ماعرفوش




لكن عرفوا وللاسف يرفتوا عم بخاتى من الشغلانة




اللى كان بيسترزق منها وعملوا




(اجهاض)للانسة (بللا) وكمان سافرت




فرنسا هى وصاحبتها




لاجل ما تسترد عافيتها




المهم الايام دارت وقابلت




مرة عم بخاتى ده فى الشارع




ازيك وعامل ايه وكده ؟




حكى لى او قالى كلمة ما أنساهاش




0شفتى ياست الدكتورة





لامؤاخذة الكلبة اثبتت وانا اترفدت




اثبتت ازاى يعنى ياعم؟




مش سفروها بره




يعنى عملوا لها باسبور




باسمها وسنها وطعموها من الامراض




اما انا العامل الاجير اللى باليومية فطردونى





الحقيقة ماعرفتش ارد عليه




الا بكلمتين أطيب خاطره واللى فيه القسمة.




وكم فيكى يامصر من المضحكات المبكيات.




........
حكاية حقيقية حصلت فى شارعنا العامر






اللى بقى ولا (لندن) فى تنوع سكانه




او زى مابيقولوا حدائق بابل




من الاعاجيب اللى فيه.


.....................................






هناك 39 تعليقًا:

على عبدالله يقول...

السلام عليكم

كيف حالك يا دكتورة
القصة تحزن بجد
لكن انا لى سؤال
هو شارعكم دا اسمه ايه ؟!
:)
موجود فى مصر يعنى ؟!

Unknown يقول...

السلام عليكم ورحمة
الله تعالى وبركاته
استاذ على عبدالله
عندنا ياالف مرحبا
الحمد لله نحن بخير والحمدلله
وشارعنا موجود فى الجيزة
اللى هى فى جمهورية مصر
العربية على ايدك الشمال
وانت راجع من السعودية برىّ:)

د. ياسر عمر عبد الفتاح يقول...

طيب نضحك ولا نزعل ولا نعمل إيه
بقي ده كلام
يعني الكلبة تقطع عيش الراجل

ربنا يسامحهم

salma mohamed يقول...

هم يضحك وهم يبكي,
بجد حسبي الله ونعم الوكيل الكلاب بقت اهم من البشر,
الناس بقت غريبة فعلا!!!

Unknown يقول...

السلام عليكم ورحمة
الله تعالى وبركاته
د.ياسر عمر عبد الفتاح
وللاسف يافندم هذا ما حدث!
اعتبروه مقصر فى حق وظيفته:(
وفصلوه من غير شفقة ولا رحمة:(.

Unknown يقول...

السلام عليكم ورحمة
الله تعالى وبركاته
Salma Mohamed
للاسف والالم عند بعض الناس
الكلام ده مضبوط ومطبق جداً

رحلتنا في الحياة يقول...

السلام عليكم يادكتورة قصة مضحكة ومبكية من حكاوى مصر المحروسة
مهما راحت ولا جت دى كلبة بنت ....
حسبنا الله ونعمة الوكيل

من غير عنـــوان يقول...

شر البلية ما يضحك

واللي يعيش ياما يشوف


تحياتي

وحي القلم يقول...

السلام عليكم
ايه يادكتورة ده
حقد طبقي ولاحاجة ربنا يزيدهم كمان وكمان
وعقبالنا يارب
تقبلي مروري

جنّي يقول...

السلام عليكم

بقى يا جماعة عايزين كلبة لولو بكل الرقة والرفاهية تبقى زي عم بخاتي دا كفاية اسمه بخاتي .. احنا في عهد العولمة وحقوق الكلاب قصدي الانسان اللي كان انسان وطيب يا صبر طيب ..

Gannah يقول...

هى دى يا دكتورة الناس اللى بتدعى التمدن والتحضر وتنادى بالمحافظة على حقوق الحيوان وناسية ان الانسان أيضا له حقوق سواء كان فقيرا أو غنيا
حسبى الله ونعم الوكيل
انت عندك حق
مصر بلد العجايب
كلها مش شارعكم بس
يارب تكونى بخير
تحياتى

د/عرفه يقول...

كيفك دكتورة

وبعدين ده حظ الكلب بقى
ظروفه كده
بجد دنيتنا دى غريبة اوى

بس انا مقتنع بشىء الانسان لو قعد يبص للى حواليه هيتعب كتير
وكل يوم هيتألم بزيادة
لازم الواحد يغض الطرف عن الناس والكلاب برضه
ههههههههههههه

مسدس صغير يقول...

ههههههههههههههههههههههههههههههههههههههههههههههههههههههههه
انتى شفتى المثل الجزائرى اللى بيقول ياللى رايح مصر فيه منك الف؟؟
ههههههه
فرنسا؟؟؟
حتة وحدة؟
يالهوى
حاجة مش تحزن لا بالعكس حاجة تفرح.
ههههههههههههههه

مسدس صغير يقول...

بس الراجل غلطان ازاى كلب ابن كلب يتحرش بيها وميقولش لأهلها؟؟
متجيش يعنى.
هههههههه
كفاية كده احسن اضرب نار فى نفسى.

عمرو يقول...

كويس أنها جات على رفد عم نجاتى و لم يتهموه بأنه الفاعل :))
الظلم يوم القيامه ظلمات و أرى أنه الظلم أستشرى و أنتشر و بقى هو الوضع الطبيعى و أتوقع غضب من الله قريب اٍن شاء الله ..
تقبلى تقديرى ..

حماده زيدان يقول...

جروب جريدة الصباح العربي بيت المدّونين العرب
http://www.facebook.com/group.php?gid=78080770039#/group.php?gid=78080770039

jonoon 3aqel يقول...

السلام عليكم

يا سبحان الله..

يعني طيب..أنا مع ان الحيوان روح..و مش المفروض يتساب يموت..و لو هو موجود ف بيت ف المفروض يعتنوا الاهل بيه..الخ الخ الخ...
لكن في النهاية..دا حيوان أجلكم الله..
يعني يترفد انسان..و يتقطع اكل عيشه هو و اسرته..
و يا عالم يلقى و لا ما يلقاش شغل..

عشان الست..حملت...!!!!!!
طيب ما كانوا ينبهوه الاول..


الله المستعان..
حقا غرائب..
لكن الواحد يعمل ايه..
الله يوفقه لشغلانه تسد حاجته..و تغنيه عن سؤال الناس..يارب دا وراه اسره..
و ربنا مايسلطش عليه بللا و لا اهلها...


مسكوا ال ... ابن ال .... اللي عمل كده؟
هههههههههههههههه

اقولها مرة اخرى....شر البليه مايضحك..

دمتي بخير و طاعه و راحة و رضى من الرحمن..

تحياتي

Unknown يقول...

السلام عليكم ورحمة
الله تعالى وبركاته
أيوشة
معلش ياشوشو
بلدنا وناسنا
نعمل ايه بقى؟

Unknown يقول...

السلام عليكم ورحمة
الله تعالى وبركاته
من غير عنوان
من ده كتير ياباشمهندس
ماتعدش يافندم.
احتراماتى

Unknown يقول...

السلام عليكم ورحمة
الله تعالى وبركاته
مصعب صلاح
لأ ما تخافش
مش حقد طبقى
لكن تعجب من احوال
بلدنا والشارع بتاعنا!

Unknown يقول...

السلام عليكم ورحمة
الله تعالى وبركاته
جنّى
كانت بتركب المرسيدس
والشوفير يفتح لها الباب
تقوم نطة قاعدة ورا ولا الملكة!
وبعدين مش ذنبه اسمه:ذنب اللى سموه!

Unknown يقول...

السلام عليكم ورحمة
الله تعالى وبركاته
Gannah
اهلا اهلا يادكتورة
قلقتينا عليكِ بجد.
عارفة شارعنا لو وقفتى
فيه شوية تستغربى وتسألنى نفسك
انت فين؟انتى امتى؟انتى مين؟
نورتينا دكتورة وما
تغبيش علينا
منتظرينك

Unknown يقول...

السلام عليكم ورحمة
الله تعالى وبركاته
د/عرفه
بغض الطرف كتير
لكن لما تلاقى بيللا هانم:)
راكبة زى ما قلت للاستاذ
جنى كده المرسيدس وقاعدة ورا
وايه الشوفير بيفتح لها الباب:(
تتغاظ ولا لأ؟رد انت بقى!

Unknown يقول...

السلام عليكم ورحمة
الله تعالى وبركاته
مسدس صغير
ايوة رحلة استجمام ونقاهة
اصل خالتها لأياسيدى مش خالة
بللا:) خالة الانسة بنتهم عايشة
هناك وكل شوية بيروحوا يزوروها:(
واحنا مش عافين نروح دريم لاند حتى:(

Unknown يقول...

السلام عليكم ورحمة
الله تعالى وبركاته
مسدس صغير
ماهم قالوا كده
انه اهمل فى اداء
واجبات وظيفته:(!
وسلامتك من ضرب النار

Unknown يقول...

السلام عليكم ورحمة
الله تعالى وبركاته
أستاذ/عمرو بدر
الف مليون حمدلله على السلامة
من العيساوية والصعيد
وحشتناااا كتيرررررر
ربنا يرحمنا ويسامحنا
امين يارب العالمين

Unknown يقول...

السلام عليكم ورحمة
الله تعالى وبركاته
hamada
ُعلم ونُفذ
بس اصل الفيس بوك
ده صراحة ما بحبوشششش

Unknown يقول...

السلام عليكم ورحمة
الله تعالى وبركاته
jonoon 3aqel
ماهو بقولك اعتبروه
اهمل فى اداء وظيفته
(حماية بيللا من الاشرار
العساريت العفاريت)!
ربنا يتولاه ويرحمنا
اللهم أمين يارب العالمين.

الربان يقول...

تحياتي يادكتورة

هكذا الدنيا...احوالها غريبة...لكن لو
دققنا قليلا لعرفنا ان الانسة صاحبة الكلبة بيلا...و اسرتها هم في ابتلاء من الله....المال ابتلاء وهم كبير سنسأل عنه
كيف اكتسبناه و فيما انفقناه....

الحمد لله علي ما منحنا...و الحمد لله علي ما حرمنا....لك الحمد ياربنا في كل وقت وحين.


تحياتي و تقديري

MaNoO يقول...

ههههههههههه والله العظيم مصر دى دائما مختلفة كل الجديد عندنا هو دا التميز ياجماعةدى سمة الكبار دائما
انتى قلتى شارعكم دا وانتى راجعة من السعودية برى على اليمين صح
مالمنطقة دى كلها من هاى ماى فاى ياسيدتى لازم تكون الكلاب عندهم اهم من البنى ادمين
مش عارف اقولك ايه
وحشتنى مصر بتاع زمان أوى ربنا يرجعهلنا بالسلامة

أم أحمد المصرية يقول...

وجعتي نفسويتي يا نوراهاتي و انا عندي امتحان بكرة
الله يوريني يوم في كلبتهم س ابقي افتكري تحكي لي
واضح ان شارعكم نموذج معبر عن مصر و لا عزاء لعم بخاتي

المعتصم يقول...

بسم الله الرحمن الرحيم
السلام عليكم ورحمة الله وبركاته
ازيك يادكتورة
يارب تكونى بخير
معلش يعنى اعذرينى
مش هقدر اعلق على البوست ده
اصل انا بعيد عنك عندى الضغط
ومش ناقص غيظ علشان مايعلاش
وكويس انك قولتى على عنوان شارعكم علشان مااعديش من هناك تانى لما اروح الجيزة
تحياتى ودمتِ بكل خير وود
والسلام عليكم ورحمة الله وبركاته

حقى اهرتل يقول...

لازم نعمل فى الفتره الجايه جمعيات للرفق بالانسان

Ahmed يقول...

ياسلااااااااااااااااااام
ماهوا الواحد اصله ناقص ضغط عالي

ايه ده بأه ان شاء الله

طيب الله يكرمك عندي جماعه أصحابي هيموتوا ويشتغلوا بره, شوفلهم واسطه كده يشتغلوا كلاب عند الناس دول يمكن في يوم من الأيام يسفروهم ان شالله حتى للصومال

ده اسمه سفه

Dr Ahmed Said@Black Armor يقول...

مش عارف اقول ايه
الموضوع لا يحتاج الى تعليق اكتر من كلام البواب نفسه
دمتى بخير

عمرو يقول...

الله يسلمك و متشكر جدا و بالمناسبه الكليبات كلها تحت أمرك أتفضلى خدى منها اللى يعجبك بس لسه فيه كليبات حأنزلها و حتبقى مفاجأه لأنها حصريه جدا
بأشكرك تانى يا دكتوره و تقبلى تقديرى

القدر و انا يقول...

نورهاتى
كتبت فعلا البوست الضاحك الباكى
لعن الله اصحاب تلك القلوب عديمة الرحمة
التى لا تهتم لالام البشر .. ولا تكرمهم مما اكرمهم به الله
تحياتى وتقبلى مرورى

romansy يقول...

اهلا يا دكتوره
اخبارك ايه
مش عارف ايه اللى بيحصل فى مصر بس دا لاسف حال الدنيا ناس نفسها تمضى فى ميعادها
وناس مش واخده فى بالها حاجه
بس بينى وبينك الكلبه شكلها حلو قوى تستاهل تتفسح

وفاء بركات يقول...

السلام عليكم
هههههههههههه إهئ إهئ إهئ
بس خلاص
شريكة إبن خالتي بتبعت تجيب الأكل لكلبتها بالطياره ابن خالتي اكل الكلبه
بسكوت مصرى جالها نازله معويه وشريكته خصمته علشان كان هيموتها.
ليكم رب يا أطفال الشوارع
بس ياختي كفايه كده علشان الواحد قلقس
من العالم ده